Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Ñemañaha (ojestudiáva)  |  Octubre de 2014

Ñamombaʼékena ikatu haguére ñambaʼapo Jehová ndive

Ñamombaʼékena ikatu haguére ñambaʼapo Jehová ndive

“Ñande ningo Ñandejára ajudánte.” (1 COR. 3:9)

1. a) ¿Mbaʼéichapa Jehová ojapo itraváho? b) ¿Mbaʼeichagua traváhopa Jehová omeʼẽ umi ánhel ha yvyporakuérape?

JEHOVÁ siémpre vyʼápe ojapo itraváho (Sal. 135:6; Juan 5:17). Ha oipota avei umi ánhel ha yvyporakuéra oñeñandu upéicha, upévare omeʼẽ enterovépe umi traváho oporomoñeñandu porãva. Por ehémplo, oheja vaʼekue Itaʼýrape oipytyvõ chupe okrea hag̃ua opa mbaʼe (elee Colosenses 1:15, 16). La Biblia omombeʼu Jesús ou mboyve ko yvy ape ári, oĩ hague yvágape Itúva ykére ha haʼe hague pe ‘pytyvõhára katupyry’ (Prov. 8:30, NM).

2. ¿Mbaʼéichapa jaikuaa Jehová ymaite guive omeʼẽ hague hembiaporã umi ánhelpe?

2 La Biblia ohechauka Jehová ymaite guive omeʼẽ hague hembiaporã umi ánhelpe. Por ehémplo, Adán ha Eva opekárõ guare, Jehová omosẽ chupekuéra pe hardín de Edéngui ha “omoĩ pe entrádape umi keruvín ha peteĩ espáda hendy ha ojeréva kontinuadoite, omboty hag̃ua pe tape ohóva pe yvyramáta oporomoingovévape” (Gén. 3:24, NM). Ha Apocalipsis 22:6 heʼi Jehová “ombou [hague] hiʼánhel ohechauka hag̃ua hembiguaikuérape umi mbaʼe oikótava koʼẽrõite”.

 JEHOVÁ OMEʼẼ YVYPORAKUÉRAPE HEMBIAPORÃ

3. ¿Mbaʼéichapa Jesús osegi Itúva ehémplo oĩ aja ko yvy ape ári?

3 Jesús oĩrõ guare ko yvy ape ári, vyʼápe ojapo pe traváho Itúva omeʼẽ vaʼekue chupe. Haʼe osegi Jehová ehémplo ha omeʼẽ avei umi disípulope peteĩ traváho iñimportantetereíva. Omokyreʼỹ hag̃ua isegidorkuérape, heʼi chupekuéra umi mbaʼe porãita ohupytýtava: “Pe ojeroviáva cherehe ojapóta avei umi mbaʼe che ajapóva, ha ojapóta tembiapo tuichavéva koʼãvagui, che aháma rupi hína che Túva rendápe” (Juan 14:12). Ha ohechauka hag̃ua chupekuéra omotenonde vaʼerãha upe tembiapo, heʼi: “Arakuépe jajapo vaʼerã upe chembou vaʼekue rembiapo; cháke ág̃a pyhare vove, avavéma ndaikatúi ombaʼapo” (Juan 9:4).

4-6. a) ¿Mbaʼérepa javyʼa Noé ojapo haguére Jehová omanda hagueichaite chupe? b) ¿Mbaʼéichapa ñañevenefisia Moisés osegi haguére palávra por palávra Jehová heʼíva? c) ¿Mbaʼépa ojehupyty umi tembiapo Jehová omeʼẽva rupive isiervokuérape?

4 Jesús ou mboyve ko yvy ape ári, Ñandejára omeʼẽma vaʼekue voi yvyporakuérape umi traváho ombovyʼátava chupekuéra. Jaikuaaháicha, Adán ha Eva ndojapói kuri pe tembiapo Jehová onkargáva chupekuéra. Upéicharõ jepe, oĩ vaʼekue heta persóna iñeʼẽrendúva ha ojapóva Ñandejára heʼíva (Gén. 1:28). Por ehémplo Noé. Ñandejára omanda vaʼekue chupe ojapo hag̃ua peteĩ árka, ikatu hag̃uáicha haʼe ha ifamiliakuéra ojesalva ou vove pe dilúvio. Ha Noé ojapo rupi Jehová heʼihaichaite, koʼág̃a ñande ñaime avei koʼápe (Gén. 6:14-16, 22; 2 Ped. 2:5).

