Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Ñemañaha (ojestudiáva)  |  Mayo de 2015

Jasegíkena Jehová ehémplo

Jasegíkena Jehová ehémplo

“Pehaʼangáke Ñandejárape, peẽ itaʼýra haʼe ohayhuetéva.” (EFE. 5:1)

1. ¿Mbaʼéichapa Jehová ñandeapo vaʼekue?

JEHOVÁ ñandeapo vaʼekue jaipurukuaa hag̃ua ñane imahinasión. Por ehémplo, ikatu ñañeimahina mbaʼe situasiónpepa oĩ ñande rapicha ñantende hag̃ua chupe, jepe ndajahasái umi mbaʼe haʼe ohasáva (elee Efesios 5:1, 2). ¿Mbaʼéichapa ikatu jaipuru ñane imahinasión ñahaʼanga hag̃ua Jehovápe? ¿Ha mbaʼérepa ñañatende vaʼerã ñapensávare?

2. ¿Mbaʼéichapa Jehová oñeñandu ohechávo jasufri?

2 Jehová opromete umi unhídope oikotaha opa árare yvágape, ha ‘ambue ovechakuérape’ katu ko yvy ape ári. Ha ág̃a jaiko vove pára siémpre ndaiporimoʼãvéima mbaʼeve ñanembosufríva (Juan 10:16; 17:3; 1 Cor. 15:53). Péro Ñandejára ohecha oĩha gueteri heta mbaʼe ñanembohasa asýva, ha ombyasyeterei upéva. La Biblia heʼi haʼe osufrieterei hague ohechárõ guare umi isrraelíta ohasa asy (Is. 63:9). Ha tiémpo rire, ipuévlo omopuʼã jeýrõ guare pe témplo, Jehová ohecha iñenemigokuéra ombosufriha chupekuéra. Upérõ haʼe heʼi: “Oimeraẽ opokóva che retãyguáre, opoko che resaʼỹire” (Zac. 2:8). Jehová ningo ñanderayhueterei,  ha upévare ñanepytyvõse ohecháramo jasufri. Haʼe ñanderayhu peteĩ sy ohayhuháicha imembyraʼy (Is. 49:15). ¿Mbaʼéichapa ikatu jasegi Jehová ehémplo? Ñañeimahina vaʼerã mbaʼéichapa ñañeñandúta ñaiméramo ñande rapicha osufríva lugárpe (Sal. 103:13, 14).

JESÚS AVEI OHAYHU VAʼEKUE UMI HÉNTEPE

3. ¿Mbaʼérepa jaʼekuaa Jesús oporoporiahuvereko hague?

3 Jesús oĩrõ guare ko yvy ape ári, ontende vaʼekue mbaʼeichaitépa osufri yvyporakuéra, ndohasáirõ jepe umi mbaʼe haʼekuéra ohasáva. Por ehémplo, oikuaa umi hénte ohasa asyha umi líder rrelihióso káusare. Haʼekuéra ijapu ha oinventa umi rrégla Ñandejára nomandáiva, ha upévare umi hénte okyhyje chuguikuéra (Mat. 23:4; Mar. 7:1-5; Juan 7:13). Péro Jesús ningo ndoroviái umi japu ni ndokyhyjéi chuguikuéra, upéicha rupi ontende mbaʼéichapa oñeñandu umi hénte. La Biblia heʼi: “Jesús omañávo umi héntere ombyasyeterei chupekuéra, ohechágui mbaʼéichapa oiko asyeterei ha isarambipa hikuái umi ovecha herekuaʼỹvaicha” (Mat. 9:36). Jesús ohecha Itúva oñemoĩha umi ótra persóna lugárpe, ha osegi iñehémplo. Upéicha rupi oiporiahuvereko ha mborayhúpe otrata chupekuéra (Sal. 103:8).

4. ¿Mbaʼépa ojapo Jesús ohechávo umi hénte osufri?

4 Jesús ohayhueterei vaʼekue umi héntepe, ha upévare oipytyvõ chupekuéra ohecháramo ohasa asyha hikuái. Upéva oaprende kuri Itúvagui. Peteĩ jey, Jesús ha ijapostolkuéra oviaha mombyry opredika hag̃ua. Ha ikaneʼõiterei rupi hikuái oheka peteĩ lugár opytuʼu hag̃ua. Péro upéi Jesús ohecha heta hénte ohenduseha chupe oporomboʼe jave. Ikaneʼõramo jepe, Jesús ohechakuaa koʼã hénte oikotevẽha ajúda. Upévare “oñepyrũ omboʼe chupekuéra heta mbaʼe” (Mar. 6:30, 31, 34).

