Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Ñemañaha (ojestudiáva)  |  Septiembre de 2014

Oñeporandúva jepi

Oñeporandúva jepi

¿Heʼisépa Salmo 37:25 ha Mateo 6:33 Jehová siervokuérape arakaʼeve ndofaltamoʼãiha hoʼu vaʼerã?

David ohai vaʼekue: “Ndahecháiva hekopotĩva oikotevẽramo, térã taʼyrakuéra ojeruréramo upérupi rei hoʼu vaʼerã” (Sal. 37:25). David oikuaa porã upéva haʼe voi ohechágui Jehová siémpre oñangarekoha hese ha opavave isiérvore. Péro upéva ndeʼiséi Ñandejára siervokuéra arakaʼeve ndohasamoʼãiha nesesida.

David voi heta vése ojecha vai vaʼekue. Por ehémplo, oikórõ guare okañy Saúlgui, opa ohóvo chuguikuéra iprovísta, upévare ohómante ojerure hoʼu vaʼerã haʼe ha umi kuimbaʼe omoirũva chupe (1 Sam. 21:1-6). Jahechaháicha, David ojecha vaírõ guare ‘ojerure kuri hoʼu vaʼerã’. Péro ohechakuaa Jehová ndohejareiriha chupe. La Bíbliape ni peteĩ hendápe ndajajuhúi haʼe oiko hague omendiga okaru hag̃ua.

Mateo 6:33-pe Jesús oasegura vaʼekue Ñandejára omeʼẽtaha hemikotevẽ umi omotenondévape Irréino. Jesús heʼi: “Pemotenonde meméke Ñandejára Rréino ha ihustísia, ha opa koʼã mbaʼe [tahaʼe peʼu ha pemonde vaʼerã] oñemeʼẽta avei peẽme”. Péro upéi heʼi avei ‘iñermanokuéra’ ikatuha ohasa ñembyahýi ojepersegi rupi (Mat. 25:35, 37, 40). Upéicha oiko vaʼekue Pablo rehe. Haʼe sapyʼánte ohasa vaʼekue ñembyahýi ha uhéi (2 Cor. 11:27).

Jehová omombeʼúma ñandéve jajepersegitaha heta hendáicha. Sapyʼánte ikatu oheja jahasa nesesida jahechaukávo Satanás ijapuha (Job 2:3-5). Ñapensamína ñane ermanokuéra osufri vaʼekuére umi kámpo de konsentrasión násipe. Upépe ohasa hikuái ñembyahýi, ha Satanás ojevale upévare omokangy hag̃ua chuguikuéra ijerovia. Umi Testígo osegi kuri iñeʼẽrendu, ha Jehová ndohejareíri chupekuéra. Añetehápe ningo Ñandejára opermiti koʼã kristiáno ombohovái heta mbaʼe ijetuʼuetereíva, koʼág̃a ohejaháicha avei isiervokuéra ombohovái heta mbaʼe. Péro katuete oipytyvõ oaguanta hag̃ua opavave osufrívape héra rehehápe (1 Cor. 10:13). Ani ñanderesarái heʼívare Filipenses 1:29: “Peẽme oñemeʼẽ pe priviléhio ndahaʼéi pejeroviánte hag̃ua pe Crístore, síno pehasa asy hag̃ua avei hesehápe”.

Jehová opromete ndohejamoʼãiha isiervokuérape. La Biblia heʼi: “Tahaʼe haʼéva umi opuʼãva nderehe, nosẽporãmoʼãi” (Is. 54:17, NM). Kóva ha ambue promésa oasegura Jehová oprotehetaha ipuévlope. Péro upéva ndeʼiséi ni peteĩ kristiánope ndojehumoʼãiha mbaʼeve. Oĩta katuete ohasa asýva térã ikatúva voi omano.