Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Ñemañaha (ojestudiáva)  |  Junio de 2015

“Tekotevẽ ningo peaguanta”

“Tekotevẽ ningo peaguanta”

CLARA * ojevautisa rire, iména oñemoĩ mbarete vaʼekue hese. Haʼe heʼi: “Che ména oproivi vaʼekue chehegui aha rreunionhápe ha ndoipotái voi ni aipuru Ñandejára réra. Ha ohendu sapyʼáramo aipuruha Jehová réra, ipochyetereími vaʼerã”.

Clárape ijetuʼueterei vaʼekue avei omboʼe hag̃ua imembykuérape Jehovágui. Haʼe heʼi: “Che ména oproivi vaʼekue voi oñeñeʼẽ Jehováre ógape. Upévare, ñemiháme astudiámi vaʼerã la Biblia che membykuérandi ha ndaikatúi ni rreunionhápe araha chupekuéra”.

Ko ermána situasión ohechauka porã ijetuʼuetereiha oĩramo peteĩ ñane hénte oñemoĩva ñanderehe jaservi haguére Jehovápe. Péro ikatu hína jahasa hetave mbaʼe ijetuʼúva, por ehémplo, jareko peteĩ mbaʼasy naipohãiva, omano ñane família térã ñane rembiayhu, térã peteĩ ñane hénte oúramo oñemomombyry Jehovágui. ¿Mbaʼépa ikatu ñanepytyvõ jasegi hag̃ua jaservi Jehovápe koʼãichagua situasión ijetuʼúvape?

Apóstol Pablo heʼi vaʼekue: “Tekotevẽ ningo peaguanta” (Heb. 10:36). Péro, ¿mbaʼépa ñanepytyvõta ñaaguanta hag̃ua?

ÑAÑEMBOʼE JEHOVÁPE ÑANDE PYʼAITE GUIVE

Ñaaguanta hag̃ua umi situasión ijetuʼúva, tekotevẽterei ñañemboʼe Ñandejárape ñande pyʼaite guive. Jahechamína peteĩ ehémplo: Ana ohasa vaʼekue peteĩ mbaʼe ijetuʼuetereíva. Peteĩ lunes iména oho itravahohápe, ha upe kaʼarúpe ojeavisa chupe iména omano hague. Ánare oguapyeterei la oikóva. Hiʼarive 30 áñoma omenda hague hikuái ha 52 áñonte oreko kuri iména.

¿Mbaʼéichapa Ana ogueropuʼaka ko situasión? Haʼe oñepyrũ jey ombaʼapo, ha upéva tuicha oipytyvõ chupe, pórke itravahohápe tekotevẽ vaʼekue oñekonsentra porã. Upéicharõ jepe hasyeterei gueteri chupe upe ohasáva. Haʼe omombeʼu: “Cheresay che rováre añemboʼémi Jehovápe che pyʼaite guive, ha ajerure asy chupe tachemombarete aaguanta hag̃ua”. ¿Ohendúpa Jehová iñemboʼe? Ana heʼi: “Ñandejára nachepytyvõirire, chetavyraíma vaʼerãmoʼã. Tuicha ningo chepyʼaguapy aikuaágui haʼe omoingove jeytaha che ménape múndo pyahúpe” (Filip. 4:6, 7).

Jehová, pe “ohendúva entéro ñemboʼe”, opromete omeʼẽtaha ñandéve opa mbaʼe ñaikotevẽva jasegi hag̃ua jaservi chupe ñande pyʼaite guive (Sal. 65:2, NM). ¡Ajépa ñanembopyʼaguapyete ko promésa! ¿Mbaʼe mbaʼépa omeʼẽ ñandéve Jehová ñaaguanta hag̃ua umi situasión ijetuʼúva?

UMI RREUNIÓN ÑANEMOKYREʼỸ

Ymaite guive, Jehová ojevale pe kongregasiónre omombarete hag̃ua isiervokuérape. Por ehémplo, ojepersegi mbaretérõ guare umi ermáno Tesalonicaguápe, apóstol Pablo heʼi chupekuéra: “Pesegíkena peñomokyreʼỹ ha peñomombarete, pejapoháicha voi peikóvo” (1 Tes. 2:14; 5:11). Umi ermáno Tesalonicagua oaprovecha vaʼekue umi rreunión oñopytyvõ ha oñomokyreʼỹ hag̃ua, upéva oipytyvõ chupekuéra oaguanta hag̃ua pe situasión ijetuʼúva ohasa vaʼekue hikuái. ¿Mbaʼépa ñanepytyvõta avei ñandéve jasegi hag̃ua ñaaguanta haʼekuéra ojapo haguéicha?

Ñañemoag̃ui vaʼerã umi ermáno kongregasionpeguáre. Péicha “ñañopytyvõ hína ñanembarete hag̃ua” (Rom. 14:19). Ha jaiko rupi peteĩ tiémpo ijetuʼúvape, iñimportanteterei jajapo upéva. Pablo ningo ohasa vaʼekue heta mbaʼe ijetuʼúva, péro Jehová omombarete chupe oaguanta hag̃ua. Ha upearã, heta vése ojevale vaʼekue ermanokuérare. Upévare Pablo oskrivírõ guare peteĩ kárta umi ermáno Colosasguápe, oguerahaka salúdo unos kuánto ermánope ha heʼi hesekuéra ‘tuichaiterei okonsola’ hague chupe hikuái (Col. 4:10, 11). Umi ermáno ohayhueterei vaʼekue Páblope, upévare omombarete chupe hikuái oikotevẽrõ guare. Kongregasiónpe umi ermáno pyʼỹinte avei ñanemokyreʼỹ ha oĩ ñande ykére jahasa jave peteĩ mbaʼe ijetuʼúva.

