Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Ñemañaha (ojestudiáva)  |  Marzo de 2015

Pe ehémplo oñeʼẽva umi taléntore

Pe ehémplo oñeʼẽva umi taléntore

“Peteĩvape omeʼẽ cinco talénto, ótrope mokõi ha ambuépe katu peteĩ.” (MAT. 25:15)

1, 2. ¿Mbaʼérepa Jesús omoĩ pe ehémplo oñeʼẽva umi taléntore?

JESÚS omoĩ vaʼekue pe ehémplo oñeʼẽva umi taléntore ohechauka hag̃ua umi kristiáno unhídope mbaʼépa ohaʼarõ chuguikuéra. Upéicharõ jepe, ko ehémplo oipytyvõ enterove kristiánope ndahaʼéiramo jepe unhído. Upévare iñimportánte ñantende porã mbaʼépa osignifika ko parávola.

2 ¿Mbaʼe okasiónpepa Jesús omoĩ ko ehémplo? Idisipulokuéra oporandúrõ guare chupe mbaʼépa oikóta opilla hag̃ua hikuái haʼe oñepyrũmaha ogoverna, ha pe fin hiʼag̃uimbaitemaha (Mat. 24:3). Upéicharõ, ko ehémplo oñeʼẽva umi taléntore haʼe hína peteĩ profesía oñekumplíva koʼã ára pahápe.

3. ¿Mbaʼépa ñanemboʼe umi ehémplo oĩva Mateo kapítulo 24 ha 25-pe?

3 Mateo 24:45 guive 25:46 peve oñeʼẽ cuatro ehémplore: pe tembiguái jeroviaha ha iñarandúvare, umi 10 kuñataĩre, umi taléntore, ha umi ovecha ha kavaráre. Koʼã ehémplo rupive Jesús omyesakã mbaʼe mbaʼépa oikóta umi ára pahápe, ha avei mbaʼe kualidápa ohechauka vaʼerã kristianokuéra oikóva koʼã tiémpope. Por ehémplo, pe rreláto oñeʼẽva pe tembiguái jeroviaháre, heʼi umi mbovymi unhído orekoha pe rresponsavilida omboʼévo Ñandejára siervokuérape. Avei ohechauka vaʼerã hikuái  iñaranduha ha ikatuha ojejerovia hesekuéra. Pe rreláto oñeʼẽva umi kuñataĩre katu ohechauka enterove unhído tekotevẽha oĩ alérta ha preparádo, pórke ndoikuaái hikuái mbaʼe día ni mbaʼe órapa Jesús og̃uahẽta. Pe parávola oñeʼẽva umi taléntore ohechauka umi unhído ombaʼapo jejopy vaʼerãha okumpli hag̃ua Jehová onkargáva chupekuéra. Pe ehémplo oñeʼẽva umi ovecha ha kavaráre katu ohechauka umi kristiáno orekóva esperánsa oikóvo ko yvy ape ári, iñeʼẽrendu ha oipytyvõ meme vaʼerãha umi kristiáno unhídope. * Ñahesaʼỹijomína koʼág̃a pe ehémplo oñeʼẽva umi taléntore.

PE PATRÓN ONKARGA HEMBIGUAIKUÉRAPE HETAITEREI MBAʼEREPY

4, 5. a) ¿Mávapepa orrepresenta pe karai oñeñeʼẽha pe parávolape? b) ¿Mboýpa ovale un talénto Jesús oikove tiémpope ko yvy ape ári? (Ehecha avei pe nóta.)

4 (Elee Mateo 25:14-30.) Ñane puvlikasionkuéra are guivéma oexplika pe ‘karai oviaháva’ orrepresentaha Jesúspe ohórõ guare yvágape áño 33-pe. Ótra parávolape avei Jesús oñeʼẽ vaʼekue peteĩ kuimbaʼe osẽvare “oho mombyry tetã ambuépe oiko hag̃ua chugui rréi” (Luc. 19:12). * Péro jaikuaaháicha, Jesúsgui ndoikói rréi ohórentema yvágape, síno oho “oguapy Ñandejára deréchape” ha ohaʼarõ áño 1914 peve, “Ñandejára omoĩmba peve ipy guýpe iñenemigokuérape” (Heb. 10:12, 13).

