Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Ñemañaha (ojestudiáva)  |  Agosto de 2015

¿Mbaʼépa ñaaprende Juana ehémplogui?

¿Mbaʼépa ñaaprende Juana ehémplogui?

OPAVAVE lénto oikuaa Jesús oreko hague 12 apóstol. Péro saʼi oĩ imanduʼáva idisipulokuéra apytépe oĩ hague avei unos kuánto kuña oipytyvõ meméva chupe. Peteĩva héra kuri Juana (Mat. 27:55; Luc. 8:3).

¿Mbaʼéichapa Juana oipytyvõ vaʼekue Jesúspe, ha mbaʼépa ikatu ñaaprende iñehémplogui?

¿MÁVAPA RAKAʼE JUANA?

Juana haʼe vaʼekue “Cuza rembireko, [peteĩ] kuimbaʼe oñangarekóva Herodes rógare”. Amalisia Cuza oadministra vaʼekue opa mbaʼe Herodes Antipas rógape. Juana oĩ kuri umi kuña Jesús omonguera vaʼekue apytépe. Haʼe avei omoirũ Jesús ha ijapostolkuérape oviaha jave hikuái (Luc. 8:1-3).

Umi mboʼehára hudío omboʼe vaʼekue kuimbaʼekuéra noñeʼẽguasúi vaʼerãha umi kuñándi. Avei heʼi hikuái kuñanguéra ndovaleiha oñemongeta umi kuimbaʼe ndahaʼéivandi ihénte, ha ni mbaʼeveichavérõ ndoviahái vaʼerã hendivekuéra. Péro Jesús ndosegíri koʼã kostúmbre. Upévare naiprovlemaiete voi Juana ha umi ótra kristiána omoirũ haguére chupe ha ijapostolkuérape iviáhepe.

Entéro umi omoirũva Jesúspe oĩ vaʼerã dispuésto ojapóvo sakrifísio. Ha Juana ojapo upéva. Chupe nointeresái oĩramo otakýva hese omoirũ haguére Jesúspe ha ijapostolkuérape. Jesús omombaʼeterei vaʼekue umichagua persónape, upévare heʼi: “Che sy ha che ermanokuéra ningo koʼã ohendúva Ñandejára Ñeʼẽ ha ojapóva” (Luc. 8:19-21; 18:28-30). ¡Ajépa ñanemokyreʼỹete jaikuaávo Jesús omombaʼeha umi ojesakrifikávare hesehápe!

OIPURU IMBAʼEREPY OIPYTYVÕ HAG̃UA JESÚSPE

La Biblia heʼi Juana ha umi ótra kristiána ‘oipuru hague imbaʼerepy oñatende hag̃ua’ Jesús ha ijapostolkuérare (Luc. 8:3). Péro peteĩ eskritór ohai: “Lucas ndeʼiséi kuri koʼã kuña okosina hague, ojohéi hague tembiporu térã orremenda hague umi ao. Oiméne ningo ojapo raʼe hikuái koʼã mbaʼe tekotevẽ jave, [...] péro Lucas noñeʼẽi kuri koʼãichagua traváhore”. Amalisia koʼã kuña oipuru ipláta ha ikosakuéra oipytyvõ hag̃ua Jesús umívape.

Jesús ha ijapostolkuéra ningo nombaʼapói oviaha jave opredika hag̃ua. Upévare oime vaʼerã ndohupytypái chupekuéra ojogua hag̃ua hembiʼu térã umi mbaʼe oikotevẽva. Hiʼarive oĩ kuri éntre 20 rupi hikuái. Añetehápe, heta vése umi hénte orresivi porã ha oipytyvõ chupekuéra, péro la Biblia omombeʼu oreko hague avei hikuái peteĩ “pláta ryru” ani hag̃ua oñasaingo ótrore (Juan 12:6; 13:28, 29). Ikatu  oime Juana ha umi ótra kuña omoirũva chupekuéra oipytyvõ opaga hag̃ua umi gásto.

