Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Ñemañaha (ojestudiáva)  |  Octubre de 2015

Pe “ivýrova oguerovia opa mbaʼe ohendúva”

Pe “ivýrova oguerovia opa mbaʼe ohendúva”

“Peteĩ persóna núnka ndoleéiva diário itavyeterei, péro itavyvéntema pe siémpre oleéva ha ogueroviapáva la oĩva pype.” August von Schlözer, istoriadór ha eskritór alemán (1735-1809).

OJAPO mas de 200 áño, ko eskritór heʼi vaʼekue ndaikatuiha ojeguerovia opa mbaʼe osẽva umi diáriope. Koʼág̃arupi avei ndaikatúi jarovia opaite mbaʼe osẽva Internétpe. Añetehápe ningo ñane tiémpope pe teknolohía rupive ikatu jalee káda día hetaiterei kláse de informasión. Oĩ umi ikatúva ojejerovia hese ha ideprovéchova, péro oĩ avei hetaiterei informasión ndahaʼéiva siérto ha ikatúva ñandeperhudika. Upévare tekotevẽ jajekuida. Peteĩ persóna oñepyrũ ramóva oipuru Internet, ikatu opensa pe notísia siertoha oĩgui Internétpe, térã ombou haguére chupe peteĩ iñamígo. Ha ikatu voi oguerovia umi mbaʼe ndoikomoʼãiva arakaʼeve. Péro la Biblia heʼi: “Ivýrova oguerovia opa mbaʼe ohendúva, iñakãguapýva katu oikuaa mamópa opyrũ” (Prov. 14:15).

Pe persóna ivýrova orovia oimeraẽ mbaʼe, péro pe iñarandúva ohecha raẽ siértopa upe ojeʼéva. Internétpe ningo oĩ heta istória ha notísia pyaʼeterei ojekuaáva opárupi, péro ndahaʼéiva siérto. ¿Mbaʼépa ikatu jajapo ani hag̃ua avave ñanembotavy? Iporã ñañeporandu: “¿Moõpa alee ko informasión? ¿Aleépa peteĩ páhina konfiávlepe, térãpa peteĩ páhina oimeraẽvante oopinahápe? ¿Ojekuaápa moõguipa osẽ? ¿Oñekomprovámapa ótra páhina konfiávlepe upe informasión japuha?”. * (Elee pe nóta.) Ñañatendékena ani hag̃ua avave ñanembotavy (Prov. 7:7). Oimérõ hasy jarovia hag̃ua peteĩ informasión, posívlemente japu hína. Ha og̃uahẽrõ ñandéve peteĩ mensáhe oheja vaíva ñande rapichápe, iporã ñañeporandu: “¿Mávapa oiméne oipota ojekuaa opárupi ko informasión, ha mbaʼérepa?”.

ANI ERAHAKA JEY UMI MENSÁHE RERRESIVÍVA GUIVE

Oĩ persóna pyaʼe orahaka jeýva iñamigokuérape umi mensáhe orresivíva. Hiʼarive ni nokomprovái oimépa siérto la ojeʼéva, térãpa operhudikáta ótra  persónape. Ikatu pyaʼe voi omondo upe mensáhe ollamaségui la atensión, térã haʼe raẽve oikuaaukaségui pe notísia (2 Sam. 13:28-33). Péro ñañatende porãkena, nahiʼãiete ningo japerhudika peteĩ persónape térã peteĩ organisasiónpe ñamosarambi haguére informasión japu.

¿Mbaʼérepa oĩ persóna orahaka jeýva mensáhe ojeaseguraʼỹre añetépa hína la ojeʼéva? Pórke iñateʼỹ okomprova hag̃ua siértopa. Ikatu opensa: “Che amigokuéra ningo ikatúnte avei ojeasegura oimépa siérto hína”. Péro ikatu haʼekuéra naitiémpoi ojapo hag̃ua upéva (Efes. 5:15, 16). Upéicharõ, redudáramo remondo hag̃ua peteĩ mensáhe, ikuentave hína neremondóinte.

Iporã reñeporandu: “¿Ajepokuaápa arahaka jey umi mensáhe oñemboúva chéve? ¿Ajediskulpámapa algúna ves amondo haguére peteĩ mensáhe ndahaʼéiva siérto? ¿Oĩpa ojeruréva chéve anivéma hag̃ua amondo chupe umi mensáhe arresivíva guive?”. Ñane amigokuéra oipurúrõ Internet, haʼekuéra voi ohekáta pe informasión oipotáva. Natekotevẽi manterei ñamondo chupekuéra chíste, fóto térã vidéo. Avei ndovaléi jarahaka diskúrso ojegravapyre térã oñeanotahápe káda fráse heʼi vaʼekue pe diskursánte. * Iporãve káda uno ñainvestiga porã peteĩ téma, jaheka umi téxto vívliko osẽva peteĩ artíkulope, térã japrepara ñane komentariorã.

