Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Ñemañaha (ojestudiáva)  |  Octubre de 2015

“Orepytyvõna rojeroviave hag̃ua”

“Orepytyvõna rojeroviave hag̃ua”

“¡Chepytyvõna amombareteve hag̃ua che jerovia!” (MAR. 9:24)

PURAHÉI: 81, 135

1. ¿Mbaʼérepa iñimportantete pe fe? (Ehecha pe taʼanga oĩva iñepyrũme.)

¿NDÉPA repensa ikatutaha rejesalva ou vove pe jehasa asy guasu? Apóstol Pablo heʼi vaʼekue tekotevẽha jareko fe ikatu hag̃uáicha jajesalva. Haʼe heʼi: “Ndajajeroviáirõ, Ñandejára ni mbaʼevéicharõ nañandeguerohorymoʼãi” (Heb. 11:6). Oĩ opensáva oimeraẽ persóna ikatuha oreko fe, péro la Biblia heʼi ‘naentéroi ojeroviaha’ (2 Tes. 3:2). Koʼã téxto omyesakã porã tekotevẽha ñañehaʼãmbaite ikatu hag̃uáicha jajerovia mbarete.

2, 3. a) ¿Mbaʼérepa iñimportantete ñamombarete ñande fe? b) ¿Mbaʼe porandúpa ñarrespondéta ko artíkulope?

2 Iñimportánte ningo jareko fe. Péro apóstol Pedro heʼi vaʼekue ‘jahechauka vaʼerãha ñande fe imbareteha’ (elee 1 Pedro 1:7). Pe jehasa asy guasu ningo hiʼag̃uimbaitéma, ha ikatu hag̃uáicha jajesalva “ñaime [vaʼerã] umi ojeroviáva apytépe” (Heb. 10:39). Upévare ñañehaʼã vaʼerã káda día ñamombareteve jahávo ñande fe. Péichamante Jesús ñandesalváta ou vove ohundi hag̃ua ko múndo aña. Peteĩ kuimbaʼe ojerure haguéicha Jesúspe, ñande avei ikatu jajerure Jehovápe: “¡Chepytyvõna amombareteve hag̃ua che jerovia!” (Mar. 9:24). Ha ikatu avei jajerure Ñandejárape umi apóstol ojerure vaʼekue Jesúspe: “Orepytyvõna rojeroviave hag̃ua” (Luc. 17:5).

 3 Ko artíkulope ñarrespondéta mbohapy porandu: ¿Mbaʼépa jajapo vaʼerã ikatu hag̃uáicha ñande fe imbarete? ¿Mbaʼéichapa jahechauka imbareteha ñande jerovia? Ha ¿mbaʼérepa ñaime segúro Jehová katuete omeʼẽvetaha ñandéve fe jajeruréramo chupe?

ÑANDEJÁRA OIPOTA JAJEROVIA MBARETE

4. ¿Máva ehémplopa ikatu ñanepytyvõ jajerovia mbareteve hag̃ua?

4 Jehová oipota imbarete ñande fe. Upévare oskrivika vaʼekue la Bíbliape heta ehémplo ikatúva ñanepytyvõ jajerovia mbarete hag̃ua. Umíva ‘ojehai vaʼekue ñanerekomboʼe hag̃ua’ (Rom. 15:4). Pype jajuhu Abrahán, Sara, Isaac, Jacob, Moisés, Rahab, Gedeón ha Barac rembiasakue (Heb. 11:32-35). Péro heta ermáno ñane tiempopegua odemostra avei ojerovia mbareteha. Haʼekuéra haʼe avei ehémplo ñandéve g̃uarã. *

5. a) ¿Mbaʼéichapa Elías ohechauka vaʼekue ojeroviaitereiha Jehováre? b) ¿Mbaʼépa iporã ñañeporandu?

5 Por ehémplo, la Bíbliape jatopa Elías rembiasakue. Jahechamína cinco okasión haʼe ohechauka haguépe ife imbareteha. Primero, Elías heʼi rréi Acábpe Jehová omboutaha peteĩ séka puku. Ha ojeroviaitereígui Jehováre heʼi voi pe rréipe: “Koʼã áñope ndokymoʼãi ha ndoʼamoʼãi ysapy, che haʼe peve” (1 Rey. 17:1). Segundo, Elías ojerovia Ñandejára omeʼẽtaha chupe ha umi ótra persónape umi mbaʼe oikotevẽva pe séka puku aja (1 Rey. 17:4, 5, 13, 14). Tercero, Elías ojerovia Jehová omoingove jeytaha peteĩ viúda membýpe (1 Rey. 17:21). Cuarto, Elías oĩ segúro Jehová omboutaha tata ohapy hag̃ua pe sakrifísio haʼe oikuaveʼẽva sérro Carmélope (1 Rey. 18:24, 37). Ha quinto, opa mboyve jepe pe séka, haʼe oĩ segúro oky jeytamaha. Upévare heʼi Acábpe: “Tereho ekaru ha heʼu víno, cháke oñehendúma hína ama ryapu” (1 Rey. 18:41). Jahecha rire koʼã ehémplo iporã ñañeporandu: “¿Ajeroviápa Jehováre Elías ojerovia haguéicha hese?”.

