Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Ñemañaha (ojestudiáva)  |  Mayo de 2015

“Haʼekuéra ohecha” umi mbaʼe Ñandejára oprometéva

“Haʼekuéra ohecha” umi mbaʼe Ñandejára oprometéva

“Noñemeʼẽiramo jepe chupekuéra umi mbaʼe oñepromete vaʼekue, [...] haʼekuéra ohecha umíva mombyry guive.” (HEB. 11:13)

1. ¿Mbaʼéichapa ñanepytyvõ pe kapasida jarekóva ñañeimahina hag̃ua? (Ehecha pe taʼanga oĩva iñepyrũme.)

JEHOVÁ omeʼẽ entéro yvypórape peteĩ rregálo ijojahaʼỹva: pe kapasida ñañeimahina hag̃ua umi mbaʼe ndajahecháiva. Upéva ñanepytyvõ ñapensa hag̃ua umi mbaʼe porã ñaneraʼarõvare, jakalkula hag̃ua mbaʼépa jajapóta, ha jadesidi porã hag̃ua. Jehová oikuaa mbaʼépa oikóta amo gotyove, ha Iñeʼẽme opromete omeʼẽtaha ñandéve hetaiterei mbaʼe iporãva. Ha ndaikatúiramo jepe jahecha gueteri umíva, si ikatúma ñañeimahina mbaʼéichapa oñekumplíta, ha jajerovia katuete oikotaha (2 Cor. 4:18).

2, 3. a) ¿Mbaʼéichapa ikatu jaipuru ñane imahinasión? b) ¿Mbaʼépa ñahesaʼỹijóta ko artíkulope?

2 Sapyʼánte ñañeimahina umi mbaʼe arakaʼeve ndoikomoʼãiva. Por ehémplo, peteĩ mitãkuñaʼi ikatu oñeimahina oveveha peteĩ panambícha, ha jaikuaaháicha, upéva núnka ndoikóiva. Péro iporã ñañeimahina umi mbaʼe ikatútava oiko, ojapo haguéicha proféta Samuel sy, hérava Ana. Oiméne ñanemanduʼa haʼe, ndorekóitirõ jepe peteĩ mitã, opromete hague Jehovápe oguerahataha imemby tavernákulope ombaʼapo hag̃ua umi saserdótendi. ¿Mbaʼépa oipytyvõ chupe okumpli hag̃ua ipromésa? Ana  oñeimahináma kuri mbaʼéichatapa upe día ontrega vove imemby. Péro upéva ndeʼiséi oñeimahina reínte hague, síno haʼe odesidíma mbaʼépa ojapóta ág̃a oreko vove peteĩ mitãkuimbaʼe (1 Sam. 1:22). Péicha avei ñande ikatu ñañeimahina umi mbaʼe porãite Jehová oprometéva, jaikuaágui haʼe katuete okumplitaha umíva (2 Ped. 1:19-21).

3 Heta Ñandejára siérvo yma guare oñeimahina vaʼekue mbaʼéichapa oñekumplíta umi mbaʼe Jehová oprometéva. ¿Mbaʼéichapa oipytyvõ raʼe chupekuéra upéva? Ha ¿mbaʼérepa ideprovécho avei ñandéve ñañeimahina mbaʼéichapa Jehová okumplíta ipromesakuéra? Ko artíkulope jahecháta upéva.

OJEROVIA MBARETEVE HIKUÁI “OHECHA” RUPI UMI MBAʼE OIKÓTAVA

4. ¿Mbaʼépa oipytyvõne raʼe Abélpe oreko hag̃ua esperánsa?

4 Abel haʼe kuri pe primer kuimbaʼe ojeroviáva Ñandejára promésare. Haʼe oikuaa kuri Adán ha Eva opeka rire, Jehová heʼi hague pe mbóipe: “Romoingovaíta pe kuña ndive, ha ne desendiénte amoingovaíta pe kuña desendiénte ndive. Nde reisuʼúta chupe ipytápe ha haʼe opyrũta ne akãre ha omonguʼíta” (Gén. 3:14, 15, NM). Abel ningo ndoikuaái mbaʼeichaitépa oñekumplíta upe promésa, péro oime vaʼerã heta opensa hese. Por ehémplo, oiméne oñeporandu raʼe mávapepa oisuʼúta pe mbói, ha oikuaase mávapa oipytyvõta yvyporakuérape iperfékto jey hag̃ua. Koʼã mbaʼe opensáva omeʼẽne raʼe chupe esperánsa. Abel oĩ vaʼekue segúro Ñandejára okumplitaha oprometéva. Upévare, haʼe oikuaveʼẽrõ guare peteĩ sakrifísio, Jehová oguerohory upéva (elee Génesis 4:3-5 ha Hebreos 11:4).

