Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Ñemañaha (ojestudiáva)  |  Septiembre de 2015

Jehová ohechauka ñanderayhuha

Jehová ohechauka ñanderayhuha

“¡Pepensamína mbaʼeichaitépa pe Túva ñanderayhu!” (1 JUAN 3:1)

PURAHÉI: 91, 13

1. a) ¿Mbaʼépa heʼi vaʼekue apóstol Juan? b) ¿Mbaʼépa jahupytýta jajepyʼamongetáramo Juan heʼi vaʼekuére?

APÓSTOL Juan heʼi vaʼekue: “¡Pepensamína mbaʼeichaitépa pe Túva ñanderayhu!” (1 Juan 3:1). Heʼívo péicha haʼe oipota ñapensa mbaʼéichapa Jehová ohechauka ñanderayhuha. Jajepyʼamongetáramo koʼã mbaʼére, oikóta ñandehegui Ñandejára amigoite ha jahayhuvéta chupe.

2. ¿Mbaʼérepa oĩ opensáva Ñandejára ndohayhuiha chupe?

2 Ñambyasýramo jepe, heta persóna opensa Ñandejára ndohayhuiha chupekuéra. Oimoʼã hikuái noñeinteresaiha avavére, siémpre omoĩha rrégla ha okastigaha umi nokumplírivape. Oĩ rrelihión omboʼéva Ñandejára ipyʼahatãha ha iñañaha. Opa koʼã mbaʼére heta oĩ opensáva ndaikatuiha jahayhu chupe. Oĩ avei opensáva Ñandejára ohayhuha enterovévape hembiapo vaíramo jepe. Péro ñande jastudiáva la Biblia jaikuaa porã mbaʼépa Jehová opensa. La Biblia heʼi Ñandejára voi haʼeha mborayhu, ha upévare ombou hague Itaʼýrape omano hag̃ua ñanderehehápe (Juan 3:16; 1 Juan 4:8). Upéicharõ jepe, oĩ Jehová siérvo odudáva haʼe ohayhuha  chupe. Ikatu ningo opensa péicha ohasa haguére peteĩ mbaʼe ijetuʼuetereíva.

3. ¿Mbaʼérepa jaʼekuaa Ñandejára ñanderayhuha?

3 ¿Mbaʼérepa ikatu ñapensa Jehová ñanderayhuha? Pórke haʼe voi ñandeapo vaʼekue ha omeʼẽ ñandéve ñande vída (elee Salmo 100:3-5). La Biblia ohenói Adánpe “Ñandejára raʼy” (Luc. 3:38). Avei Jesús omboʼe vaʼekue Jehová haʼeha ‘ñande Ru oĩva yvágape’ (Mat. 6:9). Upévare jaʼekuaa Jehová ñanderayhuha peteĩ túva ohayhuháicha itaʼýrape.

4. a) ¿Mbaʼeichagua Túvapa hína Jehová? b) ¿Mbaʼépa jahecháta ko artíkulope ha pe ótro oúvape?

4 Heta persónape itúva omaltrata vaʼekue imitãme, upévare okakuaa rire ijetuʼu chupe oñeimahina hag̃ua peteĩ túva ikatuha ohayhu ifamíliape. Péro Jehová núnka nañanembosufríri. Haʼe ningo pe Túva ivuenovéva enterovévagui (Sal. 27:10). Jehová ñanderayhueterei ha oñangareko ñanderehe de diferénte fórma. Amáske jahechakuaa mbaʼeichaitépa ñanderayhu, koʼýte jahayhuvéta chupe (Sant. 4:8). Ko artíkulope jahecháta cuatro kósa Jehová ojapóva ohechauka hag̃ua ñanderayhuha. Ha pe artíkulo oúvape katu jahecháta cuatro mbaʼe ikatúva jajapo ñademostra hag̃ua jahayhuha chupe.

JEHOVÁ IMBAʼEPORÃ

5. ¿Mbaʼe mbaʼépa omeʼẽ ñandéve Jehová?

5 Apóstol Pablo oĩrõ guare Aténaspe ohecha upe siudápe ojeadoraha hetaiterei imáhen. Ha umi hénte katu opensa umíva omeʼẽha chupekuéra la vída. Upémarõ Pablo heʼi umi héntepe: “Ñandejára ojapo vaʼekue ko múndo ha opaite mbaʼe oĩva ipype”. Avei heʼi: “Haʼe rupínte opavave oikove, orrespira ha oreko opa mbaʼe. [...] Haʼe rupi ningo jaikove, jakuʼe ha jaiko” (Hech. 17:24, 25, 28). Jehová ñanderayhúgui omeʼẽmbaite ñandéve umi mbaʼe ñaikotevẽva ikatu hag̃uáicha jaikove ha javyʼa. Jahechamína mbaʼépa umíva.

