Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Ñemañaha (ojestudiáva)  |  Septiembre de 2014

Jasegíkena jaservi Jehovápe ‘jahasa asýramo’ jepe

Jasegíkena jaservi Jehovápe ‘jahasa asýramo’ jepe

“Heta jahasa asy vaʼerã jaike hag̃ua Ñandejára Rréinope.” (HECH. 14:22)

1. ¿Mbaʼérepa Ñandejára siervokuéra ‘ohasa asy’?

ÑANDEJÁRA siervokuéra heta ‘ohasa asýta’ ohupyty mboyve pe jeikove opaveʼỹva. Tahaʼe ramónte ñañepyrũ hague jaservi Jehovápe, térã yma guivéma, enterove jahasa heta mbaʼe ijetuʼúva. ¿Mbaʼérepa? Jaikógui ko múndo oĩvape Satanás poguýpe (Rev. 12:12).

2. a) ¿Mbaʼépa ombohovái vaʼerã kristianokuéra? (Ehecha taʼanga oĩva iñepyrũme.) b) ¿Máva káusarepa kristianokuéra ohasa asy, ha mbaʼérepa jaʼekuaa upéva?

2 “Entéro yvypóra” ningo ñaneimperfékto ha upévare jareko voi heta provléma. Péro ñande kristianokuéra ñambohovái vaʼerã peteĩ mbaʼe ijetuʼuetereíva (1 Cor. 10:13). ¿Mbaʼépa hína upéva? Heta oĩ ñandepersegíva ñakumpli rupi hekoitépe Ñandejára léi heʼíva. Jesús heʼi idisipulokuérape: “Peteĩ tembiguái ndaikatúi tuichave ipatróngui. Chéve chepersegíramo hikuái, peẽme avei pendepersegíta” (Juan 15:20). ¿Máva káusarepa jahasa koʼã mbaʼe? Satanás káusare. La Biblia voi heʼi hese okorreha oikóvo ñande jerére “peteĩ león pochýicha ha oñehaʼã omokõ” Jehová siervokuérape (1 Ped. 5:8). Upévare ojevale oimeraẽ mbaʼére ñanemomombyry hag̃ua Jehovágui. Jahechamína mbaʼépa ohasa vaʼekue apóstol Pablo.

 OJEPERSEGI CHUPE LÍSTRAPE

3-5. a) ¿Mbaʼépa ohasa Pablo siuda de Lístrape? b) ¿Mbaʼérepa jaʼekuaa Pablo omombarete hague umi disípulope heʼívo ombohovaitaha hikuái heta mbaʼe ijetuʼúva?

3 Páblope heta vése ojepersegi oservi haguére Jehovápe (2 Cor. 11:23-27). Peteĩ jey, siuda de Lístrape omonguera peteĩ kuimbaʼe paralítikope. Upe rire umi hénte oguerohory joa chupe ha iñirũ Bernabépe, ha oadorase voi chupekuéra ojapo haguére pe milágro. Péro Pablo ha Bernabé ojerure umi héntepe ani hag̃ua ojapo upéva. Upe riremínte ou una partída hudío oñeʼẽ vaíva hesekuéra ha omoĩ umi héntepe ikontrapekuéra. ¡Ajépa pyaʼete okambia pe situasión! Umi henteita ojapi vaipaite Páblope itápe, ha oheja chupe hikuái upépe oimoʼãgui omanomaha (Hech. 14:8-19).

4 Pablo ha Bernabé ovisita rire táva Derbe “oho jey Listra, Iconio ha Antioquíape, [ha] upépe omombarete umi disípulope ha omokyreʼỹ chupekuéra ojerovia mbarete hag̃ua, heʼívo: ‘Heta jahasa asy vaʼerã jaike hag̃ua Ñandejára Rréinope’” (Hech. 14:21, 22). Koʼã mbaʼe heʼíva ikatu iñextráño ñandéve. Haʼete ningo avavépe nomokyreʼỹmoʼãiva heʼívo: “Heta jahasa asy vaʼerã”. ¿Mbaʼérepa jaʼe upéicharõ Pablo ha Bernabé omombarete hague umi disípulope heʼírõ guare chupekuéra ombohovaitaha heta mbaʼe ijetuʼúva?

