Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Ñemañaha (ojestudiáva)  |  Marzo de 2015

 Tembiasakue

Rojuhu peteĩ traváho orembovyʼavéva

Rojuhu peteĩ traváho orembovyʼavéva

GWEN ha che rorekórõ guare cinco áño roñepyrũ roaprende dánsa. Ore ndorojokuaáiti kuri, péro rokakuaávo rohóvo káda uno rodesidíma rosegitaha upe karréra. Upéi, oho porãve jave oréve, rodesidi rohejapaite. ¿Mbaʼérepa rojapo upéva?

David: Anase áño 1945-pe peteĩ puévlo héravape Shropshire, Inglatérrape. Che túva oreko peteĩ gránha peteĩ puevloʼi itrankílovape. Ag̃uahẽ rire eskuélagui, ajepokuaámi amongaru umi ryguasu, ambyaty hupiʼakuéra, ha aiko umi vaka ha ovechakuérare. Vakasión tiémpope katu akosechámi umi kóga ha ambaʼapo mimi traktórpe.

Péro oĩ ambue mbaʼe cheinteresavéva. Che túva ohechakuaa chemitã guive ajerokysetereiha. Upémarõ, akumplírõ guare cinco áño heʼi che sýpe chemoinge hag̃ua peteĩ eskuéla oĩvape ore puévlope oñemboʼehápe dánsa claqué. Pe profesór chemboʼe avei valét, pórke ohechakuaa osẽ porãtaha chéve. Arekópe 15 áño agana peteĩ véka aha hag̃ua pe Real Escuela de Ballétpe, oĩva Lóndrespe. Upépe aikuaa Gwénpe ha ropyta kómo paréha de váile.

Gwen: Anase Lóndrespe 1944-pe. Chemitã guive ajerovia Ñandejárare ha alee la Biblia, péro nantendeporãi. Arekórõ guare cinco áño añepyrũ astudia dánsa. Seis áño haguépe apartisipa peteĩ konkúrsope ojejapóva Gran Bretaña tuichakuére, ha agana peteĩ véka astudia hag̃ua pe Real Escuela de Ballétpe, oñemboʼehápe umi imitãvévape. Upéva opyta Richmond Párkpe (Londres), peteĩ mansión neporãvape hérava White Lodge. Upépe akontinua che koléhio ha aaprende valét klásiko. Hiʼarive oremboʼe umi profesór ikatupyryvéva. Arekópe 16 áño aháma astudia pe Real Escuela de Ballétpe, opytáva Lóndrespe séntrope, ha aikéma umi estudiánte tuichavéva apytépe. Upépe aikuaa Davídpe. Unos kuánto mése rire ropartisipáma umi teátro de óperape, oñepresentáva pe Teatro Real de Óperape, opytáva Covent Gárdenpe (Londres).

Rombaʼapórõ guare kómo vailarín rorrekorre vaʼekue heta hendárupi

David: Upeichaite, Gwen heʼi haguéicha, rojeroky jepe pe Teatro Real de Óperape ifamosoitévape ha pe Festival de Ballet de Lóndrespe (koʼág̃a hérava Ballet Nacional de Inglaterra). Peteĩ profesór ombaʼapóva pe Ballet Nacionálpe oforma peteĩ emprésa internasionál de dánsa siuda de Wúppertalpe (Alemania), ha oreporavo mokõivévape roho hag̃ua upépe kómo vailarín solísta. Rosegi aja ore profesiónpe, roho roaktua diferénte tetãrupi ko yvy tuichakuére ha romoirũ mimi pe vailarína famósape hérava Margot Fonteyn, ha avei pe vailarín famósope hérava Rudolf Nureyev. Ñaiméramo ko profesiónpe, ndahasyiete ñapensa hag̃ua ñaneimportanteveha ótrogui.