Epensa porãkena erahaka mboyve peteĩ mensáhe

¿Mbaʼépa jajapo vaʼerã peichahágui jahecháramo Internétpe peteĩ japu ojeʼéva testígo de Jehováre? Upepete jaheja vaʼerã upe jaleéva ha ani jarovia pe informasión. Ani jarahaka jey ótra persónape, pórke upéicha ñamosarambíta pe japu. Ha oiméramo ñandepyʼapy la jalee vaʼekue, jajerure Jehovápe tañanepytyvõ ha ñañemongeta peteĩ ermáno oĩ porãvandi espirituálmente (Sant. 1:5, 6; Jud. 22, 23). Ani ñañesorprende oĩramo omosarambíva japu ñane kóntrape. Ñanemanduʼákena Jesúsre jepe ojeʼe hague heta mbaʼe ndasiértoiva. Avei haʼe heʼi vaʼekue ojepersegitaha umi kristiánope ha ojeʼetaha hesekuéra heta mbaʼe vai (Mat. 5:11; 11:19; Juan 10:19-21).  Ñanearandúramo, pyaʼe voi jahechakuaáta peteĩ persóna heʼíramo japu ñanderehe, térã ombotavyséramo hína ótrope (Prov. 2:10-16).

JARRESPETÁKENA ÑANDE RAPICHAKUÉRAPE

Avei ñañatende vaʼerã ñamombeʼu hag̃ua umi mbaʼe ojeʼéva ñane ermanokuérare. Ha siértoramo jepe, ikatu hína naĩporãi ñamombeʼu ótrope (Mat. 7:12). Por ehémplo, jaikóramo ñañeʼẽ vai ótrore, jahechauka ndajahayhuiha chupe ha nañamokyreʼỹmoʼãi avavépe (2 Tes. 3:11; 1 Tim. 5:13). Avei ikatu oĩ algúna notísia ndovaléiva ñamombeʼu. Ha peteĩ persóna omombeʼuséramo peteĩ asúnto personál, oreko derécho odesidívo arakaʼépa ha mbaʼéichapa omombeʼúta. Jaikóramo ñañemotenonde hese, jahechauka ndajarrespetaiha chupe ha ikatu voi japerhudika upe ñande rapichápe.

Koʼág̃arupi umi notísia pyaʼeterei isarambi opárupi. Oĩ siértova ha ideprovéchova, péro oĩ avei heta japu oporoperhudikáva. Epensamína, remondóramo peteĩ mensáhe peteĩ persónape, haʼe ikatu omondo jey upéva sapyʼaitépe hetaitereive persónape. Upévare ikuentave neremondói káda mensáhe rerresivíva entéro ne amigokuérape. La Biblia heʼi pe persóna oporohayhúva nodeskonfiaiha hapichágui, upéicharõ jepe tekotevẽ ñañatende ha ani ñaimoʼã entéro mensáhe jarresivíva siertoha katuete (1 Cor. 13:7). Avei ni mbaʼevéicharõ ndajagueroviái vaʼerã umi japu ojeʼéva ñane organisasiónre ni ñane ermanokuérare. Ani ñanderesarái umi hénte omoñepyrũva ha omosarambíva koʼã japu ojoguaha Satanáspe, “pe japu ruvicha” (Juan 8:44). Upéicharõ, aníkena jaroviapa entéro informasión jarresivíva. Ñanemanduʼa la Biblia heʼívare: “Umi isónsova ndohupytýi mbaʼeve iporãva, péro umi iñarandúvape oñerrekompensa iñentendído haguére” (Prov. 14:18, NM).

^ párr. 4 Sapyʼánte oñemoĩ Internétpe umi istória oñedemostráma vaʼekue japuha. Péro ikatu oĩ okambiaʼimíva pe istória ikatu hag̃uáicha ojeguerovia.

^ párr. 8 Ehecha Ñane Marandu Porã osẽ vaʼekue abril de 2010-pe, pe rrekuádro heʼíva “Umi mbaʼe jaikuaaséva”, oĩva páhina 3-pe.