5 Jesús heʼi vaʼekue pe karai oñeñeʼẽha ko parávolape, oreko hague ocho talénto, ha upéva ningo hetaiterei plátama upe tiémpope. * Oviaha mboyve, pe patrón orreparti umi talénto hembiguaikuérape ikatu hag̃uáicha omombaʼapo hikuái. Péicha avei, Jesús oreko vaʼekue peteĩ mbaʼe ovaletereíva oho mboyve yvágape. ¿Mbaʼépa upéva? Pe tembiapo iñimportantevéva ojapo vaʼekue oikove aja ko yvy ape ári.

6, 7. ¿Mbaʼépa orrepresenta umi talénto?

6 Jesúspe g̃uarã ningo iñimportanteterei vaʼekue pe predikasión, upévare oipytyvõ heta persónape oiko hag̃ua chuguikuéra disípulo (elee Lucas 4:43). Péro haʼe oikuaa hetaitereiha gueteri pe traváho ojejapo vaʼerã, upéicha rupi heʼi kuri idisipulokuérape: “Pemañamína umi kogatýre, mbaʼéichapa otyarõmbáma oñemonoʼõ hag̃ua” (Juan 4:35-38). Upérõ Jesús oñeʼẽ kuri umi persóna ipyʼaporãvare ha ikatútava oiko chuguikuéra idisípulo. Jaikuaaháicha, peteĩ agrikultór ndohejamoʼãi asy hemitỹngue oĩmava ojekosecha hag̃uáicha. Péicha avei Jesús ni mbaʼevéicharõ ndohejareimoʼãi umi hénte ipyʼaporãvape. Upévare oho mboyve yvágape heʼi isegidorkuérape: “Tapeho pemboʼe umi hénte opa tetãyguápe oiko hag̃ua chuguikuéra che disípulo” (Mat. 28:18-20). Jesús onkarga chupekuéra peteĩ tembiapo iñimportánteva: pe predikasión (2 Cor. 4:7).

7 Pe patrón onkarga haguéicha umi talénto hembiguaikuérape, Jesús oheja isegidorkuéra kárgope pe predikasión (Mat. 25:14). Upéicharõ, umi talénto orrepresenta hína pe rresponsavilida orekóva entéro kristiáno opredika ha ojapo hag̃ua disípulo.

8. ¿Mbaʼépa pe patrón oipota ojapo hembiguaikuéra umi taléntogui?

8 Pe karai oreko vaʼekue mbohapy hembiguái. Peteĩme omeʼẽ cinco talénto, ótrope omeʼẽ dos, ha pe últimope omeʼẽ un  talénto (Mat. 25:15). Jahechaháicha, pe patrón omeʼẽ káda únope diferénte kantida de talénto. Upéicharõ jepe, haʼe oipota umi tembiguái iguápo ha omombaʼapo umi mbaʼerepy onkargáva chupekuéra. Upéicha avei Jesús oipota umi unhído ojapo opa ikatúva predikasiónpe (Mat. 22:37; Col. 3:23). Pentekostés áño 33-pe, Cristo segidorkuéra oñepyrũma ojapo disípulo umi héntegui. Lívro de Hechos ohechauka haʼekuéra ombaʼapo jejopy hague okumpli porã hag̃ua hembiapo (Hech. 6:7; 12:24; 19:20). *

OMOMBAʼAPO HIKUÁI UMI TALÉNTO KOʼÃ ÁRA PAHÁPE

9. a) ¿Mbaʼépa ojapo raʼe umi mokõi tembiguái umi taléntogui? b) ¿Mbaʼéichapa umi kristiáno unhído ojapo pe traváho oñenkargáva chupekuéra? c) ¿Mbaʼe priviléhiopa oreko umi “ambue ovechakuéra”?

