Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Ñemañaha (ojestudiáva)  |  Febrero de 2015

Ñandepyʼaguasúke ha jadesidi porã Jesús ojapo haguéicha

Ñandepyʼaguasúke ha jadesidi porã Jesús ojapo haguéicha

“Ndapehecháiramo jepe Crístope arakaʼeve, peẽ pehayhu chupe. Napemañáiramo jepe hese koʼág̃a, pejerovia hese.” (1 PED. 1:8)

1, 2. a) ¿Mbaʼépa jajapo vaʼerã jajesalva hag̃ua? b) ¿Máva ehémplopa jasegi vaʼerã jahupytyséramo pe jeikove opaʼỹva?

OIKÓVO ñandehegui kristiáno, haʼete ñañepyrũva peteĩ viáhe. Pe tape ikatu ñandegueraha jeikove opaʼỹvape, tahaʼe yvágape térã ko yvy ape ári. Jesús heʼi vaʼekue: “Pe oaguantáva ipahaite peve [omano peve, térã og̃uahẽ meve ko múndo ára paha], upéva ojesalváta” (Mat. 24:13). ¿Mbaʼépa heʼise koʼã mbaʼe? Ikatu hag̃uáicha jajesalva, tekotevẽ jasegi ñaneñeʼẽrendu Ñandejárape ha ndajahejái vaʼerã ko múndo ñanderesarea (1 Juan 2:15-17). ¿Mbaʼépa ñanepytyvõta upearã?

2 Jasegi vaʼerã Jesús ehémplo. Jastudiávo la Biblia ñaaprende mbaʼeichagua persónapa haʼe, avei jahayhu chupe ha jajeroviave hese (elee 1 Pedro 1:8, 9). Apóstol Pedro heʼi ñañehaʼã vaʼerãha opa ikatuháicha ñahaʼanga hag̃ua Jesúspe (1 Ped. 2:21). Jajapóramo upéicha, katuete jahupytýta pe jeikove opaʼỹva. *  Pe artíkulo ohasa vaʼekuépe, jahecha kuri mbaʼéichapa ñanderekomirĩ ha jaiporiahuvereko vaʼerã ñande rapichápe Jesús ojapo haguéicha. Koʼág̃a ñahesaʼỹijóta mbaʼéichapa ñahaʼangáta chupe ñandepyʼaguasúvo ha jadesidi porãvo opa mbaʼépe.

JESÚS IPYʼAGUASU VAʼEKUE

3. a) ¿Mbaʼéichapa ojekuaa peteĩ persónare ipyʼaguasuha? b) ¿Mbaʼépa ñanepytyvõta ñandepyʼaguasu hag̃ua?

3 Ñandepyʼaguasúramo ikatúta ñanembarete ha jagueropuʼaka umi mbaʼe ijetuʼúva. Pe tapicha ndaipyʼajúiva noñerrendíri oimeháicha rei, odefende pe oĩ porãva ha oaguantakuaa opa mbaʼe ojerovia rupi. Pe ipyʼaguasúva ningo orrespeta Ñandejárape ha okyhyje chugui, oreko esperánsa ha oporohayhueterei. Koʼã mbaʼe ningo iñimportanteterei, pórke jakyhyjéramo ñambopochýrõ g̃uarã Ñandejárape, ni mbaʼevéicharõ ndajakyhyjemoʼãi ñande rapicha yvypóragui (1 Sam. 11:7; Prov. 29:25). Pe esperánsa ñanepytyvõta jahecha hag̃ua mbaʼépa jahupytýta ñambohovái rire umi pruéva, ha jajesarekóta umi mbaʼe porã oĩvare ñane renonderãme (Sal. 27:14). Pe mborayhu katu ñanemomýi jajesakrifika hag̃ua ñande rapichakuéra rehehápe, jajapeligráramo jepe (Juan 15:13). ¿Mbaʼépa ñanepytyvõta ñandepyʼaguasu hag̃ua? Jajerovia vaʼerã Jehováre ha jasegi Itaʼýra ehémplo (Sal. 28:7).

4. ¿Mbaʼéichapa Jesús ohechauka ipyʼaguasuha oĩrõ guare pe témplope? (Ehecha pe taʼanga oĩva iñepyrũme.)

