Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Ñemañaha (ojestudiáva)  |  Diciembre de 2014

Ñaimékena unído jajesalva hag̃ua

Ñaimékena unído jajesalva hag̃ua

“Enterove ñande [...] peteĩnte ha [ñaime unído].” (EFES. 4:25)

1, 2. ¿Mbaʼéichapa Jehová oipota omombaʼeguasu chupe umi imitãva, ijedáva ha opa tetãygua?

OIMÉRAMO nde peteĩ mitãrusu térã mitãkuña reservíva Jehovápe, aníkena nderesarái ndevaliosoitereiha iñorganisasiónpe g̃uarã. Heta paíspe káda áño ojevautisa hetaiterei persóna imitãva. ¡Ajépa javyʼaite jahechávo mbaʼéichapa heta mitãrusu ha mitãkuña odesidi oservi Jehovápe!

2 Entéro imitãva ovyʼa oĩ jave hapichakuérandi. Ha jaikuaaháicha, igústonte voi ñakomparti umi ñande aveguándi. Péro Jehová oipota enterovetéva ñamombaʼeguasu chupe oñondivepa, tahaʼe imitãva, ijedáva ha opa tetãygua orekóva diferénte kostúmbre. Apóstol Pablo heʼi vaʼekue Ñandejára oipotaha “opaichagua tapicha ojesalva ha oikuaa porã pe añetegua” (1 Tim. 2:3, 4). Apocalipsis 7:9-pe omombeʼu umi oadoráva Jehovápe ouha “opa tetã, trívu ha puévlogui ha [oñeʼẽha] opaichagua idióma”.

3, 4. a) ¿Mbaʼéichapa opensa heta mitãrusu ha mitãkuña koʼag̃agua? b) Ohechaukaháicha Efesios 4:25, ¿mbaʼéichapa jaiko vaʼerã ñane ermanokuéra ndive?

3 Ajépa idiferentete umi mitãrusu ha mitãkuña oadoráva  Jehovápe ha umi nahániriva. Umi ndoservíriva Jehovápe oiko iñakãre ha opensa ijehénte. Umi oinvestigáva ko téma heʼi voi umi mitãrusu koʼag̃agua ijegoistaveha. Oñeʼẽ ha oñemonde lájare ohechauka hikuái ndorrespetaiha umi ijedavévape ha heʼi voi hesekuéra oĩha fuéra de móda.

4 Peichaite ningo jahecha ojeikoha ko múndope. Upévare, umi mitãrusu ha mitãkuña oservíva Jehovápe oñehaʼã mbarete vaʼerã ani hag̃ua ova hesekuéra hapichakuéra lája. Síglo primérope jepe Pablo ohecha kuri tekotevẽha oakonseha umi kristiánope ojekuida hag̃ua “pe espíritu [omomýivagui] umi hénte naiñeʼẽrendúivape”, pórke haʼekuéra oiko kuri péicha “peteĩ tiémpope” (elee Efesios 2:1-3). Javyʼaite ningo umi imitãva nopensái haguére ko múndope oñepensaháicha, upéva rangue ombaʼapo kyreʼỹ hikuái umi ermánondi kongregasiónpe. Oiko lájare ohechauka hikuái ontende porãha ‘enterove ñande haʼeha peteĩnte ha ñaimeha unído’ (Efes. 4:25). Og̃uahẽmbotávo huʼãme koʼã ára paha, koʼýte ñañemoag̃ui vaʼerã ñane ermanokuérare. La Bíbliape oĩ ehémplo ohechaukáva mbaʼeichaitépa iñimportánte ñaime unído ñane ermanokuérandi. Jahechamína umíva.

OĨ HIKUÁI UNÍDO

5, 6. ¿Mbaʼéicha rupípa Lot ha itajyrakuéra ojesalva, ha mbaʼépa ñaaprende chuguikuéra?

5 Ymaite guive, Jehová oprotehe isiervokuérape oñopytyvõramo hikuái ohasa jave umi mbaʼe ijetuʼúva. Ñane tiémpope, entéro jaservíva Jehovápe ikatu ñaaprende umi ehémplo oĩvagui la Bíbliape. Jahechamína ñepyrũrã Lot ehémplo.

