Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Ñemañaha (ojestudiáva)  |  Septiembre de 2014

Ñane enemígo tuichavéva oñehundietéta

Ñane enemígo tuichavéva oñehundietéta

“Ñane enemígo ipahaite oñehundítava haʼe pe ñemano.” (1 COR. 15:26)

1, 2. a) ¿Mbaʼéichapa oiko vaʼekue Adán ha Eva iñepyrũme? b) ¿Mbaʼe porandúpa oñembohováita ko artíkulope?

IÑEPYRŨME Adán ha Eva ndorekói vaʼekue ni peteĩ enemígo. Haʼekuéra perfékto kuri ha oiko peteĩ lugár iporãitereívape. Hiʼarive haʼe vaʼekue Ñandejára família ha oiko porã hikuái hendive (Gén. 2:7-9; Luc. 3:38). Upéi Jehová omeʼẽ vaʼekue chupekuéra peteĩ traváho iñimportantetereíva, ha upéva ohechauka ñandéve areterei oikovetaha hikuái (elee Génesis 1:28). Jehová heʼi chupekuéra: “Pemyenyhẽ ko yvy ha pemoĩ pende poguýpe”. Okumpli hag̃ua hikuái ko mandáto, natekotevẽi vaʼekue oikove opa árare. Péro ikatu hag̃uáicha osegi oñangareko “opa mbaʼe oikovévare ko yvy ape ári”, tekotevẽ vaʼekue oikove hikuái heta tiémpore. Adán ha Eva ikatu kuri osegi ojapo upe traváho opa árare.

2 ¿Mbaʼérepa upéicharõ ñane situasión idiferentete koʼág̃arupi? ¿Mbaʼérepa oĩ hetaite mbaʼe ñandestorváva ani hag̃ua javyʼa? ¿Mbaʼéicha rupípa oñepyrũ vaʼekue oñemano? ¿Mbaʼépa ojapóta Ñandejára ohundi hag̃ua umi mbaʼe  ñanembosufrietéva? La Biblia ombohovaipaite koʼã porandu. Jahechamína mbaʼépa heʼi.

JEHOVÁ OAVISA PORÃ CHUPEKUÉRA

3, 4. a) ¿Mbaʼépa Jehová heʼi porã vaʼekue Adán ha Évape? b) ¿Mbaʼérepa tekotevẽ kuri iñeʼẽrendu hikuái Ñandejárape?

3 Adán ha Eva ikatu kuri oikove opa árare, péro upéva ndeʼiséi núnka ndaikatumoʼãiha omano. Jaikuaaháicha, osegi hag̃ua oikove hikuái, tekotevẽ orrespira, okaru, hoyʼu ha oke, ha iñimportanteveha katu, tekotevẽ oĩ porã hikuái Jehová ndive, pe omeʼẽ vaʼekue chupekuéra hekove (Deut. 8:3). Upévare Adán ha Eva tekotevẽ kuri iñeʼẽrendu Ñandejárape. Jehová ojapo mboyve Évape, heʼi porã vaʼekue Adánpe: “Ikatu reʼu opaichagua yva koʼapegua. Upe yva oikuaaukáva iporã ha ivaíva katu, nahániri. Cháke upéva reʼuha ára, remanóta” (Gén. 2:16, 17).

4 “Upe yva oikuaaukáva iporã ha ivaíva” orrepresenta pe derécho Jehová orekóva odesidi hag̃ua mbaʼépa oĩ porã ha mbaʼépa oĩ vai. Ñandejára ningo ojapo vaʼekue Adánpe ijoguaháramo ha omeʼẽ chupe peteĩ konsiénsia, upéicha rupi haʼe ikatu avei ontende mbaʼépa oĩ porã térã oĩ vai. Péro upe yvyramáta siémpre omomanduʼáta kuri Adán ha Évape iñeʼẽrendu vaʼerãha Jehovápe. Haʼekuéra hoʼúramo pe yva, haʼetéta heʼíva Ñandejárape: “Ore natekotevẽi rojapo nde eréva”. Adán ha Eva naiñeʼẽrenduvéivo Jehovápe, hoʼa vai chupekuéra ha enterove ifamiliarépe. Ñandejára oavisa porã kuri chupekuéra omanotaha idesovediénteramo.