5 Moisés avei ojapo vaʼekue opa mbaʼe Jehová heʼi hagueichaite chupe, por ehémplo omopuʼãrõ guare pe tavernákulo ha oorganisa pe saserdósio (Éx. 39:32; 40:12-16). ¿Mbaʼéichapa ñande ñañevenefisia Moisés osegi haguére palávra por palávra Jehová heʼíva chupe? Heʼi haguéicha apóstol Pablo, pe tavernákulo ha pe saserdósio ohechauka “umi mbaʼe porã oútava” (Heb. 9:1-5, 9; 10:1).

6 Oñekumplívo ohóvo Jehová rembipota, okambia avei heta tembiapo haʼe omeʼẽva isiervokuérape. Péro umi mbaʼe ojejapóva katuete omombaʼeguasu Jehovápe ha ou porã opavave yvypóra iñeʼẽrendúvape. Por ehémplo, opa mbaʼe Jesús ojapo vaʼekue yvágape ha oúrõ guare ko yvy ape ári, ombotuicha Jehovápe ha ovenefisia yvyporakuérape (Juan 4:34; 17:4). Ñane tiémpope avei, pe tembiapo Jehová onkargáva ñandéve ombotuicha chupe (Mat. 5:16; elee 1 Corintios 15:58). ¿Mbaʼérepa jaʼe upéva?

ÑAMOMBAʼÉKENA UMI TEMBIAPO JEHOVÁ OMEʼẼVA ÑANDÉVE

7, 8. a) ¿Mbaʼe priviléhiopa oreko kristianokuéra? b) ¿Mbaʼépa jajapo vaʼerã oĩ jave kámbio Jehová organisasiónpe?

7 ¡Ajépa javyʼaite Jehová oheja haguére ñaipytyvõ chupe hembiapópe ñane imperféktoramo jepe! (1 Cor. 3:9.) Umi ermáno oipytyvõva oñemopuʼã hag̃ua Salón de Asamblea, Salón del Reino ha umi sukursál, opartisipa peteĩ traváho ojoguáva Noé ha Moisés ojapo vaʼekuépe. Ikatu oime nde reipytyvõ hína oñemyatyrõ hag̃ua Salón del Reino, térã oñemopuʼã hag̃ua pe Séde Mundiál, Warwick, Nueva Yórkpe (ehecha pe taʼanga oĩva iñepyrũme ohechaukáva mbaʼéichatapa pe Séde Mundiál oñetermina rire). Oimérõ upéicha, emombaʼékena upe traváho rejapóva Jehovápe g̃uarã. ¡Añetehápe upéva peteĩ priviléhio ijojahaʼỹva! Péro oĩ ótro traváho iñimportantetereíva avei ha enterove kristiánope oñeinvita opartisipa hag̃ua. ¿Mbaʼépa hína upéva? Pe predikasión. Upe tembiapo ningo omombaʼeguasu Jehovápe ha ovenefisia entéro iñeʼẽrendúvape (Hech. 13:47-49). Jehová organisasión ñandegia jajapo  porã hag̃ua ko tembiapo. Upéicha rupi sapyʼánte ikatu jarresivi ótro traváho jajapo hag̃ua iñorganisasiónpe.

8 Umi kristiáno iñeʼẽrendúva siémpre ojapo vyʼápe Jehová organisasión heʼíva (elee Hebreos 13:7, 17). Ikatu sapyʼánte nañantendepái mbaʼérepa okambia peteĩ mbaʼe, péro jaikuaa porã jajapóramo opa mbaʼe Jehová ojerurehaichaite, katuete oho porãtaha ñandéve.

9. ¿Mbaʼéichapa ansianokuéra omoĩ ehémplo kongregasiónpe?

9 Umi ansiáno omoĩ ehémplo kongregasiónpe oñehaʼãvo ojapo opa mbaʼe Jehová heʼihaichaite chupekuéra (2 Cor. 1:24; 1 Tes. 5:12, 13). Koʼã ermáno ombaʼapo pohýi ha oĩ okambia hag̃uáicha tekotevẽhápe. Avei umi ansiáno kyreʼỹme opredika Jehová organisasión ojerureháicha koʼág̃arupi. Ñepyrũrã ikatu oĩ noñanimáiva oorganisa ojepredika hag̃ua por teléfono, puértope, kállere, plásape térã ambue lugár hetahápe hénte. Péro upéi koʼã ermáno ohechakuaa mbaʼéichapa osẽ porã hikuái opredikávo koʼãichagua lugárpe. Por ehémplo, cuatro prekursór Alemaniagua ojapo arréglo opredika hag̃ua peteĩ lugár oĩhápe heta negósio ha aréma ndojepredikaveihápe. Peteĩva koʼã ermáno hérava Michael ha oservíva kómo ansiáno, omombeʼu: “Ohasáma kuri heta tiémpo ndoropredikavéi hague umi negosioháre, ha orepyʼapererepa rojapo jeýtarõ guare upéva. Oiméne Jehová ohechakuaa raʼe upéva ha orepytyvõ rohasa porãite hag̃ua upe pyharevépe. Añetehápe roñeñandu porãiterei rojerovia haguére Jehováre ha rosegi haguére umi suherénsia osẽva Ñane Marandu Porã-me”. ¿Ñandépa ñaĩ avei japrova hag̃uáicha umi método pyahu ñande territóriope?

