Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Ñemañaha (ojestudiáva)  |  Agosto de 2014

¿Reaprovechápa pe “hiʼupy hiʼoraitépe” rerresivíva?

¿Reaprovechápa pe “hiʼupy hiʼoraitépe” rerresivíva?

KOʼÁG̃A ningo jaiko pe tiémpo ijetuʼuvévape (2 Tim. 3:1-5). Káda día jahasa heta situasión ñandejopýva jajapo hag̃ua ivaíva ha ñatraisiona hag̃ua Jehovápe. Jesús oprofetisa vaʼekue oikotaha koʼã mbaʼe, péro opromete avei isegidorkuérape omombaretetaha chupekuéra oaguanta hag̃ua og̃uahẽ meve pe fin (Mat. 24:3, 13; 28:20). Upévare onombra peteĩ tembiguái jeroviaha omeʼẽva idisipulokuérape “hiʼupy hiʼoraitépe” ikatu vaʼerã omombarete ijerovia (Mat. 24:45, 46).

Pe tembiguái jeroviaha oñenombra vaʼekue áño 1919-pe, ha upe guive hetaiterei umi ‘ótro tembiguaikuéra’ oñeʼẽva diferénte idiómape, oñeuni Ñandejára organisasión ndive ha orresivi hiʼupy omombaretéva ijerovia (Mat. 24:14; Apoc. 22:17). Upéicharõ jepe, oiméne jahechakuaa umi informasión ndaiporiha entéro idiómape. Avei naentéroi umi hénte ikatu omboguejy pe informasión oúva Internet rupive, tahaʼe umi vidéo térã artíkulo oguerúva jw.org. ¿Heʼisépa upéva umi ndorekóiva koʼã informasión ndohupytyiha pe aliménto espirituál oikotevẽva osegi hag̃ua ojerovia mbarete? Ñantende porã hag̃ua upéva ñambohovái vaʼerã cuatro porandu.

 1. ¿Mbaʼépa pe ingrediénte iñimportantevéva oĩva pe aliménto Jehová omeʼẽvape?

Satanás heʼírõ guare Jesúspe ojapo hag̃ua pan itágui, Jesús ombohovái chupe: “Yvypóra noikotevẽi pan rehe añónte oikove hag̃ua, oikotevẽ guei opaite mbaʼe Jehová heʼívare” (Mat. 4:3, 4). ¿Ha moõpa ikatu jajuhu umi mbaʼe Jehová heʼíva? La Bíbliape (2 Ped. 1:20, 21). Péicha jahecha la Biblia haʼeha pe ingrediénte iñimportantevéva Jehová oipurúva (2 Tim. 3:16, 17).

Jehová organisasión oguenohẽ pe Traducción del Nuevo Mundo de las Santas Escrituras hetaiterei idiómape. Ikatu oñekonsegi mas de 120 idiómape, tahaʼe en párte térã kompletoite, ha ojetradusi ohóvo hetave idiómape káda áño. Hiʼarive la Biblia ikatu ñakonsegi hetaiterei versiónpe, en párte térã kompletoite heta idiómape. Jahechaháicha, koʼã mbaʼe ojehupyty oñekumpli hag̃ua Ñandejára oipotáva. “Haʼe oipota opaichagua tapicha ojesalva ha oikuaa porã pe añetegua.” (1 Tim. 2:3, 4.) Añetehápe, “ndaipóri mbaʼeve ni avave okañýva chugui”, upévare jaikuaa porã Jehová katuete omoag̃uitaha ijehe ‘umi ohechakuaávape oikotevẽha’ hese, ha omeʼẽta chupekuéra pe aliménto oikotevẽhaichaite (Heb. 4:13; Mat. 5:3, 6; Juan 6:44; 10:14).

2. ¿Mbaʼéichapa umi puvlikasión vívlika ñanepytyvõ avei ñamombarete hag̃ua ñande jerovia?