JAPOROHAYHÚKENA JEHOVÁ OJAPOHÁICHA

5, 6. ¿Mbaʼépa jajapo vaʼerã ñahaʼangaséramo Jehovápe? Emoĩ peteĩ ehémplo. (Ehecha pe taʼanga oĩva iñepyrũme.)

5 Jahechaukaséramo jahayhuha umi héntepe Jehová oporohayhuháicha, ñañemoĩ vaʼerã ilugarpekuéra. Ñapensamína peteĩ ehémplore. Ñamoĩ chupe peteĩ mitãrusu oĩha Salónpe ha omañaha hína peteĩ ermáno ijedávare. Ko ermáno ningo ndohechaporãvéima ha oipuru peteĩ vastón oguata hag̃ua. Pe mitãrusu oipytyvõse pe ermánope, ha imanduʼa Jesús heʼi vaʼekuére: “Pejapo pende rapicháre peipotáva haʼekuéra ojapo penderehe” (Luc. 6:31). Upévare ko mitãrusu oñeporandu: “¿Mbaʼépa aipota che rapichakuéra ojapo cherehehápe?”. Ha opensa oipotataha oñeinvita chupe ohuga hag̃ua partído. Péro upéi oñeporandu jey: “Aiméramo ko ermáno ijedáva lugárpe, ¿mbaʼépa aipotáta ojejapo cherehehápe?”. Pe ermáno ijedáva situasión ningo ijetuʼu, pórke ndohechaporãi ni ndoguataporãvéima ha upévare ndaikatumoʼãi oinvita chupe ohuga hag̃ua.

6 Pe mitãrusu oñehaʼã oñeimahina mbaʼéichapa oñeñandúta haʼéramo peteĩ persóna ijedáva. Upémarõ odesidi ohasa tiémpo pe ermáno ndive ha ohendu chupe. Upépe ohechakuaa ijetuʼuha chupe olee hag̃ua ha osẽ hag̃ua opredika de kása en kása. Ohechakuaávo koʼã mbaʼe, ontende mbaʼépa oikotevẽ ko ermáno ijedáva. Ñande avei jasegiséramo Jehová ehémplo, ñañehaʼã vaʼerã ñantende mbaʼéichapa oñeñandu umi ótra persóna, ha jahechauka jahayhuha chupekuéra (1 Cor. 12:26).

Jahayhúkena opavavépe Jehová ojapoháicha (Ehecha párrafo 7)

7. ¿Mbaʼéichapa ikatu ñaipytyvõ umi ermáno osufrívape?

7 Sapyʼánte ijetuʼu ñandéve ñantende  hag̃ua mbaʼépa ohasa peteĩ persóna, koʼýte ñande ndajahasáiramo upe situasiónre. Heta ermáno ohasa asy oñaksidenta, térã ijeda rupi. Ótro katu ou hasy orekógui depresión, térã atáke de pániko. Oĩ avei umi opytáva osufri oñemaltrata ỹrõ ojeavusa haguére hese. Ha heta ermáno ha ermána omongakuaa haʼeño ifamília, térã ihentekuéra apytépe haʼe añoite oservi Jehovápe. Opavavénte ñambohovái diferénte provléma. Upéicharõ káda uno ñaikotevẽ avei diferénte kláse de ajúda. Upévare, ñañehaʼãmbaite vaʼerã ñaipytyvõ umi ermáno oikotevẽvape ha jahechauka jahayhuha chupekuéra. ¿Mbaʼéichapa ikatu jajapo upéva? Jajapysaka porã vaʼerã hesekuéra, ñañeimahina mbaʼéichapa oñeñandu ha ñañehaʼãmbaite ñantende chupekuéra. Avei ikatu ñamomanduʼa koʼã ermánope Jehová oñeinteresaha umi provléma ohasávare hikuái. Ha ñande voi jajapo vaʼerã ikatúva guive hesehapekuéra. Ñañehaʼãramo jajapo opa koʼã mbaʼe, katuete jajoguavéta Jehovápe (elee Romanos 12:15 ha 1 Pedro 3:8).