6 Ojedestruítarõ guare Sodoma, pe siuda Lot ha ifamília oikoha, mokõi ánhel oavisa chupe osẽ hag̃ua upégui ha oho hag̃ua umi montáñare. Haʼekuéra oĩ kuri peteĩ situasión ipeligrósovape, upévare umi ánhel heʼi chupekuéra: “¡Pyaʼéke pesẽ koʼágui pejesalvaséramo!” (Gén. 19:12-22, NM). Lot ha umi mokõi itajýra iñeʼẽrendu ha osẽ upe siudágui. Péro Lot heʼírõ guare umi kuimbaʼe omendátavape itajyrakuérandi osẽ hag̃ua avei upégui, haʼekuéra ‘oimoʼã Lot heʼi guaʼunteha’. Ha nopenáigui hikuái Lot rehe, omano avei pe siuda oñehundírõ guare (Gén. 19:14). Lot ha itajyrakuéra añoite ojesalva oĩ rupi unído.

7. ¿Mbaʼéichapa Jehová oipytyvõ umi osẽ vaʼekuépe Egíptogui?

7 Jahechamína ótro ehémplo. Umi isrraelíta osẽrõ guare Egíptogui, osẽ vaʼekue oñondivepa, ndahaʼéi káda uno ohóva ohoseha gotyonte. Moisés ‘oipysórõ guare ipo pe mar Rojo ári’, Jehová oavri chupekuéra tape, ha Moisés ohasa enterovete umi isrraelíta ndive, ndahaʼéi haʼeñónte térã peteĩ grupoʼi ndive. Jahechaháicha, Jehová oprotehe ha osalva pe puévlo kompletoitépe (Éx. 14:21, 22, 29, 30, NM). Enterove oĩ unído, ha ijapytepekuéra oĩ umi “extranhéro” osẽ vaʼekue hendivekuéra Egíptogui (Éx. 12:38, NM). Ni nañapensái ningo oĩne hague peteĩ grupoʼi, por ehémplo unos kuánto mitãrusu ojeseparáva chuguikuéra ha ohóva ótro tapére openságui upérupi iporãvetaha. ¡Ajépa ivyroite vaʼerãmoʼã oĩrire ojapóva upéva! Jehová ndoprotehemoʼãi kuri umichaguápe (1 Cor. 10:1).

8. ¿Mbaʼéichapa Ñandejára puévlo ohechauka vaʼekue oĩha unído rréi Jehosafat tiémpope?

8 Rréi Jehosafat tiémpope, Jehová puévlo ojecha peteĩ situasión ijetuʼúvape. Unos kuánto tetã oforma peteĩ ehérsito ipoderósova ha ou oataka hag̃uáicha chupekuéra, ha hiʼarive “hetaiterei” voi hikuái (2 Crón. 20:1, 2, ÑÑB). ¿Mbaʼépa ojapo Ñandejára siervokuéra? Oñemoĩ rangue oñorairõ pe ehérsito kóntrape, ojerovia hikuái Jehováre (elee 2 Crónicas 20:3, 4). Haʼekuéra  noñehaʼãi osolusiona pe provléma ijehegui reínte, térã káda uno oikuaaháichante. La Biblia omombeʼu “opa Judagua oñemboʼy [hague] Jehová renondépe ha oĩ hendivekuéra umi hembireko ha ifamiliakuéra, umi michĩvéva jepe” (2 Crón. 20:13, NM). Enterove umi mitã ha kakuaa oĩ unído, iñeʼẽrendu ha ojerovia Jehováre. Upéicha rupi haʼe oprotehe chupekuéra iñenemigokuéragui (2 Crón. 20:20-27). Ko ehémplo ohechauka Ñandejára puévlo oĩ vaʼerãha unído ogueropuʼaka hag̃ua umi pruéva.

9. ¿Mbaʼépa ñaaprende umi kristiáno síglo primérope guare ehémplogui?

