Ehecha oĩva pype

Ehecha oĩva pype

¿Remombaʼépa pe erénsia rerresivi vaʼekue?

¿Remombaʼépa pe erénsia rerresivi vaʼekue?

“Ñande jarresivi pe espíritu oúva Ñandejáragui [...] jaikuaa hag̃ua umi mbaʼe Ñandejára omeʼẽ vaʼekue ñandéve imbaʼeporã rupi.” (1 COR. 2:12)

1. ¿Mbaʼépa ñahendu pyʼỹinte heʼiha umi hénte?

PYʼỸINTE ñahendu jepi umi hénte heʼi: “Reperde rire ae remombaʼe pe reguerekóva”. ¿Oikómavapa nderehe upéva? Heta vése ningo ndajahecharamovéima umi mbaʼe jarekóva ñanemitã guive. Por ehémplo, umi rríko família sapyʼánte nomombaʼevéima umi mbaʼe oguerekóva. Upéicha avei oiko jepi heta mitãrusu ha mitãkuñáre. Haʼekuéra imitã rupi ikatu hína ndohechakuaái mbaʼépa añetehápe pe ivaliosovéva.

2, 3. a) ¿Mbaʼépa ovalora vaʼerã umi kristiáno imitãva? b) ¿Mbaʼépa ñanepytyvõta ñamombaʼe hag̃ua umi mbaʼe jarresivíva?

2 Oiméramo nde peteĩ mitãrusu térã mitãkuña erekóva 20 áño térã saʼive, ¿mbaʼépa iñimportanteve ndéve g̃uarã? Heta oĩ heʼíva iñimportanteha chupe g̃uarã isuéldo porã, oreko peteĩ óga tuicháva, térã umi aparáto osẽ ramovéva. Péro umi opensáva péicha ndohechakuaái oĩha peteĩ mbaʼe iñimportantevéva: pe rrikésa espirituál. Ñambyasýramo jepe, oĩ hetaiterei mitãrusu ni ndohekáiva upéva. Ha oiméramo nde tuvakuéra nemboʼe nemichĩ guive reikuaa hag̃ua Jehovápe, remombaʼe vaʼerã upe erénsia espirituál rerresivíva ha eñatende ani hag̃ua  reperde (Mat. 5:3). * Nderevaloráiramo umi mbaʼe nde tuvakuéra nemboʼéva Jehovágui, ikatu hína rejapo peteĩ mbaʼe rembyasýtava upéi tóda la vída.

3 Aníkena reheja oiko nderehe upéva. ¿Mbaʼépa nepytyvõta revalora hag̃ua peteĩ tesóroicha ne erénsia espirituál? La Bíbliape oĩ heta ehémplo ohechaukáva mbaʼérepa iñimportánte ñamombaʼe pe erénsia espirituál. Umi ehémplo oñehesaʼỹijótava ko artíkulope ikatu oipytyvõ entéro kristiánope, tahaʼe imitãva ha ijedávape, ovalora hag̃ua iñerénsia espirituál.

NOMOMBAʼÉI HIKUÁI IÑERÉNSIA ESPIRITUÁL

4. ¿Mbaʼépa heʼi 1 Samuel 8:1-5 proféta Samuel raʼykuérare?

4 La Bíbliape omombeʼu oĩ hague persóna ndovaloráiva pe erénsia espirituál ijojahaʼỹva orresivi vaʼekue. Por ehémplo, proféta Samuel raʼykuéra nomombaʼéi vaʼekue pe ehémplo itúva ohejáva chupekuéra. Samuel ningo michĩete guive oservi kuri Jehovápe ha siémpre ojapo hembipota (1 Sam. 12:1-5). Iporãite vaʼerãmoʼã itaʼyrakuéra, hérava Joel ha Abías osegírire iñehémplo. Péro haʼekuéra ndojapói upéva, nomombaʼéi hikuái iñerénsia ha ojapo umi mbaʼe ndogustáiva Ñandejárape. La Biblia heʼi voi hesekuéra ndoikói hague itúva oiko haguéicha. Haʼekuéra ou iñaña ha ikorrúpto, “ndojapói mbaʼeve hekópe” (elee 1 Samuel 8:1-5).

5, 6. Mbaʼépa ojapo vaʼekue rréi Josías raʼykuéra ha peteĩ iniéto?

