Ehecha oĩva pype

Ehecha menú secundario

Testígo de Jehová

guarani

Testígo de Jehová oñehaʼã omopotĩ héra

Testígo de Jehová oñehaʼã omopotĩ héra

MARANDU OPAVAVE RUSIAYGUÁPE G̃UARÃ: Ko artíkulo rupive, ojejapóva 188 idiómape ha oñemosarambi 230 tetã rupi, oñemombeʼúta oparupiete mbaʼéichapa Rúsiape oñembohasa asy hetaiterei tapichápe ndojerrespetái rupi irrelihión. Ko rrevísta Ñemañaha haʼehína pe hetave ojetradusi ha oñemosarambíva, káda més ojejapo 40.000.000 ári. Oĩ mburuvicha ndoipotáiva avave oikuaa mbaʼéichapa ojetrata testígo de Jehovápe Rúsiape. Péro Jesús heʼivaʼekue ‘ndaiporiha mbaʼeve oñemokañýva ojetopaʼỹvaʼerã ha ojeguerekóva ñemiháme ojekuaaʼỹvaʼerã’ (LUCAS 12:2, NM).

DICIEMBRE 2009 ha enero 2010 rupi, umi mokõi trivunál tuichavéva oĩva Rúsiape heʼi testígo de Jehová haʼeha peteĩ rrelihión oporojopyetereíva. Péicha oiko jeýma Unión Soviética poguýpe oiko haguéicha. Upérõ ojeʼevaʼekue testígo de Jehová omoingovaipaha umi héntepe, upévare oñemosẽ chupekuéra hetãgui, oñemondo préso ha umi lugár oñembaʼapo pohyihápe. Péro upéi pe goviérno pyahu poguýpe oñemeʼẽmbaite jey chupekuéra liverta ha ojehechauka ojeʼe reiete hague hesekuéra umi mbaʼe vai. * Upéicharõ jepe oĩ jey omoherakuã vaiséva chupekuéra.

Oñepyrũvo áño 2009, umi goviernopegua ojokose jey testígo de Jehová rembiapokuéra. Pór ehémplo, febréropente voi ojejapo quiniento investigasión rupi Rusia tuichakuére, ojeheka hag̃ua mbaʼérepa ikatu ojekulpa chupekuéra. Upe rire umi polisía oatropella testigokuéra róga ha umi Salón del Reino oiko jave rreunión. Oguerahapa chuguikuéra puvlikasión ha ikosakuéra mimi. Avei omosẽ umi avogádo ouvaʼekue tetã ambuégui ombokatupyry hag̃ua umi Testígope odefende hag̃ua iderécho, ha oproivi chuguikuéra oike jey Rúsiape.

Cinco de octubre de 2009, pe aduána oĩva frontérape, ag̃uiete San Petersbúrgogui, ojoko peteĩ kárga oúva Alemániagui  oguerúva testígo de Jehová puvlikasionkuéra. Koʼã puvlikasión oñemondovaʼerã umi kongregasión oĩva Rúsiape. Umi polisía aduanapegua ombaʼapóva ani hag̃ua oñemoinge upe tetãme mbaʼeve ipeligrósova, orrevisa umi puvlikasión. Mbaʼérepa ojapo upéva? Oĩ peteĩ dokuménto heʼíva pe kárga ikatuha oreko informasión ‘omboligáva umi héntepe oñemoĩ hag̃ua ambue rrelihionguáre’.

Koʼýte ijetuʼuve testígo de Jehová ndive pe Tribunal Supremo Rusiaygua ha pe oĩva República de Altáipe, heʼírõ guare heta puvlikasión oguenohẽva hikuái ojopyetereiha hentekuérape, umíva apytépe rrevísta Ñemañaha. Upéi umi Testígo ojerure ojehecha jey hag̃ua ikasokuéra, péro pe Trivunál nopenái hesekuéra oĩramo jepe ambue tetã ndoguerohorýiva haʼekuéra odesidivaʼekue. Koʼág̃a peve ndojehejái oñemoinge Rúsiape umi puvlikasión ha ojeproivi oñemosarambi upérupi.

Mbaʼépa ojapo testígo de Jehová oñeñeʼẽ vaígui hesekuéra ha ojejoko rupi hembiapo? Mbaʼéichapa pe Trivunál odesidivaʼekue, opoko umi hénte Rusiayguáre, orekóramo jepe derécho oiporavo hag̃ua irrelihionrã?

Mbaʼépa ojapo testígo de Jehová oñepuʼã jeývo hesekuéra?

Vladimir Litvin (81 áño) ojeguerahavaʼekue Krasnoyárskpe orekórõ guare 14 áño. Pe viernes pyhareve, 26 de febrero de 2010 haʼe omoakã peteĩ grúpo osẽvaʼekue omeʼẽ pe tratádo

Viernes 26 de febrero de 2010, 160.000 testígo de Jehová omosarambi Rusia tuichakuére 12.000.000 tratádo hérava Oiko jeýnepa? Peteĩ porandu Rusiayguakuérape g̃uarã. Táva Usolje-Sibirskoje, Sibériape, hetaiterei Testígo oñembyaty 5:30 pyhareve omeʼẽ hag̃ua umi 20.000 tratádo omosarambivaʼerã upe távape, hiʼarive upérõ roʼy 40 °C bajo cero. Ijapytepekuéra oĩ testígo de Jehová ojeguerahavaʼekue upe távape áño 1951-pe nomboykeséigui ijerovia.

Nikolay Yasinski (73 áño) kyreʼỹme osẽ omeʼẽ pe tratádo. Haʼe oñeporandu: “Ñandepersegi jeýne piko hikuái ñamombaʼeguasu haguére Jehovápe?”

