Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Ñemañaha (ojestudiáva)  |  Junio de 2015

Ñandejára ohechauka ipodér Cristo rupive

Ñandejára ohechauka ipodér Cristo rupive

‘Ñandejára [...] podér ojehechauka Cristo rupive.’ (1 COR. 1:24)

1. ¿Mbaʼérepa Pablo heʼi vaʼekue Ñandejára ‘podér ojehechaukaha Cristo rupive’?

JESÚS oĩro guare ko yvy ape ári, ojapo vaʼekue heta milágro ndetuicháva. Katuete ningo imbareteve ñande jajerovia jaleévo la Bíbliape umi rreláto oñeʼẽva koʼã milágrore (Mat. 9:35; Luc. 9:11). Jesús ojapo vaʼekue heta milágro Jehová omeʼẽ rupi chupe podér. Upévare apóstol Pablo heʼi vaʼekue: ‘Ñandejára [...] podér ojehechauka Cristo rupive’ (1 Cor. 1:24). Péro, ¿mbaʼépa ikatu ñaaprende umi milágro Jesús ojapo vaʼekuégui?

2. ¿Mbaʼépa ñaaprende umi milágro Jesús ojapo vaʼekuégui?

2 Umi “milágro” Jesús ojapo vaʼekue, ñanemboʼe heta mbaʼe iñimportánteva (Hech. 2:22). Por ehémplo, ohechauka haʼe ogoverna vove 1.000 áñore, ojapotaha heta milágro oipytyvõ hag̃ua entéro yvypórape. Avei umi milágro Jesús ojapo vaʼekue, ñanepytyvõ jaikuaa porã hag̃ua chupe ha Jehovápe. Ko artíkulope ñahesaʼỹijóta mbohapy milágro Jesús ojapo vaʼekue, ha jahecháta mbaʼéichapa umíva  ñanepytyvõ koʼág̃a ha mbaʼéichapa omombarete ñande jerovia.

PETEĨ MILÁGRO ÑANEMBOʼÉVA ÑANEMBAʼEPORÃ HAG̃UA

3. a) ¿Mbaʼépa oiko raʼe peteĩ kasamientohápe Canáme? b) ¿Tekotevẽtereípa raʼe Jesús ojapo pe milágro?

3 Jesús ojapo vaʼekue iprimér milágro Canáme, peteĩ kasamientohápe. Upérõ ofaltapa kuri pe víno, ha umi nóvio tuichaiterei oñemotĩta noñatendeporãiramo umi invitádore. Upémarõ María heʼi Jesúspe oipytyvõmi hag̃ua pe paréhape. Oime vaʼerã haʼe oikuaáma raʼe Jesús ikatuha oipytyvõ chupekuéra, pórke ojepyʼamongeta vaʼekue umi profesía oñeʼẽvare imembýre, ha oikuaa Jesúspe oñehenoitaha “Ñandejára Ijojahaʼỹva Raʼy” (Luc. 1:30-32; 2:52). Péicha jahecha María ha Jesús oipytyvõse hague umi omendávape. Upéi Jesús okonverti 380 lítro y ‘víno iporãvape’ (elee Juan 2:3, 6-11). ¿Tekotevẽtereípa raʼe Jesús ojapo ko milágro? Nahániri. Haʼe ojapo upéva oñeintereságui umi héntere. Ha osegi rupi Itúva ehémplo, imbaʼeporã opavavéndi.

4, 5. a) ¿Mbaʼépa ñaaprende pe primer milágro Jesús ojapo vaʼekuégui? b) ¿Mbaʼéichapa jaikóta pe múndo pyahúpe?

4 Jehová podér rupive, Jesús okonverti y víno iporãvape. Ha ojapo heta porã voi ikatu hag̃uáicha ohupyty entéro umi invitádope. Ko milágro ohechauka Jehová ha Jesús imbaʼeporãha, ha oñeinteresaha ñanderehe. Avei ohechauka pe múndo pyahúpe Jehová nombofaltamoʼãiha hiʼupy avavépe (elee Isaías 25:6).

5 Ñapensamíntena mbaʼéichapa jaikóta pe múndo pyahúpe. Upépe Jehová omeʼẽmbaitéta ñandéve opa mbaʼe ñaikotevẽva. Enterove jarekóta ñande róga tee ha tembiʼu iporãva. ¡Ajépa jaagradesete Jehovápe omeʼẽta haguére ñandéve koʼã mbaʼe porãita!

