Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Ñemañaha  |  Marzo de 2013

 TEMBIASAKUE

“Ahecha, péro nahesakãi chéve”

“Ahecha, péro nahesakãi chéve”

Áño 1975-pe arekórõ guare dos áño, che sy ohechakuaa cherehe peteĩ mbaʼe. Iñamígagui hoʼa peteĩ mbaʼe yvýpe ha tyapu ojapo, péro che ni nacheresapirĩri. Arekóma tres áño ha nañeʼẽi gueteri. Upéi umi doktór heʼi che hentekuérape nahenduiha.

Chemitãme, che sy ha che ru ojedivorsia. Upéicha rupi ore sýnte oremongakuaa. Upe tiémpope Fránciape, umi mitã ohenduʼỹvape noñehekomboʼéi koʼág̃a ojejapoháicha, ipyʼa hatãiterei hikuái orendive. Upéicharamo jepe, chemitã guive areko peteĩ mbaʼe ndoguerekóiva heta che rapicha ohenduʼỹva. Amombeʼúta peẽme mbaʼépa upéva.

Arekórõ guare cinco áño rupi

Peteĩ tiémpore, heta mboʼehára heʼi umi mitã ohenduʼỹvape oñehekomboʼe vaʼerãha oñeʼẽ hag̃ua ha omañávo umi oñeʼẽva jurúre ontende hag̃ua mbaʼépa heʼi. Fránciape, pe tetã akakuaa haguépe, ojeproivi vaʼekue oñeñeʼẽ séñape eskuélape. Sapyʼánte klásepe oñapytĩ hikuái ipo ijatukupe gotyo umi oñeʼẽsévagui séñape.

Chemitãme órare chemboʼémi vaʼerã peteĩ doktóra añeʼẽ hag̃ua ha amañávo umi hénte jurúre oñeʼẽ jave antende hag̃ua mbaʼépa heʼi. Chejagarrámi hikuái cherañykã térã che akãgui ha che jopy haʼe hag̃ua umi mbaʼe che ni nahendúiva. Hasyeterei vaʼekue chéve añekomunika hag̃ua umi ótro mitã ndive ha heta ahasa asy.

Arekópe seis áño, chemondo hikuái peteĩ eskuéla oĩvape umi sórdope g̃uarã. Primera ves aime umi cheichagua apytépe. Péro upépe ojeproivi avei oñeñeʼẽ séñape klásepe ha rejapo sapyʼáramo ne akãraguetira térã ndepopete hikuái. Upéicharõ jepe, rosegi roñekomunika ñemiháme ore roikuaahaichaite. Péicha hasy peve añemongeta che rapichakuérandi ha avyʼaiterei upévare.

Péro arekórõ guare 10 áño cheguerova hikuái ótro eskuélape, koʼág̃a aha umi mitã ohendu porãva oikehápe. ¡Upéva chereja vaieterei! Haʼete chéve che añoiténte nahendúiva ko múndope. Umi doktór heʼi che hentekuérape ani hag̃ua oñeʼẽ chéve séñape ikatúgui cheresaraipa pe doktóra chemboʼe vaʼekuégui añeʼẽ hag̃ua. Upévare che hentekuéra noaprendéi séña oñeʼẽ hag̃ua chéve ha ndohejái hikuái ajeheʼa umi mitã ohenduʼỹvare. Koʼág̃a peve chemanduʼa ahárõ guare peteĩ doktór oñatendévape umi ohenduʼỹvare ha ahecha imesa ári peteĩ lívro oĩva lenguáhe de séñape ha aapuntávo hese haʼe: “¡Che aipota péva!”. Ha pe  doktór pyaʼeterei ojagarra ha oñongatu upégui pe lívro. *

AÑEPYRŨ AAPRENDE LA BIBLIA OMBOʼÉVA

Che sy oñehaʼã vaʼekue oremboʼe la Biblia. Oreguerahámi rreunionhápe testígo de Jehová kongregasión oĩvape Mérignacpe, opytáva ag̃uiete táva Burdeosgui. Saʼi antende upépe ojeʼéva, péro oĩ vaʼekue heta ojopyrúva oguapy hag̃ua che ykére ha omyesakã chéve umi mbaʼe ojeʼéva. Opokoiterei cherehe mbaʼéichapa cherayhu ha ojepyʼapy cherehe hikuái. Ógape astudiámi la Biblia che sy ndive, péro nantendepái pe chemboʼéva. Añeñandu proféta Daniel heʼi haguéicha, peteĩ ánhel omombeʼúrõ guare chupe peteĩ profesía, haʼe heʼi: “Ahendúramo jepe upe heʼíva, nahesakãi chéve mbaʼeve” (Daniel 12:8). Che katu haʼe: “Ahecha, péro nahesakãi chéve”.