5 Upéicha avei oiko vaʼekue rréi Josías raʼykuérare. Josías ningo oservi kuri Jehovápe ipyʼaite guive. Ojetopárõ guare pe lívro oĩha Ñandejára Léi, haʼe ohendu oĩva pype ha ensegída oñehaʼã okumpli. Ojapo vaʼekue opa ikatúva anivéma hag̃ua ojeadora umi taʼanga hetãme ni ojepraktika espiritísmo. Ha ndahaʼéi upéva añónte, omokyreʼỹ avei ipuévlope iñeʼẽrendu hag̃ua Jehovápe (2 Rey. 22:8; 23:2, 3, 12-15, 24, 25). ¡Ajépa iporãite pe erénsia espirituál ohejáva itaʼyrakuérape! Mbohapy itaʼýra ha peteĩ iniétogui oiko vaʼekue rréi, péro ni peteĩva ndohechaukái omombaʼeha upe erénsia haʼe oheja vaʼekue chupekuéra.

6 Josías raʼy hérava Jehoacaz oñepyrũ kuri ogoverna itúva rendaguépe, péro haʼe “ojapo opa mbaʼe ivaíva ñande Ruete resa renondépe”. Tres mésente ogoverna, ha upéi pe faraón Egiptogua ogueraha chupe prisionéroramo ha oreko chupe préso omano meve (2 Rey. 23:31-34, ÑÑB). Upéi iñermáno Jehoiaquim ojupi hendaguépe ha ogoverna 11 áño pukukue. Péro haʼe avei nomombaʼéi pe erénsia espirituál orresivi vaʼekue itúvagui. Jehoiaquim ojapo heta mbaʼe ivaietereíva, upévare Jeremías oprofetisa vaʼekue hese: “Vúrro reʼonguéicha hetekue oñeñotỹta” (Jer. 22:17-19). Upe rire ogoverna Josías raʼy hérava Sedequías, ha upéi iniéto Joaquín, péro ni haʼekuéra ndosegíri Josías ehémplo (2 Rey. 24:8, 9, 18, 19).

7, 8. a) ¿Mbaʼéicha rupípa Salomón operde iñerénsia espirituál? b) ¿Mbaʼépa ñaaprende umi nomombaʼéi vaʼekuégui iñerénsia espirituál?

7 Rréi Salomón orresivi vaʼekue avei heta mbaʼe porã itúva Davídgui. Michĩete guive itúva ohekomboʼe chupe Jehová rapére. Upéicha rupi haʼe ogoverna porãiterei ñepyrũrã, péro upéi ou nomombaʼevéi iñerénsia espirituál. La Biblia heʼi hese: “Salomón itujámarõ, hembirekokuéra okonvenséma chupe omombaʼeguasu hag̃ua umi ótro dióspe, ha upéicha haʼe ndoservivéima ipyʼaite guive Ñandejára Jehovápe ojapo haguéicha itúva David” (1 Rey. 11:4, NM). Upévare Jehová ndoguerohoryvéima Salomónpe.

 8 ¡Ajépa ñambyasyete koʼã kuimbaʼe ojapo vaʼekue! Haʼekuéra ningo ikatu kuri ojapo heta mbaʼe porã oñehekomboʼe haguéicha chupekuéra, ha ñambyasýramo jepe, ndoaprovechái hikuái pe oportunida. Péro la Biblia omombeʼu oĩ hague umi mitãrusu ovaloráva iñerénsia, ojapoháicha avei koʼág̃a heta kristiáno imitãva. Jahechamína umi ehémplo vívliko ikatúva osegi hikuái.

OMOMBAʼE HIKUÁI PE ERÉNSIA ORRESIVI VAʼEKUE

9. ¿Mbaʼéichapa Noé raʼykuéra omoĩ ñandéve ehémplo neporãva? (Ehecha pe taʼanga oĩva iñepyrũme.)

