Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Ñemañaha (ojestudiáva)  |  Septiembre de 2015

¿Ikatúpa rekonfia ne konsiénsiare?

¿Ikatúpa rekonfia ne konsiénsiare?

“Ñakumplíramo koʼã mbaʼe ikatúta ñane korasõ ha ñanekonsiénsia potĩ.” (1 TIM. 1:5)

PURAHÉI: 57, 48

1, 2. ¿Mávapa omeʼẽ ñandéve ñane konsiénsia, ha mbaʼérepa jaagradese vaʼerã upévare?

JEHOVÁ ojapo vaʼekue yvyporakuérape ikatu hag̃uáicha odesidi ijehegui. Péro jadesidi porã hag̃ua, omeʼẽ ñandéve ñane konsiénsia. ¿Mbaʼépa hína pe konsiénsia? Upéva ningo peteĩ mbaʼe jarekóva ñandepyʼapýpe ha heʼíva ñandéve mbaʼépa oĩ porã ha mbaʼépa oĩ vai. Ñahekomboʼe porãramo ñane konsiénsia, katuete ñanepytyvõta jajapo hag̃ua iporãva ha ñamboyke hag̃ua ivaíva. Ñandejára omeʼẽvo ñandéve ñane konsiénsia, ohechauka ñanderayhuha ha oipotaha javyʼa.

2 Heta persóna ndoikuaái la Biblia omboʼéva, upéicharõ jepe ojapo mimi iporãva ha omboyke avei ivaíva (elee Romanos 2:14, 15). ¿Mbaʼérepa? Pórke ikonsiénsia oavisa chupekuéra mbaʼépa oĩ vai. Yvyporakuéra ndorekóirire konsiénsia, ko múndo ivaieteve vaʼerãmoʼã. Upévare javyʼa vaʼerã Jehová omeʼẽ haguére enterovévape peteĩ konsiénsia.

3. ¿Mbaʼéichapa ñandedeprovéchota kongregasiónpe ñahekomboʼe porãramo ñane konsiénsia?

3 La majoría umi hénte nohekomboʼéi ikonsiénsia. Péro ñande  si, pórke jaipota ñanepytyvõ jaikuaa hag̃ua mbaʼépa oĩ porã ha mbaʼépa oĩ vai. Ikatu hag̃uáicha ñahekomboʼe ñane konsiénsia, jalee vaʼerã la Biblia ha ñaaprende umi mbaʼe oĩva pype. Péro ndahaʼéi upévante. Avei ñamombaʼe vaʼerã Ñandejára léi ha ñaime vaʼerã konvensído ideprovechotaha ñandéve. Pablo ohai vaʼekue: “Ñakumplíramo koʼã mbaʼe ikatúta ñane korasõ ha ñanekonsiénsia potĩ ha jajerovia tovamokõiʼỹre, ha upéva ñanemomýita japorohayhu hag̃ua” (1 Tim. 1:5). Ñahekomboʼe porãramo ñane konsiénsia ha ñapenáramo hese, tuichaiterei ñandedeprovéchota kongregasiónpe, pórke ñaipytyvõta oĩ hag̃ua unida ermanokuéra apytépe. Avei jahayhuvéta Jehovápe ha jajeroviavéta hese. Hiʼarive jahechaukáta ñande haʼeha iñamígo tee ha ñambovyʼaseha chupe.

4. ¿Mbaʼépa jajapo vaʼerã ñahekomboʼeséramo ñane konsiénsia?

4 Ñahekomboʼeséramo ñane konsiénsia, ndahaʼéi jaleénte vaʼerã la Biblia ha ñaaprende de memória heta mbaʼe oĩva pype. Tekotevẽ jastudia meme, jajepyʼamongeta pe jaleévare ha jajerure Jehovápe tañanepytyvõ jajapo hag̃ua umi mbaʼe ñaaprendéva. Jastudia jave la Biblia, ñañehaʼãmbaite vaʼerã jaikuaa porã Jehovápe ha jahecha mbaʼépa ogusta térã ndogustái chupe. Péicha ñahekomboʼéramo ñane konsiénsia, amás día ñapensáta Ñandejára opensaháicha.

