Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Ñemañaha (ojestudiáva)  |  Marzo de 2015

Jehová ñanemboʼe lája isensilloiterei

Jehová ñanemboʼe lája isensilloiterei

“Remokañy porã [...] koʼã mbaʼe umi iñarandu ha iñakãporãvagui ha reikuaauka umi mitãme.” (LUC. 10:21)

1. ¿Mbaʼérepa Jesús “ovyʼaiterei” idisipulokuéra ou jey rire? (Ehecha pe taʼanga oĩva iñepyrũme.)

JESÚS omondo 70 disípulope opredika hag̃ua pe marandu porã oñeʼẽva Ñandejára Rréinore. Péro koʼã disípulo ombohovái vaʼerã heta enemígope, umíva apytépe umi líder rrelihióso hudío. Koʼãva ningo ijestúdio yvate ha iñakãporã, ha oipota umi hénte opensa Jesús haʼeha peteĩ karpintéro reínte (Mar. 6:3). Avei heʼi hikuái umi disípulo ijestudioʼiha (Hech. 4:13). Opa umívare, Jesús oikuaasetereíma mbaʼéichapa oho chupekuéra predikasiónpe. ¿Mbaʼépa omombeʼu hikuái oúvo? Ovyʼaitereiha ikatu haguére opredika, ha umi demónio oñemoĩramo jepe hesekuéra, okumpli porã oñemanda vaʼekue chupekuéra. La Biblia heʼi Jesús ohechávo chupekuéra “ovyʼaiterei” hague avei. ¡Oime vaʼerã ningo ijuruguyrei omañávo hesekuéra! Péro, ¿mbaʼépa oipytyvõ umi disípulope ikatu hag̃uáicha ipyʼaguasu ha ovyʼa, oĩramo jepe oñemoĩva hesekuéra? (Elee Lucas 10:1, 17-21.)

2. a) ¿Mbaʼérepa Jesús okompara idisipulokuérape mitãre? b) ¿Mbaʼéicha rupípa Jesús disipulokuéra ontende porã umi mbaʼe hypyʼũvéva oĩva Ñandejára Ñeʼẽme?

2 Jesús heʼi Jehovápe: “Rombotuicha opavave rovake che Ru,  yvága ha yvy Ruvicha, reñomi haguére koʼã mbaʼe umi iñarandu ha iñakãporãvagui ha reikuaauka umi mitãme. Nde reipotágui che Ru, upéicha oiko” (Mat. 11:25, 26). ¿Mbaʼérepa Jesús okompara idisipulokuérape mitãre? Haʼekuéra ningo hekomirĩ, ha umi mitãicha oaprendese umi mbaʼe oñemboʼéva chupekuéra. Ndojoguaiete hikuái umi líder rrelihióso hudíope oikóva upe tiémpope, heʼíva ijehe iñaranduha ha oimoʼãva ndaiporiha ivalevéva chuguikuéra (Mat. 18:1-4). ¿Mbaʼépa ohupyty umi disípulo iñumílde haguére? Jehová ojevale ijespíritu sántore ikatu hag̃uáicha oipytyvõ chupekuéra ontende hag̃ua umi mbaʼe hypyʼũvéva jepe oĩva Iñeʼẽme. Péro, ¿mbaʼépa oiko umi líder rrelihiósore? Haʼekuéra oñemombaʼeguasu haguére, Satanás odomina chupekuéra, ha upéicha rupi nontendéi umi mbaʼe oĩva Ñandejára Ñeʼẽme.

3. ¿Mbaʼépa ñahesaʼỹijóta ko artíkulope?

3 Jesús ovyʼaiterei ohechávo mbaʼéichapa Itúva omyesakã umi mbaʼe hypyʼũva oĩva Iñeʼẽme umi persóna hekomirĩvape, tahaʼe ijestudioʼíva térã ijestúdio yvatéva. ¿Ikatúpa jaʼe Jehová okambia hague? ¿Mbaʼérepa jaʼekuaa koʼag̃aite peve isensilloha omboʼe lája? Ko artíkulope jahecháta mbaʼéichapa koʼág̃arupi Jehová omyesakã umi iñumíldevape umi mbaʼe hypyʼũva oĩva la Bíbliape.