JATRATA PORÃKENA OPAVAVÉPE JEHOVÁ OJAPOHÁICHA

8. ¿Mbaʼéicha rupípa Jesús otrata porã entérope?

8 Jehová otrata porã opavavépe, ha Jesús péichante avei (Luc. 6:35). ¿Mbaʼéicha rupípa Jesús otrata porã entérope? Oñeimahina mbaʼéichapa oñeñandúta hikuái umi mbaʼe haʼe ojapóvare. Por ehémplo, peteĩ día oho hendápe peteĩ kuña hekovai vaʼekue. Pe kuña hasẽ ha omoheʼõ hesaýpe Jesús py. Jesús ohechakuaa pe kuña oñarrepentiha ipyʼaite guive, ha oikuaa oñeñandu vaivetaha otrata vaíramo chupe. Upémarõ ofelisita chupe umi mbaʼe porã ojapóvare ha operdona hembiapo vaikue. Peteĩ líder rrelihióso ndoguerohoryiete ohechávo operdonaha ko kuñáme. Upéicharõ jepe, Jesús otrata porãnte avei ko karaípe (Luc. 7:36-48).

9. ¿Mbaʼépa ñanepytyvõta japorotrata hag̃ua Jehová ojapoháicha? Emoĩ peteĩ ehémplo.

9 ¿Mbaʼépa jajapo vaʼerã jatrata hag̃ua opavavépe Jehová ojapoháicha? Ñañeʼẽ mboyve voi, ñapensáma vaʼerã mbaʼéichapa ñamoñeñandúta ñande rapichápe. Upéva ñanepytyvõta ikatu hag̃uáicha ñanderory ha ani hag̃ua jaʼe mbaʼeve omoñeñandu vaítava chupe. Pablo heʼi vaʼekue umi kristiáno ‘natekotevẽiha oñorairõ avavéndi, síno imbaʼeporã vaʼerãha enterovéndi’ (2 Tim. 2:24). Epensamína koʼã situasiónre: ¿Mbaʼépa rejapóta ne patrón nokumpliporãirõ hembiapo? ¿Mbaʼépa eréta peteĩ ermánope hasýpe ou jeýva rreunionhápe? Repredika jave, ¿mbaʼépa eréta peteĩ persónape heʼíramo ndéve naitiempoiha oñeʼẽ hag̃ua nendive? Térã, ¿mbaʼépa rejapóta ne rembireko orreklamárõ ndéve rejagarra haguére peteĩ kompromíso reñemongeta mboyve hendive? Reñemoĩ vaʼerã nde rapicha lugárpe ha reñeimahina mbaʼéichapa omoñeñandúta chupe umi mbaʼe eréva ha rejapóva. Upéva nepytyvõta reporotrata hag̃ua Jehová ojapoháicha (elee Proverbios 15:28).

ÑANEARANDÚKENA JEHOVÁ IÑARANDUHÁICHA

10, 11. ¿Mbaʼéichapa ikatu ñanearandu Jehováicha? Emoĩ peteĩ ehémplo.

10 Jehová ningo iñarandueterei ha oikuaapaite mbaʼépa oikóta amo gotyove. Ñande katu ndajaikuaái ñane renonderã, péro ikatu ñanearandu. Upévare, jadesidi mboyve peteĩ mbaʼe ñañeimahináma vaʼerã mbaʼéichapa ñandeafektáta ñandéve ha umi ótra persónape. Aníkena jajogua umi isrraelítape. Haʼekuéra nopensái mbaʼépa oikóta hesekuéra naiñeʼẽrendúiramo Jehovápe. Nomombaʼéi vaʼekue iñamista Jehovándi ni ndoagradeséi umi mbaʼe haʼe ojapóva hesehapekuéra. Moisés ohechakuaa naiñeʼẽrendumoʼãiha hikuái, ha  upévare heʼi chupekuéra opensáma vaʼerãha mbaʼépa oikóta hesekuéra odesidi vaíramo (Deut. 31:29, 30; 32:28, 29).