 Gwen: Añemeʼẽmbaite pe dánsape. Che ha David roñehaʼãmbaite rohupyty hag̃ua pe fáma. Che ningo avivi voi ameʼẽvo che autógrafo, arresivívo yvoty ha umi hénte ojepopetejoáramo chéve. Ko profesiónpe opavave lénto hekokyʼa, opita ha hoʼu rasa vevída. Ha ojapoháicha heta ore kompañerokuéra, ajerovia che amuléto de la vuéna suértere.

ROHEJA ORE PROFESIÓN

Romendárõ guare

David: Heta áño ambaʼapo rire de vailarín, aju chekaneʼõ aiko hague ava ápe ha pépe. Che ningo akakuaa vaʼekue peteĩ gránhape, upévare ahechagaʼu pe kámpo, ha apensa igustovetaha voi aha aiko trankílo porã upérupi. Upémarõ áño 1967-pe aheja che profesión ha añepyrũ ambaʼapo peteĩ gránhape papa umíva róga ypýpe. Pe gránha jára oalkila chéve peteĩ ogaʼi. Upéi ahenói teléfonope Gwénpe ha haʼe chupe romenda hag̃ua. Haʼe ningo osegi de vailarína, péro haʼeñóntema, ha oho porãiterei chupe. Upévare ijetuʼu lénto chupe odesidi hag̃ua mbaʼépa ojapóta. Upéicharõ jepe, cheasepta ha oho oiko chendive pe kampáñape, ndoikuaáiramo jepe mbaʼeichaitépa ojeiko umichahárupi.

Gwen: Si, ijetuʼu kuri chéve ajepokuaa hag̃ua pe kámpañape. Aiko vaʼerã añami vaka, amongaru kure ha pe klíma avei idiferenteterei che aiko haguégui. David oñepyrũ peteĩ kúrso de ganadería oduráva nueve mése, ikatu hag̃uáicha ikatupyryve omongakuaa hag̃ua umi animál. Añeñandu cheañoite de diakue, pórke haʼe pyharéma og̃uahẽ jepi. Upe tiémpope g̃uarã onaséma kuri Gilly, che membykuña ypykue. Ha David oipota aaprende amanehakuaa hag̃ua veíkulo. Peteĩ díape aha peteĩ puévlope namombyrýiva ógagui, ha ajotopa peteĩ che konosídandi hérava Gael.

Rombaʼapo jave pe gránhape romenda riremi

Gael cheinvita hógape roʼu hag̃ua te ha ohechauka chéve ifóto de kasamiénto, ha peteĩvape ojekuaa oĩha hikuái un grúpo de persónandi peteĩ lugár héravape Salón del Reino. Aporandu chupe mbaʼe rrelihionguápa haʼe. Avyʼaiterei heʼívo chéve haʼe ha iména haʼeha testígo de Jehová, pórke chemanduʼa peteĩ che tia ivuenaitereíva Testígo hague avei. Papápe ndogustái vaʼekue haʼe osegi haguére upe rrelihión ha omombopámi chugui umi puvlikasión oguerúva. Che nantendéi vaʼekue mbaʼéicha rupípa peteĩ kuimbaʼe ivuenoitéva oporotrata vaiete.

Hasýpe areko oportunida apilla hag̃ua mbaʼérepa che tia rrelihión idiferentete umi ótrogui. Gael ohechauka chéve mbaʼépa añetehápe omboʼe la Biblia. Añesorprende ahechávo oĩha heta kreénsia la Biblia nomboʼéiva, por ehémplo umi omanóva espíritu osegiha oikove ha pe trinida (Ecl. 9:5, 10;  Juan 14:28; 17:3). Ha primera ves ahecha la Bíbliape voi Ñandejára heraha Jehová (Éx. 6:3).

