Ehecha oĩva pype

Ehecha oĩva pype

“Peñakarama hatãkena pende jeroviáre”

“Peñakarama hatãkena pende jeroviáre”

“Peñakarama hatãkena pende jeroviáre, pendepyʼaguasu ha penembaretékena.” (1 COR. 16:13)

PURAHÉI: 60, 64

1. a) ¿Mbaʼépa ojapo Pedro oikórõ guare peteĩ torménta pe márpe? (Ehecha pe taʼanga oĩva iñepyrũme.) b) ¿Mbaʼérepa Pedro oñepyrũ oñapymi?

PETEĨ pyharépe, Pedro ha umi ótro disípulo ohasa ohóvo kanóape mar de Galilea, ha ojagarra chupekuéra peteĩ torménta. Haʼekuéra ojapo ikatúva guive ani hag̃ua oñeundi. Péro peichahágui ohechásapyʼa hikuái Jesúspe oguataha oúvo pe y ári. Pedro heʼi chupe ikatúpa avei haʼe oguata pe y apére. Jesús heʼi chupe ikatuha. Upémarõ Pedro osẽ pe kanóagui, oñepyrũ oguata pe y ári ha oho Jesús oĩha gotyo. Péro sapyʼaitérõ g̃uarã oñepyrũma oñapymi. ¿Mbaʼérepa oiko hese upéva? Pórke omaña pe torméntare ha okyhyjeterei. Upéi Pedro pyaʼe ojerure ajúda Jesúspe, ha Jesús ojagarra chupe ipógui ha heʼi: “Ajépa rejeroviaʼiete. ¿Mbaʼére piko péicha ndepyʼamokõi?” (Mat. 14:24-32).

2. ¿Mbaʼépa ñahesaʼỹijóta ko artíkulope?

2 Ko artíkulope ñahesaʼỹijóta pe rreláto oñeʼẽva Pédrore ha ñarrespondéta mbohapy porandu: 1) ¿Mbaʼéichapa Pedro ohechauka ojeroviaha Jehováre? 2) ¿Mbaʼérepa ikangy ijerovia? Ha 3) ¿mbaʼépa ojapo ojerovia jey hag̃ua? Pedro ehémplo ñanepytyvõta ‘ñañakarama hatã hag̃ua ñande jeroviáre’ (1 Cor. 16:13).

 JAJEROVIA JEHOVÁRE

3. a) ¿Mbaʼérepa Pedro oñanima oguata pe y ári? b) ¿Mbaʼépa ñande jajapo jahechauka hag̃ua jajeroviaha Jehováre?

3 Jesús heʼírõ guare Pédrope ikatuha oho hendápe, haʼe oguejy pe kanóagui ha oguata pe y ári. Pedro oĩ kuri segúro Jehová oipytyvõtaha chupe, oipytyvõháicha Jesúspe. Ko ehémplo ikatu ñakompara ñane situasiónre. Ñañepyrũrõ guare jastudia la Biblia, ñaaprende kuri Jesús ñaneinvitaha ñamoirũ hag̃ua chupe, ikatu hag̃uáicha oiko ñandehegui idisípulo. Upéi ñañemeʼẽ Jehovápe ha jajevautisa. ¿Mbaʼérepa jajapo koʼã mbaʼe? Pórke ndajadudái ni michĩmi Jehová ha Jesús ñanepytyvõtaha (Juan 14:1; elee 1 Pedro 2:21).

4, 5. ¿Mbaʼérepa iñimportánte pe fe?

4 Pe fe ningo iñimportanteterei, pórke ñanepytyvõ jajapo hag̃ua heta mbaʼe haʼetévaicha núnka ndaikatumoʼãiva jajapo (Mat. 21:21, 22). Por ehémplo, Pedro oreko rupi fe, oguata kuri pe y ári. Ñande avei jajapóma heta sakrifísio jajerovia rupi. Oime vaʼerã ñakambiáma heta mbaʼépe, upévare umi hénte ohechakuaa koʼág̃a ñanediferenteha. Ñande jajapo kuri koʼã kámbio jahayhúgui Jehovápe ha haʼe ñanepytyvõgui (elee Colosenses 3:5-10). Avei jajerovia rupi, ñañemeʼẽ Jehovápe ha jaiko iñamígoramo. Mbaʼeve ningo ndaikatúi vaʼerãmoʼã jajapo Ñandejára nañanepytyvõirire (Efes. 2:8).

