Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Ñemañaha (ojestudiáva)  |  Agosto de 2014

Jehová omombaʼe kuñanguérape

Jehová omombaʼe kuñanguérape

“Umi kuña omombeʼúva pe marandu porã haʼete peteĩ ehérsito tuicháva.” (SAL. 68:11, NM)

1, 2. a) ¿Mbaʼe mbaʼépa Jehová orregala vaʼekue Adánpe? b) ¿Mbaʼérepa Ñandejára omeʼẽ Adánpe hembirekorã? (Ehecha pe taʼanga oĩva iñepyrũme.)

JEHOVÁ okrea vaʼekue ko Yvy “pype ojeiko hag̃uáicha” (Is. 45:18). Haʼe ojapo Adánpe, pe primer yvypóra perfékto, ha omoĩ chupe peteĩ lugár iporãitereívape: pe hardín de Edén. Upépe ningo oĩne raʼe umi yvyramáta tuichaicháva, arrójo osyry piroʼysã asýva, ha animalkuéra oñembosarái joáva. ¡Oiméne ovyʼaite raʼe Adán upe lugárpe! Péro ofalta chupe peteĩ mbaʼe. Jehová oikuaa upéva, ha heʼi: “Naiporãi ningo kuimbaʼe oiko haʼeño. Ajapóta chupe iñirũrã, peteĩ oipytyvõ vaʼerã chupe”. Upe rire omongete Adánpe, oipeʼa chugui “peteĩ ikostílla ha ojapo peteĩ kuña”. Katuete ningo Adán ovyʼáne raʼe opáyvo ha otopa iñirũrã. Upévare heʼi: “¡Péina, kóva hína che kostílla pehengue!” (Gén. 2:18-23, NM).

2 Ñandejára omeʼẽ Adánpe peteĩ rregálo iporãitereíva: peteĩ kuña perfékta oipytyvõtava chupe. Hiʼarive pe kuña ikatúta imemby. Upévare “Adán ombohéra hembirekópe Eva, pórke chugui oúta kuri entéro yvypóra” (Gén. 3:20, NM). Jehová ojapo Adán ha Évape ikatu hag̃uáicha ifamília. Upéi, umi yvypóra perfékto ojapóta ko Yvýgui peteĩ paraíso ha oñangarekóta opaichagua animál rehe (Gén. 1:27, 28).

3. a) ¿Mbaʼépa ojapo vaʼerã kuri Adán ha Eva Jehová ovendesi hag̃ua chupekuéra, péro mbaʼépa odesidi hikuái? b) ¿Mbaʼe porandúpa oñembohováita ko artíkulope?

 3 Adán ha Eva iñeʼẽrendu ha oñemoĩ vaʼerã kuri Jehová poguýpe ikatu hag̃uáicha haʼe ovendesi chupekuéra (Gén. 2:15-17). Péicharõmante okumplíta hikuái Ñandejára volunta. Péro ñambyasýramo jepe, haʼekuéra odesidi ohendu Satanáspe, “pe mbói ypykue”, ha opeka Ñandejára kóntrape (Apoc. 12:9; Gén. 3:1-6). ¿Mbaʼéichapa upéva operhudika kuñanguérape? ¿Mbaʼe mbaʼépa ojapo vaʼekue heta kuña ipyʼaguasu ha iñeʼẽrendúva Jehovápe? ¿Mbaʼérepa umi kristiána koʼag̃agua “haʼete peteĩ ehérsito tuicháva”? (Sal. 68:11, NM.)

MBAʼÉPA OIKO ADÁN HA EVA NAIÑEʼẼRENDÚI RUPI

4. ¿Mávapepa Jehová okulpave pe pekádore?

4 Ñandejára orreklamárõ guare Adánpe idesovediénte haguére, Adán heʼi: “Pe kuña remeʼẽ vaʼekue chéve che irũrã, haʼe omeʼẽ kuri chéve pe frúta ha upémarõ haʼu” (Gén. 3:12, NM). Añetehápe Adán ni michĩmi nombyasýi pe ojapo vaʼekue, síno okulpa Évape, ha péicha okulpa avei Jehovápe omeʼẽ haguére chupe hembirekorã. Mokõivéva ningo opeka, upéicharõ jepe Jehovápe g̃uarã Adán orekove la kúlpa. Upévare Pablo heʼi: “Peteĩ kuimbaʼe [Adán] rupive pe pekádo oike ko múndope, ha pe ñemano oike pekádo rupive” (Rom. 5:12).