¿MBAʼÉPA JAJAPO VAʼERÃ ÑANDE FE IMBARETE HAG̃UA?

6. ¿Mbaʼépa jajerure vaʼerã Jehovápe ikatu hag̃uáicha jajerovia mbarete?

6 Jajerure vaʼerã Ñandejárape tomeʼẽ ñandéve espíritu sánto. ¿Mbaʼérepa iñimportantete upéva? Pórke pe fe ou hína espíritu sántogui (Gál. 5:22). Jesús oipota kontinuadoite jajerure Ñandejárape tomeʼẽve ñandéve ijespíritu. Haʼe heʼi: “Pende Ru yvagapegua omeʼẽta espíritu sánto umi ojerurévape chupe” (Luc. 11:13).

7. Emoĩ peteĩ ehémplo ohechaukáva tekotevẽha jasegi ñamombarete ñande jerovia.

7 Ha, ¿mbaʼépa jajapo vaʼerã oiméramo imbaretéma ñande fe? Tekotevẽ ñañatende ani hag̃ua ou ikangy. ¿Mbaʼérepa? Pórke ñande fe haʼete peteĩ tatarendy. Ñepyrũrã ikatu pe tata hendy porã, péro nañamoĩvéiramo chupe jepeʼa, oguéta hína. Upéicha avei, ikatu hag̃uáicha ñande fe siémpre imbarete, tekotevẽ jalee ha jastudia la Biblia káda día. Upéicha, koʼẽ koʼẽre jahayhuvéta Jehovápe, ñamombaʼevéta Iñeʼẽ, ha ñande fe siémpre imbaretéta.

8. ¿Mbaʼépa ñanepytyvõta ñande fe imbarete hag̃ua?

8 Nahiʼãi ningo ñañekontenta umi mbaʼe ñaaprende vaʼekuére jajevautisa mboyve,  síno jasegi vaʼerã ñaaprende la Biblia omboʼéva (Heb. 6:1, 2). Por ehémplo, ikatu jastudia mbaʼéichapa oñekumpli umi profesía. Avei jastudia jave la Biblia, ñañeporandu vaʼerã oimépa ñande fe imbarete hína (elee Santiago 1:25; 2:24, 26).

9, 10. a) ¿Mbaʼérepa ñane fe imbareteve jajeheʼávo ñane ermanokuérare? b) ¿Mbaʼéichapa umi rreunión omombareteve ñande fe? c) ¿Mbaʼérepa ñande fe imbareteve japredikáramo?

9 Apóstol Pablo heʼi vaʼekue ‘káda uno ñañomokyreʼỹ vaʼerãha ñande jerovia rupive’ (Rom. 1:12). ¿Mbaʼépa heʼise upéva? Heʼise ñande fe imbaretevetaha jajeheʼa meméramo ñane ermanokuérare, koʼýte umi osegívare iñeʼẽrendu “ojejopy vaíramo” jepe (Sant. 1:3). Umi júnta vai ningo ñandeperhudika, péro umi amígo iñeʼẽrendúva Jehovápe ñanepytyvõ ñamombarete hag̃ua ñande fe (1 Cor. 15:33). Upévare la Biblia heʼi ñandéve ani hag̃ua jafalta rreunionhápe, pórke upépe “ñañomokyreʼỹ” (elee Hebreos 10:24, 25). Hiʼarive umi mbaʼe ñaaprendéva rreunionhápe omombareteve ñande fe. La Biblia heʼi voi: “Jajerovia ñahendu rire” (Rom. 10:17). Upévare iporã ñañeporandu: “¿Ajapópa ikatúva guive ani hag̃ua afalta rreunionhápe?”.

