Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Ñemañaha  |  Octubre de 2012

Ñandejára omombaʼe ha orrespeta kuñanguérape

Ñandejára omombaʼe ha orrespeta kuñanguérape

JESÚS oĩ aja ko yvy ape ári, ohechauka porãiterei umi mbaʼe ojapóvare mbaʼeichaguápa Itúva yvagapegua ha mbaʼéichapa oporotrata. Haʼe heʼi: ‘Che ndajapói mbaʼeve chejehegui reínte. Che amombeʼu umi mbaʼe che Ru heʼivaʼekue chéve haʼe hag̃uánte. [...] Che ningo akóinte ajapo umi mbaʼe chupe ombovyʼáva’ (Juan 8:28, 29; Colosenses 1:15). Ñahesaʼỹijóramo Jesús ehémplo jaikuaáta mbaʼépa Ñandejára opensa kuñanguérare ha mbaʼéichapa oipota jatrata chupekuéra.

La Bíbliape umi lívro oñeʼẽva Jesús rekovekuére ohechauka haʼe omombaʼeterei hague kuñanguérape ha umi karai arandu ohesaʼỹijóvo koʼã lívro noimoʼãiete upéva oikuaágui mbaʼéichapa ojetrata kuñanguérape upe tiémpope. ¿Mbaʼérepa ojapo upéicha? Ha iñimportantevéva, ¿ikatúpa umi mbaʼe Jesús omboʼevaʼekue oipytyvõ ojetrata porãve hag̃ua kuñanguéra koʼag̃aguápe?

Mbaʼéichapa Jesús otratavaʼekue kuñanguérape

Jesús ndeʼirivaʼekue kuñanguéra oĩha sexorãnte. Umi omoakãva hudiokuéra rrelihión opensa kuñanguéra haʼeha peteĩ tentasión kuimbaʼépe g̃uarã ha ikatuha ogueraha chupe tekovaípe. Upévare ojeproivi kuñanguéragui osẽ veloʼỹre ha oñeʼẽ kuimbaʼéndi hénte atýpe térã  kállere. Péro Jesús arakaʼeve ndeʼíri oñemboyke hag̃ua kuñanguérape ha ndovaleiha oñeñeʼẽ hendivekuéra. Upéva rangue, omboʼe umi kuimbaʼépe ojejokokuaa ha orrespeta hag̃ua kuñanguérape (Mateo 5:28).

Jesús heʼivaʼekue avei: “Oimeraẽ ojedivorsiáva hembirekógui ha upéi omenda jey ótrare, omoakãratĩ chupe” (Marcos 10:11, 12, NM). Umi rravíno omboʼevaʼekue menakuéra ikatuha ojedivorsia hembirekógui “oimeraẽ mbaʼére”, péro Jesús heʼíva ohechauka ndovaleiha ojejapo upéva (Mateo 19:3, 9). Heta hudío nontendeporãi mbaʼépa heʼise ñemoakãratĩ ha heʼi voi peteĩ kuimbaʼe oguerekóramo rrelasión sexual ambue kuñándi, nomoakãratĩriha hembirekópe. Umi rravíno heʼi umi kuña añoite oporomoakãratĩha ha umi kuimbaʼe arakaʼeve ndojapoiha upéva. Peteĩ komentário vívliko heʼi: “Jesús heʼívo avei menakuérape ani hag̃ua omoakãratĩ hembirekópe, ohechauka mokõivéva ojorrespetavaʼerãha, ha omombaʼe kuñanguérape”.

Jesús omboʼevaʼekue oipytyvõ kuñanguéra koʼag̃aguápe: Testígo de Jehová kongregasiónpe, kuñanguéra oñemongeta porãnte kuimbaʼekuérandi, oikuaágui ndojefaltamoʼãiha chupekuéra ha nopensavaimoʼãiha hesekuéra. Umi kuimbaʼe oñehaʼãmbaite ojapo la Biblia heʼíva otratávo kuñanguéra ‘ijedavévape isyramoguáicha ha umi kuñataĩme heindyramoguáicha, tekopotĩme’ (1 Timoteo 5:2).

Jesús oñemotiempovaʼekue ohekomboʼe hag̃ua kuñanguérape. Umi rravíno yma guare ndohejaivaʼekue oñehekomboʼe kuñanguérape. Péro Jesús ndahaʼeiete upéicha, haʼe oñemotiémpo omboʼe hag̃ua kuñanguérape pe añetegua ha omokyreʼỹ chupekuéra heʼi hag̃ua umi mbaʼe opensáva. Avei Jesús nopensaivaʼekue kuña kosinameguanteha. Upéva ohechauka ohejárõ guare Maríape ojapysaka hese oñeʼẽvo Jehová rembipotáre (Lucas 10:38-42). Ha Lázaro omanórõ guare, Marta (María ermána) ombohovái lája Jesúspe ohechauka oaprende hague avei heta mbaʼe Jesús omboʼevaʼekuégui (Juan 11:21-27).