6. ¿Mbaʼéichapa Jehová oprepara vaʼekue ko yvy? (Ehecha pe taʼanga oĩva iñepyrũme.)

6 Ñapensamína ñane planétare. La Biblia heʼi Jehová omeʼẽha ko yvy “yvypórape” (Sal. 115:15, 16). Umi sientífiko ningo hetaiterei plátama ogasta oñehaʼãvo ojuhu ótro planéta ojoguáva ñande yvýpe. Péro koʼág̃a peve ndojuhúi hikuái mbaʼeve. Jehová oprepara vaʼekue ko yvy ikatu hag̃uáicha jaikove pype. Hiʼarive ojapo voi chugui peteĩ lugár iporãitereíva, ikatuhápe javyʼa ha jaiko trankílo porã (Is. 45:18). Ñapensávo koʼã mbaʼére, katuete jahechakuaa Jehová ñanderayhuetereiha (elee Job 38:4, 7 ha Salmo 8:3-5).

7. ¿Mbaʼéichapa Jehová ohechauka avei ñanderayhuha?

7 Jehová ohechauka avei ñanderayhuha ñandeapóvo ijoguaháramo (Gén. 1:27). Upéicha rupínte ikatu jahechakuaa haʼe ñanderayhuha ha ñande avei ikatu jahayhu chupe. Upéva ningo ñanembovyʼa, umi taʼýra ovyʼaháicha itúva odemostrávo ohayhuha chupekuéra. Jesús heʼi vaʼekue ovyʼaha “umi ohechakuaáva oikotevẽha Ñandejárare”. Upévare ñañemoag̃ui vaʼerã Jehováre (Mat. 5:3). La Biblia heʼi haʼe ‘omeʼẽrasapaha ñandéve opa mbaʼe ñanembovyʼáva’ (1 Tim. 6:17). Upéicharõ, ikatu hína ñaĩ  segúro Jehová imbaʼeporãitereiha ha ñanderayhuha (Sal. 145:16).

JEHOVÁ ÑANEMBOʼE

8. ¿Mbaʼérepa jaipota Jehová ñanemboʼe?

8 Umi túva ohayhúva ifamília, oñehaʼã ohekomboʼe chupekuéra ikatu hag̃uáicha osẽ porã. Péro koʼág̃arupi heta túva ndorrespetái la Biblia heʼíva ha ndaikatúi omboʼe ifamíliape mbaʼépa oĩ porã ha mbaʼépa oĩ vai. Upéicha rupi, umi mitã nontendéi heta mbaʼe ha ndojevyʼapái pe ogapýpe (Prov. 14:12). Jehová katu idiferénte. Haʼe ‘núnka ndofallái avavépe’ ha ogia porã ifamiliakuérape (Sal. 31:5). Avei ohechauka mbaʼeichagua persónapa haʼe ha omombeʼu ñandéve mbaʼéichapa jaadora vaʼerã chupe. Hiʼarive ñanemboʼe mbaʼéichapa jaiko porãvéta (elee Salmo 43:3). Jahechamína mbaʼe mbaʼépa Jehová ñanemboʼe ñanderayhúgui.

Umi túva osegi Jehová ehémplo omboʼévo ifamíliape la Biblia, ha oipytyvõvo chupekuéra oiko hag̃ua Jehová amígoramo (Ehecha párrafo 8 guive 10 peve)

9, 10. a) ¿Mbaʼérepa Jehová ñanemboʼe heta mbaʼe iñimportánteva? b) ¿Mbaʼépa ñanemboʼe avei Jehová?

9 Jehová ñanemboʼe heta mbaʼe iñimportánteva oipotágui jaikuaa porãve chupe (Sant. 4:8). Omombeʼu avei ñandéve mbaʼéichapa héra. Jehová réra oaparese hetaiterei vése la Bíbliape, hetaiteve vése umi ótro téragui. Avei ñanemboʼe mbaʼeichagua persónapa haʼe. Por ehémplo, ñapensávo pe kreasiónre jahechakuaa iñarandu ha ipoderosoitereiha (Rom. 1:20). Ha jaleévo la Biblia katu jahecha hekojoja ha ñanderayhuha. Jaikuaavévo Jehovápe, koʼýte ñañemoag̃uive hese.

