Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Ñemañaha (ojestudiáva)  |  Octubre de 2015

Jajepyʼamongetákena umi mbaʼe ñanemoag̃uívare Jehováre

Jajepyʼamongetákena umi mbaʼe ñanemoag̃uívare Jehováre

“Ejepyʼamongeta koʼã mbaʼére, ha eñemeʼẽmbaite umíva rehehápe; péicha opavave ohechakuaáta reñakãrapuʼãha rehóvo.” (1 TIM. 4:15)

PURAHÉI: 57, 52

1, 2. ¿Mbaʼérepa ñanediferentete umi animálgui?

ÑANDE yvypóra ningo ñanediferénte umi animálgui. Por ehémplo, ikatu ñañeʼẽ, jaskrivi, jalee ha ñantende ñande rapichakuéra heʼíva ñandéve. Avei ikatu ñañemboʼe ha japurahéi Jehovápe. Umi sientífiko koʼag̃aite peve nontendéi mbaʼéicha rupípa ñane apytuʼũ ikatu ojapo opa koʼã mbaʼe.

2 Añetehápe ningo pe kapasida jarekóva ñañeʼẽ hag̃ua haʼe hína peteĩ rregálo oúva Jehovágui (Sal. 139:14; Apoc. 4:11). Péro oĩ avei ambue mbaʼe ñanediferensiáva umi animálgui: jareko liverta jadesidi hag̃ua, pórke Jehová ñandeapo “ijoguaháramo” (Gén. 1:27). Upéicharõ, ikatu hína jaipuru pe liverta jaadora hag̃ua Jehovápe ha jaservi hag̃ua chupe.

3. ¿Mbaʼépa omeʼẽ ñandéve Jehová jadesidi porã hag̃ua?

3 Jehová omeʼẽ ñandéve la Biblia jaikuaa hag̃ua mbaʼéichapa jaadora ha jaservi vaʼerã chupe. Koʼág̃arupi la Biblia oĩma mas de 2.800 idiómape, tahaʼe kompletoite térã en párte. Jaleéramo la Biblia ha jajepyʼamongeta hese, ñaaprende ñapensa hag̃ua Jehová opensaháicha (Sal. 40:5; 92:5; 139:17). Ha ñapensáramo haʼéicha, ‘ñanearandúta’ jadesidi porã  hag̃ua ha jaikóta pára siémpre (elee 2 Timoteo 3:14-17).

4. a) ¿Mbaʼépa heʼise jajepyʼamongeta? b) ¿Mbaʼépa ñarrespondéta ko artíkulope?

4 ¿Mbaʼépa heʼise jajepyʼamongeta térã ñamedita? Heʼise ñañekonsentraha peteĩ mbaʼére ha ñapensa porãha hese (Sal. 77:12; Prov. 24:1, 2). Iñimportanteterei ñamboyke tiémpo ñapensa hag̃ua umi mbaʼe ñaaprendévare Jehová ha Jesúsgui (Juan 17:3). Ko artíkulope ñarrespondéta koʼã porandu: ¿Mbaʼépa ñanepytyvõta jajepyʼamongeta hag̃ua? ¿Mbaʼe mbaʼérehepa ikatu ñamedita? ¿Mbaʼépa ikatu jajapo jajepyʼamongeta meme hag̃ua ha igústo hag̃ua ñandéve?

¿MBAʼÉPA ÑANEPYTYVÕTA JAJEPYʼAMONGETA HAG̃UA?

5, 6. ¿Mbaʼépa ñanepytyvõta ñanemanduʼa ha ñantende porã hag̃ua pe jaleéva?

5 Ñande yvypóra ningo ikatu jajapo heta mbaʼe ñapensaʼỹre hese, por ehémplo jarrespira, jaguata térã jaiko visikléta ári. Péicha avei ikatu oiko ñanderehe jalee jave. Ikatu jalee hína péro ñapensa ótro ladoite. ¿Mbaʼépa iporã jajapo péicha jave? Ñañekonsentra vaʼerã pe jaleévare ha ñañehaʼã ñantende la heʼiséva. Jaleepa rire peteĩ párrafo térã jaike mboyve ótro suvtítulope, iporã vaʼerã ñañeporandu: “¿Mbaʼépa aaprende koʼã párrafogui? ¿Antende porãpa hína?”.

6 Jalee rangue kirirĩháme, jalee vaʼerã en vos vaha, térã ñahenduʼimi hag̃uáicha. Umi sientífiko odeskuvri péicha ñanemanduʼa porãveha umi mbaʼe jaleévare. Ha Jehová oikuaa avei upéva, pórke haʼe voi ñandeapo. Upéicha rupi heʼi Josuépe olee vaʼerãha pe Léi “en vos váha”, ku oñeʼẽguyguyrõguáicha (elee Josué 1:8). Jaleéramo péicha la Biblia, ikatúta ñañekonsentra ha ñanemanduʼáta umi mbaʼe jaleévare.

