Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Ñemañaha  |  Marzo de 2013

Jaikuaave hag̃ua

Jaikuaave hag̃ua

¿Mbaʼéichapa síglo primérope umi hudío oprepara oñotỹ hag̃ua umi omanóvape?

Umi hudío pyaʼe oñotỹ vaʼekue umi omanóvape, jepive pe omanoha díape voi oñotỹma. ¿Mbaʼérepa? Oriente Médiope ningo hakueterei ha pyaʼe oñembyai umi omano vaʼekue. Avei oñehaʼarõramo heta día oñeñotỹ hag̃ua, ojeʼe ndojerrespetaiha pe omanóva ni ihentekuérape.

Mateo, Marcos, Lucas, Juan ha Héchospe oñeñeʼẽ cuatro tapicha oñeñotỹ vaʼekuére omanoha díape (Mateo 27:57-60; Hechos 5:5-10; 7:60–8:2). Ymave katu, Raquel omanórõ guare tapére oviaha jave iména ha ifamiliakuéra ndive, Jacob ogueraha rangue oñotỹ chupe ihentekuéra sepultúra oĩháme, oñotỹ hembirekópe ‘Belén rapére’ (Génesis 35:19, 20, 27-29).

La Biblia omombeʼu mbaʼépa ojepokuaámi ojapo umi hudío oprepara jave umi omanóvape oñotỹ hag̃ua. Por ehémplo, ihénte ha iñamigokuéra ombojahu pe omanóvape, omona hese aséite ha umi mbaʼe ryakuã porã ha olia télape (Juan 19:39, 40; Hechos 9:36-41). Umi vesíno ha ambue tapicha katu oho ovisita ha ombopyʼaguapy umi ihénte manóvape (Marcos 5:38, 39).

¿Oñeñotỹpa rakaʼe Jesúspe ojapoháicha umi hudío?

Heta família hudío ojepokuaa vaʼekue oñotỹ itakuápe térã panteónpe umi ihénte omanóvape. Israélpe, heta lugárpe ojejepokuaa vaʼekue ojejapo péicha. Upéicha osegi hikuái pe kostúmbre ohejáva umi tapicha ymave guare. Abrahán, Sara, Isaac, Jacob ha ambue tapicha oñeñotỹ vaʼekue itakuápe oĩva Macpelápe, ag̃uiete Hebróngui (Génesis 23:19; 25:8, 9; 49:29-31; 50:13).

Jesúspe oñeñotỹ vaʼekue peteĩ panteón ojejapóvape itakuápe (Marcos 15:46). Koʼã panteón hokẽ michĩmínte ha hyepýpe ojejoʼo jey oñemoĩ hag̃ua pe omanóva. Upéi opyta vove ikanguekuéntema, ihentekuéra ogueraha ha omoĩ peteĩ káha ojejapóvape itágui, ikatu hag̃uáicha oñeñotỹ ótro hendaguépe. Péicha ojejepokuaa vaʼekue ojejapo Jesús oikoha tiémpope ko yvy ape ári.

Pe Léi Jehová omeʼẽ vaʼekue Moisés rupive heʼi ndovaleiha oñembaʼapo sabadokue ni ojeprepara umi omanóvape oñeñotỹ hag̃ua. Jesús omano rupi ofaltávo 3 óra sábado hag̃ua, José Arimateagua ha ambue omoirũva chupe naitiempovéima opreparapa hag̃ua Jesús retekue oñotỹ hag̃ua ha oguerahántema hikuái oñotỹ upéicha pe panteónpe (Lucas 23:50-56). Upéicha rupi María Magdalena, Santiago sy ha Salomé ohóne raʼe upe koʼẽme Jesús retekue oĩháme, ikatu hag̃uáicha opreparapa (Marcos 16:1; Lucas 24:1).