Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Ñemañaha (ojestudiáva)  |  Septiembre de 2014

¿Reñehaʼãpa hína oiko hag̃ua ndehegui ansiáno?

¿Reñehaʼãpa hína oiko hag̃ua ndehegui ansiáno?

FERNANDO * inerviosoiterei, mokõi ansiáno heʼi chupe oñeʼẽseha hendive. Ojapóma un tiémpo haʼekuéra oñemongeta hague hendive káda visíta de superintendénte rire, ha heʼi chupe mbaʼépepa tekotevẽ ombaʼapove ohupyty hag̃ua hetave rresponsavilida kongregasiónpe, péro núnkante ndoikói mbaʼeve. Upévare Fernando oñeporandúma algún díapa oikóne chugui ansiáno. Pe superintendénte ovisita ramoite jeýma ikongregasión, ¿mbaʼépa heʼíta chupe koʼág̃a umi ansiáno?

Fernando oñatende porã heʼítavare hikuái, ha peteĩva omombeʼu rire chupe mbaʼépa heʼi 1 Timoteo 3:1, heʼi oñenombra hague chupe ansiáno. Fernando ni ndogueroviaséi ha heʼi: “¿Mbaʼe? ¿Ensério?”. Haʼe ijuruvyrei opuka; ovyʼaiterei. Upéi oñeanunsiávo kongregasiónpe, enterovénte ovyʼa hendive.

¿Oĩ vai piko jaipotáramo hetave rresponsavilida kongregasiónpe? Nahániri. Apóstol Pablo heʼi vaʼekue voi: “Peteĩ kuimbaʼe oñehaʼãmbaitéramo oservi ansiánoramo, ojapose hína peteĩ tembiapo iporãitereíva” (1 Tim. 3:1). Ko téxto omokyreʼỹ heta ermánope oprogresa hag̃ua kongregasiónpe, ha upéicha rupi koʼág̃a oĩ hetaiterei ansiáno ha siérvo ministeriál ikatupyrýva. Péro amasdía ningo okakuaave ohóvo umi kongregasionkuéra, upévare oñekotevẽve ermáno oñehaʼãva “oservi ansiánoramo”. ¿Mbaʼéichapa ikatu ojapo upéva? ¿Oĩ porãpa peteĩ ermáno ohaʼarõiterei oñenombra chupe térã ojepyʼapyeterei upévare, ojapo haguéicha Fernando?

¿MBAʼÉPA HEʼISE ‘PETEĨ KUIMBAʼE OÑEHAʼÃMBAITEHA’?

Griégo ñeʼẽme pe expresión “oñehaʼãmbaite” heʼise peteĩ persóna oipotaitereiha peteĩ mbaʼe ha ojetepysoha ohupyty hag̃ua upéva. Haʼete peteĩ ojestirapaitéva ohupyty hag̃ua peteĩ yva oĩva gueteri pe yvyramátare. Péro Pablo ndeʼiséi vaʼekue peteĩ ermáno oserviséva ansiánoramo oheka tarovaite vaʼerãha upe priviléhio.  Umi ojapóva ipyʼaite guive ko tembiapo ningo ohechauka ohupytyseha “peteĩ tembiapo iporãitereíva”, ndahaʼéi orekoségui peteĩ título.

La Bíbliape, 1 Timoteo 3:2-7 ha Tito 1:5-9-pe, jatopa umi mbaʼe ojejeruréva koʼãichagua ermánogui. Raymond, peteĩ ermáno heta áñorema oservíva ansiánoramo, heʼi: “Iñimportánte ningo añete ñañeʼẽkuaa ha ñaporomboʼekuaa, péro iñimportanteve hína ñanekondúkta porã. Heʼiháicha la Biblia tekotevẽ jajejokokuaa, ñanderekoporã, ñaneakãguapy, jaiko hekópe, jarresivi porã enterovépe ha ani ñañemohatã ñande jaʼévapente”.