9 Umi mokõi tembiguái itravahadórva oñeñeʼẽha pe ehémplope, omombaʼapo umi talénto oñenkarga vaʼekue chupekuéra ha omogana ipatrónpe el dóvle. Péicha avei, koʼã ára pahápe umi kristiáno unhído ombaʼapo meme pe predikasiónpe, ha koʼýte áño 1919 guive. Pe parávolape ohechauka peteĩ tembiguáipe oñenkarga hague hetave talénto. ¿Heʼisépa upéva oĩha mokõi grúpo de unhído iñeʼẽrendúva? Nahániri. Upéva ohechaukánte mokõive tembiguái  omombaʼapo hague umi talénto ha ogana hague el dóvle. ¿Ha mbaʼépa ikatu jaʼe umi kristiáno orekóvare esperánsa oikove hag̃ua ko yvy ape ári? Pe ehémplo oñeʼẽva umi ovecha ha kavaráre ohechauka oñemeʼẽha chupekuéra pe priviléhio oipytyvõ hag̃ua Cristo ermanokuérape. Upéicha, umi unhído ha ambue ovechakuéra ombaʼapo meme oñondive ojapo hag̃ua disípulo, ha ‘oiko chuguikuéra peteĩ ovecha atýnte’ (Juan 10:16).

10. ¿Mbaʼérepa jaʼekuaa pe fin hiʼag̃uimbaitemaha?

10 Añetehápe ningo pe patrón oipota hembiguaikuéra omombaʼapo umi talénto. Jaʼéma haguéicha, umi kristiáno síglo primérope guare opredika meme vaʼekue ha ojapo disípulo. Péro Jesús oipurúrõ guare pe ehémplo oñeʼẽva umi taléntore, opensa kuri ñane tiémpore. ¿Okumplípa hína kristianokuéra pe tembiapo oñemeʼẽva chupekuéra? Si, okumpli. Pe marandu porã ojepredika ha oñemboʼe umi héntepe ko yvy tuichakuére, arakaʼeve ojejapoʼỹ haguéicha. Ñandejára puévlo ombaʼapo jejopy rupi, hetaiterei persóna ojevautisa káda áño ha opredika meme avei. Koʼã mbaʼe ohechauka porãvéntema hiʼag̃uimbaitemaha pe fin ha Jesús ogovernamaha. ¡Oiméne pe patrón ovyʼaite ohechávo hembiguaikuéra ombaʼapo memeha!

Cristo onkarga hembiguaikuérape peteĩ rresponsavilida iñimportánteva: pe predikasión (Ehecha párrafo 10)

ARAKAʼÉPA OÚTA PE PATRÓN OIKUAA HAG̃UA MBAʼÉPA OJEJAPO PE PLÁTAGUI

11. ¿Mbaʼérepa jaʼekuaa Jesús outaha pe jehasa asy guasu aja ohecha hag̃ua mbaʼépa ojapo hembiguaikuéra imbaʼerepýgui?

11 Pe jehasa asy guasu opa potávo, Jesús oúta ohecha hag̃ua mbaʼépa ojapo hembiguaikuéra pe mbaʼerepy onkarga vaʼekuégui chupekuéra. ¿Mbaʼérepa jaʼe upéva? Mateo kapítulo 24 ha 25-pe, Jesús voi oñeʼẽ heta vése pe tiémpo haʼe oútavare, térã ivenídare. Por ehémplo, heʼi “pe Yvypóra Raʼy ouha umi arai ári”. Upéva oikóta pe jehasa asy guasu aja, Jesús ou vove ohusga hag̃ua umi héntepe. Upéi heʼi mbaʼérepa oĩ vaʼerã alérta kristianokuéra oikóva koʼã ára pahápe: “Ndapeikuaái hína mbaʼe díapa oúta pende Ruvicha”. Ha heʼi avei: “Peimoʼãʼỹve jave oúta pe Yvypóra Raʼy” (Mat. 24:30, 42, 44). Jesús omombeʼúrõ guare pe parávola oñeʼẽva umi taléntore heʼi: “Ou jey pe karai ha ohenói umi hembiguáipe, oikuaa  hag̃ua mbaʼépa ojapo hikuái pe plátagui”. Upéva oikóta haʼe ou vove ohusga hag̃ua umi héntepe ha ohundi hag̃ua ko múndo aña (Mat. 25:19). *