10 Jehová avei ñanemboʼe ñande haʼeha ifamília. Ha heʼi ñandéve mbaʼépa jajapo vaʼerã ikatu hag̃uáicha jaservi chupe pyʼaguapýpe ha peteĩ ñeʼẽme. La Biblia heʼi Jehová nañandeapói hague jadesidi hag̃ua ñandejeheguínte mbaʼépa oĩ porã ha mbaʼépa oĩ vai (Jer. 10:23). Haʼe oikuaa mbaʼépa iporãve ñandéve g̃uarã. Upéicha rupi, javyʼaséramo ha jaikoséramo pyʼaguapýpe, ñaneñeʼẽrendu ha jarrespeta vaʼerã chupe. Jehová ñanemboʼe koʼã mbaʼe pórke ñanderayhu.

11. ¿Mbaʼépa Jehová opromete ñandéve?

11 Umi túva ojepyʼapy ifamília renonderãre ha oipota osẽ porã hikuái. Péro la majoría umi hénte ndoikuaái mbaʼépa ohaʼarõ chupekuéra, upévare oipurupa lénto itiémpo ombaʼapo ha okonsegi hag̃ua umi mbaʼe ko múndo oikuaveʼẽva (Sal. 90:10). Péro ñande jaservíva Jehovápe jaagradese chupe ñanepytyvõ haguére javyʼa hag̃ua, ha opromete rupi omeʼẽtaha ñandéve peteĩ futúro iporãitereíva.

JEHOVÁ ÑANDEKORREHI

12. ¿Mbaʼépa ojapo Jehová oipytyvõ hag̃ua Caín ha Barúcpe?

12 Jehová ohechárõ guare Caín ojapo potaiteha peteĩ mbaʼe ivaietereíva, heʼi chupe: “¿Mbaʼéreiko la ndepochyete ha nderovapuku reikóvo? ¿Che piko ndoroguerohorymoʼãi mbaʼe reñehaʼãrõ rejapo pe iporãva?”. Ha upéi oadverti chupe: “Rejaposéramo ivaíva, pe pekádo neraʼarõma hína nde raperãme” (Gén. 4:6, 7, NM). Péro Caín nopenái Jehováre ha upe rire heta osufri (Gén. 4:11-13). Heta tiémpo rire, Jehová ohecha peteĩ isiérvo hérava Baruc nopensaiha hekópe, ha upevakuére ou ikaneʼõ ha oñedesanima. Upémarõ Jehová heʼi  chupe tekotevẽha okambia opensa lája. Baruc ohendu ikonsého ha upéicha rupi ojesalva (Jer. 45:2-5).

13. ¿Mbaʼépa oaprende vaʼekue Ñandejára siervokuéra ohasárõ guare umi mbaʼe ijetuʼúva?

13 Pablo heʼi vaʼekue: “Jehová okorrehi umi ohayhúvape; añetehápe haʼe oinupã umi oguerekóvape itaʼýraramo” (Heb. 12:6). Jahechaháicha, Jehová ñandegia ha ñandekorrehi ñanderayhu rupi. Haʼe ningo ñanedisiplina tekotevẽ jave, ha avei ñanepytyvõ ñamehora hag̃ua. La Biblia omombeʼu Ñandejára opermiti hague José, Moisés ha David ohasa umi provléma ijetuʼúvare. Koʼã situasiónpe haʼekuéra oaprende heta mbaʼe ideprovéchova, ikatu hag̃uáicha okumpli porã umi rresponsavilida Jehová omeʼẽva chupekuéra upe rire. Koʼã ehémplo ohechauka Jehová oapojaha isiervokuérape ha oipytyvõha chupekuéra omehora hag̃ua. Jaleévo koʼã rreláto jahechakuaa mbaʼeichaitépa Jehová ñanderayhu (elee Proverbios 3:11, 12).

14. ¿Mbaʼéichapa Jehová ohechauka ñanderayhuha jajavy jave?

