Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Ñemañaha (ojestudiáva)  |  Mayo de 2015

Ñañatendékena, cháke Satanás ñanemoñuhãse

Ñañatendékena, cháke Satanás ñanemoñuhãse

“Peñatende [memékena]. Cháke pene enemígo, pe Aña, okorre oikóvo pende jerére peteĩ león pochýicha ha oñehaʼã omokõ oimeraẽvape.” (1 PED. 5:8)

1. ¿Mbaʼépa ojapo peteĩ ánhel haʼe vaʼekue Jehová amígo?

OĨ VAʼEKUE peteĩ ánhel haʼéva kuri Jehová amígo. Péro peteĩ día oñepyrũ opensa yvyporakuéra ikatuha oadora chupe Ñandejárape rangue, ha ndoipeʼái rupi upe mbaʼe vai iñakãgui, ou opeka (Sant. 1:14, 15). Haʼe opuʼã vaʼekue Ñandejára Jehováre ha “omboyke pe añetegua”, upéicha rupi oiko chugui “pe japu ruvicha” (Juan 8:44). Ndajaikuaái ningo mbaʼéichapa héra vaʼekue ko ánhel, péro oñehenói chupe Satanás.

2, 3. ¿Mbaʼérepa Jehová enemígope oñehenói “Satanás”, “Diablo”, “mbói” ha “dragón”?

2 Satanás ningo Jehová ha yvyporakuéra enemigoite hína. La Biblia ñanepytyvõ ñantende hag̃ua mbaʼeichaitépa iñaña. Por ehémplo, ohenói chupe Satanás, heʼiséva “oñemoĩva ótrore”. Haʼe ndaijaʼéi Ñandejára goviérnore ha opuʼã ikóntrape. Satanás ndoipotaiete voi Jehová ogoverna.

3 Apocalipsis 12:9-pe oñehenói avei chupe Diablo, heʼiséva “otakýva ótrore”, térã ijapúva oheja vai hag̃ua pe ótra persónape. Ha oiméne ñanemanduʼa Satanás oinsinua  hague Jehová ijapuha. Avei la Bíbliape oñehenói chupe “mbói ypykue”, pórke oipuru kuri peteĩ mbóipe ombotavy hag̃ua Évape. Upéi ojeʼe avei hese haʼeha pe ‘dragón guasu’, pórke haʼete peteĩ mónstruo iñañaitereíva ha oporojukaséva. Haʼe ndoipotái Jehová okumpli ipromésa, ha ohundipase isiervokuérape.

4. ¿Mbaʼépa ñahesaʼỹijóta ko artíkulope?

4 Jahechaháicha, Satanás haʼe hína pe enemígo oñemoĩ mbaretevéva Jehováre ha ipuévlore. Haʼe ndoipotaieterei jaservi Jehovápe. Upévare la Biblia heʼi ñandéve: “Peñatende [memékena]. Cháke pene enemígo, pe Aña, okorre oikóvo pende jerére peteĩ león pochýicha ha oñehaʼã omokõ oimeraẽvape” (1 Ped. 5:8). Ko artíkulope ñahesaʼỹijóta mbaʼérepa tekotevẽ jajekuida Satanásgui.

SATANÁS IPODERÓSO

5, 6. a) ¿Mbaʼérepa ikatu jaʼe umi ánhel ipoderosoitereiha? b) ¿Mbaʼérepa la Biblia heʼi Satanás ikatuha oporojuka?

5 Umi ánhel “ipoderosoiterei” (Sal. 103:20, NM). Haʼekuéra iñaranduve ha imbareteve ñandehegui. Umi ánhel iñeʼẽrendúva ningo oipuru ipodér ojapo hag̃ua Jehová rembipota. Por ehémplo, peteĩ jey peteĩ ánhel ojuka 185.000 soldádo asíriope peteĩ pyharépente. Upéva ni mbaʼevéicharõ ndaikatumoʼãi ojapo peteĩ umáno, ha ijetuʼuetereítante avei peteĩ ehérsitope g̃uarã (2 Rey. 19:35). Ótra okasiónpe katu peteĩ ánhel oguenohẽ kárselgui Jesús apostolkuérape. ¿Mbaʼéichapa ojapo raʼe upéva? Oavri pe okẽ, oguenohẽ chupekuéra ha upéi omboty jey pe okẽ, ha umi guárdia ni ndopillái (Hech. 5:18-23).