9 Síglo primérope, umi kristiáno avei ohechauka vaʼekue oĩha unído. Por ehémplo, heta hudío ha extranhérogui oikórõ guare kristiáno, “haʼekuéra ojesareko meme umi apóstol omboʼévare, okomparti oñondive opa mbaʼe, okaru oñondivepa ha oñemboʼe meme hikuái” (Hech. 2:42). Upéi oñepyrũrõ guare ojepersegi umi kristiánope, koʼýte ojekuaa oĩha hikuái unído ha oñangarekoha ojuehe (Hech. 4:23, 24). ¿Mbaʼépa ñaaprende ko ehémplogui? Tekotevẽha ñaime unído jahasa jave umi mbaʼe ijetuʼúva.

ÑAIMÉKENA UNÍDO, KOʼÝTE HIʼAG̃UIVÉVO JEHOVÁ ÁRA GUASU

10. ¿Arakaʼépa tekotevẽvétantema ñaime unído?

10 Koʼẽrõitéma yvyporakuéra ombohováita peteĩ tiémpo ijetuʼuetereíva. Proféta Joel heʼi vaʼekue: “Upe ára upévape iñypytũ ha ijaraipa” (Joel 2:1, 2, ÑÑB; Sof. 1:14). Upérõ koʼytevéntema Jehová puévlo oĩ vaʼerã unído. Ñanemanduʼákena Jesús heʼi vaʼekuére: “Peteĩ goviérno hoʼáta umi hénte oiko vaipáramo oñondive” (Mat. 12:25).

11. ¿Mbaʼépa ñanemboʼe Salmo 122:3, 4? (Ehecha pe taʼanga oĩva iñepyrũme.)

11 Koʼẽrõite, oñepyrũvo pe jehasa asy guasu, iñimportantetereíta ñaime unído ñane ermanokuéra ndive. Yma ningo Jerusalénpe umi óga oñemopuʼã vaʼekue ojoykerepaite. Upévare pe salmísta heʼi kuri ‘Jerusalénpe umi óga oĩmbaha unído’. Upéicha rupi umi hénte oñopytyvõ vaʼekue ha oñangareko ojuehe. Oime vaʼerã pe salmísta opensávo umi óga oĩvare ojoykére imanduʼa “Jehová puévlo” oĩha unído espirituálmente oñembyaty jave oadora hag̃ua Ñandejárape (elee Salmo 122:3, 4). Péicha avei tekotevẽterei ñaimemba unído, tahaʼe koʼág̃a térã og̃uahẽ vove umi tiémpo ijetuʼuetéva.

12. ¿Mbaʼépa ñanepytyvõta jajesalva hag̃ua ojeataka vove Ñandejára puévlope?

12 ¿Mbaʼérepa iñimportantetéta ñaime unído og̃uahẽ vove umi tiémpo ijetuʼuetéva? Ezequiel kapítulo 38 heʼi “Gog, Magog retãygua” oatakataha Ñandejára puévlo. Oiko vove upéva ndajahejái vaʼerã mbaʼeve ñanemomombyry ojuehegui. Ani ñapensa Satanás múndo ñandeprotehetaha. Upe tiémpope koʼýte ñaime vaʼerã unído ñane ermanokuérandi. Añetehápe ningo ndahaʼéi ñaime haguérente peteĩ grúpope jajesalvátamava. Káda uno jahechauka vaʼerã ñaneñeʼẽrenduha Jehovápe ha jajeroviaha hese. Umi ombotuicháva Jehová réra añoite ojesalváta (Joel 2:32; Mat. 28:20). ¿Mbaʼépa oikóta umi ohejávagui Ñandejára puévlo ha odesidíva oho ohoseha gotyonte? ¿Ojesalváta piko umíva? (Miq. 2:12.)

13. ¿Mbaʼépa ikatu oaprende mitãrusukuéra umi mbaʼe jahecha vaʼekuégui koʼa peve?

13 Mitãrusu ha mitãkuñanguéra, ¿pehechakuaápa ipeligrosoha peñemohaʼeño, ojapoháicha jepi heta persóna? Koʼẽrõitéma og̃uahẽta pe tiémpo ijetuʼuvéva ha upe moméntope, tahaʼe imitãva térã ijedáva oikotevẽtereíta ojuehe. Upévare koʼág̃ama ñaaprende vaʼerã jaservi Jehovápe oñondivepa ikatu hag̃uáicha ñaime unído.  Upe unida katuete ñanepytyvõta jajesalva hag̃ua.