11 Ñamoĩmína peteĩ ehémplo ñantende hag̃ua mbaʼéichapa jahechauka hína ñanearanduha. Ñamoĩ chupe nde reĩha de nóvio. Oime vaʼerã sapyʼánte rehechakuaa ijetuʼuha rekontrola hag̃ua umi mbaʼe repensáva ha reñandúva. ¿Mbaʼéichapa rehechaukáta upéicha jave nearanduha? Reevita vaʼerã umi situasión ikatúva ndereity inmoralida sexuálpe. Aníkena arakaʼeve rejapo mbaʼeve nemoĩ vaítava Jehovándi. Ha siémpre nemanduʼa vaʼerã Jehová oipotaha rejeporta porã. Péicha rejehekýita heta provlémagui (Prov. 22:3).

ANÍKENA ÑAPENSA UMI MBAʼE NAIPORÃIVARE

12. ¿Mbaʼérepa ñañatende vaʼerã umi mbaʼe ñapensávare?

12 Ñanearandúramo ndajaikomoʼãi ñapensa umi mbaʼe naiporãivare. Umi mbaʼe ñapensáva ikatu ñakompara tatarendýre. Pe tata ningo ideprovécho hína jaipuru porãramo, por ehémplo ñañekosina hag̃ua. Péro nañañatendéiramo hese ikatu hína jakái térã okaipa ñande róga. Upéicha avei, ñapensa meméramo umi mbaʼe Jehová ñanemboʼévare, katuete ñasẽ porãta. Péro jaikóramo ñapensa ivaívare, tuicha jajeperhudikáta. Por ehémplo, jaikóramo ñañeimahina ñakometeha inmoralida, upéi ndahasymoʼãiete japeka hag̃ua. Ha oikóramo upéva, japyta vaítama Jehovándi (elee Santiago 1:14, 15).

13. ¿Mbaʼépa oiméne oñeimahina raʼe Eva?

13 Jahechamína mbaʼépa oiko vaʼekue Évare. Jehová heʼi vaʼekue: “Pe yva orekóva pe yvyramáta iporãva ha ivaíva rehegua ndereʼúi vaʼerã” (Gén. 2:16, 17, NM). Péro Satanás heʼi Évape: “Ni mbaʼevéicharõ napemanomoʼãi. Ñandejára oikuaa porã hína peʼuha árape pe yva, peikuaáta heta mbaʼe. Pejoguáta Ñandejárape ha peikuaáta mbaʼépa oĩ porã ha mbaʼépa oĩ vai”. Satanás heʼi chupe ikatuha odesidi ijeheguíntema mbaʼépa oĩ porã ha mbaʼépa oĩ vai. Ha Eva ndoipeʼái upéva iñakãgui ha oñeimahina voi oiko porãvetaha upéicha. Haʼe osegi “omaña pe yvyramátare ha ohecha pe hiʼa iporãitereiha, ha oñepyrũ hoʼuseterei voi”. Amo ipahápe “ojagarra ha hoʼu, upéi iména oúrõ guare hendápe, omeʼẽ avei chupe ha haʼe hoʼu” (Gén. 3:1-6, NM). Upevakuére “pe pekádo oike ko múndope, ha pe ñemano oike pekádo rupive” (Rom. 5:12). Péicha jahechakuaa Eva opeka hague noñatendéi rupi umi mbaʼe opensávare.

14. ¿Mbaʼépa heʼi la Biblia pe inmoralida sexuál rehe?

14 Añetehápe ningo Eva ndoʼái vaʼekue  inmoralida sexuálpe. Péro la Biblia heʼi porã ndovaleiha ñañeimahina jarekoha rrelasión sexuál peteĩ ndahaʼéivandi ñane ména térã ñane rembireko. Jesús heʼi vaʼekue: “Entéro osegíva omaña peteĩ kuñáre ha iñakãraku hese, upéva oikóma hendive ipyʼapýpe ha péicha oporomoakãratĩma hína” (Mat. 5:28). Apóstol Pablo heʼi vaʼekue avei: “Ani jaiko jakalkula mbaʼéichapa jajapóta ñane rembipota vai” (Rom. 13:14).

15. ¿Mbaʼépa iñimportanteve ñamotenonde, ha mbaʼérepa?