6 Jahechaháicha, umi ánhel iñeʼẽrendúva oipuru ipodér ojapo hag̃ua umi mbaʼe iporãva. Péro Satanás oipuru ipodér ojapo hag̃ua mbaʼe vai. Añetehápe ningo haʼe ipoderosoiterei, upévare la Biblia heʼi hese haʼeha “ko múndo ruvicha”, ha “ko múndo jára” (Juan 12:31; 2 Cor. 4:4). Heʼi avei hese ‘ikatuha oporojuka’ (Heb. 2:14). Péro upéva ndeʼiséi haʼe voi ikatuha ojukapaite umi persónape. Upéicharõ, ¿mbaʼére la Biblia heʼi hese ikatuha oporojuka? Primero, pórke haʼe omoñañamba umi héntepe, upévare ou hikuái ndaijaʼéi ojuehe ha iviolénto. Segundo, pórke Adán ha Eva opeka ikúlpare, ha upévare entéro japeka ha ñamano (Rom. 5:12). Ndareíri Jesús heʼi Satanás ‘oporojukaha’ (Juan 8:44). Añetehápe, opa umívare ikatu jaʼe Satanás ipoderosoitereiha.

7. Emombeʼu umi ehémplo vívliko ohechaukáva umi demónio ipoderosoha.

7 Ñañemoĩvo Satanás kóntrape, ñañemoĩ avei isegidorkuéra kóntrape. Ha umíva apytépe oĩ hína umi demónio, haʼéva umi ánhel opuʼã vaʼekue Ñandejárare (Apoc. 12:3, 4). La Bíbliape oĩ heta ehémplo ohechaukáva umi demónio imbareteveha ñandehegui ha ikatuha ñanembohasa asyeterei (Mat. 8:28-32; Mar. 5:1-5). Aníkena ñanderesarái Satanás ha umi demónio ipoderosoitereiha (Mat. 9:34). Péro Jehová ñanepytyvõramo ikatúta ñandepuʼaka hesekuéra.

SATANÁS IPYʼAHATÃ

8. a) ¿Mbaʼépa ojapose Satanás? (Ehecha pe taʼanga oĩva iñepyrũme.) b) ¿Mbaʼérepa nde ere hetaiterei hénte ojoguaha avei Satanáspe?

8 Satanás ningo iñaña ha ipyʼahatãiterei. Jahecha haguéicha párrafo 4-pe,  la Biblia heʼi hese ojoguaha ‘peteĩ león pochýpe’, okororõva hína ivareʼaitereígui. Haʼe orekóma ipoguýpe ko múndo kompletoite, ha ni upeichavérõ noñekontentái (1 Juan 5:19). Satanás ohundise umi unhído oĩvape gueteri ko yvy ape ári, ha avei “umi ambue ovechakuérape” (Juan 10:16; Apoc. 12:17). Upévare ojevale yvyporakuérare ikatu hag̃uáicha opersegi umi kristiáno teépe síglo primero guive koʼag̃aite peve.

9, 10. a) ¿Mbaʼéichapa Satanás oataka vaʼekue umi isrraelítape? b) ¿Mbaʼérepa Satanás oatakaseterei vaʼekue umi isrraelítape? c) ¿Mbaʼéichapa nde ere Satanás oñeñanduha peteĩ Ñandejára siérvo oúramo opeka?

9 Peteĩ león ivareʼáva ni michĩmi ndoiporiahuverekói iprésape. Upéva rangue oñemboharái vaipa hese ojuka rire jepe. Péicha avei Satanás ni michĩmi nombyasýi umi persóna oatakávape. Ñapensamíntena mbaʼéichapa oataka vaʼekue umi isrraelítape. Por ehémplo, ombotavy Zimrípe hoʼa hag̃ua pe inmoralida sexuálpe. Avei omoñuhã Guehazípe ikatu hag̃uáicha itaryrýi. Koʼã pekádo oporombosufrieterei vaʼekue. Katuete Satanás ovyʼaitereíne raʼe ohechávo koʼã persóna opekaha. Jaleévo koʼã rreláto, jahechakuaa Satanás ipyʼahatãitereiha (Núm. 25:6-8, 14, 15; 2 Rey. 5:20-27).

Satanás ovyʼaiterei Jehová siérvo opekáramo (Ehecha párrafo 10)

10 ¿Mbaʼérepa Satanás oatakaseterei vaʼekue umi isrraelítape? Pórke oikuaa pe Mesías outaha tetã Israélgui. Haʼe oikuaa pe Mesías ohunditaha chupe ha ohechaukataha Jehová añoite orekoha derécho ogoverna hag̃ua (Gén. 3:15). Satanás ndoipotái umi isrraelíta oĩ porã Jehovándi, ha upévare ojapo opa ikatúva ombopeka hag̃ua chupekuéra. Haʼe ni michĩmi nombyasýi rréi David oúrõ guare oñentremete tembireko ahénore. Avei ndoiporiahuverekói vaʼekue Moiséspe operdérõ guare pe oportunida oike hag̃ua pe Yvy Oñepromete vaʼekuépe. Añetehápe, Satanás ovyʼaiterei peteĩ Ñandejára siérvo oúramo opeka, ha péicha jave oaprovechapaite oñembohory hag̃ua Jehováre (Prov. 27:11).