ENTEROVE ÑANDE PETEĨNTE HA ÑAIME UNÍDO

14, 15. a) ¿Maʼerãpa Jehová ñandeprepara? b) ¿Mbaʼe konséhopa Jehová omeʼẽ ñandéve ikatu hag̃uáicha ñaime unído?

14 Jehová ñanepytyvõ jaservi hag̃ua chupe “peteĩ ñeʼẽme” (Sof. 3:8, 9, ÑÑB). Koʼág̃a Jehová ñandeprepara hína pe múndo pyahúpe g̃uarã. Upérõ haʼe “ombyatypa [jeýta] opa mbaʼe [...] Cristo poguýpe” (elee Efesios 1:9, 10). Ñandejára ounise jey ifamiliakuéra yvagagua ha ko yvy arigua ikatu hag̃uáicha oadora chupe oñondivepa peteĩ ñeʼẽme, ha katuete okumplíta upéva. Mitãrusu ha mitãkuña, ¿pehechakuaápa iñimportanteha peime unído Ñandejára organisasión ndive?

15 Koʼág̃a guivéma Jehová ñanemboʼe ñaime hag̃ua unído ikatu hag̃uáicha jajepokuaa upéicha opa ára g̃uarã. Upévare la Biblia heta hendápe heʼi tekotevẽha ñañangareko ojuehe. Por ehémplo jajuhu umi téxto heʼíva: “Pejoayhúkena pende pyʼaite guive”, “pesegíkena peñokonsola”, ha “pesegíkena [...] peñomombarete” (1 Cor. 12:25; Rom. 12:10; 1 Tes. 4:18; 5:11). Jehová oikuaa ñaneimperfektoha ha upéicha rupi sapyʼánte hasy ñandéve ñaime hag̃ua peteĩ ñeʼẽme. Upévare heʼi ñandéve: “Peñoperdona pende pyʼaite guive” (Efes. 4:32).

16, 17. a) ¿Mbaʼéichapa ñanepytyvõ umi rreunión? b) ¿Mbaʼépa ikatu oaprende Jesúsgui umi imitãva?

16 Jehová ñanepytyvõ avei umi rreunión rupive ikatu hag̃uáicha ñaneunído. Hebreos 10:24, 25 ñanemomanduʼa umi rreunión ñanepytyvõha “japorohayhu ha jajapo hag̃ua iporãva”. Péro ndahaʼéi upearãnte. Umi rreunión rupive ikatu ñañomokyreʼỹ, “koʼýte koʼág̃a jahechávo pe ára hiʼag̃uimbaitemaha”.

17 Jesús ningo oñerreuni vaʼekue Ñandejára puévlondi. Chupe g̃uarã iñimportanteterei upéva. Péicha oheja ñandéve peteĩ ehémplo neporãva. Orekórõ guare 12 áño oho isy ha itúvandi peteĩ rreunión tuichávape pe témplope. Upéi oukuévo hikuái, ituvakuéra ndohechavéi sapyʼa chupe, péro ndahaʼéi oho haguére hapichakuérandi upérupi. Jesús oĩ kuri umi mboʼehára templopegua ndive ha oñemongeta hendivekuéra Ñandejára Ñeʼẽre (Luc. 2:45-47).

18. ¿Mbaʼéichapa umi orasión ñanepytyvõ ñaneunidove hag̃ua?

 18 Jahecháma haguéicha, ikatu hag̃uáicha ñaneunidove tekotevẽ japorohayhu ha jaha meme rreunionhápe. Péro ikatu avei ñañemboʼe ñane ermanokuérare ha jajerure Jehovápe toipytyvõ chupekuéra oikotevẽhapete. Upéicha jahechauka ñañeinteresaha hesekuéra. Enterovéva ikatu jajapo koʼãichagua orasión, tahaʼe imitãva ha ijedáva. Oiméramo nemitã gueteri, ¿eaprovechapaitépa hína koʼã oportunida ikatu hag̃uáicha reñeunive umi ermánondi? Rejapóramo upéva, rejesalváta ág̃a Satanás múndo aña oñehundi vove.