David: Gwen omombeʼu chéve umi mbaʼe oaprendéva ohóvo. Chemanduʼa papa heʼími hague chéve alee vaʼerãha la Biblia. Upéi Gwen ha che rodesidi rostudia Gael ha iména Derrick ndive. Seis mése haguépe rova Oswéstrype, opytáva Shropshírepe, pórke oñepresenta oréve peteĩ oportunida roalkila hag̃ua ore granhaʼirã. Upépe rokontinua ore estúdio peteĩ Testígondi hérava Deirdre. Ñepyrũrã ndoroprogresaguasúi, pórke orejokuaite ore rymbakuéra. Péro saʼi saʼípe pe añetegua opoko ore korasõre.

Gwen: Chéve ningo chedomina vaʼekue umi superstisión, ha hasýpe akambia. Isaías 65:11 chepytyvõ antende hag̃ua mbaʼépa Jehová opensa umi oservívare pe dios de la Vuéna Suértepe. Heta añemboʼe rire, adesidi amombopa umi amuléto arekóva. Avei ahechakuaa Jehová cheguerohory hag̃ua tekotevẽha cheumílde. La Bíbliape heʼi voi: “Pe oñembotuichávape, ojeapoʼíta, ha pe oñemomirĩvape katu oñembotuicháta” (Mat. 23:12). Opokoiterei cherehe aikuaávo Ñandejára ñanderayhuetereiha, ha upévare omeʼẽ hague Itaʼýra ñandesalva hag̃ua. Upérõ guare rorekóma ótro mitã ha rovyʼaiterei roikuaávo ikatutaha roiko oñondivepa opa ára g̃uarã peteĩ paraísope ko yvy ape ári.

David: Antendérõ guare mbaʼéichapa oñekumplipaitéta umi profesía oĩva la Bíbliape, por ehémplo umi oĩva Mateo kapítulo 24-pe ha lívro de Daniélpe, aime segúro atopa hague pe rrelihión verdadéra. Ahechakuaa tuichaiterei privilehioha jaiko Jehová amígoramo, ha ndaiporiha mbaʼeve ñambojoja vaʼerã upévare. Antendevévo heta mbaʼe omboʼéva la Biblia, napensaguasuvéima umi mbaʼe ymave ahupytyse vaʼekuére ha iñimportanteveha adedika tiémpo che rembireko ha che rajykuérape. Filipenses 2:4 chepytyvõ anivéma hag̃ua apensa chejehénte, ha chekonvense natekotevẽiha areko peteĩ gránha tuichaitereíva. Ahechakuaa iñimportanteveha amotenonde Jehovápe. Upéi ahejáma pe sigarríllo, péro ijetuʼu kuri oréve roho hag̃ua rreunionhápe sábado kaʼaru pórke upe órape roñami vaʼerã ore rymba vakakuéra, hiʼarive pe lugár ojejapoha umi rreunión opyta 10 kilómetro ógagui. Péro roñopytyvõ Gwen ndive ani hag̃ua rofalta ni peteĩ rreuniónpe. Avei rojepokuaa rosẽ predikasiónpe domingo pyharevekue roñamimba rire umi vaka, ha katuete rogueraha orendive umi mitãkuñaʼípe.

Ore hentekuérape ndogustaiete umi kámbio rojapóva. Gwen túva noñeʼẽvéi chupe 6 áñore. Mama ha papa ojapo avei ikatúva guive ani hag̃ua rojeheʼave Testigokuérare.

Gwen: Jehová orepytyvõ rombohovái hag̃ua koʼã mbaʼe ijetuʼúva. Ha ohasávo pe tiémpo rojepokuaaitereíma umi ermáno ore kongregasionguáre, oĩva Oswéstrype. ¡Haʼete voi hikuái ore família tee mbaʼe! Haʼekuéra heta orepytyvõ rohasárõ guare  umi pruéva ijetuʼúva (Luc. 18:29, 30). Áño 1972-pe roñemeʼẽ Jehovápe ha rojevautisa. Che aipytyvõse che rapichakuérape oikuaa hag̃ua avei pe añetegua, upévare ajagarra che prekursorádo.

