Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Ñemañaha (ojestudiáva)  |  Enero de 2015

Jaagradesékena Jehovápe ha haʼe ñanevendesíta

Jaagradesékena Jehovápe ha haʼe ñanevendesíta

“Peagradesékena Jehovápe, haʼe ivuenoiterei rupi.” (SAL. 106:1, NM)

1. ¿Mbaʼérepa Jehová omerese jaagradese chupe?

JEHOVÁGUI ningo ou “opa mbaʼe porã ha rregálo hekopeguáva”, upévare omerese jaagradese chupe (Sant. 1:17). Haʼe oñangareko ñanderehe ojapoháicha peteĩ ovecharerekua imbaʼeporãva, ha omeʼẽ ñandéve opa mbaʼe ñaikotevẽva, tahaʼe físikamente ha espirituálmente (Sal. 23:1-3). Ñandejára “ñandeprotehe ha ñanemombarete”, koʼýte jahasa asy jave (Sal. 46:1, NM). Upévare ñandeagradesído vaʼerã pe salmístaicha. Haʼe ohai vaʼekue: “Peagradesékena Jehovápe, haʼe ivuenoiterei rupi; imborayhu ndopamoʼãi arakaʼeve” (Sal. 106:1, NM).

Téxto áño 2015-pe g̃uarã: “Peagradesékena Jehovápe, haʼe ivuenoiterei rupi.” (Salmo 106:1)

2, 3. a) ¿Mbaʼérepa ñamombaʼe vaʼerã umi vendisión jahupytýva? b) ¿Mbaʼe porandúpa ñahesaʼỹijóta ko artíkulope?

2 ¿Mbaʼérepa tekotevẽ jajepyʼamongeta ha jahecha oimépa ñandeagradesído? La Biblia oprofetisa haguéicha, koʼã ára pahápe heta hetave umi hénte imalagradesídova (2 Tim. 3:2). Heta persóna ndoguerohorýi umi vendisión ohupytýva. Ko múndope oñemombaʼeve umi mbaʼerepy ha ojejapo opaichagua propagánda. Upéicha rupi umi hénte itarovaite okonsegise  hetave mbaʼerepy, oñekontenta rangue umi mbaʼe orekomívarente. Ha ñande nañañatendéiramo ikatu avei jaʼa ko ñuhãme. Oiko haguéicha umi isrraelítare, ikatu jaju ñanemalagradesído ha nañamombaʼevéi ñane amista Jehovándi ni umi vendisión oúva chugui (Sal. 106:7, 11-13).

3 Ñambohovái jave umi situasión ijetuʼúva, sapyʼánte jajepyʼapyeterei ha ndajahechakuaái umi vendisión jahupytýva (Sal. 116:3). ¿Mbaʼépa jajapo vaʼerã ikatu hag̃uáicha ñandeagradesído? Ha oiméramo ñandeagradesídoma, ¿mbaʼépa ñanepytyvõta jasegi hag̃ua upéicha? ¿Mbaʼépa ñanepytyvõta ani hag̃ua ñañedesanima ñambohovái jave umi provléma ijetuʼúva? Jahechamína.

“HETAITE MBAʼÉMA NINGO REJAPO JEHOVÁ”

4. ¿Mbaʼépa jajapo vaʼerã ikatu hag̃uáicha siémpre ñandeagradesído?

4 Ikatu hag̃uáicha siémpre ñandeagradesído, tekotevẽ jajepyʼamongeta opa mbaʼe Jehová ojapóvare ñanderehehápe. Ñapensamíntena mbaʼeichaitépa haʼe ñanderayhu. Pe salmísta ojapo vaʼekue upéicha, ha oñesorprende ohechávo umi mbaʼe porãita Jehová ojapóva (elee Salmo 40:5 ha 107:43).

5. ¿Mbaʼéichapa Pablo ehémplo ñanepytyvõ ñandeagradesído hag̃ua?

5 Apóstol Pablo ehémplo ñanepytyvõ ñandeagradesído hag̃ua. Haʼe ojepyʼamongetámi umi vendisión ohupytývare, ha upévare pyʼỹinte oagradese Jehovápe ipyʼaite guive. Orrekonose ymave ‘otaky hague Ñandejárare, opersegi ipuévlope ha okopi hague hesekuéra’. Péro hembiapo vaíramo jepe ymave, upe rire ovyʼa Jehová ha Jesucristo imbaʼeporã haguére hendive ha omeʼẽgui chupe hikuái “peteĩ tembiapo” iñimportantetereíva (elee 1 Timoteo 1:12-14). Pablo ohayhu vaʼekue iñermanokuérape, ha heta vése oagradese Ñandejárape koʼã kristiáno ikualida porãitévare ha iñeʼẽrendu haguére hikuái (Filip. 1:3-5, 7; 1 Tes. 1:2, 3). Ohasa jave peteĩ situasión ijetuʼúva, pyaʼe voi oagradese Jehovápe umi ermáno oipytyvõ haguére chupe (Hech. 28:15; 2 Cor. 7:5-7). Ndareíri Pablo heʼi umi kristiánope: “Pehechaukákena pendeagradesidoha. [...] Pepurahéi sálmo, pembotuicha Ñandejárape ha pepurahéi músika iporãva omombaʼeguasúva chupe. Pegueropurahéi Jehovápe pende pyʼaite guive” (Col. 3:15-17).

