Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Ñemañaha (ojestudiáva)  |  Julio de 2015

Eservi Jehovápe ‘umi ára ijetuʼúvape’

Eservi Jehovápe ‘umi ára ijetuʼúvape’

ERNESTO, * orekóva mas de 70 áño, heʼi: “Koʼẽ koʼẽre cherasypave, ndaigustoveietéma ningo chéve péicha”. ¿Ndépa reñeñandu avei Ernéstoicha? Oimérõ rehechakuaa nekangy ha nderasypamaha ndeeda rupi, katuete rentende porã chupe. Ha oiméne rentende avei umi mbaʼe heʼíva Eclesiastés kapítulo 12-pe. Pe versíkulo 1 heʼi ñandeeda vove og̃uahẽmaha “umi ára ijetuʼúva” (NM). Péro, ¿heʼisépa upéva reiko vaʼerãha reñamarga upe haguére? Nahániri. Ndeedarámo jepe, nde ikatu revyʼa reservívo Jehovápe.

PESEGÍKENA PEJEROVIA MBARETE

Peẽ ore ermáno ha ore ermanakuéra ijedáva, napeiméi peneaño ko situasión ijetuʼuetévape. Ñandejára siervokuéra yma guare ningo ombohovái vaʼekue avei peẽicha heta provléma ijeda rupi. Por ehémplo, Isaac, Jacob ha Ahíya, opyta vaʼekue isiégo (Gén. 27:1; 48:10; 1 Rey. 14:4). Sara opensa vaʼekue ndovaleveimaha ‘ig̃uaig̃uíma’ rupi (Gén. 18:11, 12). Rréi David katu siémpre “iroʼy” vaʼekue (1 Rey. 1:1). Barzilai ndaikatuvéi vaʼekue odisfruta umi tembiʼu ni umi musikapu rory (2 Sam. 19:32-35). Ha Abrahán ha Noemí katu opyta vaʼekue viúdo (Gén. 23:1, 2; Rut 1:3, 12).

¿Mbaʼépa oipytyvõ rakaʼe chupekuéra osegi hag̃ua oservi Jehovápe ha ovyʼa hag̃ua, iprovléma hetárõ jepe? Abrahán ‘imbarete’ vaʼekue “ojeroviágui Ñandejára promésare” (Rom. 4:19, 20). Peẽ avei ermáno, tekotevẽ pejerovia mbarete. Ha upéva nodependéi hína pende edáre, pende kapasidáre ni pene situasiónre. Jacob avei ikangýma vaʼekue, oĩmíntema tupápe ha ndohechavéima, upéicharõ jepe osegi ojerovia Jehová promesakuérare (Gén. 48:1-4, 10; Heb. 11:21). Koʼág̃arupi avei oĩ heta ermáno ohasáva umichagua situasiónre. Inés, peteĩ ermána de 93 áño, oreko peteĩ mbaʼasy omokangypáva imuskulokuéra. Upéicharamo jepe heʼi: “Che ningo káda día apensa pe paraísore, ha upéva omeʼẽ chéve esperánsa. Káda día ohasáva haʼe peteĩ rregálo omeʼẽva chéve Jehová”. ¡Ajépa ehémplo porãite ñandéve g̃uarã ko ermána!

Ikatu hag̃uáicha pende jerovia imbareteve, tekotevẽ peñemboʼe, pestudia la Biblia ha peho rreunionhápe. Por ehémplo, proféta Daniel oñemboʼe vaʼekue 3 vése al día, ha siémpre ostudia Ñandejára Ñeʼẽ (Dan. 6:10; 9:2). Ana katu viúda ha ijedáramo jepe, arakaʼeve “ndofaltáiva pe témplope” (Luc. 2:36, 37). Peẽ avei pehóramo rreunionhápe ha pekomenta meme, peẽ voi penekyreʼỹta ha pemokyreʼỹta ermanokuérape. Ha ndaikatuvéiramo jepe pejapo heta mbaʼe Jehová servísiope yma guaréicha, penemanduʼákena haʼe siémpre omombaʼetereiha pene orasión (Prov. 15:8).