5. ¿Mbaʼéichapa oipytyvõ Enócpe opensa meme haguére Jehová promésare?

5 Enoc avei ojeroviaiterei vaʼekue Ñandejára promésare. Haʼe oikove tiémpope, umi hénte iñañaiterei ha “oiko okopi” Jehováre. Oiméne Enoc oñeimahináma raʼe mbaʼéichapa ojeikóta og̃uahẽ vove pe tiémpo oĩtahápe umi iñeʼẽrendúva Ñandejárape añoite (elee Hebreos 11:5, 6). Upéva ningo tuicha oipytyvõ chupe. Upéicha rupi haʼe ipyʼaguasu ha oavisa umi héntepe Ñandejára ohunditaha umi iñañávape (Jud. 14, 15).

6. ¿Mbaʼérehepa opensa meméne raʼe Noé pe Dilúvio rire?

6 Noé ojeroviaiterei kuri opa mbaʼe Jehová oprometévare. Upévare haʼe ojesalva oúrõ guare pe Ama Guasu (Heb. 11:7). Ojerovia rupi, Noé oikuaveʼẽ peteĩ ofrénda Jehovápe pe Dilúvio rire (Gén. 8:20). Tiémpo riremínte, ko múndo henyhẽte jeýma umi iñañávagui. Peteĩ kuimbaʼe hérava Nemrod oñepyrũ ogoverna ha omboliga umi héntepe opuʼã hag̃ua Ñandejára kóntrape (Gén. 10:8-12). Upéicharõ jepe, Noé osegi ojerovia Jehováre. Ojapo haguéicha Abel, haʼe oñeimahina mbaʼéichapa ojeikóta ág̃a Jehová oipeʼa vove pe pekádo ha ñemano. Ha oiméne opensa avei mbaʼéichatapa ndaiporivéi vove umi governánte aña. Ñande avei ikatu ñañeimahina mbaʼéichapa jaikóta og̃uahẽ vove upe tiémpo (Rom. 6:23).

OÑEIMAHINÁMA HIKUÁI MBAʼÉICHATAPA OÑEKUMPLI VOVE JEHOVÁ PROMESAKUÉRA

7. ¿Mbaʼépa oñeimahináne raʼe Abrahán, Isaac ha Jacob?

7 Abrahán, Isaac ha Jacob oñeimahináne raʼe mbaʼéichapa ojeikóta Ñandejára okumpli vove pe promésa heʼíva oñevendesitaha yvyporakuérape pe “desendiénte” rupive (Gén. 22:18; 26:4; 28:14). Jehová opromete vaʼekue avei chupekuéra ifamiliakuéragui oñeformataha peteĩ tetã tuicháva oikótava peteĩ lugár iporãitereívape (Gén. 15:5-7). Abrahán, Isaac ha Jacob oikuaa  porã Jehová katuete okumplitaha ipromésa. Upéicha rupi haʼekuéra oñeimahináma kuri mbaʼéichapa ifamiliakuéra ohupytýta upe vendisión. Añetehápe, Jehová siémpre oipytyvõ isiervokuérape ojerovia hag̃ua yvyporakuéra ohupyty jeytaha pe vída Adán ha Eva operde vaʼekue.

8. ¿Mbaʼépa oipytyvõ Abrahánpe iñeʼẽrendu ha ojerovia mbarete hag̃ua?

