Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Ñemañaha (ojestudiáva)  |  Enero de 2015

Pehejákena Jehová tapenepytyvõ pene matrimóniope

Pehejákena Jehová tapenepytyvõ pene matrimóniope

“Ndahaʼéiramo Jehová la oñangarekóva pe siudáre, reiete pe guárdia opytáta oguardia.” (SAL. 127:1b, NM)

1, 2. a) ¿Mbaʼérepa 24.000 isrraelíta operde kuri pe erénsia Jehová oprometéva chupekuéra? b) ¿Mbaʼépa ñaaprende koʼã isrraelítare oiko vaʼekuégui?

UMI isrraelíta oike mboyvemi pe Yvy Oñepromete vaʼekuépe, heta kuimbaʼe oñepyrũ “oreko rrelasión sexuál umi kuña Moabguándi”, ha upévare Jehová ohundi 24.000-pe voi. Hiʼarive haʼekuéra heta tiémporema ohaʼarõ pe erénsia porãite, péro amo ipahápe ipuʼaka hesekuéra pe tentasión ha ou naiñeʼẽrendúi Jehovápe. Upéicha rupi operde hikuái irrekompénsa okonsegi potaitépema. ¡Ajépa ñambyasyete upe oiko vaʼekue hesekuéra! (Núm. 25:1-5, 9NM.)

2 “Koʼã mbaʼe [oiko vaʼekue] hesekuéra oservi ñandéve ehémploramo, ha ojehai ñanerekomboʼe hag̃ua ñandéve, jaikóva hína ko múndo ára pahápe.” (1 Cor. 10:6-11.) Koʼág̃a ñaiméma “umi ára pahápe”, ha ñande jaservíva Jehovápe jaike potaitéma pe múndo pyahúpe (2 Tim. 3:1; 2 Ped. 3:13). Péro ñambyasýramo jepe, heta ermáno noñangarekói ijehe ha ou hoʼa pe inmoralida sexuálpe. Upévare koʼág̃a osufri oikóvo hembiapo vaikuére. Ha noñarrepentíriramo hikuái, ikatu hína operdete pe oportunida oikovévo opa árare, Jehová opromete haguéicha.

3. ¿Mbaʼérepa umi omendáva oikotevẽ Jehováre ikatu hag̃uáicha ogia ha oprotehe chupekuéra? (Ehecha pe taʼanga oĩva iñepyrũme.)

 3 Ko múndope umi hénte hekovaieterei. Upévare entéro kristiáno omendáva oikotevẽ Jehováre ikatu hag̃uáicha ogia chupekuéra ha oprotehe imatrimónio (elee Salmo 127:1). Ko artíkulope jahecháta cinco mbaʼe oipytyvõtava chupekuéra oñangareko hag̃ua imatrimóniore: 1) oprotehe vaʼerã ikorasõ, 2) oñemoag̃ui vaʼerã Jehováre, 3) oñemonde vaʼerã pe teko pyahúgui, 4) oñemongeta porã vaʼerã, ha 5) omeʼẽ vaʼerã ojupe oikotevẽva sexuál ha emosionálmente.

PEPROTEHE VAʼERÃ PENE KORASÕ

4. ¿Mbaʼéicha rupípa heta kristiáno hoʼa pe inmoralida sexuálpe?

4 ¿Mbaʼéicha rupípa heta kristiáno hoʼa pe inmoralida sexuálpe? Umíva heta vése oñepyrũ umi mbaʼe ohechávaguinte. Jesús heʼi vaʼekue: “Entéro osegíva omaña peteĩ kuñáre ha iñakãraku hese, upéva oikóma hendive ipyʼapýpe ha péicha oporomoakãratĩma hína” (Mat. 5:27, 28; 2 Ped. 2:14). Heta ermáno hoʼa inmoralida sexuálpe ojapo rupi umi mbaʼe omokangýva chupekuéra. Por ehémplo, oĩ ñepyrũrã olee vaʼekue umi puvlikasión omoakãrakúva chupe, ohecha Internétpe pornografía térã umi mbaʼe tieʼỹ ivaietereíva. Ótro katu ohecha pelíkula, teátro, térã prográma de televisión ohechaukáva umi persóna oreko jave rrelasión sexuál. Ha oĩ avei ohóva umi lugár oĩháme ojeroky tieʼỹva ha oñemboíva (striptease), térã ojapouka masáhe erótiko omoakãrakúva chupe.