Neamávle vaʼerã

Péro, ¿mbaʼépa ikatu pejapo ijetuʼúramo peẽme pelee hag̃ua, térã peho hag̃ua Salón del Réinope? Ani peñedesanima, síno peñekonsentra umi mbaʼe ikatúvare pejapo. Por ehémplo, ndaikatúiramo peho Salónpe, ikatu pehendu umi rreunión por teléfono. Peteĩ ermána hérava Isabel, ha orekóva 79 áño ningo ndohechaporãvéima. Péro haʼe ikatu ojeprepara rreunionrã, pórke peteĩ ermáno oimprimi chupe umi rrevísta létra tuichaichávape.

Oime vaʼerã koʼág̃a hembymie peẽme tiémpo yma guarégui. Iporãitéta peaprovecháramo pe tiémpo pehendu hag̃ua la Biblia ha umi puvlikasión ojegraváva, térã algún audiodráma ha diskúrso. Ikatu avei pehenói por teléfono umi ermánope ha peñemongeta hendivekuéra ‘peñomokyreʼỹ hag̃ua pende jerovia rupive’ (Rom. 1:11, 12).

PESEGÍKENA PEPREDIKA

Esegíkena epredika

Cristina, peteĩ ermána orekóva mas de 80 áño, heʼi: “Koʼág̃a ningo ndaikatuvéima ajapo heta mbaʼe yma guaréicha, ha upéva chemoñeñandu vaieterei”. ¿Mbaʼépa ikatu pejapo ani hag̃ua pemboguapy pendejehe upéva? Peteĩ ermáno hérava Peter, orekóva 75 áño, heʼi: “Eñehaʼã epensa umi mbaʼe iporãvare meme. Reñembyasy rangue umi  mbaʼe ndaikatúivare rejapo, eñekonsentra vaʼerã umi mbaʼe ikatúvare rejapo”.

¿Mbaʼéichapa ikatu pesegi pepredika pendeedáramo jepe? Peteĩ ermána hérava Heidi ndaikatuvéima opredika de kása en kása. Péro orekóramo jepe 90 áño potaite, oaprende oipurukuaa hag̃ua komputadóra ikatu hag̃uáicha oskrivi kárta. Oĩ avei ermáno opredikáva plásape térã paráda de kolektívope. Ha umi oikóva ogár de ansiánospe katu opredika umi ombaʼapóvape upépe ha umi ótra persóna ijedávape.

Emokyreʼỹ ermanokuérape

Rréi David ojapo vaʼekue heta mbaʼe Jehová rehehápe ijedáramo jepe. Por ehémplo, okontrivui pláta ha oorganisa heta mbaʼe ojejapo hag̃ua pe témplo (1 Crón. 28:11–29:5). Upéicha avei peẽ ikatu peipytyvõ osegi hag̃ua oprogresa pene kongregasión. ¿Mbaʼéichapa pejapokuaa upéva? Pemokyreʼỹ umi prekursór ha umi ótro ermánope. Ikatu pemeʼẽ chupekuéra algún rregaloʼi, peinvita chupekuéra okaru hag̃ua penendive térã peguerohory chupekuéra. Avei ikatu pejerure Jehovápe oipytyvõ hag̃ua mitãrusukuérape, umi famíliape ha umi ermáno oservívape de tiémpo kompléto. Avei ikatu peñemboʼe umi hasývare térã umi orekóvare rresponsavilida Jehová organisasiónpe.

Peẽ ningo ore ermanokuéra pendevaliosoiterei Jehovápe g̃uarã. Haʼe ningo penderayhueterei ha núnka nopensamoʼãi penderehe ndapevaleveimaha (Sal. 71:9). Koʼẽrõitéma nañandetujamoʼãvéima, ñakumplíramo jepe heta áño. Avei nañañandumoʼãvéima ‘ijetuʼuha umi ára’, síno káda día ñaneresãivereíta ha ikatúta jaservi Jehovápe pára siémpre.

^ párr. 2 Oĩ téra oñekambiáva.