ÁÑO 1970 mbytérupi aime tupápe ospitálpe. Upérõ che peteĩ soldádo de 20 áño, péro aju cherasyete ha añeinterna pe Hospital General Valley Forge de Phoenixvíllepe, oĩva Pensilvániape (Estados Unidos). Peteĩ enferméro ou okontrola che presión káda média óra. Ahechakuaa pe mitãkariaʼy, michĩmie ijedavéva chehegui, ojepyʼapyetereiha omañávo cherehe. Che presión oguejy guejyve ohóvo, ha aporandu chupe: “¿Nde piko nderehecháiva gueteri peteĩ persóna omanóvo?”. Hesaʼyju mimbi opytávo, ha heʼi chéve: “No, ndahecháiva gueteri”.

Upe moméntope ivaipaitéma la che pórte. Péro, ¿mbaʼéicha rupípa aju apyta pe ospitálpe? Vuéno, amombeʼúta peẽme la che istória.

AÑEPYRŨ CHE TRAVÁHO GERRAHÁPE

Ag̃uahẽ Vietnámpe julio de 1969-pe. Ha ojejapoháicha entéro umi og̃uahẽ ramóvandi, oñemeʼẽ chéve una semána ikatu hag̃uáicha ajepokuaa pe lugár hakuvévare ha pe órare. Aservi kuri de ajudánte umi sála de operasiónpe oiko aja pe gérra de Vietnam, ha ambaʼapo jave upépe ova cherehe peteĩ mbaʼasy igráveva. Che ningo aipytyvõseterei umi hasývape ha umi erídope, upévare haʼe voi ág̃ante oikotaha chehegui siruháno.

Upéi añepresenta ambaʼapo hag̃ua peteĩ ospitál ojejapohápe siruhía, oĩva Dong Támpe, rrío Mekong ypýrupi. Añepresenta riremínte, ahecha upépe og̃uahẽha manterei umi elikóptero henyhẽtéva erídogui. Che ningo ahayhueterei che retã ha che traváho avei, upévare pyaʼe voi añepyrũma ambaʼapo. Roprepara umi erídope ojopera hag̃uáicha ha ensegída romoinge pe sála de operasiónpe. Umi sála de operasión ojejapo umi kontenedór de metálgui ha oñemoĩ chupe áire akondisionádo. Upépe ombaʼapo peteĩ siruháno, peteĩ anestesísta, ha mokõi enferméro. Pe lugár michĩramo jepe, haʼekuéra ojapo ikatúva guive osalva hag̃ua umi erídope. Upéi ahechakuaa ojehejanteha umi elikópterope unos kuánto vosa hũ guasu. Oñemombeʼu chéve umívape oĩha umi soldádo retekue opytáva ipehẽnguepa. Péicha añepyrũ che traváho pe gerrahápe.

AÑEPYRŨ AHEKA ÑANDEJÁRAPE

Che mitãrusu guive aikuaáma umi testígo de Jehovápe

Aha mboyve pe gérrape, che aikuaáma vaʼekue umi testígo de Jehovápe. Mama ostudia la Biblia  hendivekuéra, péro ndoprogresái ha upévare ndojevautisái. Igústo vaʼekue chéve aguapy ahendu mama ostudia jave. Una ves, ahasa peteĩ Salón de Reino renondérupi che tuvangándi ha aporandu chupe: “¿Mbaʼe ojejapo koʼápe?”. Ha haʼe heʼi chéve: “¡Animoʼãkena reñentremete koʼã héntere!”. Che ningo ahayhu che tuvangápe ha ajerovia hese, ha upévare asegi la ikonsého. Upe guive ajalehaite umi testígo de Jehovágui.

Aju rire Vietnámgui añandu aikotevẽha Ñandejárare. Nosẽi che akãgui umi rrekuérdo vai aguerúva upégui. Péro haʼete chéve umi hénte nontendeporãiva mbaʼépa la oikóva Vietnámpe. Chemanduʼa ojeʼémi hague umi soldádo Estados Unidosgua oasesinaha heta mitã inosénte Vietnámpe. Upévare umi hénte ojapo manifestasión okulpágui chupekuéra.