5. ¿Mbaʼérepa japrotehe vaʼerã ñane korasõ?

5 Oĩ avei oúva hoʼa pe inmoralidápe oiko rupi oheka ótra persóna okomprendeve vaʼerã chupe. Avei ko múndope umi hénte ndojejokokuaái ha igustoitépe hekovai. Hiʼarive ñande ñaneimperfékto, ha opa umívare ndahasyiete ñane korasõ ñanetraisiona hag̃ua ha jaiko ñamaña ótra persóna ndahaʼéivare ñane ména térã ñane rembireko (elee Jeremías 17:9, 10). Jesús heʼi porã vaʼekue: “Yvypóra korasõgui osẽ umi mbaʼe vai ojaposéva, jejuka, ñemoakãratĩ, tekovai” (Mat. 15:19).

6, 7. a) ¿Mbaʼépa ikatu oiko jahejáramo ipuʼaka ñanderehe umi mbaʼe vai jajaposéva? b) ¿Mbaʼépa jajapo vaʼerã ani hag̃ua jaʼa pe inmoralida sexuálpe?

6 Umi mbaʼe vai oike jepéramo peteĩ kristiáno korasõme, ijetuʼuvétantema chupe ojejokokuaa hag̃ua. Por ehémplo, ikatu peteĩ omendáva oñepyrũ ojegusta ótra persóna ndahaʼéivare iparéha ha oñemoĩ oñemongeta hendive umi mbaʼe oñeʼẽ vaʼerãre iména térã hembirekóndinte. Upéi katu ohekáma oportunida ohecha hag̃ua chupe ha ohasa hag̃ua tiémpo hendive. Ikatu voi opensa ndaivairiha upe ojapóva ha ndoperhudikamoʼãiha chupekuéra ni ótrope. Péro mbeguekatúpe ojegusta mbaretevéta ohóvo hikuái ha ikatu ndojejokokuaavéi. Ha amáske ohasa pe tiémpo hasyvétantema chupekuéra ojejoko hag̃ua, ohechakuaáramo jepe oĩ vaimaha la ojapóva (Prov. 7:21, 22).

7 Ñepyrũrã oñemongetánte kuri hikuái, upéi opokóma ojopóre, ojoakarisia, oñohetũ, oñoañuã ha opokóma katu ojuehe. Upépe mokõivéva omboykéma Jehová heʼíva ha ojapóma umi mbaʼe ojapo vaʼerã iména térã hembirekóndi añoite. La Biblia heʼi voi: “Káda uno ñañemoñuhã, jahejávo umi mbaʼe jajaposéva ñandestira ha ñanembotavy”. Upéicha umi iñakãrakúva ojuehe ou ‘opeka’ ha hoʼa pe inmoralida sexuálpe (Sant. 1:14, 15). ¡Ajépa ivaiete upéva! Péro koʼã mbaʼe ndoikói vaʼerãmoʼã umi omendáva ohejárire Jehová oprotehe imatrimónio. Haʼe ningo ñanemboʼe jarrespeta hag̃ua pe kompromíso jajapo vaʼekue henondépe. ¿Mbaʼépa ikatu jajapo ñamombaʼeve hag̃ua pe matrimónio?

 PEÑEMOAG̃UÍKENA JEHOVÁRE

8. ¿Mbaʼérepa jareko vaʼerã Jehovápe ñane amígoramo?

8 (Elee Salmo 97:10.) Jareko vaʼerã Jehovápe ñane amígoramo ikatu hag̃uáicha jajeprotehe pe inmoralida sexuálgui. Jaikuaavévo umi kualida porãita Jehová orekóva ha ñañehaʼãramo ‘ñahaʼanga’ chupe ha ‘jasegíramo jajoayhu’, ifasilvéta ñandéve jarrechasa hag̃ua ‘pe tekovai ha opaichagua tekokyʼa’ (Efes. 5:1-4). Umi omendáva oikuaa porã “Ñandejára [okondenataha] umi hekovaívape ha umi oporomoakãratĩvape”. Upévare mokõivéva oñehaʼã vaʼerã ani hag̃ua oñotraisiona (Heb. 13:4).