8 Abrahán ha heta Ñandejára siérvo yma guare, omano oñekumpli mboyve umi promésa Jehová ojapo vaʼekue. Upéicharõ jepe, haʼekuéra oñeimahináma mbaʼéichapa ojeikóta oñekumpli vove umíva. La Biblia heʼi: “Haʼekuéra ohecha umíva mombyry guive, ha orresivi vyʼápe” (elee Hebreos 11:8-13). Upéva oipytyvõ vaʼekue Abrahánpe iñeʼẽrendu ha ojerovia mbarete hag̃ua, ohasárõ jepe heta mbaʼe ijetuʼúva. Haʼe oikuaa porã Jehová okumplíma hague heta promésa, ha oĩ segúro okumpli jeytaha.

9. ¿Mbaʼéichapa oipytyvõ Abrahánpe ojerovia haguére Jehová promésare?

9 Abrahán ojeroviaiterei Jehová promésare, upévare siémpre ojapo opa mbaʼe Ñandejára omandáva chupe. Por ehémplo, oheja pe hóga oĩ vaʼekue siuda de Úrpe, ha upe guive ndopytavéi oiko are peteĩ siudápe. Haʼe oikuaa porã umi siuda oĩva ijerére ndopytaʼaremoʼãiha, pórke igovernantekuéra ndoservíri Jehovápe (Jos. 24:2). Abrahán oipotaitereíma og̃uahẽ pe tiémpo Jehová ogovernatahápe ko yvy tuichakue. La Biblia heʼi Ñandejára goviérno haʼeha “pe siuda oguerekóva simiénto teete; upe siuda ningo Ñandejára odesidi vaʼekue mbaʼéichapa ojejapóta ha haʼe voi omopuʼã” (Heb. 11:10). Abrahán, Abel, Enoc, Noé ha ambue Ñandejára siérvo orovia avei oñemoingovetaha umi omanóvape. Haʼekuéra oñeimahina meme mbaʼéichapa ovyʼáta oiko vove pe Paraísope opa árare, ha upéva oipytyvõ chupekuéra ojerovia mbareteve hag̃ua (elee Hebreos 11:15, 16).

10. ¿Mbaʼéichapa oipytyvõ Sárape oñeimahina haguére Jehová okumplimaha ipromésa?

10 Ñañeʼẽmína koʼág̃a Sárare, Abrahán rembireko. Haʼe avei ojeroviaiterei vaʼekue Jehová promesakuérare. Ñandejára heʼi kuri iménape: “Haʼe imembýta ndehegui peteĩ mitãkuimbaʼe. Ha avendesi rupi chupe osẽta chugui heta nasión ha rréi” (Gén. 17:16, NM). Sara orekóramo jepe 90 áño ha naimembýi gueteri, haʼe oñeimahina vaʼekue mbaʼéichatapa oreko vove peteĩ mitã. Ha oiméne oñeimahina avei mbaʼéichapa imemby oúta ifamília, ha upéi oñemboheta hetavetaha ohóvo oiko peve chuguikuéra peteĩ tetã tuicháva (Heb. 11:11, 12). Opensa memévo koʼã vendisiónre, ijerovia imbareteve ohóvo. Upéi, Jehová opromete haguéicha, Sara oreko peteĩ mitã hérava Isaac. Koʼytevéntema Sara oguerovia Jehová okumplitaha avei umi ótra promésa. Ñande avei ñañeimahináramo mbaʼéichapa oñekumplíta opa mbaʼe Jehová opromete vaʼekue, jajerovia mbaretevéta jahávo.

OPENSA MEME PE RREKOMPÉNSARE

11, 12. ¿Mbaʼérepa Moisés káda día ohayhuve kuri Jehovápe?

11 Moisés ojeroviaiterei vaʼekue avei Jehová promésare. Chupe oñemongakuaa peteĩ prínsipeicha. Péro isy ha itúva tee, haʼéva evréo, omboʼe chupe heta mbaʼe Jehovágui, por ehémplo Jehová opromete hague omosãsotaha ipuévlope Egipto poguýgui, ha omeʼẽtaha chupekuéra peteĩ lugár iporãitereíva oiko hag̃ua (Gén. 13:14, 15; Éx. 2:5-10). Amáske opensa Jehová promésare, koʼýte ohayhuve chupe, ha nointeresái chupe pe pláta ni pe autorida.