Nde ikatu hína reipytyvõ ne kongregasiónpe heta hendáicha

Peteĩ ermáno oñehaʼãva ipyʼaite guive oservi hag̃ua ansiánoramo hekoporã, upéicha rupi omboyke pe tekokyʼa ha iñonrrádo opa mbaʼépe. Avei ohechauka ojejokokuaaha, noñemohatãiha haʼe opensávapente, iñakãguapyha ha oikoha hekopete. Upévare umi ermáno ojerovia hese omoakã porãtaha kongregasión ha oikuaa oipytyvõtaha chupekuéra iprovléma jave. Avei orresivi porã rupi enterovépe, omokyreʼỹ umi mitãrusúpe ha umi ipyahúvape. Haʼekuéra okonsola ha oipytyvõ umi hasýva ha ijedávape, ha ovyʼa voi ojapóvo upéva. Koʼãichagua ermáno oñehaʼã ojapo koʼã mbaʼe oservi porãségui kongregasiónpe, ndahaʼéi katuete okalifika hag̃ua ansiánoramo. *

Umi ansiáno ikatu oakonseha ha omokyreʼỹ peteĩ ermánope okumpli hag̃ua umi rrekisíto oñehaʼarõva peteĩ ansiánogui. Péro amo ipahápe pe ermánore odepende hína, pórke haʼe la okumpli vaʼerã umi mbaʼe. Henry, peteĩ ermáno heta áñorema oservíva de ansiáno, heʼi: “Reguerekoséramo priviléhio kongregasiónpe, rembaʼapo jejopy vaʼerã rekumpli hag̃ua umi rrekisíto”. Ha imanduʼávo Eclesiastés 9:10-re, heʼive: “‘Opaite mbaʼe oĩva nde pópe, rejapo vaʼerã koʼág̃a ikatu reheve’, ha rejapo vaʼerã nde pyʼaite guive. Umi ansiáno heʼíramo ndéve rejapo hag̃ua peteĩ mbaʼe, kyreʼỹme rekumpli vaʼerã, ha ejapo porã. Ha ojeʼéramo ndéve reitypei hag̃ua, vyʼápe rejapo vaʼerã avei upéva. Ani reimoʼã avave ndorekoiha enkuénta umi mbaʼe rejapóva”. Upéicharõ, reserviséramo kómo ansiáno, tekotevẽ rembaʼapo jejopy ha rehechauka ikatuha oñekonfia nderehe, tahaʼe haʼéva pe rresponsavilida oñemeʼẽva ndéve. Aníkena reiko reñemombaʼeguasu  ni reipota tarovaite umi priviléhio, síno opa mbaʼépe rehechauka vaʼerã neumildeha (Mat. 23:8-12).

ANÍKENA REPENSA NI REJAPO UMI MBAʼE NANEPYTYVÕMOʼÃIVA

Sapyʼánte oĩ ermáno orekosetereíva priviléhio kongregasiónpe, ha okonsegi hag̃ua upéva oñehenduka umi ansiánope térã okonvensese chupekuéra okumplimaha umi rrekisíto. Ha oĩ avei ermáno ipochýva umi ansiáno omeʼẽramo chupe konsého. Umichagua ermáno oñeporandu vaʼerã: “¿Ahupytysépa umi priviléhio ajechauka hag̃uánte, térãpa aipytyvõse añete Jehová ovechakuérape?”.