Che ningo siémpre arekóva enkuénta Ñandejárape, upévare añepyrũ aheka chupe heta iglésiape. Péro ndachegustái umi mbaʼe ahecháva upérupi. Upéi peteĩ domingo, febrérope áño 1971-pe, aha peteĩ Salón del Réinope oñerreunihápe umi testígo de Jehová, opytáva Delray Beach, Florídape.

Ag̃uahẽrõ guare pe Salón del Réinope, opa potaitéma kuri pe diskúrso púvliko. Upémarõ apyta pe segunda orarã, ojestudiahápe rrevísta Ñemañaha. Nachemanduʼái mbaʼe témarepa oñeñeʼẽ upérõ, péro chejurujái apytávo ahechárõ guare umi mitã ohekajoaha umi téxto ivivliakuérape. Añepyrũ añatende porã la oikóvare. Upéi opa rire pe rreunión, peteĩ ermáno hérava Jim Gardner, orekóva 80 áñorupi, oñemboja cherendápe ha ombohasa chéve peteĩ lívro hérava La verdad que lleva a vida eterna, ha heʼi: “¿Ikatúpa ameʼẽmi ndéve ko lívro?”. Upépe roñepyrũ roñemongeta, ha ropyta rojuecha jeytaha jueves pyhareve ikatu hag̃uáicha rostudia la Biblia.

Upérõ ambaʼapo urhénsiape peteĩ klínika privádape oĩva Boca Ratónpe (Florida). Upe día añeʼẽ hague pe ermánondi ambaʼapo vaʼerã pyharekue las 11 de la nóche guive las 7 de la mañána peve. Ndaiporiguasúi rupi traváho, añemoĩ alee pe lívro oñemeʼẽ vaʼekue chéve. Peteĩ enferméra oñemboja cherendápe, oipeʼa chehegui pe lívro, omaña ijapére ha osapukái chéve: “¡Anichéne ningo nde reikéta ko rrelihiónpe!”. Aipeʼa chugui che lívro ha haʼe chupe: “La mita ramo katu alee ko lívro, péro ajedesidíma aiketaha ko rrelihiónpe”. Upéi pe enferméra osẽ oho, ha che apyta aleepaite che lívro upe pyharépe.

Jim Gardner, peteĩ ermáno unhído chembostudia vaʼekue la Biblia. Haʼe oikuaa vaʼekue Charles Taze Rússellpe

Og̃uahẽvo pe jueves, roñepyrũ mboyve rostudia, aporandu ermáno Gárdnerpe: “¿Mbaʼéiko la jastudiátava?”. Haʼe heʼi chéve: “Ha pe lívro ameʼẽ vaʼekue ndéve”. Che asẽ haʼe chupe: “Péro che ningo aleepáma upéva”. Ermáno Gardner heʼi chéve: “Oĩ porã. Péro ñahesaʼỹijomína oñondive pe primer kapítulo”. Upe rire ahechakuaa ndapillái hague heta mbaʼe. Pe ermáno ojerure chéve aheka hag̃ua umi téxto che vivliaitépe voi. Péicha mbeguekatúpe aaprende ahávo mávapa hína Jehová. Upe  pyharevépe rostudia tres kapítulo voi pe lívro. Ha káda jueves pyharevekue rosegi rostudia tres kapítulo. Chegustaiterei ningo umi mbaʼe aaprendéva. Chéve g̃uarã peteĩ priviléhio tuicháva chemboʼe haguére peteĩ ermáno unhído oikuaa vaʼekue ermáno Charles T. Rússellpe.

Ohasa rire unas kuánta semána, oikóma chehegui puvlikadór. Ñepyrũrã Jim heta chepytyvõ, pórke oĩ vaʼekue umi mbaʼe chepyʼapýva ha ijetuʼu avei chéve apredika hag̃ua de kása en kása (Hech. 20:20). Péro asegi asẽ hendive, ha upéva tuicha chemokyreʼỹ. Ha amo ipahápe chegustaitereíma katu pe predikasión. Koʼag̃aite peve apensa upéva haʼeha pe priviléhio tuichavéva arekóva. Ñande ningo Ñandejára ajudánte, ha ndaipóri iñimportantevéva upévagui (1 Cor. 3:9).