Upéicharõ jepe, umi mbaʼe aikuaáva la Bíbliagui opoko che korasõre. Amombaʼeterei umi mbaʼe aaprendéva ha añehaʼã ajapo. Heta mbaʼe aaprende avei amañávo che rapicha ojapóvare. Por ehémplo, la Biblia ñanemboʼe ñanepasiénsia hag̃ua (Santiago 5:7, 8). Che katu nantendéi mbaʼépa heʼise upéva, péro ahechávo mbaʼéichapa ermanokuéra ohechauka ipasiensiaha, antende sapyʼa. Ndaʼereíri upe kongregasión tuichaiterei chepytyvõ hague.

AHASA PETEĨ MBAʼE IJETUʼÚVA HA UPÉI OIKO PETEĨ MBAʼE CHEMBOVYʼÁVA

Stéphane chepytyvõ antende hag̃ua la Biblia

Peteĩ árape ahecha kállere ótro mitãrusukuérape oñemongeta hína séñape. Ñemiháme añepyrũ ajeheʼa hesekuéra ha aaprende lenguáhe de séña francés, péro asegi aha rreunionhápe Salón del Réinope. Oĩ vaʼekue peteĩ mitãrusu testígo de Jehová hérava Stéphane ha ojapóva opa ikatúva chepytyvõ ha oñemongeta hag̃ua chendive, upéicha rupi ajepokuaaiterei hese. Péro oiko peteĩ mbaʼe ambyasyetereíva, Stéphanepe ojegueraha préso ndohoséi haguére kuartélpe. Apytavaieterei upe haguére, aju che kangy, ndavyʼavéi ha sapyʼa mimíntema aha rreunionhápe.

Upéi 11 mése haguépe ojepoi Stéphanegui ha ou jey hógape. Ni ndagueroviaséi haʼe oñepyrũvo oñeʼẽ chéve séñape. Haʼe oaprende raʼe upe idióma kárselpe. Ahechávo umi hésto ha séña ojapóva, avyʼaitereivéntema aikuaágui mbaʼépa heʼise umíva.

ANTENDE PORÃ SAPYʼA LA BIBLIA OMBOʼÉVA

Añepyrũ astudia la Biblia Stéphane ndive. Ha upe guive umi mbaʼe aikuaáma vaʼekue la Bíbliagui hesakã porãve chéve. Chemitãme aguerohoryetereími umi taʼanga osẽva ñane puvlikasionkuérape ha añehaʼã aikuaa mbaʼéichapa héra umi oĩva upépe ha amemorisa umi istória. Che aikuaa vaʼekue mávapa Abrahán, mávapa pe “ñemoñare” ha avei umi “aty guasu”. Péro tuichaiterei antendeve oñemyesakã rire chéve séñape umi mbaʼe (Génesis 22:15-18; Revelación [Apocalipsis] 7:9). Péicha ahechakuaa atopaha sapyʼa pe idióma che antendéva ha opokóva che korasõre.

Koʼág̃a antendevévo umi mbaʼe oñemboʼéva rreunionhápe, opoko pe che korasõ mbytetére ha aaprendeseve voi heta mbaʼe. Stéphane chepytyvõ antende porãve hag̃ua la Biblia omboʼéva, upéicha rupi 1992-pe añemeʼẽ Ñandejára Jehovápe ha ajevautisa. Ahupytýramo jepe heta mbaʼe porã, asegi gueteri cheotĩ ha chekirirĩ yma chemitãme ojeproivi rupi chehegui añeʼẽ séñape.