5. ¿Mbaʼépa ojehecha Jehová ohejávo yvyporakuérape ogoverna?

5 Satanás ogueroviauka Adán ha Évape natekotevẽiha Jehová ogoverna chupekuéra. Ha upéicha rupi ojehechauka vaʼerã mávapa añetehápe oreko derécho ogoverna hag̃ua. Upévare Jehová oheja yvyporakuéra ogoverna peteĩ tiémpore, ha péicha ojehecha katuete osẽ vaiha entéro goviérno noñemoĩriva ipoguýpe. Ohasávo pe tiémpo, yvypóra goviérno mbaʼe vaímante ogueru umi héntepe. Por ehémplo, pe síglo ohasa vaʼekuépente, 100 millón persónarupi omano umi gérrape, umíva apytépe heta hénte inosénte, tahaʼe kuimbaʼe, kuña térã mitã. Koʼã mbaʼe ohechauka porãvéntema yvypóra “ndahaʼeiha hape ni hekove jára” (Jer. 10:23, ÑÑB). Upévare ñande jaasepta Jehovápe ñane Governánteramo (elee Proverbios 3:5, 6).

6. ¿Mbaʼéichapa ojetrata heta lugárpe kuñanguérape?

6 Opavave yvypóra, tahaʼe kuña térã kuimbaʼe, hetáma osufri ko múndo oĩvape Satanás poguýpe (Ecl. 8:9; 1 Juan 5:19). Ha jaʼekuaa ojejapoha heta mbaʼe ivaietereíva kuñanguérare. Por ehémplo, ko yvy tuichakuére, 1 de káda 3 kuñáme omaltrata iména térã inóvio. Heta lugárpe katu umi hénte oguerohoryve umi mitãraʼy kuimbaʼéva. Opensa hikuái umíva okakuaa vove omantenetaha itúva, isy ha ijavuelokuérape ha ijapellído ndopareimoʼãiha. Heta tetãme umi hénte ndoipotái voi mitãkuñaʼi, upévare umi lugár rupi hetave oĩ oitykáva imemby oikuaávo kuñataha.

7. ¿Mbaʼéichapa Jehová ojapo vaʼekue kuimbaʼe ha kuñáme?

7 Jehová ndoipotaiete voi ojetrata vai kuñanguérape. Haʼe orrespeta ha otrata opavavépe peteĩchapa. Jahechamína peteĩ ehémplo. Ñandejára ojapo Évape perfékta, ha oprepara chupe ikatupyry hag̃uáicha heta mbaʼépe. Péicha omeʼẽ Adánpe peteĩ oipytyvõ vaʼerã chupe, ndahaʼéi hembiguairã. Upévare, omohuʼãvo hembiapo pe sexto díape, Jehová “omaʼẽ opa mbaʼe ojapo vaʼekuére ha ojuhu iporãitereiha” (Gén. 1:31). Upeichaite, opa mbaʼe Jehová ojapo vaʼekue ‘iporãiterei’. Añetehápe, mokõivévapente Ñandejára ojapo porãiterei.

KUÑANGUÉRA IÑEʼẼRENDÚVA JEHOVÁPE

8. a) ¿Mbaʼéichapa oñekomporta umi hénte opárupi? b) ¿Máva mávapepa Ñandejára oipytyvõ?

8 Adán ha Eva opuʼã rire Jehováre,  yvyporakuéra osegi ojapo hetave mbaʼe vai. Ha pe síglo ohasa vaʼekuépe katu koʼytevéntema hembiapo vai hikuái. La Biblia heʼi vaʼekue voi umi hénte oikotaha péicha “umi ára pahápe”. Añetehápe, ñane tiémpope opárupi ojehecha yvyporakuéra iñañaveha, ha upévare ‘pe situasión ijetuʼuve’ (2 Tim. 3:1-5). Péro ymaite guive oĩ avei kuimbaʼe ha kuña ojeroviáva Ñandejárare, iñeʼẽrendúva chupe ha oñemoĩva ipoguýpe. Ha “Jehová, pe Mburuvicha Tuichavéva” oipytyvõ chupekuéra (elee Salmo 71:5).