ENTEROVÉVA IKATU ÑANTENDE LA BIBLIA OMBOʼÉVA

4. ¿Mbaʼérepa jaʼekuaa rrevísta Ñemañaha de estúdio lenguáhe sensíllo haʼeha peteĩ rregálo?

4 Umi áño ohasa ramovévape, Ñandejára organisasión omboʼe pe añetegua hesakã porãve ha isensillove hag̃uáicha. Jahechamína mbohapy ehémplo. Primero, oñeguenohẽ rrevísta Ñemañaha de estúdio lenguáhe sensíllope. * Ko rrevísta ningo peteĩ rregálo umi persóna ndoleeporãivape g̃uarã, térã nontendeporãivape pe idióma. Oĩ sy ha túva ovyʼaitereíva ifamiliakuéra ontendeve haguére pe informasión ojestudiáva oipuru rupi pe rrevísta Ñemañaha oúva lenguáhe sensíllope. Heta ermáno oskrivi voi kárta pe Kuérpo Governántepe oagradese hag̃ua ko edisión rehe. Por ehémplo, peteĩ ermána heʼi ymave nokomentaguasúi hague ojestudia jave Ñemañaha. Haʼe omombeʼu: “Haʼete voi ku naiméiva mbaʼe pe rreunionhápe”. Péro ostudia rire pe rrevísta lenguáhe sensíllope, tuicha okambia. Ko ermána heʼi: “Koʼág̃a katu ndakyhyjevéima ha akomenta heta vése. ¡Aagradesete ningo Jehovápe ha iñorganisasiónpe!”.

5. ¿Mbaʼépa ikatu jaʼe pe Traducción del Nuevo Mundo de las Santas Escrituras versión rrevisádagui?

5 Segundo, el 5 de octubre de 2013 oñepresenta pe rreunión anuálpe Traducción del Nuevo Mundo de las Santas Escrituras ingléspe pe versión rrevisáda. * Ko versiónpe, heta versíkulo oreko saʼive palávra, péro isignifikádo nokambiái ni michĩmi, hiʼarive ifasilve oñentende hag̃ua. Por ehémplo, Job 10:1 oreko vaʼekue 27 palávra, péro koʼág̃a oreko 19, ha Proverbios 8:6 katu oreko vaʼekue 20 palávra, péro koʼág̃a 13 . Koʼã mokõi versíkulo hesakã porãve koʼág̃a. Peteĩ ermáno unhído aréma oservíva Jehovápe heʼi: “Aleepa ramoite pe lívro de Job, ha haʼete voi chéve primera ves mbaʼe aleéva”. Ha oĩ heta ermáno oñeñandúva avei haʼéicha.

6. ¿Mbaʼépa repensa oñentende lájare koʼág̃a Mateo 24:45-47 heʼíva?

 6 Tercero, umi entendimiénto pyahu. Ñemañaha 15 de julio de 2013, omyesakã porã kuri mávapa hína pe “tembiguái jeroviaha ha iñarandúva” (Mat. 24:45-47). Pe rrevísta heʼi pe tembiguái jeroviaha haʼeha pe Kuérpo Governánte, ha umi “ótro tembiguaikuéra” katu haʼe opavave orresivíva pe aliménto espirituál, tahaʼe unhído térã “ambue ovechakuéra” (Juan 10:16). ¡Ajépa javyʼaite ñantende porã haguére koʼã mbaʼe oĩva la Bíbliape, ha ikatu haguére ñamboʼe umíva ñande rapichakuérape! ¿Mbaʼéichapa Jehová ohechauka avei isensilloitereiha oporomboʼe lája?

OÑEMYESAKÃ PORÃVE UMI RRELÁTO OĨVA LA BÍBLIAPE

7, 8. Emombeʼu peteĩ rreláto vívliko orrepresentáva ambue mbaʼe iñimportantevéva.