OÑEPYRŨ OÑEMANO

5. ¿Mbaʼérepa Adán ha Eva naiñeʼẽrendúi Jehovápe?

5 Adán omombeʼu Évape mbaʼépa Jehová oproivi chuguikuéra, ha Eva ontende porã vaʼekue upéva. Upéicha rupi, pe mbói oñeʼẽrõ guare chupe ikatu kuri orrepeti palávra por palávra upe mandáto (Gén. 3:1-3). Péro añetehápe ndahaʼéi pe mbói la oñeʼẽva Évape, síno Satanás. Haʼe ndoipotái vaʼekue avave heʼi chupe ojapo vaʼerã ha orekose pe autorida Ñandejára orekóva (embojoja Santiago 1:14, 15 rehe). Ha okonsegi hag̃ua upéva, heʼi Ñandejárare ijapuha. Satanás heʼi Évape nomanomoʼãiha naiñeʼẽrendúi haguére, upéva rangue haʼetaha avei Ñandejáraicha (Gén. 3:4, 5). Eva oguerovia chupe ha hoʼu pe yva, ha péicha ohechauka avei ndoipotaveimaha Ñandejára ogoverna chupe. Upéi okonvense avei Adánpe hoʼu hag̃ua pe yva (Gén. 3:6, 17). Satanás tuichaiterei ombotavy chupe (elee 1 Timoteo 2:14). Adán oikuaáramo jepe noĩporãiha hoʼu upe yva, ojapo hembireko heʼíva. Pe mbói haʼetévaicha ivuénova, péro añetehápe Satanás hína pe oipurúva chupe. Haʼe ningo iñañaiterei ha oikuaa porã tuichaiterei operhudikataha yvyporakuérape upe ojapóva.

6, 7. ¿Mbaʼéichapa Jehová ohusga Adán ha Évape?

6 Jehová ningo ojapo vaʼekue Adán ha Évape ha omeʼẽ chupekuéra opa mbaʼe oikotevẽva. Haʼekuéra katu opensa ijehénte ha oñemoĩ Ñandejára kóntrape. Péro Jehová oikuaapaite la oikóva (1 Crón. 28:9; elee Proverbios 15:3). Upévare oheja Adán, Eva ha Satanáspe ohechauka mbaʼépa oreko ipyʼapýpe. Jehová ningo Ituvakuéra ha ombyasy asy ohechávo mbaʼépa ojapo ifamiliakuéra (embojoja Génesis 6:6 rehe). Péro Jehová haʼe avei peteĩ Hués hekojojáva ha ndaikatúi oheja rei upe oikóva, upévare okastigámante vaʼerã chupekuéra.

7 Ñandejára heʼi porã vaʼekue Adánpe: “Reʼuha ára [upe yva oikuaaukáva iporã  ha ivaíva], remanóta”. Ikatu oime Adán opensa raʼe omanotaha upe díape voi, kuarahy oike mboyve. Péro upe día opapotávo, “kaʼaruete yvytu piroʼy oipeju kangy asývo” Jehová oñeʼẽ jey Adán ha Évape (Gén. 3:8). Ñandejára ningo peteĩ Hués hekojojáva, upévare ohendu raẽ mbaʼépa heʼi umi akusádo oñedefende hag̃ua (Gén. 3:9-13). Upe rire okondena chupekuéra a péna de muérte (Gén. 3:14-19). Jehová ojukárire chupekuéra upepete voi, noñekumplimoʼãi kuri hembipota yvyporakuérape g̃uarã (Is. 55:11). Añetehápe, upe moménto guive pe pekádo oafektáma chupekuéra. Upéicharõ jepe, Ñandejára oheja Adán ha Évape oikove peteĩ tiémpore ikatu hag̃uáicha ifamília, ha umíva orekóta oportunida ohupyty jeývo heta mbaʼe porã. Péro opekaha ára guive, Adán ha Eva omanóma Jehovápe g̃uarã. Jaikuaaháicha, Ñandejárape g̃uarã mil áño haʼete un díante, ha upéicha rupi jaʼekuaa upe díape voi omanomaha hikuái (2 Ped. 3:8).