Ikatu hag̃uáicha omomarandu hentekuérape osẽtaha omeʼẽ pe tratádo tres día aja, umi testígo de Jehová ojapo peteĩ rreunión periodistakuéra ndive Moscúpe. Oñeʼẽ avei upépe Lev Levinson, ombaʼapóva Instituto de Derechos Humánospe. Haʼe omombeʼu mbaʼéichapa oñembohasa asy vaʼekue umi Testígope Unión Soviéticape ha avei umi nási poguýpe Alemániape. Omombeʼu upéi pe goviérno ohechakuaa hague japuha umi mbaʼe ojeʼéva testígo de Jehováre ha omeʼẽ jey chupekuéra liverta. Lev Levinson heʼi: “Presidénte Yeltsin oguenohẽ peteĩ léi heʼíva opavave rrelihión ojepersegivaʼekue Unión Soviética poguýpe orekopaite jeyha liverta. Opa mbaʼe ojepeʼavaʼekue chuguikuéra, oñemeʼẽmbaite jey chupekuéra. Añetehápe ningo  umi testígo de Jehová ndorekoivaʼekue propieda upe goviérno tiémpope, péro oñemopotĩ herakuéra opa mbaʼe vai ojeʼevaʼekuégui”.

Péro oñemongyʼase jeýma hína herakuéra. Levinson heʼi upe rire: “Ko tetã ohechakuaavaʼekue ojavy hague, koʼág̃a opersegi reiete jeýma koʼã tapichápe”.

Ojehupyty heta mbaʼe porã

Mbaʼépa ojehupyty oñemeʼẽ rire umi tratádo oparupiete? Levinson omombeʼu: “Ajukuévo ko rreunionrã, ahecha mbaʼéichapa umi hénte oúva avei trénpe oleejoa hína pe tratádo koestedía oñemeʼẽvaʼekue opavavépe Rusia tuichakuére. [...] Oguapy voi umi hénte olee ha oñatende porã mbaʼépa heʼi pype”. * Mbaʼépa heʼi hikuái olee rire? Jahechamína.

Peteĩ táva oikohápe heta musulmán, peteĩ kuñakarai ijedámava ojagarra pe tratádo ha oporandu mbaʼe rehépa oñeʼẽ. Oñemombeʼúvo chupe oñeʼẽha umi derécho ha liverta orekóvare opavave tapicha Rúsiape, osẽ heʼi: “Ojejapohápema voi ningo upéva! Haʼetéma kuri jaiko jeýva Unión Soviética tiémpope guaréicha. Pejapo porã, aguijémante!”.

Cheliabínskpe, peteĩ kuñakaraípe oñemeʼẽ pe tratádo ha haʼe heʼi: “Arekóma voi, ha aleepáma. Añetete umi mbaʼe pejéva. Ndaipóri ambue rrelihión odefendéva ijerovia peẽicha. Aguerohoryete mbaʼéichapa peñemonde ha peneakãguapy. Ojekuaa penderehe pegueroviaha umi mbaʼe pemboʼéva. Katuete Ñandejára oĩ penendive”.

San Petersbúrgope oñeporandu peteĩ karaípe ogustáparaʼe chupe pe tratádo, ha haʼe ombohovái: “Si, chegustaiterei,  chemopirĩmba voi aleekuévo ha chemyasẽ. Che avuélape heta oñemaltratavaʼekue avei Unión Soviética poguýpe ha imanduʼámi umi oĩvaʼekuére hendive préso. Umíva apytépe oĩ umi hembiapo vaíva, péro oĩ avei umi nomboykéigui ijerovia ojegueraháva upépe. Opavave oikuaavaʼerã upe oikovaʼekue ha upévare che haʼe oĩ porãitereiha ko pejapóva”.

Mbaʼépa oikóne Rúsiape koʼa guive?

Stepan Levitsky (85 áño) hembireko Yelena ndive. Haʼe oĩkuri diez áño préso oreko haguére peteĩ rrevísta Ñemañaha

Umi testígo de Jehová oikóva ko tetãme omombaʼeterei pe liverta oñemeʼẽ mimíva chupekuéra koʼã veinte áño pukukue, péro oikuaa porã sapyʼaitépe ikatuha ojepeʼa jey chuguikuéra. Mbaʼépepa opáta péichante oñeñeʼẽ vaíramo umi Testígore? Amo gotyovémante jaikuaáta upéva.

Toiko la oikóva, testígo de Jehová ndoguevimoʼãi arakaʼeve, osegíta omombeʼu pe marandu porã oĩva la Bíbliape, ombopyʼaguapýva ha omeʼẽva esperánsa opavavépe. Pe tratádo omombeʼu mbaʼépa odesidi ojapo hikuái: “Umi oñemoĩva orerehe arakaʼeve ndaorejokomoʼãi. Akóinte, rrespéto ha pyʼaguapýpe roñeʼẽta ore rapichakuérape Ñandejára Jehová ha Iñeʼẽ la Biblia rehe (1 Pedro 3:15). Ndaorejokoivaʼekue umi mbaʼe vaieta ojapóva orerehe umi nási Alemániape ni rojepersegírõ guare Unión Soviética poguýpe. Ha koʼág̃a avei avave ndaorejokomoʼãi (Hechos 4:18-20)”.

^ párr. 3 Ehecha pe rrekuádro heʼihápe  “Certificado de Rehabilitación”.

^ párr. 13 Moscúpe umi Testígo oñepyrũ omeʼẽ pe tratádo ojejapo mboyvemi pe rreunión umi periodísta ndive.