Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Ñemañaha  |  Enero de 2013

 LA BIBLIA OKAMBIA CHUPEKUÉRA

“¡Koʼág̃a ae atopa pe liverta ijojahaʼỹva!”

“¡Koʼág̃a ae atopa pe liverta ijojahaʼỹva!”
  • ONASE: 1981-PE
  • HETÃ: ESTADOS UNIDOS
  • AMBUE INFORMASIÓN: OIKO IGÚSTOPE

CHE REMBIASAKUE:

Anase peteĩ siuda héravape Moundsville, opytáva ag̃ui rrío Ohiogui, nórte gotyo Virginia Occidentálpe (Estados Unidos). Ore ningo roime cuatro ermáno, mbohapy mitãkuimbaʼe ha peteĩ kuña, ha che aime mokõihápe; ore reta rupi ayvúmante oĩ jepi ógape. Che sy ha che ru ningo iñonrrádo, itravahadór ha oporohayhukuaa; ndaoreplatahetáiramo jepe, ndofaltáiva oréve mbaʼeve. Che tuvakuéra testígo de Jehová ha ojapovaʼekue ikatúva entéro oremboʼe hag̃ua la Biblia ore mitã guive.

Upéicharõ jepe, chemitãrusúpe añepyrũma namombaʼevéi umi mbaʼe porã che sy ha che ru chemboʼevaʼekue. Apensa voi ndavyʼamoʼãiha ajapóramo la Biblia heʼíva. Chéve g̃uarã avyʼa hag̃ua aikovaʼerã che gústope. Upévare adesidi ndahavéivo testígo de Jehová rreunionhápe. Upéi che ermáno ypykue ha che ermána ojapo avei upéicha. Ore tuvakuéra ojapovaʼekue opa ikatúva orepytyvõ hag̃ua, péro ore roju orerrevélde ha noropenái hesekuéra.

Che ndahechakuaái vaʼekue aikórõ che gústope chereitytaha vísio vaípe. Peteĩ árape eskuélagui ajukuévo, peteĩ che amígo oikuaveʼẽ chéve sigarríllo ha ajagarra chugui. Upe guive hetaitereive mbaʼe vai ajapo, ajedroga, haʼu rasa vevída ha che rekokyʼa. Ohasavévo pe tiémpo aiporúma umi dróga imbaretevéva ha ndaikatuvéima aiko umíva reheʼỹ. Upéi ahupyty hag̃ua che vísio repyrã avendéma avei dróga.

Añehaʼãramo jepe napenái che konsiénsiare, akóinte chemomanduʼa naiporãiha umi mbaʼe ajapóva. Péro che haʼe chejupe: “Chéngo nachepohãvéima, oikovaʼerã ningo oikopáma”. Heta vése añeñandu cheaño ha añedeprimi oĩramo jepe heta hénte che jerére umi fiésta ha konsiertohárupi. Sapyʼánte chemanduʼa mbaʼéichapa che sy ha che ru hekoporã ha imbaʼeporã, ha añeporandu mbaʼérepa che aiko péicha.

LA BIBLIA CHEPYTYVÕ AKAMBIA HAG̃UA:

Che haʼevaʼekue nachepohãveimaha, péro naentéroi opensa upéicha.  Áño 2000-pe, che sy ha che ru cheinvita aha hag̃ua hendivekuéra peteĩ asambléa de distrítope ojapóva testígo de Jehová. Ndachegustapáiramo jepe, haʼe chupekuéra ahataha. Ha nahaʼarõiete ajuhutaha upépe che ermáno ha che ermána odesidivaʼekue avei ndohovéi rreunionhápe.