Jesús ojepyʼapyvaʼekue kuñanguérare ha oipota oñehekomboʼe chupekuéra. Umi kuña hudía apytépe oĩvaʼekue heta omombaʼetereíva oikóramo proféta imemby kuimbaʼégui térã peteĩ ojerrespetáva. Upévare peteĩ kuña heʼírõ guare Jesúspe “ovyʼaiténe pe kuña ndeguerekovaʼekue hetepýpe”, haʼe oaprovecha omboʼe hag̃ua chupe iporãveha ñaneñeʼẽrendu Ñandejárape (Lucas 11:27, 28, NM). Péicha Jesús ohechauka umi kuña orekoha hembiaporã iñimportánteva, ndahaʼeiete umi hudío opensaháicha (Juan 8:32).

Jesús omboʼevaʼekue oipytyvõ kuñanguéra koʼag̃aguápe: Testígo de Jehová kongregasiónpe ojeguerohoryeterei kuñanguéra okomenta jave rreunionhápe. Umi kuimbaʼe omboʼéva kongregasiónpe orrespeta umi kuña ijerovia  mbaretévape, “oporomboʼéva iporãva” ha omoĩva ehémplo porã, tahaʼe hénte atýpe térã haʼeñohápe (Tito 2:3). Kuñanguéra tuicha oipytyvõ avei oñemombeʼu hag̃ua opárupi Ñandejára Rréino ojapótava (Salmo 68:11; ehecha pe rrekuádro oĩva páhina 9-pe, heʼihápe “¿Oproivípa rakaʼe apóstol Pablo kuñanguéragui oñeʼẽ?”).

Jesús omombaʼevaʼekue kuñanguérape. Yma oñemombaʼeve onaséramo peteĩ mitãkuimbaʼe. Pe Talmud heʼivaʼekue: “Ovyʼaite umi kuña imembýva kuimbaʼe ha ndovyʼaiete umi imembýva kuña”. Oĩvaʼekue sy ha túva onaséramo ifamília kuña, ohecháva peteĩ mbaʼe pohýiramo. ¿Mbaʼérepa? Ohekavaʼerã chupe imenarã ha opagavaʼerã pe nóvio famíliape, avei oikuaa ndaikatumoʼãiha oñangareko hesekuéra ijeda rire.

Jesús katu omombaʼetereivaʼekue umi mitã, tahaʼe kuimbaʼe térã kuña. Pór ehémplo, pe táva Naínpe omoingove jey haguéicha peteĩ viúda memby kuimbaʼépe, omoingove jey Jairo rajýpe (Marcos 5:35, 41, 42; Lucas 7:11-15). Upéi omonguera avei peteĩ kuña “dieciocho áñorema hasýva, peteĩ demónio káusare”, ha ohenói voi chupe “Abrahán familiare”, ko ñeʼẽ ndojeporuguasúi umi hudío kuatiañeʼẽme (Lucas 13:10-16, NM). Péicha heʼívo Jesús, ohechauka omombaʼeha kuñanguérape ha oguerohoryha chupekuéra ijerovia mbarete haguére (Lucas 19:9; Gálatas 3:7).

Jesús omboʼevaʼekue oipytyvõ kuñanguéra koʼag̃aguápe: Oĩ peteĩ ñeʼẽnga ojeporúva Ásiape heʼíva, peteĩ ne família kuñáva remongakuaáramo, haʼete rerregáva hína ne vesíno hardín. Péro tuvakuéra oservíva Jehovápe nopensái péicha. Haʼekuéra oñangareko porã ifamíliare, tahaʼe kuña térã kuimbaʼéva. Oñehaʼãmbaite avei ombostudia ha oipohãnoka.

Jesús oiporavovaʼekue María Magdalénape omombeʼu hag̃ua ijapostolkuérape oñemoingove jey hague chupe

Jesús ojeroviavaʼekue kuñanguérare. Umi hudío trivunálpe peteĩ kuña heʼíva ndovaleguasúi mbaʼeverã, oñembojoja voi chupe peteĩ tembiguáire. Síglo primérope, pe istoriadór Josefo heʼi: “Kuña heʼívare ndaikatúi jajerovia, haʼekuéra ipyʼakangy ha heʼi rei reínte heta mbaʼe”.