12, 13. a) ¿Mbaʼépa heʼi pe patrón umi mokõi hembiguái itravahadórvape, ha mbaʼérepa? b) ¿Arakaʼépa orresivi pe último séllo umi unhído? (Ehecha avei pe rrekuádro heʼíva “Omanóvo orresivítama irrekompénsa”.) c) ¿Mbaʼépa ohupytýta umi persóna oñekomparáva ovecháre?

12 Pe ehémplo Jesús omoĩ vaʼekuépe heʼi pe karai ouha otopa umi mokõi hembiguái itravahadórva omogana hague chupe el dóvle. Upémarõ heʼi káda únope: “Oĩ porã, ¡ajépa ndeguápo che rembiguái ajeroviaha! Rejapo porã haguére umi tembiapo aheja vaʼekue nde kárgope, amoĩta nde poguýpe hetave mbaʼe. Evyʼa ne patrón ndive” (Mat. 25:21, 23). ¿Mbaʼépa oikóta ág̃a Jesús ou vove oporohusga hag̃ua?

13 Oñepyrũ mboyvemi pe jehasa asy guasu, umi unhído orresivíta pe último séllo (Apoc. 7:1-3). Ha oñepyrũ mboyve Armagedón katu Jesús omeʼẽtama chupekuéra pe rrekompénsa selestiál. ¿Mbaʼépa ikatu jaʼe umi ombaʼapo meme vaʼekuére predikasiónpe Cristo ermanokuéra ndive? Umíva haʼéta hína umi oñembojojáva ovecháre, ha opytáta oikove opa ára g̃uarã ko yvy ape ári Ñandejára Rréino poguýpe (Mat. 25:34).

PETEĨ TEMBIGUÁI ‘AÑA HA IÑATEʼỸVA’

14, 15. ¿Oprofetisápa raʼe Jesús oĩtaha peteĩ grúpo de unhído hiʼaña ha iñateʼỹva?

14 Pe ehémplope ojeʼe avei oĩha peteĩ tembiguái nomombaʼapói vaʼekue pe talénto ojehejáva ikárgope, ha ndoguerahái ni vánkope ikatu hag̃uáicha omogana ipatrónpe michĩmi jepe. Upéva rangue oho oñotỹ pe oñemeʼẽ vaʼekue chupe. Haʼe ningo ndojapói oñehaʼarõva chugui, upéicha rupi ipatrón heʼi hese ‘hiʼaña ha iñateʼỹha’. Upei oipeʼa chugui pe talénto ha omeʼẽ pe tembiguái orekóvape cinco talénto. Pe patrón omanda avei oñemosẽ hag̃ua pe tembiguái ateʼỹme “okápe, pytũmbýpe”. Upépe haʼe “hasẽ soro ha ipyahẽ ñembyasýgui” (Mat. 25:24-30; Luc. 19:22, 23).

