Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Ñemañaha (ojestudiáva)  |  Septiembre de 2014

Ñamombaʼékena umi oservívape de tiémpo kompléto

Ñamombaʼékena umi oservívape de tiémpo kompléto

“Oremanduʼa meme [...] pe tembiapo pejapóvare pende jerovia rupive; mbaʼeichaitépa peñehaʼã peporohayhu rupi.” (1 TES. 1:3)

1. ¿Mbaʼépa heʼi Pablo umi oñemeʼẽmbaitévare pe predikasión rehehápe?

APÓSTOL Pablo omombaʼeterei vaʼekue umi oñemeʼẽmbaitévape pe marandu porã rehehápe. Haʼe heʼi: “Oremanduʼa meme ñande Ru Ñandejára renondépe pe tembiapo pejapóvare pende jerovia rupive; mbaʼeichaitépa peñehaʼã peporohayhu rupi, ha peaguanta heta mbaʼe perekógui esperánsa ñande Ruvicha Jesucrístore” (1 Tes. 1:3). Jehová ovaloraiterei avei umi oservívape chupe ipyʼaite guive, tahaʼe haʼéva isituasión ha ojapóma guive opa ikatúva (Heb. 6:10).

2. ¿Mbaʼépa ñahesaʼỹijóta ko artíkulope?

2 Ymaite guive oĩ heta ermáno ojesakrifikáva ikatu hag̃uáicha oservi Jehovápe de tiémpo kompléto. Ñepyrũrã ñahesaʼỹijóta umi ehémplo primer síglope guare, ha upéi katu jahecháta mbaʼéichapa heta kristiáno ñane tiempopegua oservi de tiémpo kompléto ha mbaʼéichapa ikatu ñaipytyvõ chupekuéra.

SÍGLO PRIMÉROPE

3, 4. a) ¿Mbaʼéichapa oservi vaʼekue Jehovápe heta kristiáno primer síglope? b) ¿Mbaʼéichapa oñemantene vaʼekue umi siérvo de tiémpo kompléto?

3 Jesús ojevautisa riremi, oñepyrũ omombeʼu pe marandu porã oñemog̃uahẽtava upe rire ko yvy tuichakuére (Luc. 3:21-23; 4:14, 15, 43). Upéi haʼe omano, péro ijapostolkuéra osegi opredika ha odirihi pe tembiapo (Hech. 5:42; 6:7). Oĩ vaʼekue kristiáno ohejáva  hóga ikatu hag̃uáicha oho oservi de predikadór térã misionéroramo. Por ehémplo, Felipe opredika vaʼekue heta siudárupi oĩva Palestínape (Hech. 8:5, 40; 21:8). Pablo avei mombyrymbyry ogueraha pe marandu porã (Hech. 13:2-4; 14:26; 2 Cor. 1:19). Upéi oĩ umi kristiáno ohai vaʼekue Ñandejára Ñeʼẽ, umíva apytépe Marcos ha Lucas. Ha oĩ avei umi oservíva de sekretário umi oskrivívape la Biblia, por ehémplo Silvano (Silas) (1 Ped. 5:12). Oĩ vaʼekue ermanakuéra oipytyvõ meméva koʼã kuimbaʼe oservívape ipyʼaite guive Ñandejárape (Hech. 18:26; Rom. 16:1, 2). Escrituras Griegas Cristiánaspe henyhẽte umi kristiáno iñeʼẽrendúva rembiasakue, ha umíva ohechauka Jehová omombaʼetereiha isiervokuérape ha oñangarekoha hesekuéra.

4 Péro, ¿mbaʼéichapa oñemantene raʼe umi oservíva de tiémpo kompléto síglo primérope? Pablo ha iñirũnguéra por ehémplo ombaʼapo mimi vaʼekue. Haʼekuéra ndojeruréi umi ermánope omantene hag̃ua chupekuéra, upéicharõ jepe heta vése oipytyvõ jepi hikuái (1 Cor. 9:11-15). Oĩ oinvitáva chupekuéra okaru hag̃ua térã opyta hag̃ua hendivekuéra hógape. Sapyʼánte pe kongregasión kompletoite voi oipytyvõse koʼã kristiánope (elee Hechos 16:14, 15 ha Filipenses 4:15-18).

ÑANE TIÉMPOPE

5. ¿Mbaʼéichapa oñeñandu peteĩ matrimónio oservi haguére de tiémpo kompléto?