11. ¿Mbaʼérepa oiméne Satanás omoñuhãse rakaʼe Sárape?

 11 Satanás oikuaa pe Mesías outaha Abrahán famíliagui, upévare ndaijaʼeieterei hesekuéra. Por ehémplo, ñapensamína mbaʼépa oiko Jehová heʼi rire Abrahánpe ‘ojapotaha chugui peteĩ nasión tuicháva’ (Gén. 12:1-3, NM). Abrahán ha Sara oĩrõ guare Egíptope, pe rréi upepegua ogueraha Sárape omenda hag̃ua hese, péro Jehová nopermitíri upéva (elee Génesis 12:14-20). Upeichaite avei oiko haʼekuéra oĩrõ guare Guerárpe, Isaac onase mboyve. Pe rréi upe siudapegua omendase vaʼekue avei Sárare (Gén. 20:1-7). ¿Ikatúpa jaʼe Satanás voi ojapouka hague koʼã mbaʼe umi rréipe omoñuhã hag̃ua Sárape? La Biblia ndeʼíri. Péro oiméne ñanemanduʼa Sara oiko porãitehágui Úrpe ou hague oiko óga kárpapente. Ikatu oime Satanás oipuruse umi lúho orekóva umi rréi, ikatu hag̃uáicha Sara otraisiona iménape ha Jehovápe. Satanás oikuaa Abrahán ha Sara famíliagui outaha pe Mesías, upévare ovyʼaitereíta kuri Sara operdéramo upe priviléhio porãite. Ni michĩmi nointeresái chupe Sara oúramo herakuã vai, ombyai imatrimónio, térã opyta vaíramo Jehová renondépe. ¡Ajépa iñañaite pe Satanás!

12, 13. a) ¿Mbaʼépa ojapo rakaʼe Satanás onasérõ guare Jesús? b) ¿Mbaʼépa nde ere Satanás oñanduha koʼág̃a ohechávo umi mitãrusu oserviha Jehovápe?

12 Jesús onase vaʼekue heta tiémpo Abrahán omano rire. Satanáspe g̃uarã pe mitãraʼy ni michĩmi naiporãi ni ndaijukýi. Haʼe oikuaa Jesús ouha Abrahán famíliagui ha oikotaha chugui pe Mesías oñepromete vaʼekue. Hiʼarive Jesús ‘ohundipaitéta pe Aña rembiapokue’ (1 Juan 3:8). ¿Opensápa Satanás ipyʼahatãitereitamaha ojukáramo peteĩ mitãraʼy? Nahániri. Chupe ningo ndoúi ni ndohói mbaʼépa iporã térã mbaʼépa ivai. Upévare pyaʼe voi otrama ojukauka hag̃ua Jesúspe. ¿Mbaʼépa ojapo?

13 Rréi Herodes oikuaárõ guare onasemaha “hudiokuéra rréi”, ipochyeterei ha ojukase chupe (Mat. 2:1-3, 13). Upévare ojukauka enterovete umi mitã orekóva guive dos áño térã saʼive, oĩva Belénpe ha umi puévlo oĩvape ijerére (elee Mateo 2:13-18). Upérõ guare Jesús ojesalva. Péro, ¿jahechakuaápa mbaʼeichagua persónapa Satanás? Chupe g̃uarã ningo ndahaʼéi mbaʼevete yvyporakuéra rekove, ni umi mitã mimi rekove jepe. Péicha jahecha Satanás ipyʼahatãitereiha. Ndareíri la Biblia heʼi hese ojoguaha ‘peteĩ león pochýpe’.

SATANÁS ÑANEMBOTAVYSE

14, 15. ¿Mbaʼéichapa Satanás ombotavy umi héntepe?

14 Satanás ombotavy umi héntepe ikatu hag̃uáicha oñemoĩ hikuái Jehová kóntrape (1 Juan 4:8). ¿Mbaʼéichapa ojapo upéva? Oroviaka umi héntepe ‘noikotevẽiha Ñandejárare’ ha natekotevẽiha oiko iñamígoramo (Mat. 5:3). Satanás ombotavy hetaiterei héntepe ha “omohesatũ chupekuéra” ani hag̃ua oikuaa Jehovápe (2 Cor. 4:4).