8, 9. ¿Mbaʼéichapa operhudika pe pekádo Adán familiarépe? (Ehecha pe taʼanga oĩva iñepyrũme.)

8 Adán ha Eva pekádo tuichaiterei operhudika entéro ifamiliarépe. Apóstol Pablo heʼi voi Romanos 5:12-pe: “Peteĩ kuimbaʼe rupive pe pekádo oike ko múndope, ha pe ñemano oike pekádo rupive. Upéicha pe ñemano ohupyty entéro kuimbaʼépe, enterovéva opeka rupi”. Pe primer yvypóra omano vaʼekue haʼe Abel (Gén. 4:8). Upe rire, mbeguekatúpe Adán família ha inietokuéra ituja avei ohóvo ha omano. ¿Mbaʼérepa upéva? Adán ha Eva ombohasa rupi chupekuéra pe pekádo. Pablo heʼi: “Peteĩ kuimbaʼe naiñeʼẽrendúi rupi heta héntegui oiko pekadór” (Rom. 5:19). Adán ha Eva káusare yvyporakuéra ogueronase pekádo ha upéicha rupi ñamano. Ndajaikuaáiramo jepe mbaʼéichapa oñembohasa pe pekádo, jahechakuaa ñandeafektaha enterovépe. Añetehápe yvypóra ndaikatúi ojehekýi ijehegui reínte pe pekádo ha ñemanógui.

9 Ndareíri la Biblia heʼi pe pekádo ha ñemano haʼeteha peteĩ “téla pohýi ojahoʼíva entéro tetãnguérape” (Is. 25:7, NM). Ko téla pohýi ojahoʼi ombopytupa hag̃uáicha yvypórape. La Biblia heʼi: “Adán káusare enterove omano” (1 Cor. 15:22). Upévare Pablo oporandu: “¿Máva piko chesalváta ko che retégui, chegueraháva hína ñemanóme?” (Rom. 7:24). ¿Ikatúnepa añetehápe oĩ omosãsóva Páblope pe ñemanógui? *

OPÁTA PEKÁDO HA ÑEMANO

10. a) ¿Mbaʼe téxtopa ohechauka Jehová oipeʼataha pe ñemano? b) ¿Mbaʼépa ñanemboʼe Jehová ha Jesúsgui koʼã téxto?

10 Jehová añoite ikatu kuri omosãso Páblope pe ñemanógui. Oñeʼẽ riremi pe “téla pohýi” ojahoʼívare yvyporakuérape, Isaías oskrivi: “Haʼe oipeʼaitéta pe ñemano, ha ñande Ruvicha Guasu Jehová omokãta enterove resay” (Is. 25:8, NM). Por ehémplo, umi túva pyaʼe voi oñehaʼã osolusiona umi mbaʼe ombosufríva ifamíliape ha mborayhúpe omokã chupe hesay. Upéicha avei Jehová oipeʼaitéta pe ñemano ñanderupytýva Adán káusare ha hetaitéma ñanembosufríva. Ha Jesús oipytyvõ chupe ojapo hag̃ua upéva. La Biblia heʼi: “Adán káusare enterove omano, upéicha avei Cristo rupive enterovépe oñemoingove jeýta” (1 Cor. 15:22). Pablo oporandu rire mávapa omosãsóta chupe pe ñemanógui, haʼe voi ombohovái:  “¡Aagradese Ñandejárape, ñande Ruvicha Jesucristo rupive!” (Rom. 7:25). Adán ha Eva naiñeʼẽrendúiramo jepe, Jehová osegi ohayhu yvyporakuérape, ha Jesús avei ohayhu enterovépe. Ani ñanderesarái haʼe oipytyvõ hague Itúvape ojapo hag̃ua pe primera paréhape (Prov. 8:30, 31). Péro, ¿mbaʼéichapa oñeguenohẽta yvypórape pekádo ha ñemano poguýgui?