5 Ñantende hag̃ua upéva, ñahesaʼỹijo porãmi Pablo heʼi vaʼekue. Haʼe ningo ndeʼíri “ñaaguanta vaʼerãha heta jehasa asy”. Upéva rangue heʼi: “Heta jahasa asy vaʼerã jaike hag̃ua Ñandejára Rréinope”. Jahechaháicha, Pablo omombarete umi disípulope ohechaukávo mbaʼépa orresivíta hikuái oaguantáramo umi mbaʼe ijetuʼúva. Haʼekuéra ohupytýta peteĩ rrekompénsa isegúrova. Jesús voi heʼi vaʼekue: “Pe oaguantáva ipahaite peve, ojesalváta” (Mat. 10:22).

6. ¿Mbaʼépa ohupytýta umi oaguantáva ipahaite peve?

6 Ñaaguantáramo, káda uno jahupytýta peteĩ rrekompénsa. Umi kristiáno unhído oikóta yvágape, nomanomoʼãvéima ha ogovernáta Jesús ndive. Ha umi “ambue ovechakuéra” oikovéta opa árare ko yvy ape ári ‘oĩtahápe tekojoja’ (Juan 10:16; 2 Ped. 3:13). Péro Pablo heʼi haguéicha, ñahaʼãrõ aja upe rrekompénsa, heta jahasa asy vaʼerã. Jahechamína mokõi mbaʼe ijetuʼúva ombohováiva kristianokuéra.

ÑANDEATAKA DIREKTOITE

7. ¿Mbaʼéicha javépa ikatu jaʼe oĩha ñandeatakáva direktoite?

7 Jesús heʼi vaʼekue: “Oĩta pendegueraháva trivunálpe, ha peñembyepotíta sinagogahárupi. Avei peñemboʼy vaʼerã umi governadór ha rréi renondépe” (Mar. 13:9). Péicha Jesús ohechauka ojepersegitaha kristiánokuérape. Ha ikatu voi upéva ou umi governánte polítiko térã umi omoakãvagui rrelihión (Hech. 5:27, 28). Ñanemanduʼami jeýna Páblore. ¿Okyhyjépa raʼe opensávo péicha ojepersegitaha chupe? Ni mbaʼevéicharõ (elee Hechos 20:22, 23).

8, 9. a) ¿Mbaʼéichapa Pablo ohechauka idesididoha oaguanta hag̃ua umi mbaʼe ijetuʼúva? b) ¿Mbaʼéichapa koʼág̃arupi heta ermáno ohechauka idesididoha Pábloicha?

8 Pablo ipyʼaguasu vaʼekue ha ogueropuʼaka Satanás oatakávo chupe direktoite. Haʼe heʼi: “Nacherakateʼỹi che rekovére, ikatúma guive adipara ko karréra ipahaite peve ha amohuʼã pe tembiapo ñande Ruvicha Jesús omeʼẽ vaʼekue chéve, aikuaauka hag̃ua hekoitépe umi marandu porã oñeʼẽva Ñandejára mbaʼeporã ijojahaʼỹvare” (Hech. 20:24). Katuete jahechakuaa Pablo ndokyhyjéi hague ojepersegírõ g̃uarã chupe. Upéva rangue, haʼe ojedesidíma oaguantataha, ointeresave  chupe ‘oikuaauka hekoitépe umi marandu porã’, toiko la oikóva.

9 Koʼág̃arupi oĩ hetaiterei ermáno idesidídova Pábloicha. Por ehémplo, peteĩ tetãme haimetéma 20 áño ojereko hague préso heta Testígope, noñentremetéi rupi hikuái polítikape. Koʼã ermáno káso arakaʼeve noñemog̃uahẽiva trivunálpe, ndaipórigui upe tetãme léi opermitíva chupekuéra odefende ijerovia. Hiʼarive, ndojehejái avavépe ovisita koʼã ermánope, ni ihentekuéra jepe, ha sapyʼánte oñembyepoti ha ojetortura chupekuéra heta hendáicha.