Jadedikáramo tiémpo ñande rapichápe, jahechauka hína jasegiha Jesús ehémplo (Ehecha párrafo 6)

6. a) ¿Maʼerãpa Jesús oipuru vaʼekue ipodér? b) ¿Mbaʼéichapa ikatu jasegi Jesús ehémplo?

6 Jesús núnka ndoipurúi vaʼekue ipodér ivenefisiorãnte. Por ehémplo, oñenega kuri pe Diablo omboligárõ guare chupe okonverti hag̃ua ita pánpe (Mat. 4:2-4). Jesús oipuru ipodér oipytyvõ hag̃ua umi héntepe. Ñande avei ikatu jasegi iñehémplo ha ‘ñandepojera ñande rapichándi’ (Luc. 6:38). ¿Mbaʼépa ikatu jajapo ñande rapichakuéra rehehápe? Ikatu ñainvita chupekuéra ñande rógape okaru hag̃ua ñanendive, térã jahasaʼimi tiémpo rreunión rire umi oikotevẽvandi ajúda, por ehémplo ojapo hag̃ua idiskúrso. Ikatu avei ñaipytyvõ umi opredika ramóvape ikatupyryve hag̃ua. Ñanembaʼerechakuaáramo  ha ñaipytyvõ umi oikotevẽvape, jasegi hína Jesús ehémplo.

“ENTEROVÉNTE HOʼU HYG̃UATÃHA MEVE”

7. ¿Mbaʼe provlémapa siémpre oĩta Satanás múndope?

7 Ñane tiémpope oĩ hetaiterei persóna imboriahúva. Péro ko provléma oĩ ymaiterei guivéma. Por ehémplo, Jehová heʼi vaʼekue umi isrraelítape: ‘Oĩtante voi katuete nde apytépe imboriahu ha oikotevẽva’ (Deut. 15:11). Ha heta áño upe rire, Jesús heʼi avei: “Umi imboriahúva akóinte oĩ penendive” (Mat. 26:11). ¿Heʼisépa upéva siémpre oĩtaha imboriahúva ko yvy ape ári? Nahániri. Jesús heʼise kuri siémpre oĩtaha imboriahúva Satanás múndope. Péro Ñandejára múndo pyahúpe idiferénteta. Upépe oĩta hiʼupy enterovévape g̃uarã, ha ndaiporimoʼãi imboriahúva.

8, 9. a) ¿Mbaʼérepa Jesús omongaru hetaiterei héntepe? b) ¿Mbaʼéichapa reñeñandu repensávo pe milágro Jesús ojapo vaʼekuére?

8 Salmo 145:16 heʼi Jehová omeʼẽha yvyporakuérape “opa mbaʼe” oikotevẽva. Jesús oĩrõ guare ko yvy ape ári, osegi Itúva ehémplo ha omeʼẽ avei heta persónape umi mbaʼe oikotevẽva. Péro haʼe ndojapói upéva ohechauka hag̃ua ipoderosoitereiha, síno ojepyʼapýgui umi héntere. Jahechamína mbaʼépa heʼi Mateo 14:14-21 (elee). Hetaiterei persóna oúva heta siudágui oho Jesús rapykuéri (Mat. 14:13). Upéi kaʼaruetéma, ha Jesús disipulokuéra ohechakuaa umi hénte ikaneʼõ ha iñembyahyimaha. Upémarõ heʼi hikuái Jesúspe tomondo umi héntepe ojogua hag̃ua hoʼu vaʼerã. ¿Mbaʼépa ojapo Jesús?

9 Jesús ojapo peteĩ milágro: oipuru cinco pan ha mokõi pira omongaru hag̃ua hetaiterei persónape. ¿Mbaʼérepa ojapo ko milágro? Ohayhúgui umi héntepe ha ojepyʼapýgui hesekuéra. La Biblia heʼi voi enterovete okaru hague “hyg̃uatãha meve”. Okarupa rire, umi hénte ipíla jeýma ikatu hag̃uáicha oviaha ha oho hógape (Luc. 9:10-17). Ojekarupa rire, umi disípulo ombyaty pe tembiʼu hembýva 12 kanásto renyhẽte.

10. ¿Mbaʼépa oikóta pe povrésagui?