5 ¿Mbaʼérepa iñimportánte avei pe fe? Pórke ñanemombarete ñambohovái hag̃ua Satanáspe (Efes. 6:16). Ñande fe ñanepytyvõ avei jagueropuʼaka hag̃ua umi provléma. Jehová ningo opromete omeʼẽtaha ñandéve opa mbaʼe ñaikotevẽva jajeroviáramo hese ha jaservi porãramo chupe (Mat. 6:30-34). Jarekóramo fe, ikatúta avei jaiko opa árare pe paraísope (Juan 3:16).

JAJEROVIA JEHOVÁ ÑANEPYTYVÕTAHA

6, 7. a) ¿Mbaʼérehepa ikatu ñakompara pe yvytu ha umi oláda omondýi vaʼekue Pédrope? b) ¿Mbaʼérepa jaʼekuaa oimeraẽvagui ikatuha ikangy ijerovia?

6 Ñañeʼẽmi jeýna Pédrore. ¿Mbaʼérepa haʼe okyhyje kuri oguatávo pe y ári? La Biblia heʼi nomañavéi hague Jesúsre, síno pe torméntare (Mat. 14:30). Péicha rupi ikangy ijerovia ha oñepyrũ oñapymi. Pe yvytu ha umi oláda ikatu ñakompara umi provléma ha umi tentasión oñepresentávare káda día. Péro ani ñanderesarái Jehová ikatuha ñanemombarete ñaaguanta hag̃ua, ijetuʼúramo jepe umi mbaʼe jahasáva. Ñapensaitereíramo ñane provlemakuérare, ikatu avei ñande fe ikangy ha jaduda Jehová ñanepytyvõtaha.

7 Kualkiér kristiánogui ikatu ikangy ijerovia. ¿Mbaʼérepa jaʼe upéva? Pórke la Biblia heʼi pe fálta de fe haʼeha “pe pekádo ndahasyietéva ñandereity hag̃ua” (Heb. 12:1). Pédrore oiko haguéicha, ñande avei ikatu japerde ñande fe jajúramo jajepyʼapyeterei ñane provlemakuérare. ¿Mbaʼéichapa ikatu jaikuaa noiméipa ñande jerovia ikangy hína ohóvo? Jahechamína unas kuánta pregúnta ñanepytyvõtava jaikuaa hag̃ua upéva.

8. ¿Mbaʼérepa ikatu jaduda Jehová promesakuéragui?

8 ¿Jasegípa jajerovia Jehová promesakuérare? Por ehémplo, haʼe opromete koʼẽrõite ohunditaha ko múndo aña. Péro, ¿mbaʼépa oikóta jahejáramo umi vyʼarã oĩva ko múndope hoʼupa ñane tiémpo? Ikatu jaju jaduda pe fin hiʼag̃uimbaitemaha (Hab. 2:3). Jahechami ótro ehémplo. Jehová opromete operdonataha ñande pekádo Jesús sakrifísio rupive. Péro ñañemoĩramo ñapensaiterei umi mbaʼe vai yma jajapo vaʼekuére, ikatu hína jaduda Jehová ‘operdonamaha ñande pekádo’ (Hech. 3:19). Oikóramo  upéva, ndajavyʼamoʼãi jaservívo Jehovápe ha ndajapredikasemoʼãvéima.

9. ¿Mbaʼépa ikatu oiko jajúramo ñamotenonde ótra kósa ndahaʼéiva Jehová servísio?

9 ¿Jaservípa gueteri Jehovápe ñande pyʼaite guive? Ñambaʼapo jejopýramo Jehová servísiope, jajeroviáta ñande “pyʼaite guive pe esperánsare ipahaite peve”. Péro, ¿mbaʼépa ikatu oiko jajúramo ñamotenonde ótra kósa? Ñapensamína jajagarraha peteĩ traváho oñegana porãháme, péro nomeʼẽvéima ñandéve tiémpo jaservi porã hag̃ua Jehovápe yma guaréicha. ¿Mbaʼépa oikóta ñanderehe? Ikatu ikangy ñande jerovia, ha ‘ñaneateʼỹma’ jaservi hag̃ua Jehovápe ñande pyʼaite guive (Heb. 6:10-12).