7 Oiméramo aréma reservi hague Jehovápe, katuete rehechakuaáne koʼág̃a ñane puvlikasionkuéra oexplika sensilloveha heta rreláto oĩva la Bíbliape. Ymave ningo ojekalkula heta rreláto haʼeha peteĩ profesía ha orrepresentaha peteĩ mbaʼe iñimportantevéva oikótava upe rire. ¿Heʼisépa upéva koʼág̃arupi ndojejapoveimaha upéicha? Nahániri. Por ehémplo, Jesús oñeʼẽ ‘pe milágro oiko vaʼekuére proféta Jonás rehe’, ha oexplika Jonás oĩ haguéicha tres día pe pira retepýpe, haʼe oĩtaha tres día pe sepultúrape (elee Mateo 12:39, 40).

8 Añetehápe la Bíbliape jajuhu heta rreláto orrepresentáva ótra kósa iñimportantevéva. Apóstol Pablo omyesakã vaʼekue avei unos kuánto. Por ehémplo, heʼi Abrahán orrepresentaha Jehovápe, Agar orrepresentaha Israel yma guarépe, ha Sara orrepresentaha Ñandejára organisasiónpe, pe párte oĩva yvágape (Gál. 4:22-26). Pablo heʼi avei pe Léi Mosáikape oĩha heta mbaʼe orrepresentáva ótra kósa iñimportantevéva, pór ehémplo pe tavernákulo, pe témplo, pe Día Oñeperdonahápe umi Pekádo ha pe saserdóte prinsipál (Heb. 9:23-25; 10:1). Ñahesaʼỹijóvo koʼã rreláto ha ñantende mbaʼépa heʼise káda uno, katuete ñamombareteve ñande jerovia. Péro, ¿heʼisépa upéva entéro umi istória oĩva la Bíbliape, tahaʼe suséso, kósa ha persóna, orrepresentaha ambue mbaʼe iñimportantevéva?

9. ¿Mbaʼéichapa oñentende vaʼekue 1 Reyes 21:1-16?

9 Ymave oñepensa vaʼekue haimete entéro umi rreláto oĩva la Bíbliape orrepresentaha ambue mbaʼe iñimportantevéva. Jahechamína peteĩ ehémplo oĩva 1 Reyes 21:1-16-pe. Upépe omombeʼu pe rréina ñañaite hérava Jezabel ojukauka hague peteĩ karai héravape Nabot, ikatu hag̃uáicha iparralty opyta iména Acábpe. Rrevísta Ñemañaha osẽ vaʼekue áño 1932-pe ojeʼe Acab ha Jezabel orrepresentaha Satanás ha iñorganisasiónpe, Nabot orrepresentaha Jesúspe, ha imuérte orrepresentaha Jesús muérte. Upéi 1964-pe, pe lívro “Santificado sea tu nombre” oexplika Nabot orrepresentaha umi unhídope, ha Jesabel katu umi rrelihión japúpe heʼíva ijehe kristianoha. Avei ko lívro heʼi pe persekusión Nabot ohasa vaʼekue orrepresentaha pe persekusión ohasátava unhidokuéra umi ára pahápe. Heta tiémpore koʼãichagua explikasión omombarete ermanokuéra jerovia. Péro koʼág̃arupi ndojexplikavéima péicha koʼãichagua rreláto vívliko. Jahechamína mbaʼérepa.

10. a) ¿Mbaʼéichapa pe “tembiguái jeroviaha” ohechauka iñaranduveha ohóvo? b) ¿Mbaʼérehepa oñesentrave koʼág̃arupi ñane puvlikasionkuéra?

10 Ohasávo pe tiémpo, Jehová oipytyvõ  pe ‘tembiguái jeroviahápe’ iñaranduve hag̃ua ohóvo. Upévare, koʼág̃arupi pe tembiguái jeroviaha heʼi peteĩ rreláto orrepresentaha ótra kósa sólamente la Bíbliape voi heʼíramo upeichaha. Ymave ñane puvlikasionkuéra oñeʼẽ jave umi rrelátore, pyʼỹinte oexplika mbaʼépa orrepresenta káda detálle, péro hasyve vaʼekue ñantende porã hag̃ua ha opyta hag̃ua ñane akãme. Avei ijetuʼuve kuri jahechakuaa hag̃ua mbaʼépa ñaaprende káda istóriagui, ha heta vése ndojepillavéima mbaʼépa añetehápe la oñemboʼeséva. Koʼág̃a ñane puvlikasionkuéra oñeʼẽve umi mbaʼe ikatúvagui ñaaprende umi rrelátogui, ha ñanemboʼe ñaaguantakuaa hag̃ua, jajerovia, ñaneñeʼẽrendu hag̃ua Jehovápe ha jahayhuve hag̃ua chupe. *