12 La Biblia heʼi: “Ojerovia rupi Moisés, tuicha rire ndoipotái vaʼekue ojeʼe hese haʼeha Faraón niéto. Odesidi ikuentaveha  ojetrata vai chupe Ñandejára puévlondi, oiko rangue ovyʼa sapyʼami opeka aja. Moiséspe g̃uarã iporãiteve vaʼekue ojeapoʼi chupe haʼégui Ñandejára Rembiporavo oreko rangue opa mbaʼerepy oĩva Egíptope; haʼe ningo ojesareko meme pe prémio oñemeʼẽtavare chupe” (Heb. 11:24-26).

13. ¿Mbaʼéichapa oipytyvõ Moiséspe opensa meme haguére Jehová promesakuérare?

13 Jehová opromete kuri omosãsotaha umi isrraelítape oĩ vaʼekue Egipto poguýpe. Katuete ningo Moisés opensa meméne raʼe ko promésare. Haʼe oikuaa avei Jehová opromete hague oipeʼataha yvyporakuérape ñemano poguýgui (Job 14:14, 15; Heb. 11:17-19). Moisés ojepyʼamongeta meme rupi umi promésare, ohechakuaa mbaʼeichaitépa Jehová ohayhu yvyporakuérape. Avei oipytyvõ chupe ohayhuve hag̃ua Jehovápe, ojeroviave hag̃ua hese ha osegi hag̃ua iñeʼẽrendu oikove aja pukukue (Deut. 6:4, 5). Ni michĩmi ndokyhyjéi pe rréi de Egipto ojukasérõ guare chupe, oikuaágui Jehová okumplitaha ipromésa (Éx. 10:28, 29).

EPENSÁMA VAʼERÃ MBAʼÉICHAPA OJEIKÓTA JEHOVÁ GOVIÉRNO POGUÝPE

14. ¿Mbaʼépa oñeimahina heta persóna?

14 Heta persóna opensa henonderãre ha oñeimahina umi mbaʼe núnka ndoikomoʼãiva. Por ehémplo, heta imboriahúva oñemaihina ág̃ante iplatataha ha osolusionambaitetaha iprovlemakuéra. Péro la Biblia heʼi ko múndo añáme siémpre ñañekevrantataha ha jasufritaha (Sal. 90:10). Oĩ katu oñeimahináva ojupitaha peteĩ governánte umáno osolusionambaitétava umi provléma ko yvy arigua. Péro la Biblia heʼi porã Ñandejára goviérno añoite osolusionataha opaichagua provléma (Dan. 2:44). Ha heta persóna oimoʼã Ñandejára nohundimoʼãiha ko múndo. Péro la Biblia heʼi Jehová ojapotaha upéva (Sof. 1:18; 1 Juan 2:15-17). Umi persóna oñeimahináva umi mbaʼe la Bíbliape noĩriva, tuichaiterei oñedesilusionáta.

¿Reñeimahinápa mbaʼéichapa revyʼáta Jehová okumpli vove oprometéva ndéve? (Ehecha párrafo 15)

15. a) ¿Mbaʼérepa ñañeimahináma vaʼerã umi mbaʼe porã Ñandejára okumplítava? b) Emombeʼu mbaʼépa nde reipotaitereíma oñekumpli.

15 Jehová opromete ñandéve hetaiterei mbaʼe porã. Ñapensáramo umívare, katuete javyʼavéta ha jasegíta jaservi Jehovápe ñande pyʼaite guive. ¿Ndépa reñeimahina mbaʼeichaitépa revyʼáta rehupyty vove umi mbaʼe Jehová oprometéva, tahaʼe yvágape térã ko yvy ape ári? Oiméramo ereko esperánsa reikovévo ko yvy ape ári, eñeimahinamína rembaʼapoha hína ne amigokuérandi pejapo hag̃ua ko yvýgui peteĩ hardín neporãva. Peichagua traváho ningo nembovyʼaitereíta, pórke umi ermáno oporohayhúva omoakãta pe tembiapo. Entéro persóna oĩva upépe, ohayhúta Jehovápe ndéicha avei. Hiʼarive neresãita, nembaretéta ha ndaiporimoʼãi mbaʼeve ndepyʼapýva. Revyʼaitereíta ikatúta haguére reipuru nde kapasida reipytyvõ hag̃ua nde rapichakuérape ha remombaʼeguasu hag̃ua Jehovápe. Ha umi omanóva oikove jey vove, ikatúta hína reipytyvõ chupekuéra oikuaa hag̃ua avei Jehovápe (Juan 17:3; Hech. 24:15). Ñañeimahina jave koʼã mbaʼe, ndajaperdéi hína ñane tiémpo, pórke jaikuaa porã katuete oñekumplitaha (Is. 11:9; 25:8; 33:24; 35:5-7; 65:22).