5 Koʼág̃arupi avei heta ermáno ojesakrifika ikatu hag̃uáicha oservi de tiémpo kompléto Jehovápe (ehecha pe rrekuádro “ Umi servísio de tiémpo kompléto”). ¿Mbaʼépa opensa hikuái pe odesidi vaʼekuére? Eporandumína chupekuéra. Katuete nemokyreʼỹta hikuái. Jahechamína mbaʼépa heʼi peteĩ ermáno oñepyrũ vaʼekue oservi de prekursór rregulár, upéi ojapo prekursorádo espesiál, oservi de misionéro ha koʼág̃a ombaʼapo Betélpe ótro tetãme. Haʼe omombeʼu: “Nambyasýi adesidi haguére aservi de tiémpo kompléto. Arekórõ guare 18 áño ndaikuaái vaʼekue ahátapa universidápe, ajagarrátapa peteĩ traváho oipeʼaitereítava chehegui che tiémpo, térãpa ajapóta che prekursorádo. Heta apensa vaʼekue adesidi hag̃ua, péro ahechakuaa Jehová arakaʼeve ndahesarairiha umi sakrifísio jajapóvagui jaservi hag̃ua chupe de tiémpo kompléto. Jehová chepytyvõ aipurupaite hag̃ua che kapasida ha aimoʼãʼỹháicha. Upéva ni mbaʼevéicharõ ndahupytymoʼãi kuri aime rire ko múndope”. Hembireko katu heʼi: “Káda asignasión rorekóva chepytyvõ chembareteve hag̃ua. Pyʼỹinte rohecha mbaʼéichapa Jehová oregia ha oñangareko orerehe. Hetaiterei mbaʼe porã rojavymoʼã ndorojagarráirire ore servísio de tiémpo kompléto. Káda día aagradese Jehovápe ikatu haguére roipurupaite ore tiémpo iservísiope”. ¿Nahiʼãipa ndéve reservi avei péicha?

6. ¿Mbaʼépa Jehová opensa káda únore?

6 Naentéroi ningo ikatu oservi de tiémpo kompléto. Por ehémplo ikatu oime ne situasión ijetuʼu ha ndaijái ndéve koʼag̃aite. Péro, tahaʼe haʼeháicha, Jehová omombaʼeterei umi sakrifísio rejapóva iservísiope. Pablo ohaírõ guare umi kristiáno Colosasguápe, oguerahauka salúdo enterovépe ha heta ermánore imanduʼa hérarupi voi (elee Filemón 1-3). Péicha ohechauka omombaʼetereiha chupekuéra ombaʼapo porã haguére oikóvo. Ha Jehová peichaite avei opensa hesekuéra. Ñande Ru yvagapegua omombaʼeterei avei opa mbaʼe nde rejapóva iservísiope. Péro ¿mbaʼéichapa ikatu opavavénte ñaipytyvõ umi ermáno oservívape de tiémpo kompléto?

MBAʼÉICHAPA IKATU ÑAIPYTYVÕ UMI PREKURSÓRPE

7, 8. a) ¿Mbaʼépa ojapo umi prekursór? b) ¿Mbaʼéichapa ikatu ñaipytyvõ chupekuéra?

7 Ojapo haguéicha umi predikadór síglo primero guare, koʼág̃arupi umi prekursór omombarete kongregasionkuéra. Heta oĩ opredikáva 70 óra káda mes omog̃uahẽ hag̃ua pe marandu porã umi héntepe. ¿Mbaʼéichapa ikatu ñaipytyvõ chupekuéra?

8 Peteĩ prekursóra hérava Shari omombeʼu: “Ore ningo rosẽ ropredika káda día, upéicha  rupi oĩ opensáva naorekangyiha. Péro añetehápe, roikotevẽ jepi oremokyreʼỹ vaʼerã” (Rom. 1:11, 12). Ótra ermána oservi vaʼekue heta áñore de prekursóra, heʼi umi prekursór ikongregasionguáre: “Haʼekuéra ombaʼapo jejopy ha ndopytuʼúi. Upévare oagradeseterei oĩramo ogueraháva chupekuéra iveíkulope predikasiónpe, oinvitárõ okaru hag̃ua térã omeʼẽ chupekuéra plataʼimi opaga hag̃ua ikombustívle térã ambue mbaʼére. Péicha jahechauka koʼã ermánope ñañeinteresaha hesekuéra”.