Ñamombarete hag̃ua ñande jerovia, ndahaʼéi jaleénte vaʼerã la Biblia. Tekotevẽ avei ñantende la jaleéva ha jajapo pe ñaaprendéva (Sant. 1:22-25). Peteĩ funsionário Etiopiagua síglo primero guare ohechakuaa vaʼekue upéva. Haʼe olee jave Ñandejára Ñeʼẽ, Felipe oñemboja ha oporandu chupe: “¿Añetehápe piko rentende upe releéva?”. Pe kuimbaʼe heʼi: “¿Mbaʼéicha piko antendéta, ndaipóriramo omyesakãva chéve?” (Hech. 8:26-31). Upéi Felipe oipytyvõ chupe ontende porã hag̃ua Ñandejára Ñeʼẽ, ha pe añetegua opoko rupi ikorasõre, odesidi ojevautisa (Hech. 8:32-38). Upéicha avei oiko ñanderehe. Ñane puvlikasionkuéra ñanepytyvõ ñantende porã hag̃ua pe añetegua oĩva la Bíbliape, ha upéva ñanemomýi jajapo hag̃ua pe ñaaprendéva (Col. 1:9, 10).

Umi puvlikasión rupive, Jehová siervokuéra orresivi hetaiterei aliménto omombaretéva ijerovia (Is. 65:13). Por ehémplo, pe rrevísta Ñemañaha osẽ mas de 210 idiómape. Pype oñemyesakã umi profesía, ñanepytyvõ ñantende hag̃ua umi mbaʼe hypyʼũva oĩva la Bíbliape, ha jaiko hag̃ua upépe heʼiháicha. Pe rrevísta ¡Despertad! katu oñeguenohẽ 100 idiómaperupi, ha omombeʼu heta detálle Jehová rembiapokuégui, ha ohechauka mbaʼéichapa ikatu jasegi umi konsého oĩva la Bíbliape (Prov. 3:21-23; Rom. 1:20). Pe tembiguái jeroviaha omeʼẽ ñandéve puvlikasión mas de 680 idiómape. ¿Reñemotiémpopa relee hag̃ua la Biblia káda día? ¿Releépa káda rrevísta ha káda puvlikasión osẽ ramóva ne idiómape?

Jahechaháicha, Ñandejára organisasión ojapo heta puvlikasión. Péro avei oprepara hetaiterei voského oñeʼẽva umi téma vívlikore, ojepurúva umi rreunión ha asambleahápe. ¿Ndegustápa umi diskúrso, dráma, demostrasión ha entrevísta? Koʼã mbaʼe ningo haʼete peteĩ karuguasu Jehová opreparáva ñandéve g̃uarã (Is. 25:6).

 3. ¿Ofaltátapa ndéve aliménto espirituál ndaipóriramo ne idiómape entéro umi puvlikasión?

Nahániri. Oiméne jahechakuaa heta ermáno orekoveha aliménto espirituál ótrogui. ¿Mbaʼérepa upéva? Ñapensamíntena umi apóstol rehe. Haʼekuéra orresivi vaʼekue hetave informasión ambue disípulogui (Mar. 4:10; 9:35-37). Péro upéva ndeʼiséi ofaltaha umi ótrope hiʼupy omombarete hag̃ua ijerovia. Enterovéva ningo ohupytypaite kuri pe oikotevẽva (Efes. 4:20-24; 1 Ped. 1:8).

Avei ñanemanduʼa vaʼerã la Bíbliape noñemoĩri hague opaite mbaʼe Jesús heʼi ha ojapo vaʼekue oikórõ guare ko yvy ape ári. Apóstol Juan heʼi: “Añetehápe, oĩ hetave mbaʼe Jesús ojapo vaʼekue, péro peichahágui ojehaipátaramo umíva, chéverõ g̃uarã ko múndope ndaijapamoʼãi umi kuatiañeʼẽ” (Juan 21:25). Umi omoirũ vaʼekue Crístope síglo primérope, oikuaa kuri heta mbaʼe Jesúsgui ñande ndajaikuaáiva, péro ndahaʼéi upe haguére ikangýtava ñande jerovia. Jehová oikuaauka ñandéve tekotevẽva guive ikatu hag̃uáicha jasegi Jesús pypore (1 Ped. 2:21).