Oĩ opensáva umi kuña hudía ndorekói hague ipláta ni imbaʼerepy tee. Péro oĩ heta informasión upe tiempopegua ohechaukáva peteĩ kuña ikatuha okonsegi koʼã mbaʼe, por ehémplo 1) ndorekóiramo ni peteĩ ermáno ha orresivi peteĩ erénsia itúva omano rire, 2) oreko rupi peteĩ propieda, 3) ojedivorsia rupi ha imenare ombosuéldo chupe, 4) opyta rupi viúda ha iména oheja chupe peteĩ propieda térã okovra hag̃ua peteĩ suéldo, térã 5) haʼe voi ombaʼapo ogana hag̃ua.

Jesús disipulokuéra ojapo opa ikatúva oipytyvõ hag̃ua chupe, ha ijapytepekuéra amalisia oĩ vaʼekue avei umi kristiána iplátava. Juana ningo Herodes administradór rembireko térã hembirekore, ha upévare oĩ opensáva haʼe ipláta hague. Peteĩ persóna iplátava haʼeichaguámante ikatúta kuri ojogua pe ao hepyetéva Jesús oipuru vaʼekue (Juan 19:23, 24). Peteĩ eskritóra heʼi voi upeichagua ao “ndaikatumoʼãiha ojogua peteĩ peskadór rembireko”.

La Biblia nomombeʼúi Juana omeʼẽ hague pláta. Upéicharõ jepe, haʼe ojapo opa ikatúva oipytyvõ hag̃ua Jesúspe. Upéva ñanemboʼe káda uno ikatuha jadesidi mbaʼépa ñameʼẽta jaapoja hag̃ua Ñandejára Rréino. Ha ñanemanduʼa vaʼerã Jehová oipotaha ñameʼẽ opa ikatúva ha vyʼapópe (Mat. 6:33; Mar. 14:8; 2 Cor. 9:7).

JESÚS OMANO RIRE

Oiméne Juana ohecha kuri ojejukárõ guare Jesúspe. Upérõ oĩ avei umi ótro kuña ‘omoirũ vaʼekue Jesúspe ha oñatende hemikotevẽre oĩrõ guare Galiléape, ha oĩ avei umi kuña ou vaʼekue hendive Jerusalénpe’ (Mar. 15:41). Jesúspe ojeguerahárõ guare pe sepultúrape “umi kuña omoirũ vaʼekue [chupe] Galilea guive, oho avei omaña pe sepultúrare ha ohecha mbaʼéichapa oñemoĩ hetekue. Haʼekuéra oho oprepara umi mbaʼe ryakuã porã ha umi aséite hyakuã asýva”. Lucas avei omombeʼu “María Magdalena, Juana, [ha] María Santiago sy”, ou jey hague pe sepultúrape pe domingo. Upépe ojotopa hikuái umi ánhel ndive, ha koʼãva omombeʼu chupekuéra Jesús orresusita hague (Luc. 23:55–24:10).

Juana ha umi ótra kristiána ojapo opa ikatúva Jesús rehehápe

Oime vaʼerã Juana oĩ vaʼekue umi disípulo apytépe oñembyatypárõ guare hikuái Jerusalénpe Pentekostés áño 33-pe. Upépe oĩ kuri avei Jesús sy ha iñermanokuéra (Hech. 1:12-14). Jahecha haguéicha, Juana ména ombaʼapo vaʼekue Herodes Antipas rógape. Upéicha rupi Juana oikuaa heta mbaʼe pe goviérnogui. Ha oiméne haʼe la omombeʼu vaʼekue Lúcaspe heta mbaʼe Heródesgui, upéi Lucas ohai umi detálle ikuatiañeʼẽme. Avei Lucas añoite imanduʼa Juánare hérarupi (Luc. 8:3; 9:7-9; 23:8-12; 24:10).

Juana ehémplo ñanemboʼe heta mbaʼe iñimportánteva. Haʼe oservi Jesúspe opa ikatuháicha. Avei ovyʼaitereíne raʼe oipuru haguére irrekursokuéra ikatu hag̃uáicha oipytyvõ Jesús ha idisipulokuérape opredika hag̃ua hikuái. Ha oĩramo jepe heta oñembohorýva hese, haʼe osegi omoirũ Jesúspe. Umi ermána koʼag̃agua osegi vaʼerã Juana ehémplo ha oservi avei Jehovápe ipyʼaite guive.