9, 10. ¿Mbaʼépa ojapo jepi ermanokuéra oipytyvõ hag̃ua umi prekursór oĩvape ikongregasiónpe?

9 Tuicha ñaipytyvõta avei umi prekursórpe ñasẽramo japredika hendivekuéra. Peteĩ prekursóra hérava Bobbi heʼi: “Roikotevẽterei ningo osẽ vaʼerã opredika orendive éntre semána”. Ótra prekursóra ikongregasiongua heʼi avei: “Hasyeterei rotopa hag̃ua osẽ vaʼerã opredika orendive kaʼarukue”. Peteĩ ermána oservi vaʼekue heta tiémpo de prekursóra ha ombaʼapóva koʼág̃a Betel de Broóklynpe heʼi: “Chemanduʼa peteĩ ermána iveíkulova heʼími hague chéve: ‘Reikotevẽ jave ne irũrã, cherenóintema, che asẽta nendive predikasiónpe’. Upéicha, ko ermána tuichaiterei chepytyvõ asegi hag̃ua che prekursorádope”. Shari heʼi avei: “Umi prekursór soltéro térã soltéra heta vése opytáma haʼeño pe predikasión rire. Iporãitereíta ningo ñainvita mimíramo chupekuéra ñande estúdio de famíliape, térã okomparti hag̃ua ñanendive jajapo jave ambue mbaʼe”.

10 Peteĩ ermána ojapóma más de 50 áño oservi hague de tiémpo kompléto. Haʼe imanduʼa oservi tiémpope ambue prekursorakuéra soltéra ndive mbaʼéichapa umi ansiáno pyʼỹinte ovisita umi prekursórpe. Ko ermána omombeʼu: “Umi ansiáno oporandúmi oréve mbaʼéichapa roiko, oreresãintepa ha mbaʼetekópa oho oréve ore servísiope. Oikuaase hikuái mbaʼépa orepyʼapy ha mbaʼépa ofalta oréve. Koʼã ermáno oñeinteresa orerehe ipyʼaite guive”. Umi ansiáno ha ambue ermáno ipyʼaporãva osegi Onesíforo ehémplo. Haʼe oipytyvõ vaʼekue Páblope, jepe oñangareko vaʼerã avei hogayguakuérare (2 Tim. 1:18).

11. ¿Mbaʼépa ojapo umi prekursór espesiál?

11 Heta kongregasiónpe oĩ prekursór espesiál, ha upéva ombovyʼaiterei umi ermánope. Koʼã prekursór ningo opredika 130 óra káda  mes ha oipytyvõ heta hendáicha kongregasiónpe. Péicha rupi nahembyvéima voi chupekuéra tiémpo ombaʼapo hag̃ua ikatu hag̃uáicha oñemantene. Upévare, pe sukursál oipytyvõ chupekuéra opaga hag̃ua igásto, ha péicha okumpli porãve hikuái iservísio.

12. ¿Mbaʼéichapa umi ansiáno ha umi ótro ermáno ikatu oipytyvõ umi prekursór espesiálpe?

12 ¿Mbaʼéichapa ikatu ñaipytyvõ umi prekursór espesiálpe? Peteĩ ansiáno oservíva Betélpe ha oñekomunika meméva umi prekursór ndive, heʼi: “Iñimportanteterei ningo umi ansiáno oñemongeta meme umi prekursór espesiál ndive. Oikuaa vaʼerã mbaʼe situasiónpepa oĩ hikuái ha mbaʼéichapa ikatu oipytyvõ chupekuéra. Heta ermáno opensa Betel oipytyvõ haguére ekonómikamente umi prekursór espesiálpe, haʼekuéra noikotevẽveimaha mbaʼeve. Péro ndahaʼéi upéicha. Hetaiterei hendáicha ikatu ñaipytyvõ chupekuéra”. Umi prekursór espesiál oagradeseterei oĩramo ermáno omoirũ vaʼerã chupekuéra predikasiónpe oikotevẽ jave. ¿Ikatúpa nde rejapo upéva?

MBAʼÉICHAPA IKATU ÑAIPYTYVÕ UMI SUPERINTENDÉNTE DE SIRKUÍTOPE

13, 14. a) ¿Mbaʼérepa iporã ñañeinteresa avei umi superintendénte ha hembirekóre? b) ¿Mbaʼépa nde ikatu rejapo reipytyvõ hag̃ua koʼã ermánope?