10. ¿Mbaʼérepa jaʼekuaa jajeroviaha Jehováre ñaperdonáramo umi ñaneofendévape?

10 ¿Hasýpa ñandéve ñaporoperdona hag̃ua? Oĩ jave ñaneofendéva, ¿ñandepochýpa ha nañañeʼẽvéi chupe? Jajapóramo upéicha, jahechauka hína ñapensaitereiha ñandejehénte. Péro ñaporoperdonáramo, ojekuaa ñanderehe jajeroviaha Jehováre. ¿Mbaʼérepa jaʼe upéva? Pórke péicha añoite Jehová ñaneperdonáta avei (Luc. 11:4). Ñaperdonávo ñande rapichápe, jahechauka jaipotaha Jehová ovyʼa ñandereheve ha jajeroviaha haʼe ñaneperdonataha. Koʼã mbaʼe iñimportanteve hína jaiko rangue ñapensa umi ótro osufri vaʼerãha ofalla haguére ñanendive. Jesús disipulokuéra oikuaa vaʼekue tekotevẽha oreko fe ikatu hag̃uáicha oporoperdona. Upévare, Jesús heʼírõ guare chupekuéra operdona vaʼerãha heta vése hapichakuérape, umi disípulo ojerure chupe: “Orepytyvõna rojeroviave hag̃ua” (Luc. 17:1-5).

11. ¿Mbaʼépa ndajajapói vaʼerã oĩ jave oñemoñeʼẽva ñandéve?

11 ¿Ñandepochýpa oĩ jave oñemoñeʼẽva ñandéve? Peteĩ ermáno oñemoñeʼẽ jave ñandéve, ñapensa vaʼerã mbaʼéichapa  ñanepytyvõta umi konsého omeʼẽva. Péro jaikóramo jaheka deféktonte pe persónare, térã umi mbaʼe heʼívare ñandéve, ndaideprovechomoʼãi umi konsého (Prov. 19:20). Jaaprovechákena pe situasión ñaaprende hag̃ua mbaʼéichapa opensa Jehová.

12. ¿Mbaʼépa jahechauka jaikóramo jajekeha umi odirihívagui kongregasión?

12 ¿Jajekehápa umi omoakãvagui kongregasión? Umi isrraelíta ohendúrõ guare pe notísia vai oguerúva umi 10 espía, oñepyrũ ojekeha Moisés ha Aaróngui. Upévare Jehová heʼi Moiséspe: “¿Mbaʼépa ajapove vaʼerã ojerovia hag̃ua cherehe hikuái?” (Núm. 14:2-4, 11, NM). Umi isrraelíta ohechauka ndojeroviaiha Jehováre, oñepyrũrõ guare ojekeha umi kuimbaʼe haʼe omoĩvagui omoakã hag̃ua chupekuéra. Péicha avei, jaikóramo jajekeha umi kuimbaʼe Jehová omoĩvagui odirihi hag̃ua kongregasión, jahechauka hína japerdeha jahávo ñande fe.

13. ¿Mbaʼérepa ndovaléi ñañentrega oiméramo jahechakuaa ikangyha ñande jerovia?

13 Ñahesaʼỹijo rire koʼã pregúnta, ikatu hína jahechakuaa ikangyha ñande jerovia. Péro ani ñañentrega. Ñanemanduʼákena apóstol Pedro jepe okyhyje hague ha ikangy chugui ijerovia. Ha heta vése avei Jesús oñemoñeʼẽ entéro umi apóstolpe ‘ojeroviaʼi’ haguére (Mat. 16:8). Upéicharõ jepe, ikatu ñaaprende peteĩ mbaʼe iñimportantetereíva Pédrogui. Jahechamína mbaʼépa haʼe ojapo oñepyrũ rire oduda ha oñapymi.

MBAʼÉICHAPA IKATU ÑAMOMBARETE JEY ÑANDE JEROVIA

14, 15. a) ¿Mbaʼépa ojapo Pedro oñepyrũrõ guare oñapymi? b) ¿Mbaʼéichapa ikatu jajesareko meme Jesúsre?