AÑEPYRŨ AHAYHU JEHOVÁPE

Pe gérra rire ndojeíri che akãgui heta rrekuérdo vai, ha ahasa avei heta mbaʼe ijetuʼúva. Péro agueropuʼaka koʼã mbaʼe ahayhu rupi Jehovápe che pyʼaite guive (Is. 65:17). Koʼág̃a amombeʼuse peẽme mbaʼéichapa añepyrũ vaʼekue ahayhuve Jehovápe (Apoc. 2:4).

Pe gérra rire ndojeíri che akãgui heta rrekuérdo vai, ha ahasa avei heta mbaʼe ijetuʼúva. Péro agueropuʼaka koʼã mbaʼe ahayhu rupi Jehovápe che pyʼaite guive

Ajevautisa julio de 1971-pe, Asambléa de Distríto héravape “Nombre Divino”, ojejapo vaʼekue Estádio Yánkeepe

Che tuvanga omeʼẽ vaʼekue chéve peteĩ departaménto aiko hag̃ua, péro oikuaárõ guare oikoha chehegui testígo de Jehová, chemosẽ upégui. Upéva oiko vaʼekue áño 1971-pe, hiʼarive upérõ chesogueterei. Pe klínika ambaʼapohápe ningo akovra káda dos semána, ha kavalete aipurupaite lénto kuri la che pláta ajogua hag̃ua ao asẽ hag̃ua apredika. Che añemonde porãse aservi hag̃ua Jehovápe. Areko ningo la che aorroʼimi, péro oĩ peteĩ vánkope Míchiganpe, pe siuda akakuaa haguépe. Upéicha rupi, apyta kuri aiko che kóchepe unos kuánto día, ha aha umi surtidórpe ajevarvea ha ajahu hag̃ua.

 Chemanduʼa porã peteĩ mbaʼe ahasa vaʼekue. Peteĩ día, atermina rire che traváho ahántema pe enkuéntrope asẽ hag̃ua apredika. Pe enkuéntro ningo Salón del Réinope, péro ag̃uahẽ voi rupi, aike pe Salón kupépe ha aestasiona avave ndacherechamoʼãihápe. Aĩ aja upépe ou che akãme umi mbaʼe vaiete oiko vaʼekue pe gérra de Vietnámpe. Haʼete ku ahechapáva umi hénte huguypáva ha ahetũmbáva umi persóna okaipáva ryakuã. Ahendupávaicha voi umi mitãrusu ojerure asýva chéve: “¡Chepytyvõmína, chesalvamíntena!”. Che aikuaa porãma omanotaha hikuái, upéicharamo jepe añehaʼãmbaite akonsola chupekuéra ikatumiháicha. Ojapo vaieterei ningo cherehe chemanduʼávo koʼã mbaʼére.

Ajedesidi siémpre ahayhutaha Jehovápe che pyʼaite guive, ahasáramo jepe heta mbaʼe ijetuʼúva

Che resay che rováre añepyrũ añemboʼe Jehovápe (Sal. 56:8). Añemoĩ ajepyʼamongeta pe esperánsa Ñandejára omeʼẽvare umi omanóvape g̃uarã. Ha upéva chekonsola, pórke antende porã pe rresurreksión rupive Jehová oipeʼapaitetaha che akãgui umi rrekuérdo vai arekóva che ha avei heta ótra persóna. Ñandejára omoingove jeýta umi mitãrusu omano vaʼekuépe pe gérra káusare, ha haʼekuéra orekóta oportunida oikuaávo avei chupe (Hech. 24:15). Añandu ahayhuetereiveha Jehovápe, ha upéva opoko che korasõ mbytetére. Koʼag̃aite peve chemanduʼa porã upe díare. Upe guive ajedesidi siémpre ahayhutaha Jehovápe che pyʼaite guive, ahasáramo jepe heta mbaʼe ijetuʼúva.