JAJEPYʼAMONGETA HA ÑAÑEMBOʼÉRAMO ÑANDEAGRADESIDOVÉTA

6. ¿Mbaʼe mbaʼérepa nde reagradeseve Jehovápe?

6 ¿Mbaʼéichapa ikatu resegi Pablo ehémplo? Rejepyʼamongeta vaʼerã umi mbaʼe Jehová ojapóvare nderehehápe (Sal. 116:12). Oñeporandúramo ndéve mbaʼe vendisiónpa rehupytýma, ¿mbaʼépa rerrespondéta? Ikatu ere revyʼaitereiha reiko haguére Ñandejára amígoramo, oñeperdona haguére nde pekádo Jesús sakrifísio rupive, ha umi ermáno oĩ haguére nde ykére rehasárõ guare peteĩ mbaʼe ijetuʼúva. Ikatu avei reagradese ne ména térã ne rembirekóre, ne famíliare, ha hetave mbaʼére. Káda uno ñañemotiémporamo jajepyʼamongeta hag̃ua umi vendisión jahupytývare, káda día jaagradeséta Jehovápe ñane korasõite guive (elee Salmo 92:1, 2).

7. a) ¿Mbaʼérepa jaagradese vaʼerã Jehovápe ñañemboʼe jave? b) ¿Mbaʼépepa ñanepytyvõta jaagradeséramo Ñandejárape ñañemboʼe jave?

7 Ñamombaʼéramo ñande pyʼaite guive umi vendisión jahupytýva, katuete jaagradeséta Ñandejárape ñañemboʼe jave  chupe (Sal. 95:2; 100:4, 5). Heta oĩ oñemboʼéva ombaʼejerure hag̃uánte. Péro ñande jaikuaa porã Jehová ovyʼaha jaagradeséramo chupe umi mbaʼe jahupytývare. La Bíbliape jajuhu heta ñemboʼe opokoitereíva ñane korasõre ha ohechaukáva mbaʼeichaitépa heta Ñandejára siérvo ijagradesído vaʼekue, umíva apytépe Ana ha Ezequías (1 Sam. 2:1-10; Is. 38:9-20). Jasegíkena koʼã ehémplo ha jaagradese Jehovápe opa mbaʼe ojapóvare ñanderehehápe (1 Tes. 5:17, 18). Upéicha ñanekyreʼỹvéta, jahayhuvéta Ñandejárape ha ñañemoag̃uivéta hese (Sant. 4:8).

¿Mbaʼe vendisiónrepa nde reagradeseve Jehovápe? (Ehecha párrafo 6 ha 7)

8. ¿Mbaʼéicha rupípa ikatu jaju ñanemalagradesído Jehovándi?

8 ¿Mbaʼérepa ñañatende vaʼerã ani hag̃ua jaju ndajavaloravéi umi mbaʼe porã Jehová ojapóva ñanderehehápe? Ñande ningo ñaneimperfékto ha ndahasyiete ñanemalagradesído hag̃ua. Ñapensamíntena, ñande tuvakuéra ypykue Adán ha Eva oiko vaʼekue peteĩ hardín iporãitereívape, oreko opaite mbaʼe oikotevẽva ha ikatu kuri oikove opa árare (Gén. 1:28). Péro haʼekuéra nomombaʼéi koʼã vendisión; noñekontentái umi mbaʼe orekóvare. Upéicha rupi operdepaite hikuái koʼã mbaʼe porã (Gén. 3:6, 7, 17-19). Koʼág̃a avei umi hénte imalagradesído, ha nañañatendéiramo, ikatu avei ñanemalagradesído haʼekuéraicha. Por ehémplo, ikatu jaju nañamombaʼevéi ñane amista Jehovándi, ndajavaloravéi jareko haguére ermáno espirituál opárupi, ha amo ipahápe ikatu hína jaju jaiko ko múndope ojeikoháicha (1 Juan 2:15-17). Ani hag̃ua jaʼa ko ñuhãme, jajepyʼamongeta vaʼerã umi vendisión jahupytývare ha jaagradese Jehovápe ñaime haguére ipuévlope (elee Salmo 27:4).

