IMITÃ guive Antoine Skalecki oreko peteĩ kavajumi omoirũva chupe tódo el tiémpo. Oñondive ostira vaʼerã hikuái pe kárga oguenohẽva peteĩ mína de karvóngui. Haʼekuéra oguata vaʼerã peteĩ túnel puku ha iñypytũvare, opytáva 500 métro yvyguýpe. Antoine ohómante vaʼerã ombaʼapo pe mína de karvónpe. Itúva ningo oñelastima vai kuri oñederrumbárõ guare peteĩ mína, upéicha rupi ifamília omondómante ko mitãme ombaʼapo hag̃ua nueve óra al día. Hiʼárive, peteĩ vuéltape Antoine haimete omano oikórõ guare peteĩ derrúmbe.

Erramiénta oipuru vaʼekue umi ombaʼapóva mínape; mína oĩva Dechýpe, opytáva Sin-le-Noble ypýpe, ombaʼapo haguépe Antoine Skalecki

Oikórõ guare pe primera gérra mundiál, omano mas de un millón kuimbaʼe Franciagua, ha upévare ofaltapa umi ombaʼapo vaʼerã umi mína de karvónpe. Upémarõ Francia ojapo peteĩ akuérdo Polóniandi septiembre de 1919-pe. ¿Mbaʼérepa? Pórke opa rire pe primera gérra mundiál, Polonia oñeindependisa ha hetaiterei héntema oĩ upe paíspe, péro Fránciape katu mbovypaite la hénte. Áño 1931-pe g̃uarã Fránciape ováma 507.800 poláko, ha la majoría oho opyta nórte gotyo, oĩvehápe umi mína de karvón. Upe rire umi poláko oformáma avei ifamília. Antoine tuvakuéra oĩ vaʼekue avei umíva apytépe. Upévare haʼe onaséma Fránciape.

Umi poláko ningo iguápo ha irrelihiosoiterei. Antoine, koʼág̃a orekóva 90 áño, omombeʼu: “Che avuélo Joseph omombaʼeterei vaʼekue la Biblia, ha upéva haʼe oaprende vaʼekue che visavuélogui”. Umi hénte Franciagua ningo ndairrelihiosoguasúi. Péro umi poláko katuetei káda domingo oñemonde porã ha oho tupaópe, ojepokuaa haguéicha voi Polóniape. Ha umi ivesíno fransés oñembohorýramo jepe hesekuéra upe haguére, haʼekuéra osegi upe kostúmbre.

Pe lugár héravape Nord-Pas-de-Caláispe umi poláko ohendu primera ves oñeñeʼẽha umi Estudiánte de la Bíbliare. Koʼã Estudiánte de la Biblia opredikáma oikóvo upérupi 1904 guive. Áño 1915 guive osẽ pe rrevísta Ñemañaha idióma polákope, ha 1925 guive katu osẽ pe rrevísta koʼág̃a hérava ¡Despertad!. Heta família oasepta pe añetegua koʼã rrevísta rupive. Avei oipytyvõ chupekuéra pe lívro El Arpa de Dios, osẽ vaʼekue avei polákope.

Áño 1924-pe Antoine hentekuéra oikuaa ypy umi Estudiánte de la Bíbliape, peteĩ itio ohórõ guare  primera ves peteĩ rreunionhápe. Upe áñope avei umi Estudiánte de la Biblia ojapo primera ves peteĩ asambléa idióma polákope Bruay-en-Artóispe. Upe riremínte upe lugárpe avei pe rrepresentánte de la séde mundiál, hérava Joseph Rutherford, ojapo peteĩ diskúrso ha ohendu chupe 2.000 persóna. Haʼe oñesorprende ohechávo oĩha hetave poláko, ha heʼi: “Jehová pendegueru Fránciape peikuaa hag̃ua pe añetegua. Koʼág̃a otokáma peẽme ha pene famíliape peipytyvõ hag̃ua umi franséspe. Oĩ gueteri heta persóna ohendu vaʼerã pe predikasión ha Jehová omoĩvéta heta predikadór.”

¡Ha upeichaite oiko! Umi ermáno poláko iguapoiterei predikasiónpe, iguapoháicha umi mínape. Oĩ umi oho jeýva hetãme oikuaauka hag̃ua pe añetegua oaprende ramóva. Umíva apytépe oĩ vaʼekue Teofil Piaskowski, Szczepan Kosiak ha Jan Zabuda.

Heta ermáno poláko opytánte Fránciape ha osegi opredika kyreʼỹme umi ermáno fransésndi. Peteĩ asambléa oiko vaʼekuépe áño 1926-pe Sin-le-Nóblepe, oĩ vaʼekue 1.000 persóna seksión polákape ha 300 seksión fransésape. Pe Anuario de 1929 omombeʼu: “Ko áño aja, 332 ermáno poláko oñemeʼẽ Jehovápe ha ojevautisa”. Oñepyrũ mboyve pe segunda gérra mundiál, Fránciape oĩ vaʼekue 84 kongregasión, ha umívagui 32 voi oĩ idióma polákope.

Fránciape, unos kuánto ermáno poláko oviaha peteĩ asamblearã. Pe kartélre heʼi “Testigos de Jehová”

Áño 1947-pe, pe goviérno de Polonia oinvita umi poláko oho vaʼekuépe Fránciape ou jey hag̃ua hetãme, ha heta testígo de Jehová oho jey Polóniape. Upéicharamo jepe, upe áñope Fránsiape oaumenta 10 por ciento umi puvlikadór, pórke umi ermáno poláko ombaʼapo jejopy umi ermáno fransésndi. Ha 1948 guive 1950 peve katu hetaitereivéntema hikuái, oaumenta 20, 23 ha 40 por ciento voi. Áño 1948-pe pe sukursál de Francia onombra primera ves cinco superintendénte de sirkuítope, ikatu hag̃uáicha oñepytyvõ porãve umi ermáno pyahúpe. Umíva apytépe oĩ cuatro ermáno poláko, ha peteĩva haʼe kuri Antoine Skalecki.

Jahecha haguéicha, umi poláko iguapoiterei vaʼekue umi mínape ha avei predikasiónpe. Ha ikatu jaʼe osẽ porã hague hikuái hembiapokuérape, pórke heta testígo de Jehová Franciagua haʼe hína ifamiliare. Péro koʼag̃aite peve upe paíspe oĩ heta persóna ótro paisgua oaprendéva pe añetegua. Heta ermáno oho jey vaʼekue Polóniape, ha heta avei opytánte Fránciape. Péro enterovévante osegi ijypykuéra poláko ehémplo ha opredika kyreʼỹme pe marandu porã. (Manduʼarã oúva Fránciagui.)