4 Jesús imitã guive odefende pe oĩ porãva. Orekórõ guare 12 áñonte, ituvakuéra otopa chupe “pe témplope, oguapy hína umi mboʼeharakuéra apytépe” (elee Lucas 2:41-47). Koʼã mboʼehára ipopytéicha oikuaa pe Léi Mosáika ha avei umi tradisión hudía. Péro Jesús ndokyhyjéi ni nokirirĩri chuguikuéra, upéva rangue oñepyrũ “ombaʼeporandu”. Hiʼarive ndojapói umi pregúnta normálmente umi mitã ojapóva, síno umi hypyʼũva ha omopensáva umi mboʼehárape. Oimérire umi mboʼehára ombotavytavyse chupe, nokonsegíri mbaʼeve hikuái. ¿Mbaʼérepa jaʼe upéva? La Biblia heʼi: “Opavave ohendúva chupe ohecharamo mbaʼeichaitépa ombohovaikuaa ha ontende heta mbaʼe”. ¡Ajépa ipyʼaguasuete odefende hag̃ua Ñandejára Ñeʼẽ!

5. ¿Mbaʼéichapa Jesús ohechauka ipyʼaguasuha?

5 Jesús oñepyrũ guive opredika ko yvy ape ári, ohechauka heta hendáicha ipyʼaguasuha. Por ehémplo, ndokyhyjéi ohechauka hag̃ua umi líder rrelihióso omboʼeha japu umi héntepe (Mat. 23:13-36). Ndohejái umi mbaʼe vai ko mundopegua ipuʼaka hese (Juan 16:33). Haʼe siémpre opredika iñenemigokuéra oñemoĩ mbaretéramo jepe hese (Juan 5:15-18; 7:14). Ha dos vése voi omosẽ pe témplogui umi ndorrespetáivape Jehová róga (Mat. 21:12, 13; Juan 2:14-17).

6. ¿Mbaʼéichapa Jesús ohechauka ipyʼaguasuha pe último día oĩrõ guare ko yvy ape ári?

6 Ñapensa meme vaʼerã mbaʼéichapa Jesús pyʼaguasúpe ombohovái umi mbaʼe ijetuʼúva, upéicha katuete ñande jerovia imbaretevéta. Jahechamína mbaʼépa oiko vaʼekue pe último día oĩrõ guare ko yvy ape ári. Jesús oikuaa porã mbaʼépa oikóta Judas otraisiona rire chupe. Upéicharõ jepe, ojapo jave hikuái pe Páskua heʼi chupe: “Upe rejapótava, pyaʼeve ejapo” (Juan 13:21-27). Upéi, umi soldádo ohórõ guare ojagarra hag̃ua chupe pe hardín de Getsemanípe, haʼe nokañýi. Upéva rangue, oprotehe idisipulokuérape ha pyʼaguasúpe oñeidentifika chupekuéra, oikuaáramo jepe omanotaha (Juan 18:1-8). Pe  Sanedrín renondépe katu ndokyhyjéi heʼi hag̃ua haʼeha pe Cristo ha Ñandejára Raʼy, oikuaáramo jepe pe saserdóte prinsipál ohekaha oimeraẽ exkúsa ojukauka hag̃ua chupe (Mar. 14:60-65). Jesús iñeʼẽrendu Itúvape omano meve pe yvyráre. Upévare, ipytuhẽvo última ves, heʼi: “Ajapopaitéma nde rejerure vaʼekue chéve” (Juan 19:28-30).

ÑANDEPYʼAGUASÚKENA

7. a) Mitãrusu ha mitãkuña, ¿mbaʼéichapa peñeñandu peñehenói haguére testígo de Jehová? b) ¿Mbaʼéichapa ikatu pehechauka pendepyʼaguasuha?

7 ¿Mbaʼéichapa ñande avei ikatu ñandepyʼaguasu Jesús ipyʼaguasu haguéicha? Eskuélape. Oiméramo nde peteĩ mitãrusu térã mitãkuña, aníkena rekyhyje remombeʼu hag̃ua nde haʼeha peteĩ testígo de Jehová, oñembohorýramo jepe nderehe ne kompañerokuéra térã ambue tapicha. Evyʼákena rerrepresenta haguére Jehovápe (elee Salmo 86:12). Ikatu oĩ umi ogueroviaukaséva ndéve pe evolusión, péro nde reikuaa porã oĩha pruéva jaguerovia hag̃ua la Biblia heʼíva pe kreasión rehe. Ikatu reipuru pe folléto El origen de la vida. Cinco cuestiones dignas de análisis ‘redefende hag̃ua ne esperánsa’ (1 Ped. 3:15). Rejapóramo upéicha, revyʼaitereíta redefende haguére nde Apoharépe.