5. ¿Mbaʼépa jahecháta ko artíkulope?

5 Iporã ñañeporandu: “¿Mbaʼéichapa ahekomboʼe vaʼerã che konsiénsia ikatu hag̃uáicha chepytyvõ adesidi porã hag̃ua? ¿Mbaʼéichapa ikatu ahechauka arrespetaha che ermanokuéra odesidíva? ¿Mbaʼéichapa che konsiénsia chepytyvõ ajapo hag̃ua iporãva? Ko artíkulope jahecháta mbaʼéichapa ñane konsiénsia ikatu ñanepytyvõ mbohapy situasiónpe: 1) ñañatendévo ñande salúre, 2) jaiporavo jave ñane diversionrã, ha 3) japredika jave.

ÑAÑATENDÉVO ÑANDE SALÚRE

6. ¿Mbaʼépa jadesidi vaʼerã jajúramo ñanderasy?

6 La Biblia omeʼẽ ñandéve konsého ñanepytyvõva ñañangareko hag̃ua ñande salúre. Por ehémplo, heʼi ñamboyke vaʼerãha umi mbaʼe ñandeperhudikátava, ha ndovaleiha jakaru rasa térã jaʼu rasa vevída (Prov. 23:20; 2 Cor. 7:1). Péro upéva ndeʼiséi jasegi haguére umi konsého oĩva la Bíbliape nañanderasymoʼãiha ni nañandetujamoʼãiha. Upévare, jajúramo ñanderasy, tekotevẽtamante jadesidi mbaʼe tratamiéntopa jasegíta. Heta paíspe oĩ diferénte kláse de tratamiénto, ha umi ermáno odesidi vaʼerã mavaitévapa osegíta. Upévare sapyʼánte oĩ Testígo oskrivíva sukursálpe oporandu hag̃ua mbaʼeichagua tratamiéntopa ikatu oasepta.

7. ¿Mbaʼéichapa ikatu jadesidi porã tekotevẽtarõ jasegi peteĩ tratamiénto?

7 Umi sukursál ha umi ansiáno ndorekói autorida heʼi hag̃ua avavépe mbaʼeichagua tratamiéntopa osegi vaʼerã, ni oñeporandúramo chupekuéra (Gál. 6:5). Péro umi ansiáno ikatu ñanepytyvõ ñandete jadesidi porã hag̃ua, ohechaukávo ñandéve Jehová heʼíva Iñeʼẽme. Por ehémplo, ikatu ohechauka ñandéve Ñandejára heʼiha: “Ani peiporu tuguy” (Hech. 15:29). Ko mandáto ohechauka porã ndaikatuiha jaasepta umi tratamiénto ojepuruhápe tuguy, térã umi cuatro párte prinsipál orekóva pe tuguy. Péro, ¿mbaʼépa jaʼekuaa umi párte michĩvévare oñenohẽva pe tuguýgui? ¿Ikatúpa jaasepta umíva? Káda Testígo odesidi vaʼerã upéva ikonsiénsia heʼiháicha chupe. Oĩ ermáno oaseptáva umíva ikonsiénsia  opermiti rupi chupe, péro ótrope katu nopermitíri. * ¿Mbaʼe téxtopa ikatu avei ñanepytyvõ jadesidi hag̃ua mbaʼe tratamiéntopa jaaseptáta?

8. ¿Mbaʼéichapa Filipenses 4:5 ñanepytyvõ jadesidi hag̃ua mbaʼe tratamiéntopa jasegíta?