JEHOVÁ IVUENOITEREI CHENDIVE

Pe gerrahápe ningo umi hénte ojapo heta mbaʼe ivaietereíva, ha che aime umíva apytépe, upévare heta vése añeñandu kulpávle. Péro ajepyʼamongeta mokõi téxtore ha upéva tuichaiterei chepytyvõ. Peteĩva haʼe Apocalipsis 12:10, 11, heʼihápe ñandepuʼakaha Satanás rehe pe marandu jaikuaaukáva rupive, ha avei pe Ovecharaʼy ruguy rupive. Ha pe ótro téxto katu Gálatas 2:20. Ko téxto chepytyvõ antende hag̃ua Jesucristo omano hague avei “cherehehápe”. Jesús ruguy rupive Jehová cheperdonáma ha che konsiénsia ipotĩ henondépe. Antende porã rire koʼã mbaʼe ajedesidi ajapo opa ikatúva aipytyvõ hag̃ua che rapichakuérape oikuaa hag̃ua Jehovápe (Heb. 9:14).

Chemanduʼávo umi mbaʼe ahasa vaʼekuére, aagradeseterei Jehovápe oñangareko porã haguére siémpre cherehe. Por ehémplo, Jim oikuaárõ guare aikoha che kóchepente, omombeʼu chéve oĩha peteĩ ermána orekóva peteĩ óga ikatutahápe apyta, ha heʼi añeʼẽ hag̃ua hendive. Apensa voi Jehová ojevale hague Jim ha pe ermánare omeʼẽ hag̃ua chéve peteĩ lugár aikomi hag̃ua. Jehová ningo ivuenoiterei ha siémpre okuida isiervokuérare.

AAPRENDE TEKOTEVẼHA APREDIKA PYʼAGUAPÝPE PORÃNTE

Mayo de 1971 aviaha Míchiganpe añatende hag̃ua unos kuánto asúntore. Upérõ aime kongregasión Delray Béachpe, oĩva Florídape. Péro aviaha mboyve, amyenyhẽte puvlikasióngui che valihéra, ha aha pe rrúta interestatál 75-re, nórte gotyo. Ni namoalamitái gueteri la che viáhe ha akolokapáma la che puvlikasionkuéra. Apredika pe marandu porã oñeʼẽva Ñandejára Rréinore mamo ahahápe. Apredika umi kárselpe ha antrega tratádo heta kuimbaʼépe umi lugár ojepytuʼuhápe. Sapyʼánte apensa noiméipa umíva apytépe oĩ raʼe umi oaseptáva pe añetegua (1 Cor. 3:6, 7).

Chemanduʼa aikuaa ypýrõ guare pe añetegua apredika pohýimi vaʼekue, koʼýte che hentekuérape. Ahayhueterei ningo Jehovápe, ha ndaikatúi voi aguerokirirĩ umi mbaʼe aikuaáva. Upévare ndakyhyjéi apredika hag̃ua, péro heta vése añeʼẽ pohýima ha ambopochy umi héntepe. Por ehémplo, aipotaiterei che ermanokuéra, John ha Ron, oasepta pe añetegua ha mbaretépe akonvensese chupekuéra. Tiémpo rire, ahechakuaa tekotevẽha ajediskulpa hendivekuéra. Upéicharõ jepe,  siémpre añemboʼe hesekuéra ha ajerure Jehovápe toñemoag̃ui hikuái hese. Koʼág̃a ahechakuaa mbaʼéichapa Jehová chemboʼe apredika ha amboʼe hag̃ua pyʼaguapýpe porãnte che rapichakuérape (Col. 4:6).