10. ¿Mbaʼe kámbiopa ojejapo Jehová organisasiónpe?

10 Sapyʼánte Jehová organisasión ojapo kámbio umi sukursálpe. Por ehémplo, ndaʼareguasúi oñemboty hague heta sukursál michĩva ha umi sukursál tuichavéva oñenkarga pe traváho haʼekuéra ojapo vaʼekuére. Umi ermáno oservi vaʼekue umi lugárpe, ñepyrũrã tekotevẽ kuri ojesakrifikaʼimi, péro upe rire ohechakuaa ojehupytyha hetave mbaʼe porã ojejapo rupi upéicha (Ecl. 7:8). Añetehápe koʼã ermáno ovyʼaiterei oreko haguére oportunida opartisipávo umi kámbio ojejapóvape koʼã tiémpope.

11-13. ¿Mbaʼe sakrifísiopa ojapo heta ermáno oñemboty rire umi sukursál?

11 Oñemboty rire umi sukursál, heta ermáno orresivi ótra asignasión. Umíva apytépe oĩ heta tiémporema oservi vaʼekue Betélpe. Por ehémplo, peteĩ matrimónio oservi vaʼekuépe heta áñore peteĩ sukursál michĩvape Centroaméricape, ojejerure ova hag̃ua Sukursál de Méxicope. Upépe 30 vése voi hetave hikuái. Pe ermáno omombeʼu: “Ijetuʼueterei vaʼekue oréve roheja hag̃ua ore hénte ha ore amigokuéra”. Ótro ermáno hérava Juan, ojetraslada avei Méxicope, ha heʼi: “Añepyrũ jey vaʼerã de cero. Añehaʼã vaʼerã akonsegi che amigorã, ajepokuaa ótra kostúmbrere ha aprokura vaʼerã antende haʼekuéra opensa lája”.

12 Heta ermáno oservi vaʼekue ótro Betélpe Európape, ova Sukursál de Alemániape. Chupekuéra avei ijetuʼu upe kámbio. Por ehémplo umi oservi vaʼekue Suízape, ohechagaʼueterei umi paisáhe porãita ohejáva. Ha umi oservi vaʼekue Áustriape katu ohechagaʼu pe trankilida.

13 Umi oñemondóva oservi hag̃ua Betélpe ótro paíspe, ojepokuaa jey vaʼerã upe lugár rehe, ombaʼapo vaʼerã umi ermáno oikuaaʼỹvandi, térã oaprende vaʼerã ótro traváho. Ha ndahaʼéi umíva añónte, ojepokuaa vaʼerã ikongregasión pyahúre, pe territóriore ha sapyʼánte tekotevẽ  avei oaprende ótro idióma. Ha jaikuaaháicha koʼã mbaʼe ndahaʼéi ifasilpáva, péro heta vetelíta oasepta koʼã asignasión pyahu. ¿Mbaʼérepa ojapo hikuái upéva? Jahechamína mbaʼépa heʼi hikuái.

14, 15. a) ¿Mbaʼépa heʼi heta ermáno iservísiore? b) ¿Mbaʼéichapa ikatu jasegi koʼã ermáno ehémplo?

14 Grethel heʼi: “Aasepta upe invitasión pórke péicha ahechauka Jehovápe nodependeiha peteĩ país rehe, peteĩ lugár térã priviléhiore ahayhu hag̃ua chupe”. Dayska omombeʼu: “Ahecha upe invitasión ouha Jehovágui, upévare ni michĩmi ndadudái aasepta hag̃ua”. André ha Gabriela opensa avei péicha. Haʼekuéra heʼi: “Upéva omeʼẽ oréve ótra oportunida rohechauka hag̃ua Jehovápe romombaʼeveha hembipota umi mbaʼe oregustávagui”. André ha Gabriela ohechakuaa Jehová organisasión ojapóramo peteĩ kámbio, iporãveha oasepta ha ojapo oñehaʼarõva chuguikuéra.