9 Noé raʼykuéra oheja ñandéve peteĩ ehémplo neporãva. Jehová omanda vaʼekue Noépe ojapo hag̃ua peteĩ árka ha oike hag̃ua hogayguakuérandi pype. Noé raʼykuéra ohechakuaa tekotevẽha avei iñeʼẽrendu Ñandejárape, ha upévare omoirũ hikuái itúvape okumpli hag̃ua Jehová omandáva. Mbohapyvéva oipytyvõ Noépe ojapo hag̃ua pe árka ha upéi oike hikuái pype oúrõ guare pe Ama Guasu (Gén. 7:1, 7). Génesis 7:3 omombeʼu haʼekuéra omoinge hague avei animalkuéra pe árkape “ikatu hag̃uáicha umi animál oñemoña ko yvy ape ári” (NM). Noé raʼykuéra ovalora rupi umi mbaʼe orresivi vaʼekue itúvagui, yvyporakuéra osegi oexisti. Haʼekuéra oipytyvõ avei ojeadora jey hag̃ua Jehovápe añoite pe yvy ipotĩmba rire (Gén. 8:20; 9:18, 19).

10. ¿Mbaʼéichapa umi cuatro mitãrusu evréo oĩ vaʼekue Babilóniape ohechauka omombaʼeha iñerénsia?

10 Heta tiémpo upe rire, cuatro mitãrusu evréo ohechauka avei oikuaaha mbaʼépa hína pe iñimportantevéva. Áño 617-pe a.C. ojegueraha kuri Babilóniape Ananías, Misael, Azarías ha Daniélpe. Koʼã mitãrusu ningo iporã ha iñarandu vaʼekue, ha ikatu kuri oiko umi vavilónio oikoháicha. Péro haʼekuéra ndojapói upéva. Ojekuaa hesekuéra omombaʼetereiha pe erénsia espirituál, térã pe enseñánsa orresivi vaʼekue ituvakuéragui. Jehová ovendesi koʼã cuatro mitãrusúpe osegi haguére okumpli umi mbaʼe oaprende vaʼekue chugui imitã reheve (elee Daniel 1:8, 11-15, 20).

11. ¿Mbaʼéicha rupípa oĩ vaʼekue oñevenefisiáva Jesús erénsia espirituálgui?

11 Ñandejára raʼy Jesucristo, oheja ñandéve pe ehémplo iporãvéva. Haʼe oaprende heta mbaʼe Itúvagui ha omombaʼeterei vaʼekue upe enseñánsa orresivíva. Upévare heʼi: “Amombeʼu [opa] mbaʼe pe Túva chemboʼe haguéicha” (Juan 8:28). Jesús oipota vaʼekue enterove oñevenefisia umi mbaʼe haʼe oaprende vaʼekuégui. Peteĩ jey heʼi umi héntepe: “Aha vaʼerã ótro siudápe amombeʼu hag̃ua umi marandu porã oñeʼẽva Ñandejára Rréinore. Upearã ningo añembou vaʼekue” (Luc. 4:18, 43). Jesús oipytyvõ heta persónape ohechakuaa hag̃ua naiporãiha ojeheʼa “ko múndore”, pórke umi hénte ndovalorái umi mbaʼe oúva Jehovágui (Juan 15:19).

¿REVALORÁPA UMI MBAʼE RERRESIVÍVA?

12. a) ¿Mbaʼépepa ojojogua Timoteo ha heta mitãrusu ha mitãkuña koʼag̃agua? b) ¿Mbaʼépa iporã oñeporandu umi kristiáno imitãva?

12 Ikatu oime nde tuvakuéra avei nemboʼe raʼe nemitã guive reikuaa hag̃ua Jehovápe, jahecha haguéicha umi ehémplope. Timoteo upéicha vaʼekue avei (elee 2 Timoteo 3:14-17). La Biblia omombeʼu haʼe ‘oaprende’ hague imitã guive pe añetegua Ñandejáragui, ha mbaʼépa ojapo vaʼerã Jehová oguerohory hag̃ua chupe. Nde tuvakuéra ojapóramo avei upéicha, jaʼekuaa nemoaranduha hína “rejesalva hag̃ua rejerovia rupi Cristo Jesús rehe” ha nepytyvõha ‘ndekatupyry hag̃ua’ Ñandejára servísiope. Péro, ¿rehechaukápa hína remombaʼeha koʼã enseñánsa rerresivíva? Eñeporandumína: “¿Mbaʼéichapa añeñandu aime  haguére Jehová siervokuéra apytépe chemitã guive? ¿Avyʼápa Jehová cheporavo haguére avei iñamigorã? ¿Ahechakuaápa arekoha peteĩ priviléhio ijojahaʼỹva aikuaa haguére pe añetegua?”.