8 Jadesidi mboyve mbaʼe tratamiéntopa jasegíta, ñanemanduʼa vaʼerã Proverbios 14:15 heʼívare: “Ivýrova oguerovia opa mbaʼe ohendúva, iñakãguapýva katu oikuaa mamópa opyrũta”. Koʼág̃a ningo oĩ heta mbaʼasy naipohãiva gueteri. Upévare, ñapensa porã vaʼerã oĩ jave heʼíva ñandéve oikuaaha peteĩ pohã térã tratamiénto katuete ñanemonguerátava. Pablo heʼi vaʼekue: “Opavave toikuaa peneakãguapyha” (Filip. 4:5). Upéva heʼise ñañatende vaʼerãha ani hag̃ua jadeskuida ñande servísio Jehovápe, jaikógui jajepyʼapyeterei ñande salúre. Jajepreokupaitereírõ ñande salúre, amo ipahápe ñapensaitereíta ñandejehéntema (Filip. 2:4). Jaikuaa ningo ñaneimperfékto aja ikatuha gueteri ñanderasy. Upévare jahechauka vaʼerã pe iñimportantevéva ñandéve g̃uarã ndahaʼeiha ñande salu, síno ñande servísio Jehovápe (elee Filipenses 1:10).

¿Reikópa remboliga ótrope opensa hag̃ua ndéicha? (Ehecha párrafo 9)

9. a) Heʼiháicha Romanos 14:13, 19, ¿mbaʼépa ndovaléi jajapo jadesidíta jave mbaʼéichapa jakuidáta ñande salúre? b) ¿Mbaʼépa ikatu oiko ndajasegíriramo Pablo konsého?

9 Yma ningo Rómape oĩ vaʼekue kristiáno okritikáva ótro ermánope pórke nopensái haʼekuéraicha. Por ehémplo, algúno noñontendéi tembiʼu káusare, térã otaky ojuehe pórke oĩ ofesteháva umi arete ha oĩ avei ndofesteháiva. Péro ojapóvo hikuái upéicha, oapeligra pe unida oĩva kongregasiónpe. Upévare Pablo heʼi chupekuéra: “Peteĩ kuimbaʼe heʼi peteĩ día iñimportanteveha umi ótrogui, ha ótro katu heʼi entéro día peteĩchapanteha, káda uno oguerovia vaʼerã upe odesidi vaʼekue oĩ porãha” (elee Romanos 14:5, 13, 15, 19, 20). Ko ehémplo ohechauka ndovaleiha ñañemohatã ñande jaʼévapente, ha avei jarrespeta vaʼerãha ñane ermanokuéra opensáva. Ndajaikói vaʼerã jajopy chupekuéra opensa hag̃ua ñandéicha. ¿Mbaʼépa ikatu oiko ndajasegíriramo pe konsého Pablo omeʼẽ vaʼekue? Ikatu ñaofende umi ermánope ha ñambyai pe unida oĩva kongregasiónpe. Por ehémplo, Európape peteĩ matrimónio oñehaʼãmbaite okonvense heta ermánope ojogua hag̃ua peteĩ pohã ha osegi hag̃ua peteĩ diéta. Oĩ umi oroviáva chupekuéra, péro oĩ avei umi ndojeroviáiva hesekuéra. Amo ipahápe, pe pohã ndorresultái ha heta ermáno ipochy upévare. ¿Mbaʼérepa oñepyrũ pe provléma? Jaikuaaháicha, ko matrimónio oreko derécho odesidi hag̃ua hoʼútapa pe pohã ha osegítapa pe diéta. Péro haʼekuéra ojapo vai pórke omboliga umi ermánope osegi  hag̃ua avei upe tratamiénto. Upéva káusare umi ermáno ojoavypa ha noĩvéi hikuái peteĩ ñeʼẽme kongregasiónpe.

10. ¿Mbaʼérepa jarrespeta vaʼerã ñane ermanokuéra odesidíva? (Ehecha pe taʼanga oĩva iñepyrũme.)

10 Sapyʼánte ningo ikatu nañandegustapái peteĩ mbaʼe odesidíva peteĩ ermáno, por ehémplo okuida lája isalúre. Péro ndovaléi jakritika ni jajopy chupe okambia hag̃ua opensáva. Ikatu hína pe ermáno ofalta ohekomboʼeve ikonsiénsia (1 Cor. 8:11, 12). Térã ikatu avei ñande hína la tekotevẽva ñahekomboʼeve ñane konsiénsia. Amo ipahápe, káda uno odesidi vaʼerã la ojapótava ha oĩ rresponsávle la odesidívare.