AHAYHUETEREI AVEI CHE FAMÍLIAPE

Che ningo ahayhueterei Jehovápe, ha ahayhu avei che rembireko Súsanpe. Ymaite guive aipotávante voi che irũrã peteĩ persóna chepytyvõ vaʼerã aservi porã hag̃ua Jehovápe, ha Susan ijerovia mbarete ha ohayhu avei chupe. Chemanduʼa peteĩ día aha hague avisita chupe, roĩrõ guare de nóvio. Haʼe oiko Cránstonpe, Rhode Íslandpe ituvakuérandi. Ag̃uahẽvo ahecha oguapyha hína pe terrásape ha olee irrevísta Ñemañaha, peteĩ artíkulo sekundário. Añesorprende ahechávo ohekapaiteha umi téxto vívliko. Upépe apensa: “Kóva ko kuñataĩ ohayhu Jehovápe”. Ha diciembre de 1971-pe romenda. Upe guive haʼe siémpre chepytyvõ ha oĩ che ykére opa mbaʼépe. Susan ningo cherayhu, péro ohayhuve Jehovápe, ha upéva la amombaʼetereíva hese.

Che rembireko Susan ndive ha umi mokõi che raʼy, Paul ha Jesse

Jehová orevendesi omeʼẽvo oréve mokõi mitã, peteĩ héra Jesse ha pe ótro Paul. Haʼekuéra okakuaa aja ohóvo rohechakuaa mbaʼéichapa Jehová siémpre oĩ hendivekuéra (1 Sam. 3:19). Susan ha che rovyʼaiterei mokõivéva ohayhu haguére Jehovápe ipyʼaite guive, pórke roñandu rokumpli porã hague ore rresponsavilida. Ha ojapóma mas de  20 áño haʼekuéra oservi hague de tiémpo kompléto. Avei roguereko mokõi ore nuéra, peteĩ héra Stephanie ha pe ótra katu Racquel. Haʼekuéra ohayhu avei Jehovápe ipyʼaite guive, ha chéve g̃uarã mokõivéva haʼete voi che rajy (Efes. 6:6).

Rovyʼaiterei che famíliandi ropredika jave umi território saʼi ojepredikahápe

Ajevautisa rire apyta aservi 16 áñore Rhode Íslandpe, ha upépe ajuhu heta amígo. Koʼag̃aite peve chemanduʼa mbaʼéichapa ambaʼapo vaʼekue upépe umi ansiáno ikatupyrýva ndive. Aagradeseterei umi superintendénte viahántepe heta chepytyvõ haguére. Tuichaiterei mbaʼe ningo chéve g̃uarã ambaʼapo haguére umi ermáno ohayhúvandi Jehovápe ipyʼaite guive. Áño 1987-pe rova Carolina del Nórtepe ikatu hag̃uáicha roservi oĩvehápe nesesida, ha upépe rojuhu avei heta ore amigorã. *

Adirihi jave pe aty oñesẽ hag̃ua ojepredika, aservírõ guare kómo superintendénte viahánte

Agosto de 2002-pe, Susan ha che roñeinvita roservi hag̃ua Betel de Páttersonpe, Estados Unidos. Che ambaʼapo vaʼekue Departaménto de Servísiope, ha Susan katu lavanderíape. Chupe ningo ogustaiterei kuri itraváho. Upéi agosto de 2005-pe, añepyrũ aservi kómo miémbro del Kuérpo Governánte. Che apensa namereseiha upe priviléhio, ha che rembireko katu ojepyʼapy oikuaágui upéva tuicha rresponsavilidaha. Avei oikuaa tekotevẽtaha ambaʼapo heta ha pyʼỹi roviaha vaʼerãha. Súsanpe ndogustái pe viáhe aviónpe, upéicharõ jepe hetáma roviaha. Haʼe omombeʼu umi ermáno Kuérpo Governantepegua rembirekokuéra mborayhúpe omokyreʼỹ hague chupe. Ha che añandu mbaʼeichaitépa haʼe chepytyvõ, upévare ahayhueterei chupe.

Che ofisínape areko heta fóto iñimportantetereíva chéve g̃uarã. Umíva chemomanduʼa umi mbaʼe porãita ahasa vaʼekue ha chembovyʼáva. Añetehápe ningo ahupytýma heta vendisión ahayhu haguére Jehovápe che pyʼaite guive.

Avyʼaiterei ahasávo tiémpo che famíliandi

^ párr. 31 Rejuhuvéta informasión oñeʼẽva ermáno Morris rehe La Atalaya 15 de marzo de 2006-pe, páhina 26.