9. a) ¿Mbaʼépa oipytyvõ Josépe ani hag̃ua hoʼa pe tentasiónpe? b) ¿Mbaʼépa ñaaprende José ehémplogui?

9 Heta kristiáno, opoi rire itraváhogui, ohasaiterei tiémpo ikompañéro de traváho ndahaʼéivandi Testígo, ha mbeguekatúpe nopenavéi ohóvo Ñandejára heʼívare. Oĩ katu umi ombohováiva tentasión itravahohápe voi. Upéicha oiko vaʼekue peteĩ mitãrusúre, hérava José. Haʼe ombaʼapo oikóvo pe ógarupi ha ohechakuaa ipatrón rembireko ojegustaha hese, upéi káda díama pe kuñakarai oiko hapykuéri. Amo ipahápe “ojagarra Josépe ijaógui, ha heʼi chupe: ‘¡Ejúna eñeno chendive!’”. Péro José osẽ odipara chugui. ¿Mbaʼépa oipytyvõ ko mitãrusúpe ani hag̃ua ojapo pe mbaʼe ivaietéva? Haʼe ni mbaʼevéicharõ noñemoĩvaiséi Jehovándi. Upévare oñemosẽ kuri itraváhogui ha oñemoinge kárselpe, péro Jehová upéi ovendesi chupe (Gén. 39:1-12; 41:38-43). Koʼág̃arupi avei ikatu oñepresenta koʼãichagua situasión ñande travahohápe. Upévare kristianokuéra oñatende vaʼerã ikatu hag̃uáicha pyaʼe ojehekýi koʼã tentasióngui ha ani peichahágui omoakãratĩ iména térã hembirekópe.

PEÑEMONDÉKENA PE TEKO PYAHÚGUI

10. ¿Mbaʼéichapa ñandeprotehe pe teko pyahu?

10 Pe teko pyahu ojejapóva “Ñandejára oipotaháicha ha oñemopyendáva tekojoja ha jerovia teetépe” oipytyvõta umi omendávape oprotehe hag̃ua imatrimónio (Efes. 4:24). Umi oñehaʼãva oñemonde pe teko pyahúgui ojuka hete “rembipota vai” ha oñehaʼãmbaite ojapo ko téxto heʼíva: “Ani penderekovai, ani penderekokyʼa, ani penembaʼepota vai, ani pendetarovaite pejaposégui ivaíva, ha ani pendetaryrýi” (elee Colosenses 3:5, 6). Pe palávra “pejukáke” oĩva Colosénsespe, ohechauka ñandéve tekotevẽha jajapo opa ikatúva ani hag̃ua jaʼa pe inmoralida sexuálpe. Upéva heʼise ñamboyke vaʼerãha oimeraẽ mbaʼe ikatúva ñanemoakãraku peteĩ persóna ndahaʼéivare ñane ména térã ñane rembireko (Job 31:1). Jaikóramo Jehová oipotaháicha, ñamboykéta ‘umi mbaʼe vai’ ha ñañakãrama hatãta umi mbaʼe “iporãvare” (Rom. 12:2, 9).

11. ¿Mbaʼéichapa pe teko pyahu omombarete umi omendávape?

11 Ñañemondéramo pe teko pyahúgui, jahechaukáta ‘jajoguaha Ñandejárape’ (Col. 3:10). Pe ména ha tembireko ‘ojoporiahuverekóramo [...] ipyʼaite guive, imbaʼeporã, oñemomirĩ, ndaipochyreíri ha ipasiénsiaramo’ ojuehe, imatrimónio imbaretevéta ha Jehová ovendesíta chupekuéra (Col. 3:12). Avei umi omendáva ojogueraha porãta hogapýpe ohejáramo ‘Cristo pyʼaguapy ogoverna ikorasõ’ (Col. 3:15). Ha ‘ojoayhúramo hikuái ipyʼaite guive’, mokõivéva ‘ohechaukáta omombaʼeha’ hembiayhúpe (Rom. 12:10).

12. ¿Mbaʼe mbaʼépa nde rehechakuaa oipytyvõha umi matrimóniope ovyʼa hag̃ua?