Nabot ehémplo ñanemboʼe peteĩ mbaʼe iñimportantetereíva (Ehecha párrafo 11)

11. a) ¿Mbaʼéichapa oñentende koʼág̃a Nabot istória? b) ¿Mbaʼépa ñaaprende ko ehémplogui? c) Ymave ñane puvlikasionkuéra pyʼỹinte oexplika mbaʼépa orrepresenta káda detálle oĩva umi istóriape, ¿mbaʼérepa ndojapoguasuvéi upéicha? (Ehecha ko rrevístape pe párte “Oñeporandúva jepi”.)

11 Upéicharõ, ¿mbaʼéichapa oñentende koʼág̃a Nabot istória? Koʼág̃a ndojeʼevéima Nabot orrepresenta hague Jesúspe ni umi unhídope, síno oñemombeʼúntema mbaʼépa ñaaprende iñehémplogui. Nabot omano iñeʼẽrendu rupi Jehovápe. Ha opersegíramo jepe chupe umi persóna orekóva autorida, haʼe odesidi okumpli Ñandejára Léi heʼíva (Núm. 36:7; 1 Rey. 21:3). ¿Mbaʼépa ñaaprende chugui? Jahecha ñaneovediénte vaʼerãha Jehovápe oĩramo jepe oñemoĩva ñanderehe (elee 2 Timoteo 3:12). Koʼág̃a enterovéva ikatu ñantende mbaʼépa ñanemboʼe ko rreláto, avei ndahasýi ñanemanduʼa hag̃ua hese ha jasegi hag̃ua upe ehémplo. Katuete ningo Nabot istória omombarete ñande jerovia.

12. a) ¿Mbaʼéichapa koʼág̃arupi ojexplika umi rreláto vívliko? b) ¿Mbaʼépa ñanepytyvõ ñantende hag̃ua umi mbaʼe hypyʼũvéva oĩva la Bíbliape? (Ehecha pe nóta.)

12 ¿Ñapensa vaʼerãpa entéro umi rreláto oĩva la Bíbliape norrepresentaveimaha ótra kósa? Nahániri, oĩ gueteri umi istória  orrepresentáva ambue mbaʼe iñimportantevéva. Upéicharõ jepe, ñane puvlikasionkuéra koʼag̃agua okomparave peteĩ rreláto ótrore, ha ohechauka mbaʼépa ikatu ñaaprende chuguikuéra. Por ehémplo, Nabot iñeʼẽrendu vaʼekue omano meve, ha upéva ñanemomanduʼa Jesús ha umi unhído siémpre iñeʼẽrenduha avei. Upéicha avei ñanemanduʼa “ambue ovechakuéra” apytépe oĩha heta osegi vaʼekue ojerovia mbarete Jehováre omano meve. ¡Ajépa ndahasyiete ñantende hag̃ua koʼãichagua explikasión! Añetehápe, Jehová ñanemboʼe lája koʼág̃a isensilloiterei. *

OJEXPLIKA SENSILLOVE UMI EHÉMPLO JESÚS OIPURU VAʼEKUE

13. Emensiona umi ehémplo koʼág̃arupi ojexplika sensillovéva.

13 Jesús, pe Mboʼehára Guasu, oipuru meme vaʼekue umi ehémplo térã komparasión omboʼe hag̃ua umi héntepe (Mat. 13:34). Umichagua ehémplo ideprovechoiterei oñemyesakã hag̃ua umi enseñánsa hypyʼũvéva. Avei opoko umi hénte korasõre, pórke oipytyvõ chupekuéra ojepyʼamongeta hag̃ua. Ohasávo pe tiémpo, ñane puvlikasionkuéra oexplika sensillove umi ehémplo Jesús oipuru vaʼekue. ¿Nemanduʼápa umi artíkulo osẽ vaʼekuére Ñemañaha 15 de diciembre de 2014-pe? Koʼãvape oñemyesakã porã umi parávola oñeʼẽva pe mostása raʼỹire, pe levadúrare, ha pe rred tuichaitereívare. Koʼág̃a jaikuaa porãma koʼã ehémplo oñeʼẽha Ñandejára Rréinore, ha mbaʼéichapa ko goviérno oipytyvõ heta persónape oiko hag̃ua chuguikuéra Cristo disípulo.