¿Revyʼápa reime haguére Jehová siervokuéra apytépe? (Ehecha párrafo 9, 10 ha 12)

13, 14. ¿Mbaʼépa otantease jepi umi mitãrusu kristiáno, ha mbaʼérepa jaʼekuaa ivyroitereitaha ojapóramo hikuái upéva? Emoĩ peteĩ ehémplo.

13 Sapyʼánte heta mitãrusu ha mitãkuña oikuaáva Jehovápe imitã guive ndohechakuaái orekoha peteĩ priviléhio ijojahaʼỹva oĩ haguére Jehová siervokuéra apytépe, ha otantease ko múndo oĩva Satanás poguýpe. Epensamína: ¿Ndépa rejepoíne rrútape peteĩ áuto renondépe reikuaa hag̃ua upéva ndegolpea vaitaha, térã ikatuha voi ndejuka? Ajépa natekotevẽiete rejapo upéva. Upéicha avei natekotevẽi ‘rejapo umi mbaʼe ivaietéva’ ojejapóva ko múndope reikuaa hag̃ua mbaʼeichaitépa resufríta (1 Ped. 4:4).

14 Gener, oikóva Ásiape, okakuaa vaʼekue peteĩ família kristiánape ha ojevautisa orekórõ guare 12 áño. Upéi, tuichavévo ohóvo oñepyrũma ogusta chupe ko múndo. Haʼe heʼi: “Che ningo atantease vaʼekue pe liverta guaʼu oikuaveʼẽva ko múndo”. Gener orekórõ guare 15 áño oñepyrũma ojapo heta mbaʼe vai ñemihãme. Oikóma umi isósio mundopegua oikoháicha, ikaʼu ha ijurutieʼỹ haʼekuéraicha. Gener pyʼỹinte og̃uahẽ tárde hógape opytágui ohuga videohuégo violénto isosiokuérandi. Tiémpo rire ohechakuaa umi mbaʼe oofreséva ko múndo ndovaleiha mbaʼeverã ha nombovyʼaiha chupe. Upéi Gener oñemoag̃ui jey pe kongregasiónre, ha heʼi: “Sapyʼánte ijetuʼu gueteri chéve ambohovái hag̃ua umi tentasión, péro apensávo umi mbaʼe ahupytývare Jehovágui, ahechakuaa nañehaʼãreiriha”.

15. ¿Mbaʼérepa iporã avei opensa umi mitãrusu térã mitãkuña ndoikuaái vaʼekue Jehovápe michĩ guive?

15 Péro oĩ avei kongregasiónpe heta mitãrusu ha mitãkuña ituvakuéra ndahaʼéiva Testígo. Oiméramo nde upeichagua, remombaʼe vaʼerã pe priviléhio erekóva ikatu haguére reikuaa ha reservi ñande Apoharépe. ¡Ajépa imbaʼeporãite Jehová ñanemoag̃uívo ijehe ha oikuaauka ñandéve pe añetegua oĩva la Bíbliape! Upéva ningo tuicha vendisión (Juan 6:44, 45). Hetaiterei persóna oĩva ko múndope ndorekói upe priviléhio. Epensamíntena, ñane tiémpope 1.000 persóna apytégui, peteĩnte oikuaa pe añetegua Ñandejáragui, ha nde reime umíva apytépe. Ajépa javyʼaite jaikuaa haguére  Jehovápe, tahaʼe ñanemitã guive ñande tuvakuéra ñanemboʼe rupi, térã ambue hendáicha (elee 1 Corintios 2:12). Gener heʼi: “Chepirĩmba apensávo pe priviléhio arekóvare. ¿Máva piko che amerese hag̃ua areko Jehovápe che amígoramo? Haʼe ningo pe tuichavéva ko univérsope” (Sal. 8:4). Peteĩ ermána heʼi avei: “Peteĩ alúmno ningo ovyʼaiterei iprofesór oguerohorýramo chupe. Ñande katu jareko pe priviléhio ñandeguerohorývo Jehová, pe Mboʼehára Iñaranduvéva”.

¿MBAʼÉPA REJAPÓTA?

16. ¿Mbaʼéichapa umi mitãrusu ohechaukáta iñaranduha?

16 Nde ningo rerresivi peteĩ erénsia ijojahaʼỹva, ¿mbaʼére piko nderejedesidíri reservi Jehovápe nde pyʼaite guive? Rejapóramo upéicha rehechaukáta nearanduha ha reiméta Jehová siervokuéra apytépe. Ivyroiterei ningo umi mitãrusu ojapónteva hapichakuéra ojapóva, haʼete hikuái oikóva ikéra ha oho pe tape oguerahávape ñehundípe (2 Cor. 4:3, 4).