14 ¿Mbaʼépa ojapo Pedro oñepyrũvo oñapymi? Haʼe ningo ijyta vaʼekue, ha ikatu kuri ohupyty pe kanóa oytahápente (Juan 21:7). Péro Pedro ndojapói upéva. ¿Mbaʼérepa? Pórke noñehaʼãi ojesalva ijeheguínte, síno omaña Jesúsre ha ojerure chupe ajúda. Oiméramo jahechakuaa ikangyha ñande jerovia, jasegi vaʼerã Pedro ehémplo. Péro, ¿mbaʼéichapa ikatu jajapo upéva?

15 Jahecha haguéicha, Pedro omaña kuri Jesúsre. Ñande avei ‘jajesareko meme vaʼerã Jesús rehe’ (elee Hebreos 12:2, 3). Péro ñande ningo ndajahechái Jesúspe Pedro ohecha haguéicha chupe. Upéicharõ, ¿mbaʼéichapa ikatu jajesareko meme hese? Jastudiávo opa umi mbaʼe haʼe heʼi ha ojapo vaʼekue, ha ñañehaʼãvo jasegi iñehémplo. Upéva tuichaiterei ñanepytyvõta ñande fe imbarete jey hag̃ua. Jahechamína koʼág̃a mbaʼéichapa ikatu jasegi Jesús ehémplo.

Jasegíkena Jesús ehémplo, ha ñande fe imbaretevéta (Ehecha párrafo 15)

16. ¿Mbaʼéichapa ikatu ñamombarete ñande jerovia la Biblia rupive?

16 Ñamombarete ñande jerovia la Biblia rupive. Jesús oĩ vaʼekue segúro la Biblia ouha Jehovágui ha pype oĩha umi konsého ideprovechovéva (Juan 17:17). Ikatu hag̃uáicha jajerovia mbarete Jesús ojerovia haguéicha, káda día jalee vaʼerã la Biblia, jastudia ha jajepyʼamongeta vaʼerã umi mbaʼe ñaaprendévare. Ha oimérõ oĩ umi mbaʼe nañantendeporãiva, tekotevẽ ñainvestiga ha ani japyta ñantende porãʼỹre. Por ehémplo, ¿reimépa segúro jaikoha umi ára pahápe? Oiméramo reduda hína, iporãta restudiárõ umi profesía oñeʼẽva umi ára paháre. ¿Redudápa Jehová okumplitaha opa mbaʼe opromete vaʼekue? Oimérõ upéicha, ikatu rehesaʼỹijo umi profesía oñekumplíma vaʼekue. ¿Reimépa konvensído umi konsého oĩva la Bíbliape ideprovechoha ñane tiémpope? Releéramo umi ermáno rembiasakue, ohechaukáva mbaʼéichapa la Biblia oipytyvõ chupekuéra okambia hag̃ua, nde fe imbarete jeýta (1 Tes. 2:13). *

17. a) ¿Mbaʼépa oipytyvõ Jesúspe oaguanta hag̃ua heta mbaʼe ijetuʼuetereíva? b) ¿Mbaʼéichapa ikatu jasegi Jesús ehémplo?

 17 Ñapensa meme Jehová promésare. Jesús opensa meme vaʼekue umi mbaʼe Jehová oprometévare chupe. Upéicha rupi oaguanta heta mbaʼe ijetuʼuetereíva (Heb. 12:2). Haʼe ndohejái odistrae chupe ko múndo oikuaveʼẽva (Mat. 4:8-10). ¿Mbaʼéichapa ikatu jasegi iñehémplo? Ñapensa memévo Jehová oprometévare ñandéve. Por ehémplo, ikatu ñañeimahina ñaimemaha pe paraísope. Ikatu voi jaskrivi téra jadivuha mbaʼépa jajaposéta upépe. Ikatu avei japrepara peteĩ lísta ha ñamoĩ pype máva mávandipa ñañemongetase pe múndo pyahúpe orresusita rire. Ñapensákena Jehová oprometeha káda únope umi mbaʼe porãite.

18. ¿Mbaʼépa ñanepytyvõta jajeroviave hag̃ua?

