Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Ñemañaha  |  Febrero de 2013

 LA BIBLIA OKAMBIA CHUPEKUÉRA

“Oipota hikuái chete ahechakuaa la Biblia omboʼéva”

“Oipota hikuái chete ahechakuaa la Biblia omboʼéva”
  • ONASE: 1982-PE
  • HETÃ: REPÚBLICA DOMINICANA
  • AMBUE INFORMASIÓN: MORMÓN

CHE REMBIASAKUE:

Anasevaʼekue Santo Domingo, República Dominicánape; che ipahague umi mbohapy che ermáno apytépe. Che sy ha che ru ijestúdio porã vaʼekue, ha oipota ore avei rosẽ porã. Cuatro áño che anase mboyve haʼekuéra oikuaa umi misionéro mormónpe ha ogustaiterei chupekuéra mbaʼéichapa hory, ipotĩ ha oñemonde porã hikuái. Upe riremínte oikéma hikuái pe Iglesia de Jesucristo de los Santos de los Últimos Díaspe térã rrelihión mormónpe.

Chemitã guive chegusta umi mbaʼe ojejapóva upe iglésiape, péro aguerohoryve mbaʼéichapa umi mormón omombaʼe hogapy ha hekoporã. Avyʼaiterei vaʼekue aike haguére upe rrelihiónpe ha apensa voi aservívo misionéroramo.

Arekórõ guare 18 áño, che sy, che ru ha che ermanokuéra ndive rova Estados Unídospe ikatu hag̃uáicha aike universidápe. Upéi un áño rova haguépe, che tio ha hembireko ou orevisita Florídape, haʼekuéra ningo testígo de Jehová ha ore invita roho hag̃ua hendivekuéra peteĩ Aty Guasu ojejapóvape oñehesaʼỹijo hag̃ua la Biblia. Ahávo upe aty guasuhápe, ahecharamoiterei mbaʼéichapa enterovénte oheka ivívliape umi téxto ha oanota umi mbaʼe ojeʼéva, upémarõ aiporu chuguikuéra peteĩ kuatia ha viróme ha ajapo avei upéicha.

Opa rire pe Aty Guasu, che tio ha hembireko heʼi chéve aserviséramo de misionéro, haʼekuéra chepytyvõtaha aikuaave hag̃ua la Biblia omboʼéva ha chegusta upéva, che ningo aikuaa heta mbaʼe pe Libro de Mormón omboʼévagui, péro saʼi aikuaa Ñandejára Ñeʼẽgui.

LA BIBLIA CHEPYTYVÕ AKAMBIA HAG̃UA:

Oho rire hikuái hógape, teléfono rupive rosegi roñemongeta la Biblia omboʼévare. Haʼekuéra akóinte chemokyreʼỹ ahecha  hag̃ua oĩpa la Bíbliape umi mbaʼe che agueroviáva. Oipota hikuái chete ahechakuaa la Biblia omboʼéva.

Ahechakuaa heta mbaʼe che rrelihión omboʼéva oĩ porãha, péro ndaikuaái mbaʼépa heʼi la Biblia umívare. Che tia ogueruka chéve rrevísta ¡Despertad! 8 de noviembre de 1995, ojapóva testígo de Jehová, upévape oñeʼẽ umi mormón rehe. Naimoʼãiete heta mbaʼe ndaikuaaiha che rrelihióngui, upémarõ aheka ore páhinape Internétpe ahecha hag̃ua añetépa upe rrevísta heʼíva orerehe; ha ndaijapúiraʼe. Upéi avisita heta muséo orekóva umi mormón Utahpe ha koʼýte upépe ahechakuaa añeteha pe rrevísta heʼíva.

Che apensáva la Biblia ha pe Libro de Mormón ndojoavyiha. Péro aleevévo la Biblia ahechakuaa tuicha ojoavyha, pór ehémplo, Ezequiel 18:4-pe la Biblia heʼi ñane álma omanoha. Péro pe Libro de Mormón, Alma 42:9-pe heʼi ñane álma arakaʼeve nomanoiha.

Oĩ avei ambue mbaʼe nahesakãporãiva chéve, ahecha umi mormón omombaʼetereiha hetã. Pór ehémplo haʼekuéra heʼi hardín de Edén oĩ hague koʼág̃a oĩhápe siuda Jackson (Misuri, Estados Unidos). Umi omoakãva ko Iglésia heʼi avei “Ñandejára Rréino oisãmbyhy vove, Estados Unidos vandéra potĩ asy ovevetaha yvatete ohechauka hag̃ua yvypóra isãsomaha ha oñemeʼẽtaha enterovépe iderécho”.

Che añeporandu mbaʼépa oikóta upéicharõ che retãgui ha umi ótro tetãgui oiko vove upéva. Peteĩ kaʼarúpe cherenói peteĩ che konosído ostudiáva hína misionerorã ha añeʼẽ hendive upe témare. Upéi aporandu porã chupe: “Ne retã oñorairõramo ótro tetã ndive, ¿reñorairõtapa umi mormón ótro tetãygua kóntrape? Haʼe heʼi chéve oñorairõtaha ha naimoʼãiete upéva. Oĩ heta mbaʼe aikuaasevéva che rrelihión omboʼévagui, upévare asegi ainvestiga ha aporandu che Iglésia omoakãvape, péro haʼekuéra heʼi chéve umíva haʼeha peteĩ mistério ha ág̃a itiémpope oñemyesakãtaha.

Cherejavaieterei upéva, upéi añepyrũ apensa mbaʼérepa aservise de misionéro, ha ahechakuaa ajaposeha aipytyvõségui che rapichakuérape, chegusta avei mbaʼéichapa ojetrata ha oñemombaʼe umi oservívape upéicha. Péro che saʼieterei aikuaa Ñandejárape ha yma aleéramo jepe heta vése la Biblia, nañemoĩriva ajepyʼamongeta hese. Ndaikuaaivaʼekue avei Ñandejára oprometeha heta mbaʼe porã ko yvy ha yvyporakuérape g̃uarã.

UMI MBAʼE PORÃ AHUPYTÝVA:

Astudia rire la Biblia umi testígo de Jehová ndive, aaprende heta mbaʼe. Pór ehémplo, mbaʼéichapa héra Ñandejára, mbaʼépa oiko ñandehegui ñamano rire, mbaʼéichapa Jesús rupive oñekumplíta Jehová rembipota ha hetave mbaʼe. Hasýpe aikuaa porã koʼã mbaʼe porãita omboʼéva la Biblia, ha vyʼápe amombeʼu che rapichakuérape umi mbaʼe aaprendéva. Che ningo agueroviáva voi Ñandejára oĩha, péro koʼág̃a ikatúma añemboʼe ha añeʼẽ chupe añeʼẽrõguáicha peteĩ che amigoiténdi. Upéi 12 de julio 2004-pe ajevautisa testígo de Jehováramo ha seis mése haguépe añepyrũma aiporupaite che tiémpo predikasión.

Ambaʼapo cinco áño testígo de Jehová sentrálpe oĩva Brooklynpe (Nueva York). Avyʼaiterei ikatu haguére aipytyvõ michĩmi jepe ojejapo hag̃ua la Biblia ha ambue puvlikasión oipytyvõtava hetaiterei tapichápe opárupi ko yvy ape ári. Chembopyʼarory ikatu haguére aipytyvõ che rapichakuérape oikuaa hag̃ua Ñandejárape.