Ehecha oĩva pype

Ehecha oĩva pype

 TUVAKUÉRA OMBOʼE HAG̃UA IFAMÍLIAPE

Pedro ha Ananías ijapu. ¿Mbaʼépa ñanemboʼe?

Pedro ha Ananías ijapu. ¿Mbaʼépa ñanemboʼe?

Peteĩ ijapúva ningo oikuaa porã ndahaʼeiha añetegua upe heʼíva. ¿Ndépa ndejapúmava avei? *... Oĩ voi kakuaa ohayhúva Ñandejárape jepe ijapúva. Por ehémplo la Bíbliape oñeñeʼẽ peteĩ kuimbaʼe ijapu vaʼekuére ha oime vaʼerã reikuaa hína mávapa. Upéva hína Pedro, haʼe Jesús apóstol vaʼekue. ¿Reikuaasépa mbaʼérepa ijapu? Jahechamína.

Ojejagarrárõ guare Jesúspe, ojegueraha chupe umi saserdóte ruvicha rógape. Upéi de madrugádama Pedro oike upe óga korapýpe avave oikuaaʼỹre chupe ha oguapy peteĩ tataypýpe ojepeʼe. Upéi pe sirviénta oavri vaʼekue chupe pe portón ohechávo chupe pe tata ohesapevehápe heʼi: “¡Nde avei reime kuri Jesús Galileagua ndive!”. Upépe Pedro oñemondýi ha heʼi hese ijapuha.

Upe riremínte ohecha chupe ótra sirviénta ha heʼi: “Ko kuimbaʼe oĩ kuri Jesús Nazaretgua ndive”. Upépe Pedro onega jey ha heʼi hese ijapuha. Upéi ambue oñemboja avei hendápe ha heʼi chupe: “Añetehápe nde heseguakuérante voi”.

Pedro okyhyjeterei ha ijapu jey heʼívo: “¡Ndaikuaái pe kuimbaʼépe!”. Upe javete peteĩ gállo osapukái, Jesús omaña Pedro rehe ha haʼe upépe imanduʼa Jesús heʼi vaʼekuére chupe upe mboyvemi: “Peteĩ gállo osapukái mboyve, nde chenegáta tres vése”. Pedro ombyasyeterei upe ojapóva ha hasẽ soro.

¿Ikatúpa oiko nderehe avei upéicha?... Epensamínte reimeha eskuélape ha ehendu ne kompañerokuéra heʼi: “Umi testígo de Jehová ningo ndopurahéiri voi vandérape”. Ótro katu heʼi: “Haʼekuérango ni noñorairõi odefende hag̃ua hetã”. Ambue heʼive: “Umi testígo de Jehová ningo ndahaʼéi kristiáno, haʼekuéra ni navidad ndofestehái”. Upépe peteĩva omaña nderehe ha heʼi: “Nde testígo de Jehová, ¿ajépa?”. ¿Mbaʼépa nde eréta chupekuéra?...

 Reʼa mboyve koʼãichagua situasiónpe, rejepreparáma vaʼerã rembohovái porã hag̃ua. Pedro ndojapói vaʼekue upéva, upéicha rupi ijapu ojejopy vaírõ guare chupe. Péro upéi haʼe ombyasy ijapu hague ha Ñandejára operdona chupe.

Ñanemanduʼami koʼág̃a Ananías rehe. Haʼe Jesús disípulo vaʼekue ha peteĩ jey ijapu avei ha hembireko Safira omoirũ chupe. Péro Ñandejára noperdonái chupekuéra. Jahechami mbaʼérepa.

Upérõ ojapo diez día Jesús oheja hague umi ijapóstolpe ha oho yvágape Ñandejára rendápe. Tres mil tapicha rupi ohendu pe marandu Jesús omombeʼúva ha ojevautisa Jerusalénpe. Umíva apytépe oĩ vaʼekue mombyrymbyrýgui oúva fiestarã, Pentekostés áño 33-pe. Upe rire odesidi opytave hikuái oaprendeve hag̃ua Ñandejáragui. Upéicha rupi oĩ Jesús disípulo oiporúva ipláta oipytyvõ hag̃ua umi ermáno pyahúpe opyta aja upépe.

Ananías ha hembireko ovende ijyvy oipytyvõ hag̃ua avei umi ojevautisa ramóvape. Ananías ogueraha pe pláta umi apóstolpe ha heʼi omeʼẽmbaiteha ijyvy repykue, péro ijapu, ohejaʼimi kuri imbaʼerã. Jehová oikuaauka Pédrope upe oikóva ha haʼe heʼi Ananíaspe: “Nde ningo ndejapu Ñandejárape, ndahaʼéi yvyporakuérape”. Ha upepete Ananías hoʼa omano. Amo 3 óra haguépe ou Safira ha haʼe ndoikuaái kuri mbaʼépa oiko iménare ha ijapu avei haʼéicha, ha upepete omano.

¿Mbaʼépa ñaaprende chuguikuéra? Ndovaleiha ñandejapu. Upéicharõ jepe, sapyʼánte jajavy ha koʼýte ñanemitãramo. Péro ¿revyʼápa reikuaávo Jehová nderayhu ha neperdonataha ojapo haguéicha Pedro rehe?... Nemanduʼáke siémpre ere vaʼerãha pe añetegua. Ha upeichahágui ndejapúramo, ndepyʼaite guive rejerure vaʼerã Ñandejárape taneperdona. Pedro ojapo kuri upéicha ha Ñandejára ohendu chupe. Reñehaʼãramo anive hag̃ua ndejapu, Ñandejára avei neperdonáta.

^ párr. 3 Oimérõ relee reína peteĩ mitãndi, epytaʼimi oĩ jave mbohapy púnto ha ehaʼarõ tombohovái umi porandu.