13 Umi superintendénte ha hembireko ningo ojerovia mbarete Ñandejárare ha haʼete voi mbaʼeve nomokangymoʼãiva chupekuéra. Péro koʼã ermáno oikotevẽ avei oñemokyreʼỹ ha oñemoirũ chupekuéra predikasiónpe. Avei ovyʼa hikuái ohasávo tiémpo umi ermánondi ha ojedivertise hendivekuéra. Sapyʼánte hasy térã oñeinterna jave hikuái, iporãta javisita ha jahechauka ñañeinteresaha hesekuéra. Yma Lucas, pe oskrivi vaʼekue lívro de Hechos ha “haʼéva doktór”, oñangareko porã vaʼekue Pablo ha iñirũnguérare. ¡Ajépa iporãite iñehémplo! (Col. 4:14; Hech. 20:5–21:18.)

14 Umi superintendénte ha hembireko oikotevẽ avei iñamigorã. Peteĩ superintendénte de sirkuíto oskrivi: “Che amigokuéra haʼetévaicha voi oikuaáva aikotevẽ jave chemokyreʼỹ vaʼerã. Oikuaa mbaʼépa heʼíta chéve hikuái amombeʼu hag̃ua chupekuéra mbaʼéichapa añeñandu. Cherendu haguénte hikuái tuichaitereíma añeñandu porãve”. Umi superintendénte ipyʼaite guive oagradese umi ermáno oñeinteresa haguére hesekuéra.

MBAʼÉICHAPA IKATU ÑAIPYTYVÕ UMI VETELÍTAPE

15, 16. a) ¿Mbaʼépa ojapo umi ermáno ombaʼapóva Betélpe ha umi lugár de Asambléape? b) ¿Mbaʼéichapa ikatu ñaipytyvõ koʼã ermánope?

15 Oĩ heta ermáno ha ermána oservíva Betélpe térã umi lugár de Asambléape. Pe tembiapo ojapóva hikuái iñimportanteterei oñemotenonde hag̃ua Ñandejára Rréino. ¿Mbaʼéichapa ikatu ñaipytyvõ koʼã ermánope oĩrõ ñane kongregasión térã ñande sirkuítope?

16 Koʼã ermáno oúvo ombaʼapo Betélpe, katuete ohechagaʼu iñamígo ha ihentekuérape. Upévare oñeñandu porãve hikuái umi ótro vetelíta ha umi ermáno ikongregasión pyahupegua otrata porãrõ chupekuéra ha oñamiga hesekuéra (Mar. 10:29, 30). Umi vetelítape oñemeʼẽ avei tiémpo oho hag̃ua rreunionhápe ha osẽ hag̃ua opredika káda semána, péro sapyʼánte opyta vaʼerã okumpli iñasignasión Betélpe. Umi ermáno ikongregasionpegua oñehaʼã vaʼerã ontende upéva. Ohechauka vaʼerã ovaloraha chupekuéra ha omombaʼeha itraváho (elee 1 Tesalonicenses 2:9).

MBAʼÉICHAPA IKATU ÑAIPYTYVÕ UMI OSERVÍVAPE ÓTRO PAÍSPE

17, 18. ¿Mbaʼe tembiapópa ojapo umi oservíva de tiémpo kompléto ótro paíspe?

17 Heta ermáno oĩva tiémpo komplétope ova oservi hag̃ua ótro paíspe. Heta vése tekotevẽ oaprende hikuái ótro idióma, ojepokuaa vaʼerã kostúmbre ha tembiʼu idiferéntevare. Sapyʼánte umi lugár rupi ndaiporiguasúi komodida ha ndojeikói haʼekuéra ojepokuaaháicha. ¿Mbaʼéicha rupípa ova hikuái ótro paíspe? ¿Mbaʼéichapa haʼekuéra oipytyvõ umichahárupi?