Enterove ñañemboʼe vaʼerã ñane ermanokuérare (Ehecha párrafo 18)

JAHECHAUKÁKENA ÑAIMEHA UNÍDO

19-21. a) ¿Mbaʼéicha javépa ojekuaa porãvéntema Jehová siervokuéra oĩha unído? Emoĩ ehémplo. b) ¿Mbaʼépa ojapo umi ermáno oiko jave desástre naturál, ha mbaʼépa ñaaprende chuguikuéra?

19 Ñane tiémpope avei Jehová siervokuéra oĩ unído, ohechaukaháicha Romanos 12:5. Por ehémplo, upéva ojekuaa porã oiko jave umi desástre naturál. Diciembre de 2011-pe oiko peteĩ inundasión tuicháva ísla Mindanáope (Filipinas). Peteĩ pyharépente pe y ojagarrapa mas de 40 mil óga, umíva apytépe heta ñane ermáno róga. Pe sukursál omombeʼu: “Umi komite de sokórro oñepyrũ mboyve ombaʼapo, umi ermáno ótra sonagua omboúma chupekuéra heta ajúda”.

20 Japónpe oikórõ guare pe terremóto ha upéi pe sunámi, heta ermáno ojeperhudika vai. Oĩ umi opytáva ipo iñakã ári. Por ehémplo peteĩ ermána hérava Yoshiko, oikóva 40 kilómetro pe Salón del Réinogui, operde hóga. Haʼe omombeʼu: “Roñesorprende roikuaávo al ótro día pe superintendénte de sirkuíto ha ótro ermáno ou hague orereka”. Upéi Yoshiko opukavy ha heʼi: “Pe kongregasión ningo oñangareko porãiterei orerehe ani hag̃ua orekangy espirituálmente, ha romombaʼeterei upéva. Hiʼarive omeʼẽ hikuái oréve ao, sapatu, kartéra ha pijáma”. Peteĩ ermáno ombaʼapóva pe komite de sokórrope, omombeʼu: “Entéro ermáno upe paispegua oĩ unído ha oñopytyvõ joa hikuái. Upéi ou avei heta Testígo Estados Unídosgui oipytyvõ hag̃ua chupekuéra. Roporandúrõ guare koʼã ermánope mbaʼérepa ou hikuái mombyryetégui, haʼekuéra heʼi: ‘Rohayhu ningo ore ermanokuéra Japonguápe ha roikuaa oikotevẽha hikuái ajúda’”. ¡Ajépa javyʼaite ñaime haguére peteĩ organisasión enterove oñeinteresahápe ojuehe! Ha oime vaʼerã Jehová ovyʼaiterei avei ohechávo pe unida oĩva ipuévlope.

21 Koʼág̃ama voi ñaiméramo unído, ñanepytyvõta jagueropuʼaka hag̃ua umi pruéva oúva guive, ndaikatúiramo jepe ñañekomunika umi ermáno ótro paisgua ndive. Avei ñaiméramo unído jajepreparáma hína ñambohovái hag̃ua umi mbaʼe ijetuʼuetéva oikótava pe múndo aña oñehundi vove. Peteĩ ermána Japongua hérava Fumiko ojesalva kuri oúrõ guare peteĩ urakán. Haʼe heʼi: “Pe fin hiʼag̃uimbaitéma. Péro jasegi vaʼerã ñaipytyvõ ñane ermanokuérape og̃uahẽ meve pe tiémpo ndaiporimoʼãveimahápe desástre naturál”.

22. ¿Mbaʼépa jahupytýta ñaiméramo unído Jehová puévlondi?

22 Enterove ñañehaʼãva jaiko unído, tahaʼe imitãva ha ijedáva, jajepreparáma hína jajesalva hag̃ua ág̃a oñehundi vove ko múndo aña oĩva dividído. Jehová katuete osalváta ipuévlope, ojapóma haguéicha yma (Is. 52:9, 10). Katuete ningo jajesalváta jajapóramo opa ikatúva ñaime hag̃ua unído Ñandejára puévlo ndive. Péro tekotevẽ avei jahechauka javaloraitereiha umi mbaʼe jarresivi vaʼekue. Pe artíkulo oúvape ñahesaʼỹijóta upéva.