Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Ñemañaha (ojestudiáva)  |  Julio de 2015

Jaapojákena Jehovápe ha igoviérno

Jaapojákena Jehovápe ha igoviérno

“Haʼekuéra ndojeheʼái ko múndore.” (JUAN 17:16)

PURAHÉI: 63, 129

1, 2. a) ¿Mbaʼérepa ñande jaservíva Jehovápe nañañentremetéi ko múndore? (Ehecha pe taʼanga oĩva iñepyrũme.) b) ¿Mbaʼépa opensa heta persóna ipaís, ikultúra, térã iclúb rehe? c) ¿Mbaʼépa oiko umi hénte opensáramo iñimportanteveha ótrogui?

KOʼÁG̃ARUPI heta hénte opensa hetã, irrása térã ikultúra iñimportanteveha umi ótrogui, upévare ndaijaʼéi hikuái ojuehe. Péro ñande jaservíva Jehovápe nañapensái upéicha, pórke jahayhu Ñandejárape ha jajapose opa mbaʼe haʼe oipotaháicha (1 Juan 5:3). Upévare, tahaʼe haʼéva pe lugár jaikoha térã ñanase hague, siémpre ñañehaʼã jasegi umi konsého haʼe omeʼẽva. Ñandéve g̃uarã iñimportanteve hína jaapoja Jehovápe ha igoviérno (Mat. 6:33). Upévare ikatu jaʼe ‘ndajajeheʼaiha ko múndore’ (Is. 2:4; elee Juan 17:11, 15, 16).

2 Heta persóna opensa ipaís, ikultúra térã ikostumbrekuéra iporãveha umi ótrogui. Oĩ avei umi ifanatikoitereíva iclúb rehe térã ohuga jave ipaís. Upévare oĩ heta kompeténsia, ha avei oĩ ndaijaʼéiva ojuehe térã ojuka voi hapichápe idiferénte haguére chugui. Jaikuaaháicha, ñande testígo de Jehová nañañentremetéi koʼã mbaʼépe. Upéicharõ jepe, jaiko rupi ko  múndope, koʼã mbaʼe ikatu ñandeafekta ñandéve ha ñane famíliape. Ikatu avei umi goviérno odesidi umi mbaʼe iñinhústova. Oikóramo ñanderehe upéva, katuete ñanembosufrietereíta, pórke Jehová ñandeapo vaʼekue jahechakuaa hag̃ua mbaʼépa oĩ porã ha mbaʼépa oĩ vai (Gén. 1:27; Deut. 32:4). Upévare, peteĩ goviérno ojapo jave peteĩ inhustísia, sapyʼánte ñañeʼẽ vaise hese. ¿Mbaʼépa jajapo vaʼerã upéicha jave? ¿Ñañemoĩtapa jakopi avei hesekuéra, térãpa ñakirirĩmítante? Ñañatendékena ani peichahágui ñañentremete ko múndore.

3, 4. a) ¿Mbaʼérepa ñande kristianokuéra nañañentremetéi polítikape ni ndajahái gerrahápe? b) ¿Mbaʼépa jahecháta ko artíkulope?

3 Heta vése umi goviérno opresiona umi héntepe oapoja hag̃ua chupekuéra oĩ jave provléma polítiko ha gérra. Péro ñande kristianokuéra nañañentremetéi polítikape ni ndajahái gerrahápe, pórke jasegi Jesús ehémplo (Mat. 26:52). Nañapensái peteĩ párte oĩva Satanás múndope iñimportanteveha ótrogui (2 Cor. 2:11). Añetehápe ñande ndajajeheʼaiete voi ko múndore (elee Juan 15:18, 19).

4 Péro ñaneimperfékto rupi, sapyʼánte ikatu ndajahayhupái umi idiferéntevape ñandehegui (Jer. 17:9; Efes. 4:22-24). Ko artíkulope jahecháta mbaʼéichapa la Biblia ñanepytyvõ jasegi hag̃ua Jehová ha Jesús ehémplo ha avei ani hag̃ua jadespresia avavépe. Koʼã mbaʼe ñanepytyvõta jaapoja hag̃ua Ñandejára goviérno.