8. ¿Mbaʼérepa ndajakyhyjéi vaʼerã japredika hag̃ua?

8 Predikasiónpe. Enterove kristiáno jasegi vaʼerã ‘ñañeʼẽ pyʼaguasúpe Jehová omeʼẽ rupi ñandéve podér’ (Hech. 14:3). ¿Mbaʼérepa ndajakyhyjéi vaʼerã japredika hag̃ua? Primero, jaikuaa porãgui ñamboʼeha pe añetegua oĩva la Bíbliape (Juan 17:17). Segundo, “ñande ningo Ñandejára ajudánte”, ha ijespíritu sánto ñanepytyvõ (1 Cor. 3:9; Hech. 4:31). Ha tercero, japredikávo jahechauka hína jahayhuha Jehovápe ha ñande rapichakuérape (Mat. 22:37-39). Ñandepyʼaguasúramo, ndajahejamoʼãi avave ñanemokirirĩ, síno jasegíta ñaipytyvõ umi héntepe isãso hag̃ua umi japu omboʼévagui rrelihionkuéra ha oaprendéta hikuái pe añetegua (2 Cor. 4:4). Oĩramo jepe nañanerenduséiva, ñandepersegíva térã oñembohorýva ñanderehe, jasegíta japredika pe mensáhe oĩva la Bíbliape (1 Tes. 2:1, 2).

9. ¿Mbaʼéichapa jahechauka ñandepyʼaguasuha ñambohovái jave umi mbaʼe ijetuʼúva?

9 Ñambohovái jave umi mbaʼe ijetuʼúva. Jajeroviáramo Jehováre, haʼe ñanemombaretéta ñambohovái hag̃ua umi pruéva. Oiméramo omano raʼe peteĩ jahayhúva, ñande jareko esperánsa, ha ñañemoag̃uive ‘Ñandejárare, omeʼẽgui opaichagua konsuélo’ (2 Cor. 1:3, 4; 1 Tes. 4:13). Ikatu avei oime jasufri hína ñanderasy térã ñañeaksidenta rupi. Upéicharõ jepe, ñande ndajaaseptái umi tratamiénto ñandereja vaítava Ñandejára renondépe (Hech. 15:28, 29). Ha oiméramo ñañedeprimi, ikatu hína ‘ñane korasõ ñanekondena’, péro ñande nañañentregái jaikuaa rupi Jehová oĩha ag̃ui “umi ohasa asývagui ha oipytyvõ umi oñembyasývape” (1 Juan 3:19, 20; Sal. 34:18, ÑÑB). *

JESÚS ODESIDI PORÃ OPA MBAʼÉPE

10. a) ¿Mbaʼéichapa jahechaukáta jadesidi porãha? b) ¿Mbaʼépa jajapo vaʼerã jadesidi porã hag̃ua?

10 Ikatu hag̃uáicha jadesidi porã, tekotevẽ jaikuaa mbaʼépa oĩ porã ha mbaʼépa oĩ vai, ha upéi jaiporavo pe iporãva (Heb.  5:14). Upéicha jajapóramo ñañemoag̃uivéta Ñandejárare. Avei ñañatendéta ani hag̃ua ñaofende ñande rapichápe jaʼéva térã jajapóva rupive, ha ñañehaʼãmbaitéta ñamokyreʼỹ hag̃ua ótrope (Prov. 11:12, 13). Ndajaikomoʼãi ‘ñandepochypa rei’ (Prov. 14:29, NM). Umi mbaʼe jadesidíva ñanepytyvõta jasegi hag̃ua tape porãre, térã ‘jaiko hag̃ua hekópe’ (Prov. 15:21). ¿Mbaʼépa jajapo vaʼerã jadesidi porã hag̃ua? Jastudia vaʼerã la Biblia ha jajapo umi mbaʼe ñaaprendéva (Prov. 2:1-5, 10, 11). Ha opa mbaʼe ári, jasegi vaʼerã Jesús ehémplo, pórke haʼe siémpre odesidi porã vaʼekue opa mbaʼépe.

11. ¿Mbaʼéichapa Jesús ohechauka odesidi porãha oñeʼẽ lájare?