PETEĨ TRAVÁHO IPORÃVÉVA

David: Pe gránhape ningo heta rombaʼapo pohýi ha orekaneʼõ. Péro roñehaʼãmbaite roservi porã Jehovápe ha romoĩ ehémplo porã ore famíliape. Tiémpo rire, pe goviérno nomeʼẽguasuvéima ajuda granherokuérape, ha upévare rohejámante la ore gránha. Ropyta ogaʼỹre ha travahoʼỹre. Upérõ mbohapýma orefamília ha pe ipahague 1 áñonte oreko. Roñemboʼe Jehovápe ha rojerure chupe orepytyvõ ha oregia hag̃ua. Upémarõ rodesidi roavri peteĩ eskuéla de dánsa romantene hag̃ua ore família. Roñehaʼãmbaite rupi romotenonde Jehovápe, opa mbaʼe osẽ porãmba oréve. Rovyʼaiterei umi mbohapy ore família odesidi haguére ojagarra iprekursorádo omohuʼã rire ikoléhio. Gwen avei oservi de prekursóra ha upéicha rupi ikatu omoirũ káda día umi mitãkuñáme.

Umi mokõi che rajy tuichavéva, Gilly ha Denise, omenda rire, rodesidi romboty pe eskuéla de dánsa. Romondo peteĩ kárta pe sukursálpe ha roʼe chupekuéra rovaseha peteĩ lugár oñekotevẽvehápe ajúda. Heʼi oréve hikuái ikatuha roho roservi suréste gotyo Inglatérrape, ha rova upépe. Upérõ che rajy pahaguéntema oĩ orendive, hérava Debbie. Upévare adesidi avei ajapo che prekursorádo. Cinco áño upe rire, ojejerure oréve roipytyvõ hag̃ua umi kongregasión oĩvape nórte gotyove. Debbie omenda rire, roservi 10 áño pe Konstruksión Internasionálpe ha roho rombaʼapo Zimbabue, Moldavia, Hungría ha Costa de Marfílpe. Upéi roju jey Inglatérrape roipytyvõ hag̃ua oñemopuʼãrõ guare pe Betel de Londres. Areko rupi experiénsia, ojejerure chéve aipytyvõ hag̃ua peteĩ tiémpore pe gránha oĩvape Betélpe. Koʼág̃a roservi hína de prekursór noroéste gotyo Inglatérrape.

Vyʼápe roservi pe Konstruksión Internasionálpe

Gwen: Haʼete vaʼekue oréve rovyʼáva rojeroky tiémpope, péro roikuaa rire Jehovápe rohechakuaa mbaʼépa añetehápe la ñanembovyʼáva, ha upéva ndopamoʼãi arakaʼeve. Añetehápe, rosegi rombaʼapo kómo paréha, péro ndahaʼevéima dánsape, síno ore prekursorádope. Rovyʼaiterei ikatu haguére romboʼe heta persónape pe añetegua, oipytyvõtava chupekuéra ojesalva hag̃ua. Koʼã mbaʼe haʼete voi peteĩ ‘kárta oñeʼẽva orerehehápe’, ha ivaliosoiteve pe fáma ikatúvagui ojehupyty ko múndope (2 Cor. 3:1, 2). Ndoroikuaáirire pe añetegua, ropytamoʼã kuri umi fótorente, umi rrekuérdo yma guarére, ha unos kuánto invitasión de teátro roipuru vaʼekuére.

David: Hetaiterei mbaʼépe ningo rokambia roikuaa rire Jehovápe. Pe añetegua tuicha chepytyvõ akumpli hag̃ua che rresponsavilida ména ha túvaramo. La Biblia omombeʼu Míriam, rréi David ha ambue Ñandejára siérvo yma guare ojeroky hague vyʼágui. Oréve avei hiʼãitereíma og̃uahẽ pe múndo pyahu. Upépe, rojerokýta avei vyʼágui (Éx. 15:20; 2 Sam. 6:14).