15 La Biblia heʼi avei jajapo vaʼerãha Jehová oipotáva, ha ndajaikói vaʼerã ñapensa mbaʼéichapa ñaganáta heta pláta. Umi iplátava ningo ndovyʼái ni ñoñeñandúi segúro (Prov. 18:11). Jesús heʼi vaʼekue peteĩ persóna ivyroitereiha oikóramo pláta rapykuéri ha ombotapykue Jehovápe. Upeichagua persóna iplátaramo jepe ‘imboriahu Ñandejára renondépe’ (Luc. 12:16-21). Ñambyatýrõ “mbaʼerepy yvágape” ha ñañehaʼãramo jajapo Jehová oipotáva, ñambopyʼarory hína chupe ha ñande avei javyʼa (Mat. 6:20; Prov. 27:11). Jahechaháicha, ñane amista Jehovándi iñimportanteve hína pe plátagui.

ANI JAIKO JAJEPYʼAPYHÁRE

16. ¿Mbaʼépa ikatu rejapo oiméramo rejepyʼapyeterei reikóvo?

16 Ñañehaʼãramo ñandepláta heta ko múndope, jaikóta jajepyʼapyháre (Mat. 6:19). Jesús heʼi vaʼekue jaikóramo ñapensa meme pe plátare, ijetuʼutaha ñamotenonde hag̃ua Jehovápe (Mat. 13:18, 19, 22). Oĩ avei persóna ojepyʼapýva oñeimahinágui oikotaha hese heta mbaʼe vai. Péro ñapensáramo péicha, ikatu jaju ñanderasy ha ndajajeroviavéi Jehováre. La Biblia heʼi umi ojepyʼapyetereíva oñedeprimiha, péro umi ‘ñeʼẽ iporãva’ ikatuha omokyreʼỹ jey chupekuéra (Prov. 12:25). Upéicharõ, ¿mbaʼépa ikatu rejapo oiméramo rejepyʼapyeterei reikóvo? Reñemongeta vaʼerã peteĩ Testígo ndekuaa porãvandi, ikatu hína nde tuvakuéra, ne ména térã ne rembireko, ỹrõ peteĩ ne amígo ojepyʼapýva nderehe. Haʼekuéra nepytyvõta rejerovia hag̃ua Jehováre ha anivéma hag̃ua rejepyʼapy.

17. ¿Mbaʼéichapa Jehová ñanepytyvõ jajepyʼapy jave?

17 Jehová ningo ontende porãiterei mbaʼéichapa ñañeñandu, ha ikatu ñanepytyvõ jajepyʼapyeterei jave. Pablo heʼi vaʼekue: “Ani pejepyʼapyeterei mbaʼevére, síno opa árape pemombeʼu Ñandejárape peipotáva, pejapo upéva peñemboʼévo, pejerure asývo, ha peagradese avei chupe. Ha Ñandejára pyʼaguapy tuichavéva opa mbaʼe ikatúvagui pentende, oñangarekóta pene korasõre ha umi mbaʼe pepensávare, Cristo Jesús rupive” (Filip. 4:6, 7). Upéicharõ, oiméramo rejepyʼapyeterei reikóvo, repensa vaʼerã Jehová omeʼẽha ndéve heta mbaʼe resegi hag̃ua reiko iñamígoramo. Por ehémplo, haʼe ojevale umi ermáno kongregasionguáre, umi ansiánore, pe tembiguái jeroviaháre, umi ánhel ha Jesúsre nepytyvõ hag̃ua.

18. ¿Maʼerãpa ikatu jaipuru ñane imahinasión?

18 Ko artíkulope jahecha kuri ikatuha jaipuru ñane imahinasión jasegi hag̃ua Jehová ehémplo, ha ñantende hag̃ua umi ótra persónape (1 Tim. 1:11; 1 Juan 4:8). Ñaaprende kuri: 1) javyʼavetaha jahayhúramo ñande rapichápe ha jatrata porã chupekuéra, 2) javyʼavéta ñapensáramo mbaʼépa oikóta ñanderehe jadesidi vaíramo, ha 3) javyʼavéta ndajaikóiramo jajepyʼapyeterei. Upévare, jaipurúkena ñane imahinasión jasegi hag̃ua Jehová ehémplo ha ñapensa hag̃ua mbaʼéichapa jaikóta pe múndo pyahúpe (Rom. 12:12).