11. ¿Mbaʼépa ojapo Jehová omosãso hag̃ua yvyporakuérape?

11 Adán opekárõ guare, Jehová okondena chupe a péna de muérte. Ha ikáusare entéro yvypóra onase imperfékto ha omano (Rom. 5:12, 16). Ñandejára Ñeʼẽ heʼi: “Peteĩ pekádo rupive [...] yvyporakuérape oñekondena” (Rom. 5:18). ¿Mbaʼépa ojapóta Jehová oipeʼa hag̃ua upe kondéna omboykeʼỹre iñeʼẽ? Jesús heʼi vaʼekue: “Pe Yvypóra Raʼy [...] ou [...] omeʼẽ hekove, opaga ha oguenohẽ hag̃ua hetápe pekádo poguýgui” (Mat. 20:28). Jesús ningo perfékto ha upéicha rupi ikatu opagapaite upe ojeperde vaʼekuére. ¿Mbaʼérepa jaʼekuaa Jehová nopyrũi hague iñeʼẽre oaseptávo Jesús sakrifísio repykue? (1 Tim. 2:5, 6.)

12. ¿Mbaʼérepa jaʼekuaa Jesús opagaha hustoite Adán operde vaʼekue?

12 Jesús ningo perfékto ha ikatu kuri oikove opa árare, ha Adán upéicha vaʼekue avei opeka mboyve. Péro Jehová oipota kuri ko yvy henyhẽ Adán familiarégui. Ha Jesús ohayhu rupi Itúvape ha Adán familiarépe, osakrifika hekove perfékto ikatu hag̃uáicha opagapaite Adán operde vaʼekue. Upe rire Jehová omoingove jey chupe, ndahaʼéi peteĩ yvypóraicha, síno peteĩ espírituicha (1 Ped. 3:18). Péicha Jesús opyta Adán rendaguépe, ha Jehová opyrũʼỹre iñeʼẽre oasepta isakrifísio ha omeʼẽ jey yvypórape oportunida ohupyty hag̃ua Adán operde vaʼekue. Jesús omeʼẽvo hekove perfékto, opaga hustoite pe vída perfékta Adán operde vaʼekue. Pablo heʼi: “‘Pe kuimbaʼe ypykue Adán, haʼe vaʼekue peteĩ yvypóra oikovéva’. Pe último Adán katu haʼe peteĩ espíritu oporomoingovéva” (1 Cor. 15:45).

Abel, pe primer kuimbaʼe omano vaʼekue, oñevenefisiáta avei Jesús sakrifísiogui (Ehecha párrafo 13)

13. ¿Mbaʼépa ojapóta koʼẽrõite “pe último Adán” umi omano vaʼekue rehehápe?

13 Koʼẽrõitéma ‘pe último Adángui’ oikóta “peteĩ espíritu oporomoingovéva” ha haʼe omeʼẽta jeikove opaveʼỹva Adán familiarépe. Upéva ohupytýta umi omano vaʼekuépe entéro. Jesús omoingove jeýta avei chupekuéra ko yvy ape ári (Juan 5:28, 29).

14. ¿Mbaʼéichapa yvyporakuéra ohupyty jeýta perfeksión?

14 ¿Mbaʼéichapa yvyporakuéra ohupyty jeýta pe perfeksión? Jehová oforma peteĩ goviérno yvágape oĩhápe “pe último Adán” ha 144.000 persóna ojeporavo vaʼekue yvyporakuéra apytégui (elee Apocalipsis 5:9, 10). Koʼã 144.000 ogovernátava Jesús ndive iñimperfékto vaʼekue oho mboyve yvágape, upéicha rupi oikuaa porãiterei mbaʼépa ohasa peteĩ persóna imperfékta. Mil áño pukukue haʼekuéra ha Jesús oipytyvõta enterove yvypórape ohupyty hag̃ua pe perfeksión (Apoc. 20:6).

15, 16. a) ¿Mbaʼérepa jaʼekuaa pe ñemano haʼeha ñane ‘enemígo pahaite’, ha arakaʼépa ojepeʼaitéta? b) Heʼiháicha 1 Corintios 15:28, ¿mbaʼépa ojapóta Jesús pe mil áño rire?