14. a) ¿Mbaʼéichapa ojexplika vaʼekue pe parávola oñeʼẽva pe samaritáno ipyʼaporãvare? b) ¿Mbaʼéichapa ñantende koʼág̃a ko ehémplo?

14 Jesús omombeʼu avei umi parávola térã ehémplo orekóva heta detálle. Oĩ umi orrepresentáva ambue mbaʼe iñimportantevéva ha oĩ umi orekóva leksión ideprovéchova. Jehová ñanepytyvõ jahechakuaa hag̃ua oimépa hína umíva peteĩ profesía, térãpa ñanemboʼesénte peteĩ leksión iñimportánteva. Jahechamína mbaʼéichapa ojexplika pe parávola oñeʼẽva pe samaritáno ipyʼaporãvare (Luc. 10:30-37). Peteĩ rrevísta Ñemañaha osẽ vaʼekue áño 1924-pe, heʼi kuri pe samaritáno orrepresentaha Jesúspe, ha pe tape ivahádava oúva Jerusaléngui ha oporogueraháva siuda de Jericópe, orrepresentaha yvypóra rekove ivaivéva ohóvo Adán opeka guive. Heʼi avei umi mondaha orrepresentaha umi emprésa tuichaicháva ha umi komersiánte itaryrýiva. Pe saserdóte ha pe levíta katu orrepresenta umi rrelihión japúpe heʼíva ijehe kristianoha. Péro koʼág̃arupi ñane puvlikasionkuéra oipuru ko ehémplo ñanemboʼe hag̃ua ndovaleiha japoroporavo, espesiálmente japredika jave. ¡Ajépa javyʼaite ñantende porãve haguére la Biblia!

15. ¿Mbaʼépa ñahesaʼỹijóta pe artíkulo oúvape?

15 Pe artíkulo oúvape ñahesaʼỹijóta ótro ehémplo Jesús oipuru vaʼekue, oñeʼẽva umi 10 kuñataĩre (Mat. 25:1-13). ¿Mbaʼéichapa Jesús oipota vaʼekue oñentende ko istória ñane tiémpope? ¿Ikatúpa jaʼe káda kósa ha persóna oñeñeʼẽha ko istóriape orrepresentaha peteĩ mbaʼe iñimportantevéva? ¿Térãpa ñanemboʼénte peteĩ leksión ideprovéchova?

^ párr. 4 Rrevísta Ñemañaha de estúdio oĩva lenguáhe sensíllope, osẽ primera ves ingléspe julio de 2011-pe. Upe rire ko edisión ojetradusi avei heta idiómape, umíva apytépe castellánope.

^ párr. 5 Pe versión rrevisáda koʼẽrõite osẽtama avei hetave idiómape. Ñandejára Ñeʼẽ Mateo-Apocalipsis ojetradusíma pe versión rrevisádagui.

^ párr. 10 Por ehémplo, pe lívro Jajeroviave hag̃ua ohesaʼỹijo 14 persóna rembiasakue oĩva la Bíbliape. Ko lívro ñanemboʼe mbaʼépepa ideprovécho iñehemplokuéra, ha ndoikói omombeʼu mbaʼépa orrepresenta káda detálle.

^ párr. 12 Ñandejára Ñeʼẽme oĩ jepi “umi mbaʼe hasýva ñantende hag̃ua”, umíva apytépe umi kuatiañeʼẽ apóstol Pablo ohai vaʼekue. Péro umíva Ñandejára ohaika vaʼekue espíritu sánto rupive, ha koʼág̃a ñanepytyvõ avei ijespíritu rupive ñantende hag̃ua “umi mbaʼe ipypukuvéva oúva Ñandejáragui jepe” (2 Ped. 3:16, 17; 1 Cor. 2:10).