15 Jehová oipota jaadora chupe añoite, ha Satanás oikuaa upéva (Éx. 20:5). Upévare opaicharei oñehaʼã ombotavy yvyporakuérape, ha koʼýte ojevale umi rrelihión fálsare. Ovyʼaiterei voi ohechávo umi hénte oadoraha iñantepasadokuérape, pe naturalésa, animalkuéra, térã ambue mbaʼe, ndahaʼéima  guive Jehovápe. Umi persóna ojapóva koʼã mbaʼe ningo oimoʼã Ñandejára oguerohoryha chupekuéra, péro añetehápe ndovaléi mbaʼeverã umi mbaʼe ogueroviáva ni umi rrituál osegíva hikuái. Péicha oiko vaʼekue umi isrraelítare proféta Isaías tiémpope. Upévare Jehová oñehaʼãmbaite oipytyvõ chupekuéra ko proféta rupive ha okompara pe rrelihión fálsa peteĩ tembiʼu ndaideprovéchoivare. Heʼi chupekuéra: “¿Mbaʼupe piko pepaga umi mbaʼe ndahaʼéivare pan? ¿Ha mbaʼérepa pemombopa rei pene rembiapo repykue pejogua hag̃ua umi mbaʼe napenemoryg̃uatáiva? Pehendu porãna la haʼéva peẽme, ha peʼúta umi mbaʼe iporãva” (Is. 55:2, NM).

16, 17. a) ¿Mbaʼérepa Jesús heʼi Pédrope: “¡Eñemoĩ che atukupépe Satanás!”? b) ¿Mbaʼéichapa Satanás ñanembotavyse?

16 Satanás oñehaʼãmbaite avei ombotavy Jehová siervokuérape. Ñanemanduʼamína mbaʼépa oiko vaʼekue Jesús heʼírõ guare idisipulokuérape omanotamaha. Apóstol Pedro ohayhueterei rupi Jesúspe osẽ heʼi chupe: “Anivéna ere upéicha che Ruvicha, ejeporiahuverekomína nde avei. Ni mbaʼevéicharõ ndoikomoʼãi koʼã mbaʼe nderehe”. Péro Jesús orresponde chupe: “¡Eñemoĩ che atukupépe Satanás!” (Mat. 16:22, 23). ¿Mbaʼére piko osẽ heʼi chupe péicha? Pórke Jesús oikuaa porã omanómante vaʼerãha ikatu hag̃uáicha ohechauka Satanás ijapuha ha avei osalva hag̃ua yvyporakuérape. Añetehápe, Jesús oreko vaʼekue ikárgope peteĩ rresponsavilida iñimportantetereíva ha ndaikatúi kuri opensa ijehénte. Péro Satanás katuete oipotaitereíne raʼe Jesús ojedeskuida upe moméntope.

17 Ko múndo aña oñehundi potaitéma. Upévare koʼã tiémpo jaikoha iñimportanteterei. Péro Satanás oipota ñapensa ñandejehénte ha jaiko trankílamente jajepyʼapyʼỹre mbaʼevére. Oipota jaiko ko múndo oikuaveʼẽva rapykuéri ha ñapensa ofaltaha gueteri heta tiémpo ou hag̃ua pe fin, térã ndoumoʼãiha voi. Péro upéva japu hína. Ñande ñañatende porã vaʼerã ha ani ñanderesarái jaikoha umi ára pahápe (Mat. 24:42).

18, 19. a) ¿Mbaʼépa Satanás oipota ñapensa? b) ¿Mbaʼéichapa Jehová ñanepytyvõ?

18 Satanás oipota avei ñapensa Jehová nañanderayhuiha ha núnka noperdonamoʼãiha ñande pekádo. Péro upéva japúnte avei. La Biblia heʼi: “Ñandejára ningo hekojoja hína ha ndahesaraimoʼãi umi mbaʼe pejapo vaʼekuégui [ha] mbaʼéichapa pehayhu héra” (Heb. 6:10). Jahechaháicha, Jehová omombaʼeterei entéro mbaʼe jajapóva hesehápe (elee 1 Corintios 15:58). Jehová ningo Satanáspe la ndohayhúi ha noperdonamoʼãi. Upévare, aníkena jaheja pe Diablo ñanembotavy.

19 Ko artíkulope jahecha Satanás ipoderosoitereiha, ipyʼahatã ha oporombotavyseha. Péro Jehová ñanepytyvõ rupi, ikatu ñandepuʼaka hese. La Biblia omombeʼu ñandéve mbaʼe ñuhãpa Satanás oipuru ha ñanepytyvõ ñañatende porã hag̃ua (2 Cor. 2:11). Péro ndahaʼéi jaikuaánte vaʼerã umi ñuhã, síno ñañehaʼãmbaite vaʼerã ani hag̃ua jaʼa umívape. La Bíbliape heʼi voi: “Peñemoĩ mbaretéke pe Añáre ha haʼe odiparáta pendehegui” (Sant. 4:7). Pe artíkulo oúvape jahecháta mbaʼépa jajapo vaʼerã ani hag̃ua jaʼa mbohapy ñuhã Satanás oipurúvape.