18 Jajerure Jehovápe tañanepytyvõ jajerovia mbareteve hag̃ua. Jesús omboʼe idisipulokuérape ojerure hag̃ua Jehovápe espíritu sánto (Luc. 11:9, 13). Pe espíritu sánto ñanepytyvõta ñande fe imbareteve hag̃ua, pórke pe fe ou Ñandejára espíritugui. Avei jajerure vaʼerã Jehovápe tañanepytyvõ jaipeʼa hag̃ua ñandejehegui umi mbaʼe ikatúva omokangy ñande jerovia. Por ehémplo, jahechakuaáramo ijetuʼuha ñandéve ñaporoperdona, jajerure Jehovápe tomombarete ñande jerovia ha tañanepytyvõ ñaperdona hag̃ua.

19. ¿Mbaʼeichagua amígopa jaiporavo vaʼerã?

19 Jaiporavo ñane amigorã umi ojerovia mbaretéva. Jesús oñatende porã vaʼekue mávarepa ojeheʼáta. Haʼe oiporavo iñamigorã ijapostolkuérape, pórke haʼekuéra ojerovia mbarete ha iñeʼẽrendu chupe (elee Juan 15:14, 15). Ñande avei jaiporavo vaʼerã ñane amigorã umi ermáno térã ermána oĩ porãva espirituálmente ha iñeʼẽrendúva Jesúspe. Umi amígo oporohayhúva ningo isinséro. Upévare ohechakuaáramo tekotevẽha omeʼẽ ñandéve konsého, ndodudái ojapo hag̃ua upéva. Ha oiméramo ñande la ñameʼẽ vaʼerã pe konsého, haʼekuéra naiprovlémai oasepta hag̃ua (Prov. 27:9).

20. ¿Mbaʼérepa ñaipytyvõ vaʼerã ñande rapichakuérape ojerovia hag̃ua?

20 Ñaipytyvõ ñande rapichakuérape ojerovia hag̃ua Ñandejárare. Jesús heʼi ha ojapo vaʼekue heta mbaʼe ikatu hag̃uáicha idisipulokuéra orekove fe (Mar. 11:20-24). Ñande avei ñaipytyvõ vaʼerã ñande rapichakuérape ojeroviave hag̃ua Ñandejárare. Péicha jajapóramo, ñande fe imbaretevéta (Prov. 11:25). ¿Mbaʼéichapa ikatu ñaipytyvõ ótrope ojeroviave hag̃ua? Japredika jave, ikatu jaexplika umi héntepe mbaʼérepa jarovia Ñandejára oexistiha, mbaʼéicha rupípa jaikuaa haʼe oñeinteresaha ñanderehe ha haʼete voi oskrivika hague la Biblia. Péro ñande ikatu avei ñaipytyvõ ñane ermanokuérape ojeroviave hag̃ua. Por ehémplo, ñahendúramo peteĩ ermáno ojekehaha umi odirihívagui kongregasión, nañamboykéi vaʼerã chupe upe haguére. Tekotevẽ ñanepasiénsia hese ha ñaipytyvõ chupe ikatu hag̃uáicha ojeroviave Jehováre ha okonfia umi ermánore (Jud. 22, 23). Oiméramo nde peteĩ mitãrusu térã mitãkuña reiméva eskuéla térã koléhiope, ¿mbaʼépa rejapo oñeñeʼẽ jave pe evolusiónre? Ani rekyhyje eñeʼẽ hag̃ua pe kreasiónre. Ikatu hína nde profesór ha ne kompañerokuéra ohendu porã umi mbaʼe reexplikáva.

21. ¿Mbaʼépa Jehová opromete ñandéve?

21 Jahecha haguéicha, Pedro okyhyjérõ guare ha ou ikangy chugui ijerovia, Jehová ha Jesús oipytyvõ chupe. Upe rire, Pedro orrekupera jey ife ha oiko chugui ehémplo entéro kristiánope g̃uarã. Jehová opromete ñandéve ñanepytyvõtaha jajerovia mbarete hag̃ua (elee 1 Pedro 5:9, 10). Ñañehaʼãkena siémpre ñamombareteve ñande fe. Upéva ningo núnka nañambyasymoʼãi.

^ párr. 16 Ehecha umi artíkulo “La Biblia okambia chupekuéra”, osẽva jepi Ñemañaha púvlikope.