12 Peteĩ paréhape oñeporandu mbaʼe mbaʼépa oipytyvõ chupekuéra ovyʼa hag̃ua imatrimóniope. Pe ména, hérava Sid,  heʼi: “Siémpre roñehaʼã rohechauka ojupe rojoayhuha, ha mokõivéva roñehaʼãmbaite ani hag̃ua orepochy rei oñondive”. Hembireko Sonja katu heʼi añeteha upéva, ha omombeʼu avei mbaʼépa oipytyvõ chupekuéra: “Oréve g̃uarã iñimportanteterei oreamávle oñondive. Ha avei roñehaʼãmbaite rohechauka oreumildeha, sapyʼánte ijetuʼúramo jepe upéva”.

PEÑEMONGETA PORÃKENA

13. ¿Mbaʼépa tekotevẽ ojapo umi omendáva omombarete hag̃ua imatrimónio, ha mbaʼérepa upéva iñimportánte?

13 Ména ha tembireko mborayhúpe oñeʼẽramo ojupe, imatrimónio imbaretevéta. Péro ñambyasýramo jepe, oĩ heta otrata porãva umi extráñope, péro iñeʼẽ arhélva iména térã hembirekópe. Ha oĩ voi otrata porãvéva hymba jaguápe jepe hembiayhúpe rangue. Umi omendáva oikóramo ‘ipyʼaro, orrenega vaipa, ipochy, ojoguerosapukái, térã ojojaʼo’, nokumplíri hína Jehová ohaʼarõva chuguikuéra ha oñemomombyryve ojuehegui (Efes. 4:31). Umi paréha oiko rangue otaky térã oñembohory ojuehe, iporãvéta oñeʼẽramo ojupe mborayhúpe ha oñatende heʼi vaʼerãre ani hag̃ua omoñeñandu vai hembiayhúpe (Efes. 4:32).

14. ¿Mbaʼépa ndovaléi jajapo?

14 Añetehápe ningo la Biblia heʼi oĩha “ára oñekirirĩ hag̃ua” (Ecl. 3:7). Péro upéva ndeʼiséi umi omendáva noñeʼẽvéi vaʼerãha ojupe ipochy jave. Peteĩ ermána Alemaniagua heʼi: “Oĩ jave provléma ha ñañemokirirĩnterõ, ikatu ñamoñeñandu vaive ñane rembiayhúpe. Upéicha avei, ivaíta ndajajokóiramo ñande juru ha jaʼepaite jaʼeséva guive ñanenervióso haguérente. Peichaháguinte ikatu hína jaʼe ñapensaʼỹre peteĩ mbaʼe olastimátava ñane rembiayhúpe ha ñambyaivéta ñane situasión”. Umi matrimónio nosolusionamoʼãi iprovléma ojoguerosapukáiramo térã noñeʼẽvéiramo ojupe. Upéva rangue, oñehaʼã vaʼerã oñontendeve hikuái ha ani oiko ojodiskutipa rei. Upéichamante ikatúta omombareteve imatrimónio.

15. ¿Mbaʼérepa umi omendáva oñemotiémpo vaʼerã oñemongeta hag̃ua?

15 Ména ha tembireko ojoayhuvéta oñemotiémporamo  oñemongeta hag̃ua umi mbaʼe opensa ha oñandúvare. Péro imanduʼa vaʼerã hikuái iñimportanteha oñatende mbaʼépa heʼíta ha mbaʼéichapa heʼíta. Upévare, ñañehaʼãkena ñañeʼẽ torýpe ha mborayhúpe ñambohováiramo jepe umi provléma ijetuʼúva. Upéicha ndahasymoʼãi ñane rembiayhúpe ñanerendu porã hag̃ua (elee Colosenses 4:6). Jaʼe vaʼerã ñane ména térã ñane rembirekópe “umi mbaʼe iporãva ha oporomombaretétava oñekotevẽ jave” (Efes. 4:29).

Ména ha tembireko omombaretevéta imatrimónio ojepokuaáramo oñemongeta porã (Ehecha párrafo 15)

PEMEʼẼKENA OJUPE PEIKOTEVẼVA SEXUÁL HA EMOSIONÁLMENTE

16, 17. ¿Mbaʼérepa umi omendáva imbaʼerechakuaa vaʼerã ha omeʼẽ ojupe umi mbaʼe oikotevẽva sexuál ha emosionálmente?