Chemanduʼa ojapoha un áño aime hague upe lugárpe peteĩ konsiérto de rock ojejapovaʼekuépe. Tuicha idiferénte umi mbaʼe ahecháva pe asambleahápe ha opokoiterei cherehe. Upe konsiertohápe oparupiete isarambivaʼekue yty ha sigarríllo ratatĩmante ojagarrapa upe lugár. Umi hénte oĩva upépe ndoikuaaséi mbaʼeve avavégui ha umi músika oñembopúva katu oporodeprimi. Péro pe asambleahápe oĩ umi hénte ovyʼa añetéva ha torypápe cherresivi hikuái heta áño haguépe cherecha jeýramo jepe. Upe lugár ipotĩ ha umi mbaʼe ojeʼéva upépe oporomokyreʼỹ. Ahechávo umi mbaʼe porã ojehupytýva ojejapo rupi la Biblia heʼíva, añeporandu mbaʼeichakuépa ahejarakaʼe (Isaías 48:17, 18).

“La Biblia chepytyvõ anivéma hag̃ua ajedroga ni avende dróga, ha chedeprovécho hag̃ua che vesinokuérape”

Pyaʼe voi adesidi aha jeytaha testígo de Jehová kongregasiónpe. Che ermáno ha che ermána ojapo avei upéicha opokoiterei rupi hesekuéra umi mbaʼe ohasavaʼekue pe asambleahápe. Upéi mbohapyvéva rojerure rostudia hag̃ua la Biblia.

Peteĩ téxto opokoiterei vaʼekue cherehe haʼe Santiago 4:8: “Peñemoag̃uíkena Ñandejárare, ha haʼe oñemoag̃uíta penderehe”. Ahechakuaa añemoag̃uiséramo Ñandejárare, akambiavaʼerãha heta mbaʼépe. Umíva apytépe ahejavaʼerã sigarríllo, umi dróga ha vevída (2 Corintios 7:1).

Upévare ndajeheʼavéi umi che amígo chegueraha vaíva rehe ha aheka che amigorã umi ohayhu ha oservíva Jehovápe. Astudiavaʼekue la Biblia peteĩ testígondi, omoakãva pe kongregasión, ha haʼe tuichaiterei chepytyvõ. Cherenói jepi teléfonope ha chevisita oikuaa hag̃ua mbaʼéichapa aha hese. Koʼág̃a peve haʼe che amigoite.

Áño 2001-pe che ermáno ha che ermána ndive rojevautisa ha oiko orehegui testígo de Jehová. Che sy, che ru ha pe che ermáno imitãvéva akóinte iñeʼẽrendu Ñandejárape ha ovyʼaiterei koʼág̃a enterove roservi haguére oñondivepa ñande ru Jehovápe.

UMI MBAʼE PORÃ AHUPYTÝVA:

Yma apensavaʼekue la Biblia oproiviha hetaiterei mbaʼe, péro koʼág̃a amombaʼeterei. La Biblia chepytyvõ anivéma hag̃ua ajedroga ni avende dróga, ha chedeprovécho hag̃ua che vesinokuérape.

Avyʼaiterei ikatu haguére aservi Jehovápe umi ermáno oparupigua ndive. Haʼekuéra ningo oporohayhukuaaiterei ha omombaʼeguasu Ñandejára Jehovápe peteĩ ñeʼẽme (Juan 13:34, 35). Upéi, ijapytepekuéra aikuaa che rembirekorãme, hérava Adrianne, haʼe ningo peteĩ vendisión chéve g̃uarã, ahayhu ha amombaʼeterei chupe. Mokõivéva rovyʼaiterei roservi haguére oñondive ñande Apoharépe.

Aiko rangue apensa chejehénte, koʼág̃a aiporupaite che tiémpo Ñandejára servísiope ha amboʼe che rapichakuérape ohechakuaa hag̃ua mbaʼeichaitépa ñanepytyvõ la Biblia. Avyʼaiterei ningo ajapo haguére upéicha. Che pyʼaite guive ikatu haʼe la Biblia chepytyvõ hague akambia hag̃ua. ¡Koʼág̃a ae atopa pe liverta ijojahaʼỹva!