10 Hetaiterei hénte ningo imboriahu oĩ rupi governánte ikorrúptova ha opensáva ijehénte. Ha oĩ avei heta ñane ermáno imboriahúva. Péro Ñandejára omeʼẽta entéro yvypórape opa mbaʼe oikotevẽva oikove hag̃ua. Haʼe opromete oipeʼaitetaha pe povrésa ko yvy ape árigui (elee Salmo 72:16). Koʼẽrõite, entéro iñeʼẽrendúva Jehovápe oikóta peteĩ múndo ndaiporihápe ikorrúpto ha imboriahúva.

11. a) ¿Mbaʼérepa ñaĩ segúro koʼẽrõite Cristo oipurutaha ipodér oipytyvõ hag̃ua entéro yvypórape? b) Ñapensávo umi mbaʼe Cristo ojapótavare, ¿mbaʼépa ñanemokyreʼỹ jajapo hag̃ua?

11 Jesús oĩrõ guare ko yvy ape ári, tres áño imédiore ojapo heta milágro pe lugár oiko haguérupi (Mat. 15:24). Péro koʼág̃a ningo haʼe peteĩ Rréi, ha igoviérno de 1.000 áñope oipytyvõtama entéro yvypórape ko múndo tuichakuére (Sal. 72:8). Umi milágro Jesús ojapo vaʼekue ohechauka porãiterei haʼe katuete ñanepytyvõtaha. Ñapensávo koʼã mbaʼére ñanekyreʼỹ japytávo. Mbaʼégui voi piko ndajaipurusemoʼãi ñane tiémpo ñaipytyvõ hag̃ua ñande rapichápe (Sal. 45:1; 49:3). Jaikuaaháicha, ñande ndaikatúi jajapo milágro, péro si ikatu  ñamombeʼu umi héntepe umi promésa porãite oĩva la Bíbliape. Añetehápe upéva ñane rresponsavilida hína (Rom. 1:14, 15).

JEHOVÁ HA JESÚS ODOMINA PE NATURALÉSA

12. ¿Mbaʼérepa ñaĩ segúro Jesús ontende porãha mbaʼéichapa ofunsiona ñane planéta?

12 La Biblia heʼi Ñandejára ojapórõ guare ko yvy, Jesús haʼe hague pe “pytyvõhára katupyry” ombaʼapóva Itúvandi (Prov. 8:22, 30, 31; Col 1:15-17). Upévare haʼe oikuaa porã mbaʼéichapa ofunsiona ko planéta, ha oreko ipoguýpe pe naturalésa, por ehémplo pe yvytu ha pe mar.

¿Mbaʼéichapa reñeñandu reikuaávo mbaʼérepa Jesús ojapo umi milágro? (Ehecha párrafo 13 ha 14)

13, 14. ¿Mbaʼérepa jaʼekuaa Jesús orekoha podér odomina hag̃ua pe naturalésa?

13 Jesús oĩrõ guare ko yvy ape ári ohechauka vaʼekue orekoha ipoguýpe pe naturalésa. Por ehémplo, peteĩ jey oipuru pe podér Ñandejára omeʼẽ vaʼekue chupe okalma hag̃ua “peteĩ torménta ndevaíva” (elee Marcos 4:37-39). Peteĩ mboʼehára ohesaʼỹijóva umi palávra vívlika heʼi upéva haʼéne hague peteĩ arai hũ, yvytu atã, ha arasunu ama guasu reheve. Peichagua torménta ningo oguerahapa otopáva. Ha apóstol Mateo imanduʼa vaʼekue avei ko torméntare (Mat. 8:24).

14 Epensamíntena ko situasiónre: Pe oláda ojejapete pe kanóare ha pe y oikepa chupekuéra. Pe torménta hyapu hatã ha pe kanóa okacha vaipa. Upéicharõ jepe, Jesús oke hína, pórke ikaneʼõ kuri. Umi disípulo katu okyhyjeterei. Upémarõ haʼekuéra omombáy chupe ha heʼi: “¡Oresalvamína ore Ruvicha, romanombátamako!” (Mat. 8:25). ¿Mbaʼépa ojapo Jesús? Opuʼã ha heʼi pe yvytu ha pe márpe: “¡Epytaitéke! ¡Ekirirĩetéke!” (Mar. 4:39). “Ha pe torménta ohasaite.” Péicha ojekuaa porã Jesús orekoha podér odomina hag̃ua pe naturalésa.