14 Jajavy jave Jehová ñandekorrehi, ha jaaseptáramo pe disiplína, jahechakuaáta haʼe ñanderayhuha. Proféta Isaías heʼi vaʼekue Jehová ‘operdonakuaaha’ ñane rembiapo vaikue (Is. 55:7, ÑÑB). Ha rréi David heʼi avei: “Haʼe ningo operdona umi mbaʼe vai jajapóva, ha omonguera entéro ñane mbaʼasy. Ñandejára ñandesalva ani hag̃ua ñamano, haʼe ohechauka ñanderayhu  ha ñandeporiahuverekoha” (Sal. 103:3, 4, 12, NM). Jahechaháicha, Jehová siémpre oĩ dispuésto ñaneperdonávo. Péro ñande jaasepta vaʼerã pe konsého ha korreksión, ha ñakambia tekotevẽhápe. Ñanemanduʼákena Jehová ñandekorrehiha ñanderayhu rupínte (Sal. 30:5).

JEHOVÁ OÑANGAREKO ÑANDEREHE

15. ¿Mbaʼéichapa avei Jehová ohechauka ñanderayhuha?

15 Umi túva ohayhúva ifamíliape oprotehe chupekuéra umi pelígrogui. La Biblia heʼi: “Ñandejára oñangareko hína umi iñeʼẽrendúvare, haʼe osalva isiervokuérape umi iñañáva poguýgui” (Sal. 97:10, NM). Ñapensamína: oĩ jave peteĩ mbaʼe ikatúva olastima ñande resa, pyaʼe voi ñasapymi. Péicha avei, Jehová ohechávo jajapeligraha, pyaʼe voi orreaksiona ñandeprotehe hag̃ua. Añetehápe, Jehová oñangareko ñanderehe ñanderayhúgui (elee Zacarías 2:8).

16, 17. ¿Mbaʼéichapa Jehová oñangareko isiervokuérare?

16 Jehová siémpre ojevale umi ánhelre oprotehe hag̃ua isiervokuérape (Sal. 91:11). Por ehémplo, peteĩ ánhel ojuka vaʼekue peteĩ pyharépe 185.000 soldádope, osalva hag̃ua Ñandejára puévlope (2 Rey. 19:35). Síglo primérope, umi ánhel oipytyvõ Pedro, Pablo ha ambue kristianokuérape osẽ hag̃ua kárselgui (Hech. 5:18-20; 12:6-11). Ndaaredemái, peteĩ país de Áfricape oiko vaʼekue peteĩ gérra ivaietereíva. Pe tetã tuichakuére oiko ñemonda, ñorairõ, violasión ha jejuka. Nomanóiramo jepe ni peteĩ Testígo, heta oĩ ijapytypekuéra operdepáva ikosakuéra. Ha ohasa asýramo jepe hikuái, entéronte ohechakuaa Jehová oñangarekoha hesekuéra ha ovyʼa hikuái upe haguére. Peteĩ rrepresentánte de la séde mundiál ovisitárõ guare chupekuéra oporandu umi ermánope mbaʼéichapa oñeñandu. Haʼekuéra heʼi oĩ porãha pórke Jehová oñangareko hesekuéra.

17 Péro sapyʼánte oĩ Jehová siérvo omanóva iñeʼẽrendu haguére chupe. Upéva oiko vaʼekue disípulo Estébanre ha ambue siervokuérare. Upéicharõ jepe, Jehová siémpre oprotehe ipuévlope Satanás ñuhãgui (Efes. 6:10-12). La Biblia ha umi puvlikasión rupive, haʼe ñandeavisa umi pelígrogui. Por ehémplo, heʼi ñandéve jaipurukuaa vaʼerãha Internet, ndajaikói vaʼerãha pláta rapykuéri, ni ndajahechái vaʼerãha umi pelíkula ha videohuégo itieʼỹva ha ivioléntova. ¡Ajépa ojekuaa porãite Jehová oñangarekoha ñanderehe ha ñanderayhuha!

PETEĨ PRIVILÉHIO TUICHÁVA

18. ¿Mbaʼéichapa nde reñeñandu reikuaávo Jehová nderayhuha?

18 Moisés ojepyʼamongetárõ guare umi áño ohasávare iservísiope, ohechakuaa Jehová ohayhuha chupe. Upévare heʼi: “Ehechaukána oréve káda pyhareve orerayhuha ha nembaʼeporãha, péicha siémpre ropurahéita ha roikóta vyʼápe” (Sal. 90:14, NM). Apóstol Juan heʼi vaʼekue avei: “¡Pepensamína mbaʼeichaitépa pe Túva ñanderayhu!” (1 Juan 3:1). ¡Ajépa tuichaite priviléhio jareko jaikuaa haguére Jehová ñanderayhuha!