JAHASA JAVE UMI PRUÉVA

9. ¿Mbaʼérepa iporã ñapensa umi vendisión jahupytývare jahasa jave umi pruéva ijetuʼúva?

9 Ñandeagradesídoramo ikatu hína ñambohovái porã umi pruéva ijetuʼuvéva jepe. Peichahágui jahasáramo peteĩ situasión ijetuʼuetereíva, por ehémplo jaju ñanderasyete, omano peteĩ jahayhúva, ñandeafektáramo peteĩ desástre naturál térã ñanetraisiona ñane ména térã ñane rembireko, katuete ñañeñandu vaietereíta. Umícha jave jajepyʼamongeta vaʼerã umi vendisión jahupytývare. Upéva ñanekonsola ha ñanemombaretéta ñaaguanta  hag̃ua. Jahechamína ñane ermanokuéra ohasa vaʼekue.

10. ¿Mbaʼéichapa oñeñandu Irene opensávo umi vendisión ohupytývare?

10 Irene * ningo peteĩ prekursóra rregulár oikóva Norteaméricape. Iména, haʼéva kuri ansiáno, otraisiona chupe ha oheja rei chupe mbohapy mitã reheve. ¿Mbaʼépa oipytyvõ ko ermánape osegi hag̃ua oservi Jehovápe ipyʼaite guive? Haʼe heʼi: “Aagradeseterei Jehovápe oñangareko ha oñeinteresa haguére cherehe. Apensávo káda día mbaʼéichapa haʼe chevendesi, ahechakuaa tuichaiterei mbaʼeha areko haguére peteĩ Túva chekuaa ha cheprotehéva. Aikuaa porã haʼe arakaʼeve ndacherejamoʼãiha”. Irene ohasáramo jepe hetaiterei mbaʼe ijetuʼúva, osegi ovyʼa. Upéva omombarete ha oipytyvõ chupe omokyreʼỹ hag̃ua ótrope.

11. ¿Mbaʼépa oipytyvõ Kyung-sóokpe ogueropuʼaka hag̃ua imbaʼasy?

11 Peteĩ ermána oikóva Ásiape hérava Kyung-sook, mas de 20 áñoma oservi de prekursóra iménandi. Upéinte ko ermána oñentera orekoha kánser de pulmón, ha tres a seis mése de vídantema hemby chupe. Upe mboyve ohasáramo jepe heta mbaʼe ipohýiva, siémpre hesãi vaʼekue. Kyung-sook heʼi: “Apyta vaieterei aikuaa rire cherasyha. Haʼete voi chéve aime reimíntemava ha akyhyjeterei”. ¿Mbaʼépa oipytyvõ chupe ogueropuʼaka hag̃ua imbaʼasy? Haʼe omombeʼu: “Káda pyhare añeno mboyve ajupi pe terrásape ha añemboʼe. Aagradese Jehovápe cinco mbaʼe porã ahasa vaʼekuére upe díape, ha añemboʼe chupe en vos álta. Upéva chetrankilisa ha chemokyreʼỹ ahechauka hag̃ua Jehovápe ahayhuha chupe”. ¿Mbaʼéichapa oipytyvõ chupe oñemboʼe haguére upéicha? Haʼe heʼi: “Añandu mbaʼéichapa Jehová chemombarete ahasa jave umi situasión ijetuʼuetereíva. Ambojojáramo umi mbaʼe ahasáva umi vendisión ahupytývare, ahechakuaa saʼietereiha umi provléma arekóva”.

Iñermáno John ndive, ojesalva vaʼekue avei (Ehecha párrafo 13)

12. ¿Mbaʼépa oipytyvõ Jásonpe ogueropuʼaka hag̃ua imbaʼembyasy?

12 Peteĩ ermáno hérava Jason 30 áñorema oservi de tiémpo kompléto ha koʼág̃a ombaʼapo peteĩ sukursál de Áfricape. Haʼe omombeʼu: “Ojapo siete áño che rembireko omano hague. Añeñandu vaieterei ningo chemanduʼávo mbaʼeichaitépa ombosufri vaʼekue chupe pe kánser”. ¿Mbaʼépa oipytyvõ ko ermánope ogueropuʼaka hag̃ua imbaʼembyasy? Haʼe heʼi: “Peteĩ día chemanduʼa peteĩ moménto iporãitereívare ahasa vaʼekue che rembirekóndi. Aagradese Jehovápe chemanduʼa haguére upe mbaʼe porãitére, ha apyta chepyʼaguapyve. Upe guive pyʼỹinte aagradese umi mbaʼe porã rohasa vaʼekuére che rembireko ndive. Upéva tuicha chepytyvõ akambia hag̃ua apensa lája. Ahechagaʼúramo jepe chupe, aagradese Jehovápe rovyʼa haguére ore matrimóniope ha ikatu haguére mokõivéva roservi chupe ore pyʼaite guive”.