AÑEHAʼÃ ANIVE HAG̃UA CHEOTĨETEREI

Aha peteĩ grúpo de lenguáhe de séñape, ha tiémpo rire enterove sórdo roiméva upe grúpope, rohasa peteĩ kongregasión oĩvape Pessac,  várrio Burdeospe. Upéva tuichaiterei chepytyvõ añakãrapuʼãve hag̃ua Ñandejára servísiope. Upérõ ndachekatupyrypái gueteri añemongeta hag̃ua umi ermáno ndive, péro umi che amígo ohendu porãva chepytyvõ antende porã hag̃ua opa mbaʼe ojeʼéva chéve. Gilles ha hembireko Elodie ojapo vaʼekue opa ikatúva oñemongeta hag̃ua chendive. Pyʼỹinte rreunión rire cheinvitámi hikuái hógape rokaru téra roʼu hag̃ua kafe, ha upéicha rupi ajepokuaaiterei hesekuéra, che amigoite hikuái. ¡Igustoite ningo ñaime umi ñande rapicha oñehaʼãva ndive oguata Ñandejára ñanderayhuetéva rapére!

Che rembireko Vanessa tuicha chepytyvõ

Upe kongregasiónpe aikuaa kuri peteĩ kuñataĩ ijukyetereívape, hérava Vanessa. Aguerohoryeterei mbaʼéichapa oporohayhukuaa ha hekojoja. Haʼe arakaʼeve nopensáiva cherehe chedefektuosoha síno ikatuha heta mbaʼe oaprende chehegui. Ajegustaite voi Vanessa rehe ha romenda áño 2005-pe. Che ningo cheotĩeterei añemongeta hag̃ua che rapichakuéra ndive, péro che rembireko tuicháma chepytyvõ ambohovái hag̃ua upéva. Che pyʼaite guive aagradese chupe akóinte chemokyreʼỹ ha chepytyvõ haguére akumpli porã hag̃ua che rembiapo.

AMBUE RREGÁLO OMEʼẼVA ORÉVE JEHOVÁ

Áño 2005-pe romenda rire, testígo de Jehová sukursál oĩva Francia, Louvierspe, cheinvita aservi hag̃ua upépe un mes ha chembokatupyry hikuái atradusi hag̃ua. Upe tiémpope, pe sukursálpe ojejapo heta DVD lenguáhe de séña francéspe; ha hetaiterei gueteri oĩ ojejapo vaʼerã ha umi traduktór oikotevẽterei oipytyvõ vaʼerã chupekuéra.

Ajapo jave diskúrso lenguáhe de séña francéspe

Vanessa ha che rovyʼaiterei Jehová chejokuái haguére aipytyvõ hag̃ua upe sukursálpe. Upéicharamo jepe rojepyʼapy mbaʼépa oikóta pe grúpo de lenguáhe de séñagui, mbaʼépa rojapóta ore rógagui ha ojuhútapa Vanessa itravahorã. Péro romombaʼeterei rohechávo mbaʼéichapa Jehová orepytyvõ rosolusiona hag̃ua koʼã mbaʼe. Che rembireko ha che rohecha mbaʼéichapa Jehová ore rayhu oréve ha entéro ohenduʼỹvape.

AVYʼA ASERVI HAGUÉRE ÑANDEJÁRA ORGANISASIÓNPE

Ambaʼapo rire Departaménto de Traduksiónpe ahechakuaave iñimportanteha ñaipytyvõ umi ohenduʼỹvape oikuaa porã hag̃ua Jehovápe. Chepyʼarory ahechávo mbaʼéichapa umi ermáno oñehaʼã oaprende michĩmi jepe séña oñekomunika hag̃ua chendive. Ni mbaʼevéicharõ nañeñandúi cheaño ni chemboykeha hikuái. Koʼã mbaʼe ohechauka chéve mbaʼéichapa ojeiko peteĩ ñeʼẽme Jehová organisasiónpe (Salmo 133:1).

Departaménto de Traduksiónpe Betélpe

Che pyʼaite guive aagradese Jehovápe akóinte oĩ haguére ermáno chepytyvõva. Avyʼaiterei avei ikatu haguére aipytyvõ michĩmi jepe umi ohenduʼỹva oikuaa hag̃ua ñande Apohare ñanderayhuetévape ha oñemoag̃ui hag̃ua hese. Hiʼãitereíma chéve og̃uahẽ pe ára opa hag̃ua umi mbaʼe ñandejokóva ñañekomunika porã hag̃ua, ha enterove tañañeʼẽ “peteĩ ñeʼẽme” Jehová ha hembipota rehe peteĩ famíliaicha (Sofonías 3:9).

^ párr. 9 Áño 1991-pe ae pe goviérno francés opermiti oñemboʼe séñape umi mitã ohenduʼỹvape.