Peteĩ ermáno oñehaʼãva hína oiko hag̃ua chugui ansiáno, “ehémplo vaʼerã” kongregasiónpe (1 Ped. 5:1-3). Upéva heʼise nopensái ni ndojapói vaʼerãha umi mbaʼe noipytyvõmoʼãiva chupe, síno ipasiénsia ha oaguanta vaʼerã, tove toñenombráma raʼe chupe térã nahániri. Péro ñanemanduʼa vaʼerã avei peteĩ ermáno oñenombrárõ ndeʼiséi ndojavyveitamaha (Núm. 12:3; Sal. 106:32, 33). Avei upe ermáno ikatu hína opensa ojapo porãha opa mbaʼe ha ‘ikonsiénsia potĩ’, péro ikatu oime ótro nopensái hese upéicha (1 Cor. 4:4). Upévare, umi ansiáno oñemoñeʼẽramo ndéve la Biblia rupive, ehendu porãnte vaʼerã chupekuéra ha ani ndepochy, síno eñehaʼã esegi umi konsého oñemeʼẽ vaʼekue ndéve.

¿HA OIMÉRAMO ARETEREÍMA REHAʼARÕ UPE PRIVILÉHIO?

Oĩ ermáno ikaneʼõmava ohaʼarõ hague oñenombra chupe ansiáno. Oiméramo nde heta áñorema reñehaʼã reikóvo oiko hag̃ua ndehegui ansiáno, ani rejepyʼapyeterei ni rejedesespera. Síno nemanduʼa vaʼerã heʼívare Proverbios 13:12: ‘Peteĩ mbaʼe oñehaʼarõ aréva ogueru ñembyasy, upe mbaʼe jahupytýva katu ñande pyʼa ombohory’.

Nog̃uahẽiramo peteĩ mbaʼe ñahaʼarõitereíva, ikatu ñanembohasy. Upéicha oiko vaʼekue Abrahán rehe. Jehová opromete vaʼekue chupe ifamiliataha, péro ohasa la tiémpo ha ndoikói mbaʼeve; Sara ha haʼe osegi gueteri ifamiliaʼỹre (Gén. 12:1-3, 7). Ituja riréma Abrahán heʼi Jehovápe: ‘Che Ruete, che Jára, ¿mbaʼéiko remeʼẽta chéve ko ndarekóiva che raʼy tee? [...] Neremeʼẽi ningo chéve che raʼyrã’. Jehová ja heʼíma kuri Abrahánpe okumplitaha ipromésa, péro haʼe tekotevẽ ohaʼarõ 14 áñorupi oiko peve upéva (Gén. 15:2-4, ÑÑB; 16:16; 21:5).

¿Oikópa raʼe Abrahán oñamarga ha ndovyʼavéi ohaʼarõitereíma rupi? Nahániri. Haʼe ndodudái Jehová okumplitaha upe opromete vaʼekue ha osegi ohaʼarõ. Apóstol Pablo heʼi voi: “Abrahán ohechauka rire ipasiensiaha, ohupyty pe promésa” (Heb. 6:15). Amo ipahápe Ñandejára omeʼẽ chupe hetave mbaʼe haʼe ohaʼarõvagui. ¿Mbaʼépa ikatu ñaaprende Abrahángui?

Oiméramo nde aretereíma reñehaʼã hague reservi hag̃ua ansiánoramo ha neʼĩraiti reñenombra, ani reñentrega, síno esegi ejerovia mbarete Jehováre ha vyʼápe eservi chupe. William, peteĩ ermáno oipytyvõmava hetápe oprogresa hag̃ua kongregasiónpe, omombeʼu: “Rekumplipa hag̃ua umi rrekisíto ningo reikotevẽ heta tiémpo. Mbeguekatúpente voi ojehechakuaa peteĩ ermánore ikatupyrýpa ha oikótapa oservi hag̃ua kómo ansiáno. Ha upéva ojekuaáta otrata porãramo hapichakuérape ha okumpli porãramo umi traváho  oñemeʼẽva chupe kongregasiónpe. Oĩ opensáva ovyʼa añete hag̃ua iservísiope, orekómante vaʼerãha priviléhio kongregasiónpe. Péro umichagua persóna tuicha ojavy ha ikatu voi upévantema oreko iñakãme. Añetehápe javyʼaséramo, jaservínte vaʼerã Jehovápe ñande pyʼaite guive, tahaʼe haʼéva umi mbaʼe jajapóva kongregasiónpe”.