Peteĩ priviléhio ijojahaʼỹva ningo ñambaʼapo meme Jehová ndive

15 Oñemboty jave peteĩ sukursál, oñeasigna heta vetelítape oservi hag̃ua kómo prekursór. Por ehémplo, oñembotýrõ guare umi sukursál oĩva Dinamarca, Noruega ha Suéciape, oñeforma pe Sukursál de Escandinavia ha oñeasigna unos kuánto ermánope oservi hag̃ua kómo prekursór. Ijapytepekuéra oĩ Florian ha Anja. Haʼekuéra heʼi: “Ijetuʼu koʼãichagua kámbio, péro roikuaa roaprendetaha heta mbaʼe. Rovyʼaiterei roikuaágui oredeprovechoha Jehovápe ha upévare haʼe orepuru tekotevẽhápe. Ha roʼekuaa haʼe tuichaiterei orevendesiha”. Jaikuaaháicha, algúnopente ohupyty koʼãichagua kámbio, péro opavavénte ikatu jasegi koʼã ermáno ehémplo. Oĩramo peteĩ kámbio, jaasepta vaʼerã ha ñamotenonde Ñandejára Rréino (Is. 6:8). Jehová katuete ovendesi umi omombaʼévape iservísio, toĩ oĩháme.

JAVYʼÁKENA IKATU HAGUÉRE ÑAMBAʼAPO JEHOVÁNDI

16. a) ¿Mbaʼe konséhopa omeʼẽ Gálatas 6:4? b) ¿Mbaʼépa pe priviléhio tuichavéva ikatúva jareko?

16 Ñande yvypóra imperfékto ningo ñañekomparase ótrore. Péro la Biblia heʼi  jajesareko vaʼerãha umi mbaʼe ikatúvare jajapo káda uno (elee Gálatas 6:4). Naentéroi ningo ikatu oservi kómo ansiáno, prekursór, misionéro térã vetelíta. Upéicharõ jepe, opavavénte jareko pe priviléhio iñimportantevéva: ikatu ñambaʼapo Jehovándi japredikávo pe marandu porã. ¡Ajépa tuichaite mbaʼe upéva!

17. a) ¿Mbaʼe mbaʼépa ñambohovái vaʼerã jaiko aja ko múndo añáme? b) ¿Mbaʼérepa ndovaléi ñañedesanima?

17 Jaiko aja ko múndo añáme oĩva Satanás poguýpe, sapyʼánte ndaikatúi jajapo opa mbaʼe jajaposéva Jehovápe g̃uarã. Péro ani ñañedesanima upe haguére. Jarekóramo jepe rresponsavilida ñande rogapýpe, ñanderasykatu térã oĩrõ ambue mbaʼe ñandejopýva, ikatúnte avei ñambaʼapo meme Jehovándi ñamombeʼúvo opárupi héra porãite ha ñamyerakuãvo Irréino. ¡Aníkena ñapensa vyroreiha upéva! Iñimportanteterei jajapo opa ikatúva Ñandejára servísiope. Upéicha avei, jajerurékena Jehovápe tovendesi umi ermáno ikatúvape ojapo hetave mbaʼe ñandehegui. Ñanemanduʼa vaʼerã haʼe omombaʼetereiha enterove oikuaaukávape héra.

18. ¿Mbaʼépa tekotevẽ jajapo ha mbaʼérepa?

18 Jarekóramo jepe defékto ha ñanekangy heta mbaʼépe, Jehová ovyʼa ikatu haguére ñambaʼapo meme hendive. Ñande avei ñamombaʼéramo pe priviléhio haʼe omeʼẽva ñandéve koʼã ára pahápe, ñambotapykuéta heta mbaʼe ñandegustáva. Ág̃a pe múndo pyahúpe jarekóta tiémpo jajapo hag̃ua hetave mbaʼe ha jaikóta vyʼápe opa árare (1 Tim. 6:18, 19).

¿Ñamombaʼépa ikatu haguére ñambaʼapo Jehová ndive? (Ehecha párrafo 16 guive 18 peve)

19. ¿Mbaʼe asignasiónpa Jehová omeʼẽta ñandéve?

19 Koʼág̃a hiʼag̃uivévo pe múndo pyahu, ñapensami Moisés heʼi vaʼekuére umi isrraelítape oike mboyvemi pe Yvy Oñepromete vaʼekuépe: “Jehová nde Jára ovendesíta opa mbaʼe rejapóva osẽ porã hag̃ua ndéve” (Deut. 30:9, NM). Armagedón rire, Jehová okumplíta ipromésa ha ontregáta ko yvy umi ombaʼapo vaʼekuépe hendive. Upépe Jehová omeʼẽta ñandéve ótra asignasión: jajapo vaʼerã ko planétagui peteĩ hardín neporãva.