7. ¿Mbaʼeichagua lugárpa jaheka vaʼerã jajepyʼamongeta hag̃ua, ha mbaʼe moméntopepa? (Ehecha pe taʼanga oĩva iñepyrũme.)

7 Añetehápe ningo sapyʼánte ijetuʼu ñañekonsentra ha jajepyʼamongeta pe jastudiávare. Upéva ikatu oiko ñanekaneʼõ rupi térã oĩgui rruído ñande jerére. Upévare jaheka vaʼerã peteĩ lugár trankílo, ndaiporihápe mbaʼeve ñandedistrae vaʼerã. Por ehémplo, David ojepyʼamongeta vaʼekue pyharekue (Sal. 63:6). Jesús avei oho vaʼekue umi lugár itrankilohápe ojepyʼamongeta ha oñemboʼe hag̃ua (Luc. 6:12).

¿MBAʼE MBAʼÉREHEPA IKATU JAJEPYʼAMONGETA?

8. a) ¿Mbaʼérehepa ikatu jajepyʼamongeta? b) ¿Mbaʼéichapa Jehová oñeñandu ñañeʼẽ jave hese ótra persónape?

8 Jahecha haguéicha, siémpre jajepyʼamongeta vaʼerã la Biblia heʼívare, péro iporã avei ñamedita ambue mbaʼére. Por ehémplo, ñamaña jave umi mbaʼe Jehová ojapo vaʼekue, ikatu ñañeporandu: “¿Mbaʼépa aaprende chugui ahechávo koʼã mbaʼe?”. Ñapensáramo péicha, katuete jaagradeséta chupe. Ha ñaime jave ótra persónandi, ikatúta ñakomparti hendive pe ñaaprende vaʼekue (Sal. 104:24; Hech. 14:17). Jehová ojesareko ñanderehe ha ovyʼa ohechávo ñapensaha hese, ñañemboʼeha chupe, ha ñañeʼẽramo chugui ñande rapichápe. La Biblia heʼi: “Ojeskrivi peteĩ lívro henondépe oĩháme umi orrespetáva Jehovápe ha opensa meméva hérare” (Mal. 3:16, NM).

Ejepyʼamongetákena ikatu hag̃uáicha eipytyvõ porãve ne estudiántepe (Ehecha párrafo 9)

9. a) ¿Mbaʼe konséhopa Pablo omeʼẽ Timotéope? b) ¿Mbaʼérehepa ikatu jajepyʼamongeta jajeprepara jave peteĩ estúdio vivlikorã térã japredika hag̃ua?

 9 Pablo heʼi vaʼekue Timotéope opensa vaʼerãha mbaʼéichapa omoñeñandúta ótrope umi mbaʼe heʼíva, ojapóva ha omboʼéva (elee 1 Timoteo 4:12-16). Péicha avei, ñande ñañemotiémpo vaʼerã jajepyʼamongeta hag̃ua umi mbaʼe jaʼétavare. Por ehémplo, jajapóta jave peteĩ estúdio vívliko, iporã ñapensáma mbaʼe pregúntapa jaipurúta, térã mbaʼe ehémplopa oipytyvõvéta pe estudiántepe oñemoag̃uive hag̃ua Jehováre. Jajapóramo péicha, ñande fe imbaretevéta ha ñanekyreʼỹvéta ñaporomboʼe hag̃ua. Avei tekotevẽ jajepyʼamongeta jaha mboyve japredika (elee Esdras 7:10). Ikatu jalee peteĩ kapítulo oĩva lívro de Héchospe. Avei iporã ñapensa pe versíkulo jaleétavare umi héntepe, térã umi puvlikasión jaofresétavare. Koʼã mbaʼe katuete ñanemokyreʼỹvéta japredika jave (2 Tim. 1:6). Ñapensa vaʼerã mbaʼe témapa ointeresavéta umi hénte oikóvape ñande territóriope. Péicha jaipuru porãvéta la Biblia japredika jave (1 Cor. 2:4).

10. ¿Mbaʼérehepa ikatu avei ñamedita?