Peteĩ ermáno, ohaʼarõ vaʼekue mas de 10 áño oñenombra hag̃ua chupe ansiáno, heʼi tuicha oipytyvõ hague chupe okambia hag̃ua opensa lája, heʼíva Ezequiel kapítulo 1-pe. Haʼe heʼi: “Jehová ningo omonguʼe ikárro selestiál térã iñorganisasión haʼe oipotahaichaite. Umi mbaʼe oikóva iñorganisasiónpe ndoikói ñandéve ñandegustaha óra, síno Jehová odesidi vove tekotevẽha oiko. Ahechakuaa iñimportanteveha Jehová opensáva, ndahaʼéi che aipotáva upe moméntope térã che aimoʼãva iporãveha. Ikatu oime Jehová ohechakuaa che aservisetereiha de ansiáno, péro ndahaʼeiha upéva la aikotevẽva hína aservi porã hag̃ua chupe upe moméntope”.

Oiméramo nde reservise de ansiáno, koʼág̃ama voi reipytyvõ vaʼerã oĩ hag̃ua pyʼaguapy kongregasiónpe. Ha repensáramo aretereíma rehaʼarõ hague, eñehaʼã nepasiénsia ha ehaʼarõkuaa. Raymond, ñañeʼẽma hague ko artíkulope, heʼi: “Peteĩ itaryrýiva, siémpre oipotapotave ha núnka noñekontentái. Reikóramo siémpre rehaʼarõ peteĩ priviléhio, ndaikatumoʼãi reservi porã Jehovápe”. Upéicharõ, eñehaʼãkena ehechauka nde rekovépe umi mbaʼe porã oúva Ñandejára espíritugui, koʼýte pe pasiénsia. Estudia la Biblia ha emombarete nde jerovia. Esẽve predikasiónpe ha ejapove estúdio vívliko. Ejapo nde estúdio de família ha eipytyvõ chupekuéra oñemoag̃uive hag̃ua Ñandejárare. Ha eaprovecha opaichagua oportunida oñepresentáva ndéve remokyreʼỹ hag̃ua ermanokuérape. Rejapóramo koʼã mbaʼe, redisfrutáta nde servísiope, rehaʼarõ aja rehupyty peteĩ priviléhio.

Reaprovechapaite vaʼerã umi oportunida Jehová omeʼẽva ndéve rekumpli porã hag̃ua umi rrekisíto ha reipytyvõ hag̃ua kongregasiónpe. Ni haʼe ni iñorganisasión ndoipotái reñentrega ni reñamarga nereñenombráiti rupi. Ñandejára ningo oipytyvõ ha ovendesi umi oservívape chupe ipyʼaite guive. Ha nemanduʼa vaʼerã ivendisión nañanembohasaʼasyiha (Prov. 10:22).

Oiméramo jepe aréma rehaʼarõ hague pe nombramiénto, nemanduʼa vaʼerã lomímonte ikatuha gueteri resegi reprogresa. Jehová ndahesaraimoʼãi umi mbaʼe nde rejapóva hína rekumpli hag̃ua umi rrekisíto, ha oikuaa porã rembaʼapo jejopyha kongregasiónpe. Haʼe ohecha avei mbaʼéichapa nde reipytyvõ hína ne famíliape oñemoag̃uive hag̃ua hese. Tahaʼe haʼéva umi rresponsavilida oñemeʼẽva ndéve kongregasiónpe, siémpre reservi vaʼerã Jehovápe vyʼápe ha nde pyʼaite guive.

^ párr. 2 Oñekambia herakuéra.

^ párr. 8 Ko artíkulope oñeñeʼẽramo jepe umi ansiánope, umi konsého ikatu avei oipytyvõ umi oservisévape siérvo ministeriálramo. Umi mbaʼe oñehaʼarõva chuguikuéra oĩ koʼã téxtope: 1 Timoteo 3:8-10, 12, 13.