ÑAÑEMONGETA ÑANE ERMANOKUÉRANDI UMI MBAʼE ÑAHAʼARÕVARE

16, 17. ¿Mbaʼérepa iporã ñañemongeta umi mbaʼe Jehová oprometévare ñandéve?

16 Ñañemongetáramo ñane ermanokuéra ndive umi mbaʼe jajaposévare pe múndo pyahúpe, ñanepytyvõta ñañeimahina porãve hag̃ua mbaʼéichatapa upe tiémpope. Añetehápe ningo ndajaikuaaporãi mbaʼépa  jajapóta pe múndo pyahúpe, péro jaipurúramo ñane imahinasión, jahupytýta mokõi mbaʼe: Primero, jahechaukáta jajeroviaha Jehová promésare. Ha segundo, ‘ñañomokyreʼỹta’ ikatu hag̃uáicha jasegi ñaneñeʼẽrendu ijetuʼúramo jepe. Apóstol Pablo ha ambue kristianokuéra Romagua ojapo vaʼekue upéva (Rom. 1:11, 12).

17 Ñapensa jave umi mbaʼe Jehová oprometévare, ñanderesaraive ñande provlemakuéragui. Peteĩ jey, Pedro ojepyʼapy ha heʼi Jesúspe: “Ore ningo rohejapaite opa mbaʼe ha romoirũ. ¿Mbaʼépa rohupytýta upévare?”. Jesús oipota Pedro ha umi ótro disípulo opensa umi mbaʼe porã ojapótavare amo gotyove. Upévare heʼi chupekuéra: “Pe Yvypóra Raʼy oguapývo itróno omimbipávape [...] peẽ chemoirũ vaʼekue, peguapýta avei doce trónope, pehusga hag̃ua umi doce trívu oĩva Israélpe. Ha opavave oheja vaʼekue hóga, iñermáno ha iñermanakuéra, isy ha itúva, itaʼyrakuérape térã ijyvy, che réra rehehápe, chupekuéra oñemeʼẽta hetaitereive upe oheja vaʼekuégui, ha ohupytýta jeikove opaveʼỹva.” (Mat. 19:27-29). Koʼã mbaʼe Jesús heʼíva, oipytyvõ Pédrope ha umi ótro disípulope oñeimahina hag̃ua ogovernamaha yvágape Jesús ndive ha oipytyvõha yvyporakuérape ohupyty jey hag̃ua perfeksión.

18. ¿Mbaʼérepa iporã ñañeimahina mbaʼéichapa jaikóta Ñandejára okumpli vove ipromesakuéra?

18 Ko artíkulope jahecha mbaʼéichapa heta Ñandejára siérvo oipuru iñimahinasión omombarete hag̃ua ijerovia. Por ehémplo, Abel oñeimahina mbaʼéichapa oñekumplíta Jehová promésa, ha ojerovia rupi umívare, Jehová oguerohory chupe. Abrahán avei opensa meme vaʼekue mbaʼéichapa oñekumplíta pe promésa oñeʼẽva pe “desendiénte” rehe (Gén. 3:15, NM). Upéva oipytyvõ chupe iñeʼẽrendu hag̃ua Jehovápe ombohováirõ jepe heta provléma. Moisés avei opensa meme vaʼekue pe rrekompénsa Jehová oprometévare, ha upévare ohayhuve chupe ha osegi iñeʼẽrendu (Heb. 11:26). Ñande avei ñañeimahina meméramo mbaʼéichapa jaikóta Ñandejára okumpli vove oprometéva ñandéve, koʼýte jahayhuvéta chupe ha jajeroviavéta hese. Pe artíkulo oúvape jahecháta mbaʼéichapa ikatu avei jaipuru ñane imahinasión.