10 ¿Mbaʼe mbaʼérehepa ikatu avei jajepyʼamongeta? Oiméramo ñaanota raʼe algúna kósa rreunionhápe térã asambléape, iporã vaʼerã jarrepasáramo umíva ha ñañeporandu: “¿Mbaʼépa chemboʼe la Bíbliagui ha Ñandejára organisasióngui?”. Avei ikatu ñapensa umi mbaʼe jaleévare rrevísta Ñemañaha ha ¡Despertad!-pe, ha umi puvlikasión osẽvare ñane asambleakuérape. Jalee jave Anuáriope algún ermáno rembiasakue,  ñañemotiémpo vaʼerã ñapensa hag̃ua iñehémplore, ikatu hag̃uáicha opoko ñane korasõre. Ha jalee jave umi puvlikasión, iporã ñamarka umi púnto iñimportantevéva, térã ñaanota hese algúna idéa ideprovéchotava ñandéve. Upéva ñanepytyvõta ñanemanduʼa hag̃ua umi mbaʼe iñimportantevévare. Upéi ikatu jaipuru pe informasión japrepara hag̃ua diskúrso, javisita jave peteĩ ermánope térã peteĩ persóna ohendu porãvape pe predikasión. Péro ikatu hag̃uáicha pe informasión og̃uahẽ ñane korasõme ha jaagradese Jehovápe, tekotevẽ japausaʼimi ha ñapensa porã la jaleévare.

JAJEPYʼAMONGETA KÁDA DÍA UMI MBAʼE JALEÉVARE LA BÍBLIAPE

11. ¿Mbaʼépa jaipuru vaʼerã jajepyʼamongeta hag̃ua, ha mbaʼérepa? (Ehecha avei pe nóta.)

11 Añetehápe ningo la Biblia hína pe lívro iñimportantevéva jaipuru vaʼerã jajepyʼamongeta hag̃ua. Péro, ¿mbaʼépa oikóta algún día ojeproivíramo ñandehegui jareko la Biblia? * Vuéno, ikatu ojepeʼa ñandehegui ñande Biblia, péro avave ndaikatúi oipeʼa ñane akãgui umi téxto vívliko, ni umi kántiko ñaaprende vaʼekue de memória (Hech. 16:25). Jehová ñanepytyvõta ijespíritu sánto rupive ñanemanduʼa hag̃ua umi mbaʼe ñaaprende vaʼekue, ha avei ñaneñeʼẽrendu hag̃ua chupe (Juan 14:26).

12. ¿Mbaʼépa ikatu jajapo jalee hag̃ua la Biblia káda día?

12 ¿Mbaʼépa jajapo vaʼerã ikatu hag̃uáicha jalee la Biblia káda día? Jahechamína peteĩ suherénsia. Ikatu jaipuru unos kuánto día de la semána jajapo hag̃ua pe lektúra semanál oñeasignáva Eskuéla Jaipurukuaa Hag̃ua la Bíbliape. Upéi ñamboykeʼimi tiémpo ñapensa porã hag̃ua pe jaleévare. Umi ótro día ikatu jalee algún kapítulo de Mateo, Marcos, Lucas térã Juan, ha jajepyʼamongeta umi mbaʼe Jesús ojapo ha omboʼe vaʼekuére (Rom. 10:17; Heb. 12:2; 1 Ped. 2:21). Ha ideprovechove hag̃ua ñandéve pe jaleéva, ikatu jaipuru peteĩ puvlikasión omyesakãva por órden umi mbaʼe Jesús ojapo vaʼekue oĩrõ guare ko yvy ape ári (Juan 14:6).

¿MBAʼÉREPA IÑIMPORTANTETE JAJEPYʼAMONGETA?

13, 14. ¿Mbaʼérepa iñimportánte jajepyʼamongeta meme Jehová ha Jesúsre, ha mbaʼépepa ñanepytyvõta upéva?

13 Jajepyʼamongeta meméramo Jehová ha Jesúsre, oikóta ñandehegui kristiáno madúro ha jajerovia mbaretéta (Heb. 5:14; 6:1). Nañanemanduʼaguasúiramo Jehováre katu, saʼi saʼípe ñañemomombyrýta chugui ha ndahaʼevéitama ñane amígo (Heb. 2:1; 3:12). Jesús ñandeavisa vaʼekue ndajaaseptáiramo ‘ñande pyʼaite guive’ Ñandejára Ñeʼẽ, jajutaha ‘jajepyʼapyeterei ñane remikotevẽre, ha jaikotaha pláta ha vyʼarã rapykuéri’. Ha oikóramo upéva ñanderehe, katuete ñañemomombyrýta Jehovágui (Luc. 8:14, 15).

14 Upévare iñimportanteterei káda día jajepyʼamongeta la Biblia heʼívare, ha koʼẽ koʼẽre jaikuaave jahávo Jehovápe. Upéva ñanepytyvõta jasegi hag̃ua iñehémplo (2 Cor. 3:18). Jasegíramo ñaaprende Jehovágui, jaikuaa porãvéta  mbaʼeichagua persónapa haʼe ha ikatúta ñahaʼanga chupe jaikove aja pukukue. ¡Ajépa tuichaite mbaʼe upéva! (Ecl. 3:11).