10 Ikatu hag̃uáicha ñande fe imbareteve, tekotevẽ avei ñamboʼe ñande rapichakuérape pe marandu porã oĩva la Bíbliape. Jajapóvo upéva, ñakonfiave Jehováre ha avei ñandepyʼaguasu umi kristiáno ypykuéicha (Hech. 4:17-20; 13:46).

11. a) ¿Mbaʼérepa Josué ha Caleb ojeroviaiterei vaʼekue Jehováre? b) ¿Mbaʼéichapa ikatu jasegi Josué ha Caleb ehémplo?

11 Jahechakuaávo mbaʼéichapa Jehová okontesta ñane orasión ha ñanepytyvõ, jajeroviave hese. Upéva oiko vaʼekue Josué ha Caleb rehe. Haʼekuéra ohórõ guare oespia pe Tiérra Prometída, ohechauka okonfiaitereiha Jehováre. Ha ohasávo pe tiémpo, ife imbareteve, pórke okomprova Ñandejára siémpre oipytyvõha chupekuéra. Upévare Josué heʼi umi isrraelítape Jehová siémpre okumpliha opa mbaʼe oprometéva. Heʼi chupekuéra: “Pemombaʼéke Ñandejárape ha pejapo hembipota”. Avei heʼi: “Che ha maymáva che rogaygua romombaʼeguasúta [Jehovápe]” (Jos. 23:14; 24:14, 15). Ñande avei ñakonfiáramo Jehováre ha jahechakuaa haʼe ñanepytyvõha, katuete ñande fe imbaretevéta (Sal. 34:8).

¿MBAʼÉICHAPA JAHECHAUKA IMBARETEHA ÑANDE JEROVIA?

12. ¿Mbaʼéichapa jahechauka imbareteha ñande fe?

12 Santiago heʼi vaʼekue: “Che ahechaukáta ndéve che jerovia che rembiapo porã rupive” (Sant. 2:18). Añetehápe, umi mbaʼe jajapóvare ojekuaa porã oimépa hína ñande fe imbarete. Jahechamína mbaʼéichapa ikatu jahechauka upéva.

Jajapóramo ikatúva guive ñamotenonde hag̃ua pe predikasión, jahechauka ñande fe imbareteha (Ehecha párrafo 13)

13. ¿Mbaʼérepa jaʼekuaa ñademostraha fe japredika jave?

13 Japredika jave jahechauka hína jarekoha fe. ¿Mbaʼérepa jaʼe upéva? Pórke péicha ñademostra jagueroviaha pe fin hiʼag̃uimaha ha ‘upe día nog̃uahẽmoʼãiha tárde’ (Hab. 2:3, NM). Jaikuaaséramo oimépa ñande fe imbarete hína, ñañeporandu vaʼerã: “¿Iñimportántepa chéve g̃uarã pe predikasión? ¿Ajapópa ikatúva guive añeʼẽ hag̃ua Ñandejárare tahaʼe haʼévape? ¿Añehaʼãpa ambaʼapove Jehová servísiope?” (2 Cor. 13:5). Jasegíramo ‘ñamombeʼu pe marandu porã’, jahechauka imbareteha ñande jerovia (elee Romanos 10:10).

14, 15. a) ¿Mbaʼéichapa ikatu jahechauka jajeroviaha Jehováre ñaaguanta jave umi provléma káda diagua? b) Emombeʼu mbaʼéichapa peteĩ família Asiagua ohechauka ojeroviaha Jehováre.

 14 Jahechauka avei jarekoha fe ñaaguantávo umi provléma oñepresentáva káda día. Oiméramo ñanemboriahu, ñanderasy, ñañedesanima, ñañedeprimi térã jareko peteĩ provléma, ñakonfia vaʼerã Jehová ha Jesús ‘ñanepytyvõtaha ñaikotevẽ jave’ (Heb. 4:16). Jajeruréramo Jehovápe ajúda, jahechauka hína jajeroviaha hese. Jesús heʼi vaʼekue ikatuha jajerure Ñandejárape omeʼẽ hag̃ua ñandéve ‘ñane rembiʼurãmi ñaikotevẽva’ káda diarã (Luc. 11:3). La Bíbliape jatopa heta ehémplo ohechaukáva Jehová ikatuha omeʼẽ ñandéve oimeraẽ mbaʼe ñaikotevẽva. Por ehémplo, Israélpe oúrõ guare peteĩ séka puku, Jehová omeʼẽ vaʼekue Elíaspe tembiʼu ha y. La Biblia heʼi: “Yryvukuéra ogueraha jepi chupe pan ha soʼo pyhareve ha kaʼaru. Ha hoyʼu ysyrýgui” (1 Rey. 17:3-6). Ñande avei ikatu jajerovia Jehová omeʼẽtaha ñandéve ñaikotevẽmíva jaikove hag̃ua.