“Aagradeseterei Jehová oĩ haguére che ykére.” (Sheryl)

13. ¿Mbaʼépa oipytyvõ Shérylpe ogueropuʼaka hag̃ua umi mbaʼe ijetuʼuetéva ohasa vaʼekue?

13 Sheryl oreko vaʼekue 13 áñonte pe urakán Haiyan ojagarrárõ guare pe párte sentrál de Filipinas, áño 2013 opakuévo. Haʼe opyta mbaʼeveʼỹre. Sheryl omombeʼu: “Apyta ogaʼỹre ha omano chehegui heta persóna ahayhúva”. Pe oláda ojuka isy ha itúvape ha mbohapy iñermánope. ¿Mbaʼépa oipytyvõ chupe ogueropuʼaka hag̃ua ko desgrásia vaiete ha ani hag̃ua oñamarga? Haʼe  ijagradesidaiterei ha siémpre opensa umi vendisión ohupytývare. Upéi omombeʼu: “Ahecha mbaʼeichaitépa Jehová puévlo oipytyvõ ha omokyreʼỹ entéro rohasávape koʼã mbaʼe vaietére. Aikuaa porã oparupiete umi ermáno oñemboʼeha cherehe”. Upéi heʼi avei: “Aagradeseterei Jehová oĩ haguére che ykére. Haʼe siémpre omeʼẽ ñandéve opa mbaʼe ñaikotevẽva”. Jahechaháicha, ñapensa meméramo umi vendisión jahupytývare, pe mbaʼembyasy nañanemokangymoʼãi. Avei, ñandeagradesídoramo ikatúta ñaaguanta umi pruéva ijetuʼuvéva jepe (Efes. 5:20; elee Filipenses 4:6, 7).

“VYʼÁGUI CHERENYHẼTA”

14. ¿Mbaʼe esperánsapa jareko? (Ehecha pe taʼanga oĩva iñepyrũme.)

14 Ymaite guive, Jehová puévlo ovyʼaiterei umi vendisión ohupytývare. Por ehémplo, umi isrraelíta ojesalvárõ guare faraón ha ijehérsitogui pe mar Rójope, ovyʼaiterei hikuái ha opurahéi Jehovápe ombotuicha ha oagradese hag̃ua chupe (Éx. 15:1-21). Koʼág̃arupi avei ñande jaservíva Jehovápe ñamombaʼeterei pe esperánsa jarekóva: ñanesãsóta opa mbaʼe ñanemoñembyasy ha ñanembosufrívagui (Sal. 37:9-11; Is. 25:8; 33:24). Ñañeimahinamína mbaʼeichaitépa ñañeñandúta Jehová ohundi rire entéro iñenemígope ha ñanderresivi pe múndo pyahúpe oĩtahápe pyʼaguapy ha tekojoja. ¡Upépe katu koʼýte jaagradeséta chupe opaite mbaʼére! (Apoc. 20:1-3; 21:3, 4.)

15. ¿Mbaʼépa jajapo vaʼerã ko áño 2015-pe?

15 Ko áño 2015-pe katuete jahupytýta heta vendisión Jehovágui. Ikatu avei ñambohovái heta pruéva, péro toiko la oikóva, ñande jaikuaa porã Jehová akóinte oĩtaha ñande ykére (Deut. 31:8; Sal. 9:9, 10). Haʼe osegíta omeʼẽ ñandéve opa mbaʼe ñaikotevẽva ñaneñeʼẽrendu hag̃ua chupe. Upévare jajerovia vaʼerã proféta Habacuc ojerovia haguéicha: “Ndaipotýirõ jepe ígo máta, ndahiʼáirõ jepe parrál ha olívo, nomeʼẽiramo kokue hiʼa, ha omanomba ovechakuéra, ha ndaipóri mymba korápe, péicharõ jepe, vyʼágui cherenyhẽta Ñandejára cherenohẽ haguére jejopy vaígui” (Hab. 3:17, 18). Ñapensa memékena umi vendisión jahupytývare Jehovágui ha jajapo ko téxto 2015-pegua heʼiháicha: “Peagradesékena Jehovápe, haʼe ivuenoiterei rupi” (Sal. 106:1, NM).

^ párr. 10 Oĩ téra oñekambiáva.