JAIPORAVO JAVE ÑANE DIVERSIONRÃ

11, 12. ¿Mbaʼéichapa ñanepytyvõ Eclesiastés 3:4 ha Gálatas 5:19-21 jadesidi porã hag̃ua jajedivertíta jave?

11 Jaikuaaháicha, iporã jajediverti ha japuka. Jehová voi ñandeapo vaʼekue upéicha. Salomón heʼi kuri oĩha “tiémpo japuka hag̃ua” ha “tiémpo jajeroky hag̃ua” (Ecl. 3:4, NM). Péro ikatu hag̃uáicha ideprovécho ñandéve umi diversión, tekotevẽ jaiporavo porã ha jahecha mboy tiémpopa jaipurúta upearã. ¿Mbaʼéichapa ñanepytyvõ ñane konsiénsia jadesidi porã hag̃ua?

12 La Biblia heʼi ndoikemoʼãiha Ñandejára Rréinope umi “hekovaíva, hekokyʼáva, notĩriva hembiapo vai hag̃ua, omombaʼeguasúva ñandejára guaʼu, ojapóva paje, ijarhélva, ipyʼaróva, ipochy reíva, oiko vaíva ótrondi, ojoavýva, osegíva yvyporakuéra omboʼéva, iñenvidiósova, ikaʼúva, ofarreáva itarovávaicha” (Gál. 5:19-21). Upévare, iporã ñañeporandu: “¿Opermitípa chéve che konsiénsia añentretene umi depórte violéntore, térã chemoakãrakúva chefanátiko hag̃ua? ¿Opermitípa chéve che konsiénsia ahecha umi pelíkula ohechaukáva iporãrõguáicha pe inmoralida sexuál, jekaʼu térã pe espiritísmo?”.

13. ¿Mbaʼéichapa 1 Timoteo 4:8 ha Proverbios 13:20 ñanepytyvõ jadesidi porã hag̃ua jajedivertíta jave?

13 Jahechamína avei ambue téxto ñanepytyvõtava jaiporavo porã hag̃ua ñane diversionrã. Por ehémplo 1 Timoteo 4:8 heʼi: “Pe ehersísio jajapóva ñamombarete hag̃ua ñande rete, [...] ideprovécho”. Péro upéva ndeʼiséi ikatuha jajapo ehersísio oimehaichagua persónandi. Proverbios 13:20 heʼi: “Pe oikóva iñarandúvandi, iñarandúta avei. Pe ojeheʼáva ivýrovandi katuete osẽ vaíta” (NM). Jahechaháicha, jadesidi porãséramo jaiporavo jave ñane diversionrã, tekotevẽ ñahekomboʼe ñane konsiénsia la Biblia rupive.

14. ¿Mbaʼéichapa Romanos 14:2-4 oipytyvõ peteĩ mitãkuñáme?

14 Christian ha Daniela ningo peteĩ matrimónio Testígo. Haʼekuéra mokõi ifamília, lodovéa mitãkuña. Christian omombeʼu: “Peteĩ okasiónpe rojapo jave ore estúdio de família, roñemongeta umi diversiónre. Entéronte rokomentajoa oĩha umi diversión iporãva ha ivaíva. Avei reñemongeta umi persóna roñeamigávare. Peteĩva che rajy omombeʼu ikoléhiope oĩha Testígo ojapóva umi mbaʼe noĩporãmbáiva, ha heta vése haʼe opensáma avei ojapo umi mbaʼe. Upémarõ roexplika chupe káda uno jaipuru vaʼerãha ñane konsiénsia jadesidi hag̃ua mbaʼépa jajapóta térã mávarepa jajeheʼáta” (elee Romanos 14:2-4).

Peteĩ kristiáno ohekomboʼe porãva ikonsiénsia ojeprotehe heta pelígrogui (Ehecha párrafo 14)

15. ¿Mbaʼéichapa Mateo 6:33 ñanepytyvõ jadesidi hag̃ua mboy tiémpopa jaipurúta jajediverti hag̃ua?