MBAʼÉREPA JAAPOJA JEHOVÁPE AÑOITE

5, 6. ¿Mbaʼépa Jesús opensa umi diferénte grúpo de persónare, ha mbaʼérepa opensa péicha?

5 ¿Mbaʼépa ikatu jajapo jahechakuaáramo jafavoreseveha algún grúpope? Upéicha jave iporã ñañeporandu: “¿Mbaʼépa ojapo vaʼerãmoʼã Jesús?”. Haʼe oĩrõ guare ko yvy ape ári, umi hénte oikóva Judea, Galilea ha Samáriape ndojoguerahaporãi. Por ehémplo, umi hudío ha samaritáno noñeʼẽi ojupe (Juan 4:9). Umi fariséo ha saduséo katu manterei ojodiskuti (Hech. 23:6-9). Umi hudío ostudia vaʼekue Moisés Léi opensa iñimportanteveha umi ótro ndostudiái vaʼekuégui (Juan 7:49). Avei umi hénte ndochaʼéi umi impuésto kovraháre ni umi rrománore (Mat. 9:11). Jesús omboʼe pe añetegua ha oikuaa Ñandejára oiporavo hague umi hudíope ipuevlorã. Upéicharõ jepe, núnka nomboʼéi idisipulokuérape haʼekuéra iñimportanteveha umi ótrogui (Juan 4:22). Upéva rangue, omboʼe chupekuéra ohayhu vaʼerãha opavavépe (Luc. 10:27).

6 Jesúspe g̃uarã ndaipóri peteĩ grúpo de persóna iñimportantevéva ótrogui. ¿Mbaʼérepa haʼe opensa upéicha? Pórke Jehová ojapo vaʼekue yvyporakuérape omyenyhẽ hag̃ua ko yvy ha oĩ hag̃ua diferénte rrása (Gén. 1:27, 28). Upéicharõ, Jehová ha Jesús nopensái oĩha rrása, país térã idióma iñimportantevéva ótrogui (Hech. 10:34, 35; Apoc. 7:9, 13, 14). Ha ñande ñapensa vaʼerã avei péicha (Mat. 5:43-48).

7, 8. a) ¿Mávapepa jaapoja ñande kristianokuéra, ha mbaʼérepa? b) ¿Mbaʼéguipa nañanderesaráiri vaʼerã?

7 Ñande kristianokuéra nañaiméi yvypóra goviérno favórpe, síno jaapoja Jehová goviérno añoite. ¿Mbaʼérepa? Pórke jaikuaa porã Jehová haʼeha pe governánte ikatupyryvéva. Hardín de Edénpe, Satanás oipota vaʼekue oñepensa Jehová nogovernaporãiha yvyporakuérape. Haʼe oimoʼã ikatupyryveha Ñandejáragui, ha oipota yvyporakuéra opensa avei péicha. Jehová oheja káda uno odesidi oapojátapa chupe térãpa nahániri. Upévare iporã ñañeporandu: “¿Aĩpa konvensído Jehová haʼeha pe governánte ikatupyryvéva ha upévare cheñeʼẽrendu chupe? ¿Aĩpa segúro Ñandejára  goviérno añoite ikatuha osolusiona umi provléma oĩva ko múndope? ¿Apensápa káda persónante ikatuha odesidi mbaʼépa iporã térã mbaʼépa ivai?” (Gén. 3:4, 5).

8 Por ehémplo, oñeporandúramo ndéve mbaʼépa repensa algún partído polítikore térã peteĩ organisasión oĩvare ko múndope, ¿mbaʼépa eréta? Añetehápe ningo ikatu oĩ persóna iñintensión porãva ha oipytyvõséva umi héntepe. Péro ani ñanderesarái Jehová goviérno añoite ikatuha osolusiona umi provléma ha oipeʼa pe inhustísia oĩva ko múndope. Upévare ñande jaapoja Jehovápe añoite. Ndajajapóirire upéicha, ndaiporimoʼãi kuri unida kongregasiónpe.