15 Jesús heʼírõ guare peteĩva umi tembiguái ‘hiʼaña ha iñateʼỹha’, ndeʼiséi kuri 1 de káda 3 unhído naiñeʼẽrendumoʼãiha. ¿Mbaʼéichapa jaikuaa upéva? Pe ótra parávolape, oñeʼẽva pe tembiguái jeroviaha ha iñarandúvare, Jesús oñeʼẽ vaʼekue avei peteĩ tembiguái iñaña  ha oñepyrũvare ombyepoti ikompañerokuérape. Upérõ haʼe ndoprofetisái kuri pe grúpo de unhído oformáva pe tembiguái jeroviaha ha iñarandúva oñepyrũtaha ojapo ivaíva, síno omeʼẽnte chupekuéra peteĩ adverténsia ani hag̃ua oñekomporta peteĩ tembiguái iñañávaicha. Upéicha avei, pe rreláto oñeʼẽvape umi diez kuñataĩre, Jesús heʼi oĩha cinco kuñataĩ iñembotavýva. Upéva ndeʼiséi umi unhído apytépe alamita voi oñekomportataha umi kuñataĩ iñembotavývaicha, síno oadverti entéro umi unhídope tekotevẽha oĩ alérta ha preparádo. * Upévare ikatu jaʼe pe ehémplo oñeʼẽvape umi taléntore, Jesús ndeʼíri hague koʼã ára pahápe oĩtaha unhído hiʼaña ha iñateʼỹva. Upéva rangue, haʼe ohechaukánte umi unhídope tekotevẽha ‘ombaʼapo’ meme predikasiónpe, ha ndojoguái vaʼerãha pe tembiguái añáme (Mat. 25:16).

16. a) ¿Mbaʼépa ñanemboʼe pe ehémplo oñeʼẽva umi taléntore? b) ¿Mbaʼéichapa ko artíkulo ñanepytyvõ ñantende porãve hag̃ua pe ehémplo oñeʼẽva umi taléntore? (Ehecha pe rrekuádro heʼíva “ Oñentende porãve pe ehémplo oñeʼẽva umi taléntore”.)

16 Pe ehémplo oñeʼẽva umi taléntore ñanemboʼe mokõi mbaʼe. Primero, Cristo onkarga hembiguaikuéra unhídope ojapo hag̃ua peteĩ mbaʼe ivaliosoitereíva: opredika ha omboʼe vaʼerã umi héntepe oiko hag̃ua avei chuguikuéra Jesús disípulo. Segundo, Jesús oipota enterovéva jajapo ko traváho kyreʼỹme ha ñande pyʼaite guive. Upéicharõ, ñaimékena alérta, jajerovia mbarete ha ñaneñeʼẽrendu. Jajapóramo upéicha, Jesús katuete ñanerrekompensáta (Mat. 25:21, 23, 34).

^ párr. 3 Ñemañaha 15 de julio de 2013, páhina 21 ha 22, párrafo 8 guive 10 peve, omyesakã mávapa pe tembiguái jeroviaha ha iñarandúva. Ko rrevísta jastudiávape, páhina 12 guive, ojexplika mávapa umi 10 kuñataĩ. Pe ehémplo oñeʼẽva umi ovecha ha kavaráre katu oñehesaʼỹijo La Atalaya 15 de octubre de 1995-pe, páhina 23 guive 28 peve, ha avei ko rrevístape pe artíkulo oúvape.

^ párr. 5 Jesús oikove tiémpope ko yvy ape ári, un talénto ovale vaʼekue 6.000 denário. Peteĩ travahadór ogana vaʼekue un denário por día. Upéicharõ, ikatu hag̃uáicha ogana un talénto, ombaʼapo vaʼerã kuri 20 áñorupi.

^ párr. 8 Umi apóstol omano rire, pe apostasía oñepyrũ ojagarra umi kongregasión kristiána. Upéicha rupi heta tiémpore saʼieterei ojepredika. Péro upéi, og̃uahẽvo umi ára paha, térã pe “kosécha tiémpo”, umi kristiáno tee oñepyrũ jey oñeorganisa ha opredika ko yvy tuichakuére (Mat. 13:24-30, 36-43). Rejuhuvéta informasión oñeʼẽva ko témare Ñemañaha 15 de julio de 2013-pe, páhina 9 guive 12 peve.

^ párr. 15 Ehecha ko rrevístape pe artíkulo hérava “¿Jasegítapa ‘ñañatende porã’?”, páhina 15 ha 16, párrafo 13.