11 Umi mbaʼe Jesús heʼíva ha ojapóva rupive ohechauka odesidi porã hague opa mbaʼépe. Oñeʼẽ lájare. Haʼe oipurúmi “umi ñeʼẽ porãite” opredikárõ guare, ha umi ohendúva chupe oguerohory upéva (Luc. 4:22; Mat. 7:28). Jesús oipuru meme vaʼekue Ñandejára Ñeʼẽ, upévare pyʼỹinte olee térã osita de memória umi téxto. Hiʼarive oikuaa porã mbaʼe situasiónpepa ikatu oipuru káda téxto (Mat. 4:4, 7, 10; 12:1-5; Luc. 4:16-21). Omyesakã jave umíva katu opoko voi umi hénte korasõre. Peteĩ jey, orresusita rire oñemongeta ohóvo mokõi idisípulondi Emaús rapére, ha “omyesakã chupekuéra Ñandejára Ñeʼẽme heʼíva hese”. ¿Mbaʼéichapa oñeñandu hikuái? Haʼekuéra omombeʼu: “Ajeve voi ningo ñañandu raʼe pe ñane korasõ hendytarõguáicha ñandehegui, [...] omyesakãvo ñandéve opa mbaʼe oĩva Ñandejára Ñeʼẽme” (Luc. 24:27, 32).

12, 13. Emombeʼu peteĩ ehémplo ohechaukáva Jesús noñemohatãi hague peteĩ mbaʼépente ha ‘ndaipochyreiriha’.

12 Opensa lájare. Jesús ningo peteĩ persóna ojejokokuaáva ha “ndaipochyreíri” (Mat. 11:29; Prov. 16:32). Ha idisipulokuéra orekóramo jepe heta defékto, haʼe ipasiénsia hesekuéra (Mar. 14:34-38; Luc. 22:24-27). Jesús oñekontrolakuaa vaʼekue, ojetrata vaíramo jepe chupe (1 Ped. 2:23).

13 Jesús arakaʼeve noñemohatãi peteĩ mbaʼépente. Por ehémplo, haʼe oikuaapaite pe Léi Mosáika, ha oikuaa porã avei maʼerãpa oñemoĩ. Upéicha rupi otrata porã umi héntepe. Jahechamína pe rreláto oĩva Marcos 5:25-34-pe (elee). Peteĩ kuña orekóva emorráhia oike pe hénte apytépe, oho opoko Jesús aóre ha okueraite. Pe Léi ningo heʼi peichagua persóna naipotĩriha, ha upévare ndopokói vaʼerãha avavére (Lev. 15:25-27). Péro Jesús ontende porã “umi mbaʼe iñimportantevéva oĩva pe Léipe”, umíva apytépe “poriahuvereko ha jerovia”, ha upévare ndotratavaíri pe kuñakaraípe (Mat. 23:23). Upéva rangue, torýpente heʼi chupe: “Che rajy, rejerovia rupi ningo rekuera ko mbaʼasy nembohasa asyetévagui. Tereho katu pyʼaguapýpe”. ¡Ajépa iporãite ko ehémplo!

14. a) ¿Mbaʼépa iñimportanteve vaʼekue Jesúspe g̃uarã? b) ¿Mbaʼépa Jesús ojapo vaʼekue ikatu hag̃uáicha okumpli hembiapo?

14 Umi mbaʼe omotenondévare. Jesús oiporavo porã mbaʼépa omotenondéta. Chupe g̃uarã ndaipóri iñimportantevéva predikasióngui (Luc. 4:43). Upévare odesidi umi mbaʼe oipytyvõtava ha ndodistraemoʼãiva chupe okumpli hag̃ua hembiapo. Odesidi oiko sensillomínte ikatu hag̃uáicha itiempove ha ikyreʼỹ omboʼe hag̃ua umi héntepe (Luc. 9:58). Upéi oprepara avei idisipulokuérape osegi hag̃ua opredika haʼe omano rire (Luc. 10:1-12; Juan 14:12). Ha opromete chupekuéra omoakãtaha pe tembiapo “og̃uahẽ meve huʼãme ko múndo ára paha” (Mat. 28:19, 20).

 JADESIDI PORÃKENA OPA MBAʼÉPE

Ñañeʼẽ mboyve umi héntepe, ñañehaʼã vaʼerã jahechakuaa mbaʼépa ohasa hikuái ha mbaʼépa ointeresa chupekuéra (Ehecha párrafo 15)

15. ¿Mbaʼéichapa ikatu jahechauka jadesidi porãha ñañeʼẽ lájare?