9. a) ¿Mbaʼe provlémapa oĩ kuri kongregasión de Coríntope? b) ¿Mbaʼépa Pablo oskrivi chupekuéra?

9 Síglo primérope oĩ kuri peteĩ provléma kongregasión de Coríntope. Upépe oĩ vaʼekue kristiáno oñepyrũva ojodiskuti pórke oĩ oapojáva Páblope, ótro Apólospe, ambue katu Céfaspe ha ótro Crístope. Pablo ojepyʼapyeterei ohendúrõ guare upe oikóva, pórke oikuaa pe provléma ikatuha odividi pe kongregasión. Upévare haʼe oskrivi chupekuéra: “Ani oĩ joavy pende apytépe, ikatu hag̃uáicha peiko oñondivepa peteĩ ñeʼẽme ha pepensa hag̃ua peteĩchapa” (1 Cor. 1:10-13). Ñande avei jasegi vaʼerã ko konsého, ha ndajahejái vaʼerã mbaʼeve odividi ñane kongregasión (elee Romanos 16:17, 18).

10. ¿Mbaʼépa omboʼe raʼe Pablo ohenóirõ guare umi unhídope embahadór?

10 Pablo heʼi vaʼekue umi kristiáno unhídope haʼekuéra ohóta yvágape, upévare nopensái vaʼerãha “umi mbaʼe ko mundopeguáre” (Filip. 3:17-20). * Avei ohenói umi unhídope Ñandejára ha Cristo rrepresentánte, térã embahadór. Peteĩ embahadór oĩva ótro paíspe, noñentremetéi umi provlémare térã pe polítika upepeguáre. Upéicha avei umi unhído noñentremetéi polítikare ni umi provléma oĩvare ko múndope (2 Cor. 5:20). Umi kristiáno oikótava opa ára g̃uarã ko yvy ape ári, oapoja avei Jehová goviérno añoite ha ndojeheʼaiete ko múndore.

¿MBAʼÉPA ÑANEPYTYVÕTA ANI HAG̃UA JADESPRESIA AVAVÉPE?

11, 12. a) Jahechaukaséramo jaapojaha Jehová goviérno, ¿mbaʼépa nañapensái vaʼerã? b) ¿Mbaʼépa oñandu peteĩ ermána umi sérviore? c) ¿Mbaʼépa oipytyvõ pe ermánape ohayhu hag̃ua hapichápe?

11 Heta paíspe, umi hénte oĩ unído oñeʼẽ rupi el mísmo idióma, térã okompati rupi la mísma kultúra ha kostúmbre. Hiʼarive opensa hikuái iñimportanteveha ótrogui. Péro ñande ñañatende vaʼerã ani hag̃ua ñapensa upéicha. Upévare, oiméramo jahechakuaa jafavorese térã jaladeaha peteĩ grúpo de persónape, pyaʼe ñakambia vaʼerã. ¿Mbaʼépa ikatu ñanepytyvõ upearã?

12 Jahechamína peteĩ ermána hérava Mirta ehémplo. * Haʼe onase peteĩ país héra vaʼekuépe Yugoslavia, ha okakuaa peteĩ lugár ndojechaʼeihápe umi hénte oikóvare Sérbiape. Péro upéi ou oaprende Jehovápe g̃uarã entéro rrása peteĩchanteha. Avei oaprende Satanás oipotaha umi hénte ndaijaʼéi ojuehe. Upévare, oñehaʼãmbaite okambia hag̃ua. Péro oikórõ guare peteĩ gérra pe lugár Mirta oikohápe, haʼe oñepyrũ jey ndochaʼéi umi sérviore, ha ni ndopredikaséi voi chupekuéra. Haʼe oikuaa porã upéva noĩporãiha. Upévare, oñemboʼe Jehovápe ha ojerure  chupe oipeʼamínte hag̃ua ikorasõgui umi sentimiénto vai. Avei ojerure toipytyvõmi chupe ikatu hag̃uáicha oiko chugui prekursóra. Mirta heʼi: “Ahechakuaa pe predikasión chepytyvõtaha, upévare asẽve apredika. Añehaʼãmbaite asegi Jehová ehémplo ha añeinteresa umi héntere. Upéva tuichaiterei chepytyvõ aipeʼaite hag̃ua pe ódio che korasõgui”.