Ñaaguantáramo umi provléma káda diagua, jahechauka ñande fe imbareteha (Ehecha párrafo 14)

15 Jasegíramo umi konsého oĩva la Bíbliape, katuete jahupytýta umi mbaʼe ñaikotevẽva ñamantene hag̃ua ñane famíliape. Peteĩ matrimónio oikóva Ásiape osegi umi konsého oĩva Mateo 6:33-pe ha Proverbios 10:4-pe. Pe ermána omombeʼu iména ohechakuaa hague itraváho ikatuha operhudika iñamista Jehovándi. Upémarõ odesidi hikuái haʼe ohejataha itraváho ha oñondive oñepyrũ ojapo tembiʼu ovende hag̃ua, ha péicha omantene ifamíliape. Heta ombaʼapo hikuái, péro Jehová siémpre oñangareko porã hesekuéra ha ndofaltái chupekuéra hoʼumi vaʼerã. ¿Ndépa rehasáma avei peichagua situasión ijetuʼúvare? ¡Oiméne nde fe imbareteve raʼe rehechávo mbaʼeichaitépa Jehová nepytyvõ!

16. ¿Mbaʼépa ojapóta Jehová jajeroviáramo hese?

16 Jehová ningo katuete ñanepytyvõta  jajeroviáramo hese ha jajapóramo haʼe ojeruréva ñandéve. Pablo imanduʼa vaʼekue proféta Habacuc ohai vaʼekuére ha heʼi: “Pe hekojojáva oikovéta ijerovia rupive” (Gál. 3:11; Hab. 2:4). Pablo heʼi avei: “Ñandejára ningo oiporúma ipodér ñanderehehápe, ha pe podér rupive ikatu ojapo hetaitereive mbaʼe jajerure térã ñaimoʼãvagui” (Efes. 3:20). Ñande ñañehaʼã jaservi porã Jehovápe, péro sapyʼánte ndaikatúi jajapo heta mbaʼe. Upéicharõ jepe, ñañehaʼã jajapo opa ikatúva, ha ñakonfia Jehová ñanepytyvõtaha osẽ porãmbaite hag̃ua ñandéve entéro mbaʼe jajapóva.

JEHOVÁ OMEʼẼVÉTA ÑANDÉVE FE JAJERURÉRAMO CHUPE

17. a) ¿Mbaʼépa Jesús ojapo idisipulokuéra ojerurevérõ guare chupe fe? b) ¿Mbaʼérepa jaʼekuaa Jehová omeʼẽvetaha ñandéve fe jajeruréramo chupe?

17 Jastudia rire ko artíkulo, ikatu ñañeñandu avei umi apóstol oñeñandu haguéicha, heʼírõ guare Jesúspe: “Orepytyvõna rojeroviave hag̃ua” (Luc. 17:5). Pentekostés áño 33-pe, Jesús omeʼẽ kuri umi disípulope pe ajúda opromete vaʼekue chupekuéra. Upérõ Jesús ombou espíritu sánto hiʼarikuéra ha oipytyvõ chupekuéra ontende porãve hag̃ua Ñandejára rembipota. Upéva omombarete umi disípulo jerovia. Upéicha rupi haʼekuéra kyreʼỹme opredika opárupi arakaʼeve ojejapoʼỹ haguéicha (Col. 1:23). Jehová opromete omeʼẽtaha ñandéve opa mbaʼe jajeruréva chupe, “oĩ porãramo hembipotándi” (1 Juan 5:14). Upévare ikatu jaʼe katuete omeʼẽvetaha ñandéve fe, jajeruréramo chupe.

18. ¿Mbaʼéichapa Jehová ovendesi umi okonfiávape hese?

18 Ñakonfiáramo ñande pyʼaite guive Jehováre, haʼe ñanevendesíta. Ha jajeruréramo chupe omombareteve hag̃ua ñande fe, haʼe katuete orrespondéta ñane orasión. Péicha ñamereséta jaiko “Ñandejára Rréino” poguýpe (2 Tes. 1:3, 5).

^ párr. 4 Rejuhúta unos kuánto ehémplo koʼã rrevístape: ¡Despertad! del 22 de julio de 1993 (Lillian Gobitas Klose), ¡Despertad! del 22 de febrero de 1994 (Feliks Borys) ha ¡Despertad! de septiembre de 2009 (Josephine Elias).