 UMI ANSIÁNO ÑANEPYTYVÕ

Jehová ojevale avei umi ansiánore ikatu hag̃uáicha ñanepytyvõ ñaaguanta hag̃ua. Koʼã ermáno haʼete voi ñandéve g̃uarã “peteĩ lugár segúro ñanemoʼãva yvytu atã ha torméntagui, haʼete avei peteĩ ysyry séka tiémpope ha kuarahyʼã peteĩ desiértope” (Is. 32:2, NM). ¡Ajépa ñanemokyreʼỹete upéva! ¿Jaaprovechápa hína ko rregálo omeʼẽva ñandéve Jehová? Umi ansiáno ningo ikatu ñanemokyreʼỹ ha ñanemombarete ñaaguanta hag̃ua umi situasión ijetuʼúva.

Jaikuaa ningo umi ansiáno ndaikatuiha ojapo milágro ñanepytyvõ hag̃ua, haʼekuéra iñimperféktonte avei ñandéicha ha ohasa heta mbaʼe ijetuʼúva (Hech. 14:15). Upéicharõ jepe, tuichaiterei ikatu ñanepytyvõ hikuái oñemboʼéramo ñanderehehápe (Sant. 5:14, 15). Peteĩ ermáno Italiagua, heta áñorema oaguanta peteĩ enfermeda ijetuʼuetereíva, hérava distrofia muscular, ha upéicha rupi ndaikatúi ojevale porã ijehe. Haʼe heʼi: “Umi ansiáno siémpre ohechauka chéve cherayhuha ha pyʼỹinte chevisita hikuái, upéva chepytyvõ aaguanta hag̃ua ko situasión ijetuʼuetéva”. Jehová ningo omoĩ umi ansiánope ñanepytyvõ hag̃ua, upévare ndajadudái vaʼerã ñañemboja hag̃ua hendapekuéra.

ÑAMOMBARETE MEME ÑANDE JEROVIA

Oĩ hetave mbaʼe ikatúva jajapo ñaaguanta hag̃ua umi mbaʼe ijetuʼúva. Por ehémplo, jajapo meme umi mbaʼe ñanemoag̃uivétava Jehováre. Jahechamína mbaʼépa ojapo peteĩ ermáno orekóva 39 áño, hérava Juan. Ko ermánope osẽ orekoha kánser, hiʼarive upérõ itaʼýra 3 áñonte oreko. Haʼe heʼi: “Upe notísia chereja vaʼekue yvýre, pórke chemitãiterei gueteri. Koʼág̃a che rembireko oñangareko vaʼerã ore famíliare, oñangareko vaʼerã cherehe ha pyʼỹinte chegueraha vaʼerã ospitálpe ajapo hag̃ua che tratamiénto”. Pe tratamiénto osegíva oforsaiterei Juánpe, omokangy ha ombopyʼajerepámi chupe. Ha ivaive hag̃ua, upe tiémpope oikuaa avei itúa oĩha omano hag̃uáicha, ha oikotevẽha oñangareko vaʼerã hese.

¿Mbaʼépa oipytyvõ Juan ha ifamíliape ogueropuʼaka hag̃ua ko situasión ijetuʼuetéva? Juan heʼi: “Chekangypáramo jepe, añehaʼãmbaite vaʼekue rojapo hag̃ua che famíliandi umi mbaʼe omombaretétava ore jerovia. Por ehémplo, ndorofaltái rreunionhápe, rosẽ ropredika káda semána ha siémpre rojapo ore estúdio de família”. Juan ohechakuaa oaguanta hag̃ua umi mbaʼe ijetuʼúva iñimportantetereiha omombarete ijerovia. ¿Mbaʼe konséhopa omeʼẽ haʼe umi ohasávape peichagua situasión? Juan heʼi: “Ñepyrũrã ijetuʼueterei voínte, péro nemanduʼáramo Jehová nderayhuha ha oĩha nde ykére, katuete reñeñandu porãvéta. Haʼe nemombaretéta, chéve chemombarete haguéicha”.

Jahechaháicha, Jehová ñanepytyvõta jagueropuʼaka hag̃ua oimeraẽ mbaʼe ijetuʼúva ikatúva oñepresenta koʼág̃a térã amo gotyove. Upévare, eñemboʼékena Jehovápe nde pyʼaite guive, eñemoag̃ui ermanokuérare, ejerure umi ansiánope tanepytyvõ ha ejapo meme umi mbaʼe omombaretétava nde jerovia. Apóstol Pablo heʼi vaʼekue: “Tekotevẽ ningo peaguanta”. Aníkena nderesarái Jehová nepytyvõtaha upearã.

^ párr. 2 Oĩ téra oñekambiáva.