10. ¿Mbaʼérepa ndajakyhyjéi vaʼerã oñepresenta jave ñahaʼarõʼỹetére umi persekusión?

10 Heta hendápe ko yvy tuichakuére ñane ermanokuéra ombohovái umi mbaʼe ijetuʼúva oñepresentáva oñehaʼarõʼỹetére. Oiméramo oiko upéva nderehe, ani rekyhyje. Nemanduʼami José rehe. Chupe ningo oñevende vaʼekue esklávoramo, péro Jehová “oguenohẽ chupe opa jejopy vaígui”. (Hech. 7:9, 10). Ñandejára ikatu avei nepytyvõ upéicha. Ani nderesarái “Jehová [oikuaaha] mbaʼéichapa oguenohẽta jejopy vaígui umi hénte omombaʼeguasúvape chupe” (2 Ped. 2:9). Oĩ heta mbaʼe ñanepytyvõva jajerovia mbarete hag̃ua hese ha ñaaguanta hag̃ua oĩ jave ñandepersegíva. Jaikuaa porã Jehová ikatuha ñandesalva ko múndo añágui ha omeʼẽ ñandéve pe jeikove opaveʼỹva Igoviérno poguýpe (1 Ped. 5:8, 9).

ÑANDEATAKA JAHECHAKUAAʼỸRE

11. ¿Mbaʼéichapa Satanás ñandeataka avei?

11 Sapyʼánte ñambohovái vaʼerã avei umi mbaʼe ndajahechakuaáiva ñepyrũrã. Péro oĩ jave ñandeatakáva direktoite pyaʼe japilla, jepe ou ñahaʼarõʼỹetére. Upéva haʼete umi yvytu atã ikatúva peteĩ tesapirĩme oitypaite peteĩ óga. Péro umi ndajapilláiva katu haʼete umi kupiʼi okarúva mbeguekatu peteĩ ógare, ha upeichaháguinte ou yvýpe. Péicha jave, ñepyrũrã ndajahechakuaái pe pelígro, ha japilla rire ndaikatuvéima jajapo mbaʼeve.

12. a) ¿Mbaʼéicha javépa Satanás ojaprovecha ñanderehe, ha mbaʼérepa ou porãite chupe upe ñuhã? b) ¿Mbaʼérepa Pablo oñedesanima vaʼekue?

12 Satanás ñandeataka direktoite, térã omokangy ñande jerovia saʼi saʼípe ha ñañanduʼỹre. Péicha ojapo ikatu hag̃uáicha ñanemoĩ vai Jehovándi. Por ehémplo, pyʼỹinte oaprovechapaite oĩ jave peteĩ mbaʼe ñanedesanimáva, ha heta kristiánopema oity upéicha. Pablo orrekonose vaʼekue haʼe voi sapyʼánte oñedesanima hague (elee Romanos 7:21-24). Hiʼarive haʼe peteĩ apóstol ijerovia mbaretéva, ha amalisia oĩ vaʼekue pe kuérpo governántepe. ¿Mbaʼérepa upéicharõ heʼi ijehe: “¡Aichejáranga che!”? Heʼi péicha iñimperfékto rupi. Haʼe ningo ojapose iporãva, péro ostira avei chupe umi mbaʼe vai. Oiméramo nde sapyʼánte reñedesanima, katuete nekonsola reikuaávo apóstol Pablo jepe oñeñandu hague upéicha.

13, 14. a) ¿Mbaʼérepa Jehová siervokuéra apytépe oĩ oñedesanimáva? b) ¿Mávapa oipota ñañedesanima, ha mbaʼérepa?

13 Sapyʼánte heta ermáno oñedesanima, ojepyʼapyeterei térã opensa ndovaleiha mbaʼeverã. Por ehémplo, peteĩ prekursóra ikatupyrýva heʼi: “Ndaikatúi aipeʼa che akãgui umi mbaʼe vai ajapo vaʼekue, upévare añeñandu vaieterei jepi. Apensa jave umi mbaʼe yma ajapo vaʼekuére, haʼete chéve ni Jehová ni avave ndacherayhumoʼãiva”.