 18 Ijapytepekuéra oĩ misionéro oipuru meméva itiémpo opredika hag̃ua. Haʼekuéra ningo orekóma heta experiénsia ha oñembokatupyry porã chupekuéra, upéicha rupi tuicha oipytyvõ umi kongregasiónpe. Pe sukursál omoĩ koʼã ermánope peteĩ óga sensillomi oiko hag̃ua ha oipytyvõ chupekuéra opaga hag̃ua igásto. Oĩ avei ohóva oservi Betélpe térã ombaʼapóva oñemopuʼã hag̃ua sukursál, ofisína de traduksión, Salón de Asambléa ha Salón del Reino. Pe sukursál upe tetãmegua térã pe kongregasión upepegua omoĩ chupekuéra viviénda, hiʼupy ha ambue mbaʼe oikotevẽva. Umi vetelítaicha avei, koʼã ermánope oñemeʼẽ tiémpo osẽ hag̃ua opredika ha oho hag̃ua rreunionhápe. Ha umi kongregasión ovyʼaiterei koʼã ermáno oservi haguére hendivekuéra.

19. ¿Mbaʼéichapa ikatu jahechauka javaloraha umi ermáno oúvape oservi de tiémpo kompléto ñane retãme?

19 ¿Mbaʼéichapa ikatu jahechauka javaloraha umi ermáno oúvape oservi de tiémpo kompléto ñane retãme? Ikatu ningo ñepyrũrã ndojepokuaái hikuái ñane rembiʼúre. Upéicha jave ñanembaʼerechakuaa vaʼerã hendivekuéra. Por ehémplo, ñainvitáramo koʼã ermánope okaru hag̃ua, ikatu ñaporandu chupekuéra otanteasépa peteĩ tembiʼu ndoprováiva gueteri, térãpa oĩ álgo ndoʼuséiva. Avei ñanepasiénsia vaʼerã hesekuéra oñehaʼã jave oaprende ñane kostúmbre ha ñane idióma. Ñepyrũrã ikatu nontendepái hikuái umi mbaʼe jaʼéva, péro ikatu ñaipytyvõ koʼã ermánope opronunsia porã hag̃ua umi palávra. Ani ñanderesarái haʼekuéra oĩha oaprende hag̃uáicha.

20. ¿Mbaʼéichapa ikatu ñaipytyvõ umi oservívape de tiémpo kompléto ha ituvakuérape?

20 Heta kristiáno oservíva de tiémpo kompléto ohecha vaʼerã mbaʼéichapa oñangarekóta ituvakuéra ijedávare. Ha oiméramo haʼekuéra Testígo avei, ndoipotamoʼãi ifamília oheja iñasignasión oñatende hag̃uánte hesekuéra (3 Juan 4). Katuete ningo ifamília ojapóta opa ikatúva ovisita hag̃ua chupekuéra ha oñangareko hag̃ua hesekuéra. Péro umi Testígo oikóva ag̃ui koʼã ermáno tuvakuéragui, ikatu hína oipytyvõ tekotevẽ jave. Jahechakuaa vaʼerã umi oservíva de tiémpo kompléto tuicha oipytyvõha hína ojejapo hag̃ua pe traváho iñimportantevéva ko tiémpope (Mat. 28:19, 20). ¿Ikatúpa nde térã ne kongregasión peipytyvõ koʼãichagua ermánope ha peñangareko ituvakuéra hasy térã ijedávare?

21. ¿Mbaʼéichapa oñeñandu umi oservíva de tiémpo kompléto oñepytyvõ ha oñemokyreʼỹvo chupekuéra?

21 Heta persóna ombaʼapo jejopy ipláta hetaségui, péro umi oservíva de tiémpo kompléto ombaʼapo kyreʼỹ Jehová ha hapichakuéra rehehápe. Haʼekuéra oagradeseterei ñaipytyvõ jave chupekuéra. Peteĩ ermána oservíva ótro paíspe heʼi: “Peteĩ nóta de agradesimiénto jepe tuichaiterei mbaʼéma chéve g̃uarã. Péicha ahechakuaa umi ermáno cherayhu ha omombaʼeha pe ajapóva”.

22. ¿Mbaʼépa repensa pe servísio de tiémpo komplétore?

22 Umi oservíva de tiémpo kompléto oiporavo pe traváho iporãvéva ha oporombovyʼáva. Haʼekuéra ohasa heta mbaʼe opreparámava chupekuéra oiko hag̃ua Ñandejára Rréino poguýpe. Upépe opavavénte oipurupaitéta itiémpo Jehová servísiope. Upéicharõ, javalorákena umi oservívape de tiémpo kompléto Pablo ojapo haguéicha. Haʼe heʼi: “Oremanduʼa meme [...] pe tembiapo pejapóvare pende jerovia rupive; mbaʼeichaitépa peñehaʼã peporohayhu rupi” (1 Tes. 1:3).