13. a) ¿Mbaʼépa omoñeñandu vai vaʼekue Zóilape? b) ¿Mbaʼépa ojapo raʼe Zoila? c) ¿Mbaʼépa ñanemboʼe ko ermána ehémplo?

13 Jahechamína ótro ehémplo. Peteĩ ermána hérava Zoila onase vaʼekue Méxicope, péro upéi ova Európape. Ikongregasiónpe oĩ unos kuánto ermáno ha ermána ou vaʼekue avei América Latínagui. Haʼe omombeʼu oĩha ermáno oñembohorýva ipaísre, ikostúmbrere ha umi músika oñehendúvare hetãme. Upéva ningo omoñeñandu vaieterei Zóilape. Péro ojerure Jehovápe toipytyvõ chupe anivéma hag̃ua oñeñandu péicha. ¿Mbaʼépa ñanemboʼe Zoila ehémplo? Primero, ikatuha ñañeofende oĩrõ oñeʼẽ vaíva ñane retãre, péro ñañehaʼãmbaite vaʼerãha ñañekontrola. Ha segundo, núnka ndajaʼéi ni ndajajapói vaʼerãha mbaʼeve jaapoʼi hag̃ua peteĩ grúpo de persónape. Ñande ningo ndajaipotái ojeiko vai ñande káusare ni nañaofendeséi avavépe, tahaʼe umi ermáno kongregasionpegua térã ótro ñande rapichápe (Rom. 14:19; 2 Cor. 6:3).

14. ¿Mbaʼépa ikatu ñanepytyvõ ani hag̃ua jadespresia avavépe?

14 Entéro jaservíva Jehovápe ko yvy tuichakuére ñaime unído. Upévare arakaʼeve nañapensái vaʼerã ñande siuda térã ñande país iñimportanteveha ótrogui. Ikatu ningo ñande rogayguakuéra térã umi hénte oikóva pe lúgar jakakuaa haguépe, ñanemboʼe jahayhu vaʼerãha ñande país. Ha upévare ikatu koʼág̃a peve sapyʼánte ndajahayhupái umi extranhérope, umi orekóvape ótra kultúra, oñeʼẽva ótro idióma, térã umi hénte de ótra rrásare. Oiméramo oiko jepi nderehe upéva, ¿mbaʼépa nepytyvõta rekambia hag̃ua? Iporã vaʼerã repensa mbaʼépa Jehová heʼi umi persóna omombaʼévare hetã ha oimoʼãva voi ndaiporiha haʼekueraichagua. Upéi, rejapo jave nde estúdio personál térã ne adorasión en família, eheka informasión oñeʼẽva upe témare. Avei ejerure Jehovápe tanepytyvõ ani hag̃ua redespresia avavépe (elee Romanos 12:2).

Jaapojaséramo Jehová goviérno, siémpre ñaneñeʼẽrendúta chupe, oĩramo jepe ñaneamenasáva (Ehecha párrafo 15 ha 16)

15, 16. a) ¿Mbaʼéichapa ñandetrata heta hénte ohechávo ñanediferenteha? b) ¿Mbaʼéichapa sy ha túva ikatu omboʼe ifamíliape oapoja hag̃ua Jehová goviérno?

15 Ñande ningo ñaneñeʼẽrendu Jehovápe, upévare sapyʼánte ñane vesinokuéra, ñane hénte, ñane kompañéro de traváho térã koléhiopegua ohechakuaa ñanediferenteha (1 Ped. 2:19). Jesús heʼi vaʼekue oĩtaha ndaijaʼéiva ñanderehe upe haguére. Ani ñanderesarái la majoría umi hénte ndoikuaaiha mbaʼeve Ñandejára goviérnogui. Upévare nontendéi hikuái mbaʼérepa iñimportanteterei ñandéve jaapoja Jehová goviérno añoite.