14 ¿Mbaʼérepa Jehová siervokuéra apytépe oĩ oñedesanimáva? Oĩ inegativoitereíva. Por ehémplo, ndojeroviái voi ijehe ni nohaʼarõi mbaʼeve iporãva (Prov. 15:15). Sapyʼánte oĩ opensáva upéicha hasykatu rupi térã orekógui depresión.  Oiméramo nde rehasa hína koʼã mbaʼe, nemanduʼa vaʼerã oĩha peteĩ persóna ojaprovechaséva ne situasiónre nemokangy hag̃ua. ¿Mávapa oipota reñeñandu vai haʼéicha ku nanepohãveirõguáicha? (Rev. 20:10.) ¿Mávapa upe oipotáva reñedesanima ha reñentrega? Satanás. Haʼe direktoite ñandeataka térã jahechakuaaʼỹ hag̃uáicha. Ha ojapo upéva ñanembohasa asy ha ñanedesanima hag̃ua, ha amo ipahápe ñañentrega hag̃ua. Aníkena nderesarái, Jehová puévlo oñorairõ hína odefende hag̃ua ijerovia ha ohechauka hag̃ua iñeʼẽrenduha chupe.

15. ¿Mbaʼépa jajapo vaʼerã ani hag̃ua ñanekangy?

15 Aníkena reñentrega. Epensa umi mbaʼe porãita rehupytýtavare. Pablo heʼi vaʼekue umi kristiáno Corintoguápe: “Ñande nañanekaneʼõi, ñande rete oñembyaíramo jepe, ñande pyʼapy oñembopyahu ohóvo koʼẽ koʼẽre. Pe jehasa asy ningo ivevýi ha sapyʼami g̃uarãnte, péro péva rupive jahupytýta pe prémio tuichavéva ohóvo ha opa ára g̃uarãva” (2 Cor. 4:16, 17).

KOʼÁG̃AMA EJEPREPARA VAʼERÃ

Entéro kristiáno, imitãva térã kakuaa, ojeprepara vaʼerã odefende hag̃ua ogueroviáva (Ehecha párrafo 16)

16. ¿Mbaʼérepa tekotevẽ koʼág̃ama voi japrepara?

16 Jahecha haguéicha, Satanás ojevale hetaiterei ‘ñuhãre’ ñandereity hag̃ua (Efes. 6:11). Upévare, káda uno jasegi vaʼerã pe konsého oĩva 1 Pedro 5:9-pe: “Peñemoĩ mbaretéke ikóntrape ha pejerovia mbarete”. Upéva heʼise koʼág̃ama voi japrepara vaʼerãha ñane ménte ha ñane korasõ ikatu hag̃uáicha jajapo pe oĩ porãva. Por ehémplo, umi soldádo ojepokuaa ojapo heta ehersísio ipohýiva, ndaipóriramo jepe oamenasáva chupekuéra peteĩ gerrarã. Upeichaite avei ñane situasión. Ñande ndajaikuaái mbaʼeichagua ñorairõpa ñaneraʼãrõ. Koʼag̃aite ñaime hína trankílo porã. Upévare, jaaprovechákena jajeprepara hag̃ua  koʼág̃a guive. Espíritu sánto rupive Pablo oskrivi vaʼekue umi kristiáno Corintoguápe: “Pesegíkena pejesareko pendejehe pehecha hag̃ua peñakarama hatãpa pende jeroviáre. Pehechauka memékena mbaʼeichagua persónapa peẽ” (2 Cor. 13:5).

17. ¿Mbaʼéichapa ikatu jahecha ñañakarama hatãpa hína ñande jeroviáre?

17 Jahecha hag̃ua ñañakarama hatãpa hína ñande jeroviáre, heʼi haguéicha Pablo, tekotevẽ jajepyʼamongeta ha ñañeporandu: “¿Añemboʼe memépa? ¿Adefendépa kyhyjeʼỹme umi mbaʼe agueroviáva? Oĩ jave chejopýva ajapo hag̃ua ivaíva, ¿cheñeʼẽrendúpa Ñandejárape, térãpa ajapo che rapichakuéra oipotáva? ¿Añehaʼãpa ani hag̃ua ajavy ni peteĩ rreunión? ¿Chepasiénsiapa che ermanokuérare ojavy jave, haʼekuéra ipasiensiaháicha cherehe? ¿Arrespetápa umi ansiáno che kongregasionguápe ha umi ermáno odirihívape Ñandejára organisasión?”.