15 Ohasávo mil áño, yvyporakuéra isãsótama pekádo ha ñemanógui. Pablo heʼi: “Adán káusare enterove omano, upéicha avei Cristo rupive enterovépe oñemoingove jeýta. Péro káda uno oikove jeýta otoka vove chupe: Cristo raẽve oñemoingove jey, upéi umi haʼéva Cristo mbaʼe [umi ogovernátava hendive] oñemoingove jeýta haʼe oĩ aja. Upe rire ipahaitépe haʼe omeʼẽta pe Rréino Itúva Ñandejárape, ohundipaite rire entéro goviérno,  autorida ha podér. Haʼe ogoverna vaʼerã Ñandejára omoĩ meve ipy guýpe entéro iñenemigokuérape. Ha ñane enemígo ipahaite oñehundítava haʼe pe ñemano” (1 Cor. 15:22-26). Péicha, pe ‘enemígo pahaite’ ñanderupyty vaʼekue Adán káusare, oñehundietéta. Pe “téla pohýi” ojahoʼi ha ombosufríva entéro yvypórape, ojepeʼaitéta (Is. 25:7, 8).

16 Upéi apóstol Pablo heʼi avei: “Oñemoĩ vove ipoguýpe opa mbaʼe, upévo pe Taʼýra oñemoĩta avei Ñandejára poguýpe, haʼe ningo Upe omoĩ vaʼekue opa mbaʼe Cristo poguýpe. Upéicha Ñandejára añoite omoakãta opa mbaʼe” (1 Cor. 15:28). Upéramo g̃uarã oñekumplipátama opa mbaʼe ojehupytyse vaʼekue Jesús goviérno rupive. Upe rire haʼe ontrega jeýta pe goviérno Jehovápe, ha avei entéro yvypóra oĩva ipoguýpe ha ohupytýmava pe perfeksión.

17. ¿Mbaʼépa oikóta Satanásgui?

17 ¿Ha mbaʼépa oikóta Satanásgui? Apocalipsis 20:7-15 omombeʼu oñemohuʼã rire mil áño, Satanás oñehaʼã jeytaha omoñuhã umi yvypórape, haʼétamava perfékto upérõ g̃uarã. Upe rire Satanás ha opaite umi omoirũva chupe oñehundietétama. La Biblia ohenói upévape “ñemano mokõiha” térã muérte segunda (Apoc. 21:8). Umi ohupytýva pe “ñemano mokõiha” arakaʼeve ndoikovemoʼãvéima. Péro umi iñeʼẽrendúvape ha ohayhúvape Jehovápe, núnka ndohupytymoʼãi pe ñemano mokõiha.

18. ¿Mbaʼéichapa ojejapóta pe tembiapo Jehová omeʼẽ ypy vaʼekue Adánpe?

18 Opavave yvypóra ohupytýta perfeksión ha Ñandejára omeʼẽta chupekuéra jeikove opaveʼỹva. ¡Ndaiporimoʼãvéima mbaʼeve ostorváva chupekuéra ovyʼa hag̃ua! Pe tembiapo Jehová omeʼẽ vaʼekue Adánpe ikatúta ojejapopa. Ko yvy henyhẽta idesendientekuéragui, ha vyʼapópe oñangarekóta hikuái ko yvýre ha umi animál rehe. ¡Ajépa javyʼaite jaikuaávo Jehová oipeʼaitetaha ñane enemígo tuichavévape, pe ñemano!

^ párr. 9 Pe lívro Perspicacia para comprender las Escrituras, oñeʼẽvo umi sientífiko oñehaʼãvare omyesakã mbaʼérepa ñandetuja ha ñamano, heʼi: “Haʼekuéra ndohechakuaái ñande Apohare voi okondena hague Adán ha Évape omano hag̃ua. Avei haʼe oñenkarga oñekumpli hag̃ua upe kondéna yvyporakuéra ikatuʼỹ hag̃uáicha ontendepa” (volúmen 2, páhina 1.200).