15 ¿Mbaʼéichapa ikatu jadesidi porã Jesús ojapo haguéicha? Ñañeʼẽ lájare. Ñañemongeta jave ñane ermanokuéra ndive, ñañehaʼã vaʼerã ñamokyreʼỹ chupekuéra. Ani jaʼe mbaʼeve oporomoñeñandu vaítava (Efes. 4:29). Japredika jave katu jaipuru vaʼerã umi ñeʼẽ ‘ijukýva’. Upéva heʼise ñañatende vaʼerãha jaʼévare (Col. 4:6). Ñañeʼẽ mboyve umi héntepe, jahecha vaʼerã mbaʼépa ohasa hikuái ha mbaʼépa ointeresa chupekuéra. Aníkena ñanderesarái ñanderorýramo ikatuha ñag̃uahẽ ñande rapicha korasõme. Tekotevẽramo ñamyesakã umi mbaʼe jagueroviáva, jaipuru vaʼerã la Biblia upearã. Jasita térã jalee vaʼerã umi téxto ijahápe ñandéve. Avei ñarrekonose ndahaʼeiha ñande la ikatúva japoko ñande rapicha korasõre, síno Ñandejára Ñeʼẽ (Heb. 4:12).

16, 17. a) ¿Mbaʼépa jahupyty avei jadesidi porãramo? b) ¿Mbaʼéichapa peteĩ persóna ohechauka noñemohatãiha haʼe heʼívapente? c) ¿Mbaʼéichapa jahechauka ñamotenondeha pe predikasión?

16 Ñapensa lájare. Jajepokuaáramo jadesidi porã, katuete ñakontrola véta ñapensáva ha nañandepochyreimoʼãi (Sant. 1:19). Oĩramo ñaneofendéva, ñañehaʼã ñañemoĩ ilugárpe. Péicha ifasilve ñañetrankilisa hag̃ua ha ‘jaheja rei hag̃ua’ pe ojejapóva ñanderehe (Prov. 19:11). Iporã avei ndajaikóiramo ñañemohatã ñande jaʼévapente. Tekotevẽ ñantende porã upe oikóva ha ani ñapensa ñane ermanokuéra ndojavymoʼãiha voi. Ñanemanduʼa vaʼerã haʼekuéra ikatuha hína ohasa peteĩ provléma ñande ndajaikuaáiva. Avei tekotevẽ ñahendu mbaʼépa oopina ñande rapichakuéra, ha ani ñañemohatã jaipotágui ojejapo opa mbaʼe ñande jaipotaháichante (Filip. 4:5).

17 Umi mbaʼe ñamotenondévare. Ndaipóri mbaʼeve iñimportantevéva pe predikasióngui. Tuichaiterei mbaʼe ningo ñamombeʼu umi héntepe pe marandu porã oĩva la Bíbliape. Upévare jahechauka vaʼerã ñamotenondeha pe predikasión opa mbaʼe ári. ¿Mbaʼéichapa jajapo upéva? Ñamotenonde vaʼerã umi aktivida espirituál, ha jadesidi umi mbaʼe ñanepytyvõtava jaiko sensillomi hag̃ua. Péicha ikatúta jaipuruve ñane tiémpo ha ñane mbaretekue japredika hag̃ua koʼã ára pahápe, og̃uahẽ mboyve pe fin (Mat. 6:33; 24:14).

18. ¿Mbaʼépa jajapo vaʼerã jahupyty hag̃ua pe jeikove opaʼỹva?

18 Katuete ningo ñanepytyvõta jajepyʼamongetáramo umi kualida porãite Jesús ohechauka vaʼekuére. ¿Ikatúpa ñahesaʼỹijove ambue kualida orekóva ha jahecha mbaʼéichapa ñahaʼangakuaa chupe? Ñañehaʼãmbaitékena jasegi iñehémplo opa ikatuháicha. Péicha ñañemoag̃uivéta Jehováre ha jahupytýta pe jeikove opaʼỹva.

^ párr. 2 Pedro oñeʼẽ vaʼekue umi unhídope ohaírõ guare 1 Pedro 1:8, 9. Péro upe konsého ideprovécho avei entéro kristiáno orekóvape esperánsa oikovévo ko yvy ape ári.

^ párr. 9 Ehecha La Atalaya 1 de diciembre de 2000, páhina 24 guive 28 peve, ¡Despertad! 22 de abril de 2003, páhina 18 guive 21 peve, ha ¡Despertad! 22 de enero de 1995, páhina 11 guive 15 peve. Koʼã rrevístape omombeʼu mbaʼéichapa heta ermáno ombohovái pyʼaguasúpe umi mbaʼe ijetuʼúva.