¡Ajépa idiferentete Jesús! Haʼe oiporavo kuñanguérape oikuaauka hag̃ua oñemoingove jey hague chupe (Mateo 28:1, 8-10). Koʼã kuña jeroviapy ningo ohechákuri mbaʼéichapa ojejuka ha oñeñotỹ Jesúspe. Upéicharõ jepe, ijetuʼúkuri umi apóstolpe oguerovia hag̃ua chupekuéra heʼírõ guare Jesúspe oñemoingove jey hague (Mateo 27:55, 56, 61; Lucas 24:10, 11). Péro Jesús ohejávo umi kuña raẽvete ohecha chupe oñemoingove jey rire, ohechauka omombaʼeha chupekuéra ha ikatuha oñeʼẽ hérape umi ótro hemimboʼéicha (Hechos 1:8, 14).

 Jesús omboʼevaʼekue oipytyvõ kuñanguéra koʼag̃aguápe: Testígo de Jehová kongregasiónpe, umi kuimbaʼe oguerekóva rresponsavilida omombaʼe kuñanguérape ha ohendu chupekuéra. Menakuéra avei ohechauka omombaʼeha hembirekópe oñatende porãvo hesekuéra oñeʼẽ jave (1 Pedro 3:7; Génesis 21:12).

La Biblia omboʼéva ombovyʼa kuñanguérape

Umi ojapóva la Biblia heʼíva omombaʼe ha otrata porã kuñanguérape

Ñandejára ojapoha ára guive kuñanguérape, oipota oñemombaʼe ha ojerrespeta chupekuéra, ha umi osegíva Jesús ehémplo ojapo upéicha (Génesis 1:27, 28). Menakuéra oservíva Jehovápe ndoapoʼíri hembirekópe ni naimachístai. Upéva rangue ojapo la Biblia heʼíva, ojogueraha porã hendive ha ovyʼave (Efesios 5:28, 29).

Yelena oñepyrũrõ guare ostudia la Biblia, kirirĩháme heta ohasa asy iména ojahéi ha omaltrata rupi chupe. Iména ningo okakuaavaʼekue peteĩ lugár oĩháme heta violénsia, upépe umi kuimbaʼe oguerokañýntema hembirekorã ha chupekuéra ndahaʼeiete mbaʼeve ombyepoti hag̃ua kuñáme. Yelena heʼi: “Umi mbaʼe aaprendéva la Bíbliagui chemombarete. Aikuaa oĩha peteĩ Ñandejára cherayhu, chemombaʼe ha ojepyʼapy añetéva cherehe. Ahechakuaa avei che ména ikatuha okambia ostudiáramo la Biblia”. Tiémpo rire, oiko ko mbaʼe haʼe ohaʼarõitéva: Iména ojevautisa ha oiko chugui testígo de Jehová. Yelena heʼi: “Koʼág̃a ojejokokuaa rupi omoĩ ehémplo opavavépe. Ha mokõivéva roaprende roñoperdona”. Yelena ohechakuaa ko mbaʼe: “La Biblia omboʼéva tuicha chepytyvõ añeñandu porã ha ani hag̃ua akyhyje che rogapýpe” (Colosenses 3:13, 18, 19).

Ndahaʼéi ningo Yelena añónte oñeñandúva péicha. Oĩ avei hetaiterei kuña haʼéicha oservíva Jehovápe ha ovyʼáva hogapýpe. ¿Mbaʼérepa? Iména ndive oñehaʼãgui ojapo la Biblia heʼíva. Upéicha rupi oiko avei pyʼaguapýpe ha ohechakuaa ojerrespetaha chupekuéra ha oñeñandu porã umi oservívandi Jehovápe (Juan 13:34, 35).

Enterove testígo de Jehová tahaʼe kuña térã kuimbaʼe ohechakuaa iñimperfékto, pekadór ha oĩha “Ñandejára rembiapokue opytavaʼekue ndovalevéi” apytépe. Upéicharõ jepe, haʼekuéra oikuaa porãiterei oñemoag̃uíramo Ñandejára Jehováre, ikatuha ojei “ñehundi poguýgui” ha ohupyty “Ñandejára raʼykuéra liverta iporãitereíva”. ¡Ajépa iporãite ko esperánsa orekóva kuimbaʼe ha kuña oĩva Ñandejára oporohayhuetéva poguýpe! (Romanos 8:20, 21, NM).