18, 19. ¿Mbaʼéichapa ikatu ojeprepara umi mitãrusu odefende hag̃ua ijerovia eskuéla térã koléhiope?

18 Koʼã porandu apytépe oĩ mokõi mbaʼe iñimportantetereíva: ñadefende umi mbaʼe jagueroviáva, ha ñaneñeʼẽrendu Ñandejárape yvyporakuérape rangue. Heta mitãrusu oservíva Jehovápe ojapo vaʼerã upéva eskuélape térã koléhiope. Haʼekuéra ipyʼaguasu ha noguerotĩri umi mbaʼe oroviáva, upévare kyreʼỹme opredika. Ñande rrevistakuérape osẽ jepi umi konsého oipytyvõtava chupekuéra. Por ehémplo, Ñemañaha 15 de mayo de 2013, páhina 6-pe ohechauka vaʼekue mbaʼépa ikatu heʼi pe mitãrusu ikompañéro oporandúramo chupe mbaʼérepa ndogueroviái pe evolusión. Tuvakuéra, peñensajákena pene família ndive ikatu hag̃uáicha oikuaa mbaʼéichapa oñedefendéta ikompañerokuéra ombaʼeporandu jave chupekuéra.

19 Sapyʼánte ijetuʼu voínte ñandéve ñadefende hag̃ua ñande jerovia, térã jajapo hag̃ua ambue mbaʼe Jehová ojeruréva ñandéve. Por ehémplo, ñambaʼapo heta rire, sapyʼánte ñandekaigueséma jaha hag̃ua rreunionhápe, térã ñaneateʼỹ jepi ñapuʼã hag̃ua pyhareve jaha hag̃ua japredika. Péro jajepokuaáramo jajesakrifikaʼimi koʼã mbaʼépe, ñaiméta preparádo ñambohovái hag̃ua umi mbaʼe ijetuʼuvéva.

20, 21. a) ¿Mbaʼérepa iporã jajepyʼamongeta Jesucristo sakrifísiore? b) ¿Mbaʼépa ñañehaʼãmbaite vaʼerã jajapo?

20 Péro, ¿mbaʼéichapa ñambohováita umi mbaʼe ikatúva ñanemokangy saʼi saʼípe ha jahechakuaaʼỹre? ¿Mbaʼépa ñanepytyvõta ani hag̃ua ñañedesanima? Jajepyʼamongeta vaʼerã Jesús sakrifísiore. Pablo ojapo vaʼekue upéva. Haʼe sapyʼánte oñeñandu vai vaʼekue pekadór haguére, péro oikuaa porã Cristo ojesakrifika hague osalva hag̃ua yvyporakuéra pekadórpe. Upévare oskrivi: “Añetehápe koʼág̃a aiko hína yvypóraicha ajerovia rupi Ñandejára Raʼýre, haʼe ningo cherayhu ha oñemeʼẽ cherehehápe” (Gál. 2:20). Pablo omombaʼeterei Jesús sakrifísio ha orrekonose osalva hague chupe.

21 Jahechakuaáramo Jehová omeʼẽ hague Itaʼýra káda persóna rehehápe, tuichaiterei ñanepytyvõta. Péro upéva ndeʼiséi ojeitamaha ñandehegui pe desánimo. Ikatu voi ñañedesanima mimi og̃uahẽ meve pe múndo pyahu. Péro ani ñañentrega. Ñanemanduʼákena umi oaguantáva ipahaite peve, orresivitaha pe prémio. Saʼietereíma ofalta Ñandejára Rréino omoĩ hag̃ua pyʼaguapy ha oipytyvõ hag̃ua yvyporakuéra iñeʼẽrendúvape ohupyty hag̃ua perfeksión. Ñañehaʼãmbaitékena jaike hag̃ua Ñandejára Rréinope, ñambohováiramo jepe heta mbaʼe ñanembohasa asýva.