15. ¿Mbaʼérepa jaʼekuaa Jehová odominaha pe naturalésa?

15 Jesús ningo oreko podér Jehová omeʼẽ rupi chupe. Ha upéva heʼise avei Ñandejára ikatuha odomina pe naturalésa. Por ehémplo, pe Dilúvio mboyve, Jehová heʼi vaʼekue: “Koʼágui siete día haguépe aguerúta peteĩ ama tuichaitereíva ha okýta 40 día aja, ára ha pyhare” (Gén. 7:4, NM). Avei la Biblia omombeʼu “Jehová ogueru [hague] peteĩ yvytu atã oipejúva ésteguio” ombojaʼo hag̃ua pe mar Rojo (Éx. 14:21, NM). Ha Jonás 1:4 heʼi avei Ñandejára ombou hague ‘peteĩ yvytu atã’ pe márpe, ha pe várko haimete oñeundi. ¡Ajépa tuichaite ñanetrankilisa jaikuaa rupi pe Paraísope Jehová orekopaitetaha ipoguýpe pe naturalésa!

16. ¿Mbaʼérepa ñandepyʼaguapy jaikuaávo Jehová ha Jesús orekoha podér odomina hag̃ua pe naturalésa?

16 Tuichaiterei ñandepyʼaguapy jaikuaávo Jehová ha Jesús orekoha podér odomina hag̃ua pe naturalésa. Ág̃a Cristo ogoverna vove 1.000 áñore, ndaiporimoʼãvéima desástre naturál. Avave ndohasaʼasymoʼãi ni nomanomoʼãi umi urakán, sunámi, volkán térã terremóto káusare. Ndajakyhyjemoʼãvéima pórke “Ñandejára [...] oĩta yvyporakuérandi” (Apoc. 21:3, 4). Upépe Cristo oipurúta pe podér Jehová omeʼẽva chupe odomina hag̃ua pe naturalésa.

 JASEGÍKENA ÑANDEJÁRA HA CRISTO EHÉMPLO

17. ¿Mbaʼéichapa ikatu jasegi Jehová ha Cristo ehémplo?

17 ¿Mbaʼéichapa ikatu jasegi Ñandejára ha Cristo ehémplo? Añetehápe ningo ñande ndaikatúi jajapo umi milágro haʼekuéra ojapo haguéicha, péro ikatu jajapo heʼíva Proverbios 3:27 (elee). Jahechávo oĩha ñane ermáno ohasa asýva hína, ikatu ñaipytyvõ ha ñakonsola chupe (Prov. 17:17). Upéva ikatu jajapo oiko jave peteĩ desástre naturál. Por ehémplo, peteĩ urakán ombyaipa lénto peteĩ ermána viúda róga. Upéi ko ermána omombeʼu: “Avyʼaiterei aime haguére Jehová organisasiónpe. Umi ermáno ningo oporosokorre oĩ jave ojecha vaíva, ha hiʼarive oñopytyvõmba hikuái ijerovia mbarete hag̃ua”. Peteĩ ermána soltéra katu ojedesespera peteĩ torménta rire, pórke ohecha hóga oñembyaiha. Péro umi ermáno oho oipytyvõ chupe ha omyatyrõ pe hóga. Haʼe heʼi: “¡Ndaikuaái ni mbaʼéichapa aagradeséta!”. Upéi heʼi avei: “¡Grásiamante Jehová!”. Ajépa javyʼaite jareko haguére ermáno ha ermána oñeinteresáva ñanderehe. Péro jaagradeseve hína Jehová ha Jesúspe oñangareko porã haguére isiervokuérare.

18. Rejepyʼamongetávo entéro umi milágro Jesús ojapo vaʼekuére, ¿mbaʼéichapa reñeñandu?

18 Jesús oĩrõ guare ko yvy ape ári ohechauka vaʼekue orekoha Ñandejára podér. Péro haʼe arakaʼeve ndojapói milágro ivenefisiorãnte ni ojechauka hag̃ua umi héntepe. Haʼe ojapo umi milágro ohayhu rupi ipyʼaite guive yvyporakuérape ha oipytyvõségui chupekuéra. Pe artíkulo oúvape jahechavéta hína mbaʼéichapa Jesús ohechauka upéva.