15 ¿Mbaʼépa ndéve g̃uarã la iñimportantevéva? ¿Igústopa ndéve reho rreunionhápe, repredika ha restudia la Biblia? ¿Térãpa rejedivertisénte? Jesús omeʼẽ vaʼekue peteĩ konsého ñanepytyvõtava  jadesidi hag̃ua mboy tiémpopa jaipurúta jajediverti hag̃ua. Haʼe heʼi: “Pemotenonde meméke Ñandejára Rréino ha ihustísia, ha opa koʼã mbaʼe oñemeʼẽta avei peẽme” (Mat. 6:33). Jadesidíta jave mbaʼéichapa jaipurúta ñane tiémpo, ñane konsiénsia ñanemomanduʼa vaʼerã ko konséhore.

JAPREDIKA JAVE

16. ¿Maʼerãpa ñanemokyreʼỹ vaʼerã ñane konsiénsia?

16 Ñahekomboʼe porãramo ñane konsiénsia, ndahaʼéi ñandeavisátanteva ani hag̃ua jajapo ivaíva, síno heʼíta avei ñandéve jajapo hag̃ua iporãva. Por ehémplo, ñanemokyreʼỹta japredika hag̃ua, tahaʼe de kása en kása térã oimeraẽ lugárpe. Pablo oñandu vaʼekue opredika vaʼerãha, upévare oskrivi: “Upéva ningo che ajapónte vaʼerã voi. ¡Añetehápe ivaíta chendive ndapredikáiramo umi marandu porã!” (1 Cor. 9:16). Jasegíramo Pablo ehémplo, ñakumplíta ñane rresponsavilida ha ñane konsiénsia nañandestorvamoʼãi. Avei pe predikasión rupive ñameʼẽta oportunida umi héntepe ohekomboʼe hag̃ua ikonsiénsia. Pablo heʼi voi: “Roikuaauka rupi pe añetegua oiko orehegui ehémplo iporãva enterovépe g̃uarã” (2 Cor. 4:2).

17. ¿Mbaʼépa ojapo peteĩ mitãkuña ohekomboʼe porã rupi ikonsiénsia?

17 Jahechamína peteĩ ermána hérava Jacqueline ehémplo. Orekórõ guare 16 áño, ikoléhiope ojestudia pe teoría de la evolusión. Haʼe ningo siémpre opartisipámi pe klásepe, péro oñeñeʼẽrõ guare ko témare ikonsiénsia nopermitíri chupe opartisipa. ¿Mbaʼérepa? Pórke haʼe ndoapojaséi ko enseñánsa. Upévare odesidi oexplika iprofesórpe mbaʼérepa haʼe ndogueroviái pe evolusión. Jacqueline ningo ni noimoʼãi iprofesór ohendu porãtaha chupe. Hiʼarive ojerure chupe oñeʼẽ hag̃ua pe kreasiónre ikompañerokuéra renondépe. Jacqueline oñeñandu porãiterei ikonsiénsia oipytyvõ haguére chupe ojapo hag̃ua iporãva. ¿Nemokyreʼỹpa avei ne konsiénsia redefende hag̃ua pe iporãva?

18. ¿Mbaʼérepa ñahekomboʼe porã vaʼerã ñane konsiénsia?

18 Jastudiáramo la Biblia, jajepyʼamongeta hese ha jajapóramo umi mbaʼe ñaaprendéva, ñahekomboʼe porãta ñane konsiénsia. Ha upéva ningo iñimportanteterei, pórke ñanepytyvõta ñaneñeʼẽrendu hag̃ua Jehovápe ha siémpre jajapóta haʼe oipotáva. ¡Ajépa enterove kristiáno jahupytyse upéva!

^ párr. 7 Ehecha lívro ‘Jaikókena Ñandejára mborayhúpe’, páhina 215 guive, 218 peve, ha La Atalaya del 15 de junio de 2004, “Preguntas de los lectores”, páhina 29 guive 31 peve.