Ñapensamíntena avei umi kuatiañeʼẽ omondo vaʼekuére apostolkuéra umi kongregasiónpe. Oĩ peteĩ kárta Pablo ohai vaʼekue, péro ndaipóriva la Bíbliape (Col. 4:16). ¿Ikatúpa jaʼe pe aliménto espirituál jarresivíva saʼiveha ndajarekóigui upe kárta? Nahániri. Jehová oikuaa mbaʼépa ñaikotevẽ ikatu hag̃uáicha ñamombarete ñande jerovia ha oñenkarga ohupytyka hag̃ua ñandéve umíva (Mat. 6:8).

Jehová oikuaa mbaʼépa ñaikotevẽ ñañealimenta porã hag̃ua ha omeʼẽ ñandéve upe ñaikotevẽva

Ñane tiémpope, Jehová siervokuéra oreko heta aliménto espirituál. Péro ikatu oime nde reñeʼẽ peteĩ idióma oĩháme saʼive puvlikasión ojetradusíva. Aníkena rejepyʼapy, Jehová oñangarekóta avei nderehe. Ehesaʼỹijo umi puvlikasión reguerekóva ha eñehaʼã eho umi rreunión ojejapóvape pe idióma nde rentendévape. Katuete ningo Jehová nepytyvõta rejerovia mbarete hag̃ua (Sal. 1:2; Heb. 10:24, 25).

4. ¿Ikangýtapa nde jerovia ndaikatúiramo rehecha térã rehendu umi informasión oĩva jw.org-pe?

Ñande sítio jw.org oĩva Internétpe oreko umi rrevísta ha ambue puvlikasión ikatúva ojepuru ojestudia hag̃ua la Biblia. Oĩ informasión omendávape g̃uarã, mitãrusukuéra ha mitãme g̃uarã jepe. Koʼã informasión ikatu ojepuru ojejapo hag̃ua pe estúdio de família. Ko sítiope oñemombeʼu jepi avei oiko jave umi mbaʼe iñimportánteva, por ehémplo graduasión Eskuéla de Galaádpe, térã pe rreunión anuál. Osẽ avei notísia oñeʼẽva umi desástre naturál rehe térã umi káso legál oafektáva ermanokuérape (1 Ped. 5:8, 9). Pe jw.org ideprovechoiterei avei ojepredika hag̃ua opárupi. Upéva rupive ikatu oñemog̃uahẽ pe marandu porã heta lugárpe, por ehémplo umi autorida oproivi térã ojokosehápe pe predikasión.

Upéicharõ jepe, nde ikatu resegi remombarete nde jerovia, tove tereguereko Internet térã nahániri. Pe tembiguái jeroviaha heta ombaʼapo ohupytyka hag̃ua hiʼupy káda kristiánope umi puvlikasión imprésa rupive. Avave nandeovligái rejogua hag̃ua peteĩ aparáto reipuru hag̃uánte jw.org. Ikatu sapyʼánte peteĩ ermáno oguenohẽ kópia umi artíkulo osẽvagui Internétpe ha omeʼẽ umi ndorekóivape, péro upéva ndeʼiséi umi kongregasión katuete ojapo vaʼerãha upéicha.

Jaagradesékena Jesúspe okumpli haguére ipromésa ha osegi oñangareko ñanderehe ikatu hag̃uáicha ñamombarete ñande jerovia. Og̃uahẽvo ohóvo huʼãme koʼã ára ijetuʼuetéva, koʼýte jajerovia vaʼerã Jehová akóinte osegitaha omeʼẽ ñandéve pe “hiʼupy hiʼoraitépe”.