16 Jaapojaséramo Jehová goviérno, ñañehaʼãmbaite vaʼerã siémpre ñaneñeʼẽrendu chupe, tahaʼe haʼéva ojeʼéva térã ojejapóva ñanderehe (Dan. 3:16-18). Ikatu ningo umi imitãvévape ijetuʼu ohechauka hag̃ua idiferenteha hapichakuéragui. Por ehémplo, ikatu voi okyhyje ojejopy jave chupekuéra omombaʼe hag̃ua pe vandéra, térã opartisipa hag̃ua umi aktivida ojejapóvape oñembotuicha hag̃ua hetã. Upévare, isy ha itúva oipytyvõ vaʼerã chupekuéra ikatu hag̃uáicha odefende ijerovia eskuélape. Tuvakuéra, ¿mbaʼéichapa ikatu  peipytyvõ pene famíliape? Pejapo jave pene adorasión en família, peñemongeta ha pehecha mbaʼépa Jehová opensa koʼã mbaʼére. Ikatu avei pemboʼe chupekuéra oexplikakuaa hag̃ua umi mbaʼe ogueroviáva, ha tekotevẽha opororrespeta ojapóvo upéva (Rom. 1:16). Ha oiméramo tekotevẽ, peñeʼẽ iprofesorkuérandi peexplika hag̃ua chupekuéra umi mbaʼe pegueroviáva.

JAVALORÁKENA OPA MBAʼE JEHOVÁ OJAPO VAʼEKUE

17. a) ¿Mbaʼépa naiporãi ñapensa? b) ¿Mbaʼérepa ndovaléi ñapensa ñande jajapóvante oĩ porãha?

17 Katuete ningo ñandegusta ñane idióma, ñane kostúmbre, umi lugár jaikoha ha umi tembiʼu jajepokuaáva jaʼu ñanemichĩ guive. Péro ani ñapensa umi mbaʼe ñandéve ñandegustávante iporãveha. ¿Mbaʼérepa? Pórke Jehová okrea heta mbaʼe de diferénte kláse, ikatu hag̃uáicha jadisfruta ikreasióngui (Sal. 104:24; Apoc. 4:11). Upévare, aníkena ñapensa ñande jajapóvante oĩ porãha.

18. ¿Mbaʼépa jahupytýta ñahendúramo ñande rapicha opensáva?

18 Jehová oipota opaichagua persóna oikuaa ha oadora chupe, ha oikove pára siémpre (Juan 3:16; 1 Tim. 2:3, 4). Upévare, ñahendu vaʼerã ñande rapicha opensáva, idiferénteramo jepe ñande ñapensa lájagui. Péicha jajapóramo, javyʼavéta ha jaikóta pyʼaguapýpe ñane ermanokuérandi. Ñande ningo jaapoja Jehová goviérno añoite, upévare nañañentremetéi umi provléma oikóvare ko múndope, ni nañapensái ñaneimportanteveha ótrogui. Jaagradesete ningo Jehovápe ñanemboʼe haguére ñandepyʼaguapy ha ñaneumílde hag̃ua. Katuete ningo ñañeñandu pe salmísta oñeñandu haguéicha. Haʼe heʼi: “Ajépa iporã ha igustoite jahecha ermanokuéra oiko porãmbaha oñondive” (Sal. 133:1, NM).

^ párr. 10 Filipo haʼe vaʼekue peteĩ kolónia rromána. Posívlemente upépe oĩ kuri kristiáno orekóva pe siudadanía rromána. Ha upéva omeʼẽ vaʼekue chupekuéra hetave derécho umi ótro ermánogui, ndorekóiva pe siudadanía rromána.

^ párr. 12 Oĩ téra oñekambiáva.