15, 16. a) ¿Mbaʼéichapa ñanepytyvõ avei jajepyʼamongetáramo Jehová ha Jesúsre? b) ¿Mbaʼérepa sapyʼánte ijetuʼu ñamboyke tiémpo ñamedita hag̃ua la Bíbliare? c) ¿Mbaʼépa jahupytýta jajepyʼamongeta meméramo la Bíbliare?

15 Jajepyʼamongetáramo Jehová ha Jesúsre, ñanekyreʼỹvéta jaservi hag̃ua Jehovápe. Avei ñane ermanokuéra ha umi persóna japredikáva ikyreʼỹta ohechávo upéva. Ñameditáramo Jehová ojapo vaʼekuére omboúvo Jesúspe omano hag̃ua ñanderehehápe, jahechakuaáta tuichaiterei mbaʼeha jaiko Jehová amígoramo (Rom. 3:24; Sant. 4:8). Peteĩ ermáno Sudafricagua hérava Mark, ohasa tres áño kárselpe iñeʼẽrendu haguére Jehovápe. Haʼe heʼi: “Igustoiterei ningo jajepyʼamongeta Jehováre. Amáske ñapensa hese, hetave mbaʼe ñaaprende chugui. Sapyʼánte ningo añedesanima térã ajepyʼapy che renonderãre. Péicha jave ajagarra che Biblia, alee ha amedita, ha upéva tuicha chembopyʼaguapy”.

16 Sapyʼánte ijetuʼu ñamboyke tiémpo jajepyʼamongeta hag̃ua la Biblia heʼívare. ¿Mbaʼérepa? Pórke ko múndope oĩ heta mbaʼe ikatúva ñandedistrae. Peteĩ ermáno Africagua hérava Patrick, omombeʼu káda día orekoha heta mbaʼe ojapo hag̃ua. Ha sapyʼánte oĩ umi mbaʼe oipyʼapyetereíva chupe. ¿Mbaʼépa ojapo péicha jave ikatu hag̃uáicha ojepyʼamongeta? Ñepyrũrã omboykeʼimi tiémpo ha omombeʼu Jehovápe mbaʼépa oipyʼapy chupe, ha upéi itrankilovéma. Upéva oipytyvõ chupe oñemoag̃uive hag̃ua Jehováre, ha ontende porãve hag̃ua umi mbaʼe oĩva la Bíbliape (Sal. 94:19). Jahechaháicha, jahupyty heta mbaʼe ‘ñahesaʼỹijo porãramo Ñandejára Ñeʼẽ’ ha jajepyʼamongeta hese káda día (Hech. 17:11).

¿MBAʼÉICHAPA IKATU ÑAÑEMOTIÉMPO JAJEPYʼAMONGETA HAG̃UA?

17. ¿Mbaʼe moméntopepa opyta porãve ndéve rejepyʼamongeta hag̃ua?

17 Heta ermáno opuʼã voi porã ikatu hag̃uáicha oñemboʼe, olee la Biblia ha ojepyʼamongeta hese. Oĩ avei ojapóva upéva asajekue opytuʼu aja, kaʼaru, térã pyhare oñeno mboyve. Ótro katu olee ivívlia michĩmi pyhareve ha michĩmi pyhare (Jos. 1:8). Jahechaháicha, ikatu jaiporavo oimeha óra, péro ani ñanderesarái jalee vaʼerãha káda día. Ñamboykékena umi mbaʼe naiñimportanteguasúiva, ikatu hag̃uáicha jalee la Biblia ha jajepyʼamongeta hese (Efes. 5:15, 16).

18. ¿Mbaʼépa heʼi la Biblia umi ojepyʼamongetávare káda día ha oñehaʼãmbaitéva ojapo umi mbaʼe oaprendéva?

18 Jehová opromete ovendesitaha umi ojepyʼamongetávape la Bíbliare ha oñehaʼãmbaitéva ojapo umi mbaʼe oaprendéva (elee Salmo 1:1-3). Jesús heʼi vaʼekue: “Ovyʼa [...] umi ohendúva Ñandejára Ñeʼẽ ha ojapóva” (Luc. 11:28). Ñameditáramo káda día umi mbaʼe ñanemoag̃uívare Jehováre, ikatúta ñambotuicha chupe umi mbaʼe jajapóvare. Upéicha, ñande Apohare katuete ñanerrekompensáta koʼág̃ama voi, ha amo gotyove ikatúta jaiko pára siémpre pe múndo pyahúpe (Sant. 1:25; Apoc. 1:3).

^ párr. 11 Ehecha pe artíkulo “Nuestra lucha para mantenernos espiritualmente fuertes”, osẽ vaʼekue La Atalaya 1 de diciembre de 2006-pe.