16 Umi omendáva ikatu avei omombarete imatrimónio oñeinteresáramo hembiayhu oikotevẽvare, opensa rangue ijehénte (Filip. 2:3, 4). Ména ha tembireko imbaʼerechakuaa vaʼerã ha omeʼẽ ojupe umi mbaʼe oikotevẽva sexuál ha emosionálmente (elee 1 Corintios 7:3, 4).

17 Ñambyasýramo jepe, oĩ ména térã tembireko naikariñósoiva iparéhandi, térã ndohechaukáiva mborayhu oreko jave rrelasión sexuál. Oĩ voi ména oimoʼãva oikotaha chugui kuimbaʼe dominádo ikariñósoramo hembirekóndi. Péro la Biblia heʼi porã: “Peẽ menakuéra, pentende porã vaʼerã pene rembirekópe” (1 Ped. 3:7). Menakuéra oikuaa vaʼerã ndahaʼeiha oreko haguére rrelasión hembirekóndi omeʼẽmbamaha chupe pe oikotevẽva sexuál ha emosionálmente. Katuete ningo pe tembireko ovyʼavéta oreko jave rrelasión sexuál iména ojepokuaáramo omokunuʼũ ha otrata porã chupe siémpre, ndahaʼéi upe moméntopente. Mokõivéva opensáramo ojuehe ha ohechauka ojoayhuha, ifasilvéta chupekuéra omeʼẽ hag̃ua ojupe oikotevẽva.

18. ¿Mbaʼéichapa umi omendáva ikatu omombareteve imatrimónio?

18 Ndaipóri ningo ni peteĩ exkúsa ñamoakãratĩ hag̃ua ñane ména térã ñane rembirekópe. Péro umi omendáva ndohechaukáiramo ojupe ojoayhuha, peteĩva ohekaséta ótra persóna opena vaʼerã hese (Prov. 5:18; Ecl. 9:9). Upévare la Biblia heʼi porã umi omendávape: “Ani penega ojuehegui [umi mbaʼe peikotevẽva], noiméirõ peñemoĩ peteĩ ñeʼẽme ha pedesidi ndapekemoʼãiha oñondive peteĩ tiémpore [...], ani hag̃ua Satanás pendereity iñuhãme ndapejejokokuaáigui” (1 Cor. 7:5). Ivaietereíta ningo Satanás ojaprovecháramo pene situasión rehe, ha “ndapejejokokuaáigui” pemoakãratĩ pene ména térã pene rembirekópe. Upéva rangue, peñehaʼã vaʼerã pemombarete pene matrimónio ha pemeʼẽ ojupe mborayhúpe upe peikotevẽva ha ani pemeʼẽ vaʼerãgui reínte. Upearã iñimportánte pehendu ko konsého: “Káda uno jasegi vaʼerã jajapo pe ideprovéchotava ñande rapichápe, ha ani ñandévente” (1 Cor. 10:24).

PEÑANGAREKÓKENA PENE MATRIMÓNIORE

19. ¿Mbaʼépa tekotevẽ ojapo umi omendáva, ha mbaʼérepa?

19 Pe múndo pyahu ningo hiʼag̃uimbaitéma. Upévare, ñañatendékena ani hag̃ua jaʼa pe tentasiónpe oiko haguéicha umi 24.000 isrraelítare Moábpe. La Biblia omombeʼu rire umi mbaʼe oiko vaʼekue hesekuéra, heʼi: “Pe opensáva ojepytaso mbareteha, toñatendéke ani hoʼa” (1 Cor. 10:12). Upéicharõ, tekotevẽterei hína ñañangareko ñane matrimóniore ikatu hag̃uáicha siémpre ñaneñeʼẽrendu Jehovápe ha ani hag̃ua ñatraisiona ñane rembiayhúpe (Mat. 19:5, 6). Jajapo vaʼerã ko téxto heʼíva: “Peñehaʼãmbaitékena penepotĩ Ñandejára renondépe, ani oĩ pende pype mbaʼeve ivaíva, ha peiko porã hendive” (2 Ped. 3:13, 14).