17-19. ¿Mbaʼépa nepytyvõta ani hag̃ua reñeñandu vai nediferénte haguére?

17 Jaikuaaháicha, enterovépe ijetuʼu sapyʼánte idiferénte hag̃ua hapichakuéragui. Upéicharõ jepe, nearanduve hína nediferénteramo. Por ehémplo, epensamína peteĩ atléta opartisipávare peteĩ Olimpiádape. Haʼe ningo idiferénte rupi umi ótro ikompañérogui og̃uahẽ upépe. Omboyke vaʼekue heta mbaʼe ogustáva chupe ikatu hag̃uáicha itiempove oñentrena hag̃ua. Idiferénte rupi hapichakuéragui, oñentrenave ha ohupyty iméta.

18 Heta hénte nopensái mbaʼépepa ogueraháta chupekuéra umi mbaʼe vai ojapóva. Péro nde repensáramo ne renonderãre, reñehaʼãta nediferénte chuguikuéra. Reñehaʼãta nderekopotĩ, rejehekýita umi mbaʼe ikatúvagui nemoĩ vai Jehová renondépe, ha rehupytýta ‘pe jeikove añeteguáva’ (1 Tim. 6:19). Pe ermána ñanemanduʼáma hague, heʼi avei: “Redefendéramo umi mbaʼe regueroviáva, katuete reñeñandu porãta og̃uahẽvo huʼãme káda día. Rehechaukáta Satanás múndo ndaipuʼakaiha nderehe. Ha iporãveha katu, reñandúta Jehová ndeguerohory ha nevendesiha. Péicha jave reñeñandu porãitereíta nediferénte haguére”.

19 Aníkena reperde rei ne tiémpo rehupyty hag̃ua umi mbaʼe ko múndo oikuaveʼẽvante (Ecl. 9:2, 10). Nde ningo reikuaa porã maʼerãpa Jehová ñandeapo vaʼekue ha avei erekoha oportunida reikove hag̃ua opa ára g̃uarã. Upévare, aníkena reiko “umi hénte ko mundopegua oikoháicha”. Redesidi porãramo, rehupytýta heta mbaʼe porã ha revyʼáta (Efes. 4:17; Mal. 3:18).

20, 21. a) ¿Maʼerãpa jajeprepara hína jadesidi porãramo koʼág̃a? b) ¿Mbaʼépa Jehová ohaʼarõ ñandehegui?

20 Jadesidi porãramo, koʼág̃ama voi jaikóta vyʼápe ha jajepreparátama jaiko hag̃ua opa ára g̃uarã pe múndo pyahúpe. Ndaikatúi ni ñañeimahinamba umi mbaʼe porãita Jehová omeʼẽtava ñandéve (Mat. 5:5; 19:29; 25:34). Péro koʼã vendisión ndohupytymoʼãi oimeraẽvante, síno umi iñeʼẽrendúva Jehovápe añoite (elee 1 Juan 5:3, 4). Jahechaháicha, jaservíramo Jehovápe ñande pyʼaite guive jahupytýta heta mbaʼe porã.

21 Epensamíntena umi mbaʼe porã jarresivívare koʼág̃ama voi: jaikuaa porã Ñandejára Ñeʼẽ, jaikuaa mávapa haʼe ha mbaʼépa hembipota. Jareko pe priviléhio ñarrepresentávo chupe ha jaiko Itestígoramo. Avei Jehová oasegura ñandéve oĩha ñande ykére (Sal. 118:7). Ñañehaʼãkena enterovete, tahaʼe mitã ha kakuaa, jahechauka hag̃ua ñamombaʼeha ñane erénsia espirituál ha ñambotuichaseha Jehovápe “opa ára g̃uarã” (Rom. 11:33-36; Sal. 33:12).

^ párr. 2 Pe erénsia espirituálpe oike hína umi mbaʼe ñaaprendéva Jehovágui, jaiko Itestígo ha iñamígoramo, ha jaikuaa porã Iñeʼẽ. Avei oike umi ehémplo omoĩva ñandéve ñande tuvakuéra ha ambue Ñandejára siérvo yma guare.