9. ¿Mboy persónapa ojesalva oúrõ guare pe Ama Guasu, ha mbaʼéicha rupípa?

9 Ñandejára ohundírõ guare pe múndo aña Noé tiémpope, saʼieterei persóna ojesalva. Oimérire Noé oreko iñermáno ha iñermanakuéra, katuete omanombáne raʼe hikuái pe Ama Guasúpe (Gén. 5:30). ¿Máva mávapa ojesalva rakaʼe? Cuatro kuimbaʼe ha cuatro kuña: Noé, hembireko, ha umi mbohapy itaʼýra hembirekokuéra reheve. Ñandejára osalva koʼã persónape iñeʼẽrendu ha ojapo rupi hembipota. Opavave ñande jaju umi ocho persóna ojesalva vaʼekuégui Jehová oprotehe rupi chupekuéra (Gén. 7:7; 1 Ped. 3:20).

10. ¿Mbaʼérepa Jehová oipytyvõ ha oprotehe isiervokuéra yma guare rembirekópe?

10 Ohasávo pe tiémpo, Jehová oipytyvõ ha oprotehe avei isiervokuéra yma guare rembirekópe. Upéva oiko koʼã kuñakarai iñakãguapy ha oñekontenta rupi umi mbaʼe orekóvare (Jud. 16). Por ehémplo Sara, Abrahán rembireko. Haʼe ningo orrespetaiterei vaʼekue iménape, ha ni nañapensái voi ojeplageáne hague ohejágui umi komodida Úrpe ha oho oiko óga kárpape mombyry hetãgui. “Sara iñeʼẽrendu vaʼekue Abrahánpe, ha ohenói chupe ‘che karai’.” (1 Ped. 3:6.) Ñanemanduʼami avei Rebécare. Haʼe katu haʼete voi peteĩ rregálo Jehová omeʼẽva Isaácpe. La Biblia heʼi Isaac ‘oñenamora hague hese [...] ha ojuhu hague konsuélo isy omano rire’ (Gén. 24:67, NM). ¡Ajépa javyʼaite koʼág̃arupi oĩ haguére ñande apytépe heta kuña iñeʼẽrendúva Sara ha Rebeca ojapo haguéicha!

11. ¿Mbaʼéichapa mokõi partéra isrraelíta ohechauka ipyʼaguasuha?

11 Umi isrraelíta oikórõ guare tembiguáiramo Egíptope, heta hetave hikuái ohóvo. Upévare pe faraón omanda ojejuka hag̃ua entéro mitãkuimbaʼe onase ramóvape. Péro mokõi partéra isrraelíta, hérava Sifrá ha Puá, oñembopyʼaguasu ha ndojapói pe faraón omandáva, hiʼarive koʼã kuña amalisia oñenkarga umi ótra partérare. Haʼekuéra omombaʼetereive Jehovápe faraónpe rangue ha odesidi ndopartisipái pe mbaʼe vaietépe. Upe rire Ñandejára orrekompensa koʼã partérape omeʼẽvo chupekuéra ifamília teerã (Éx. 1:15-21).

12. ¿Mbaʼeichagua persónapa raʼe Débora ha Jael?

12 Umi hués oipytyvõ tiémpope Israélpe, Jehová heta oapoja avei peteĩ profetísa héravape Débora. Haʼe omokyreʼỹ pe hués Barácpe ha oipytyvõ umi isrraelítape ojei hag̃ua iñenemigokuéra poguýgui. Avei Débora oprofetisa umi isrraelíta ogana vove umi kananéope, noñembotuichamoʼãiha Barácpe, ha heʼi Ñandejára oitytaha pe ehérsito kananéo héfepe peteĩ ‘kuña rupive’. Ha upeichaite oiko. Peteĩ kuña ndahaʼéiva isrraelíta hérava Jael ojuka Sísarape (Juec. 4:4-9, 17-22).

13. ¿Mbaʼépa heʼi la Biblia Abigail rehe?

13 Ñanemanduʼamína avei Abigail rehe, oiko vaʼekue 1.100 áñorupi a.C. Haʼe ningo peteĩ kuña iñakãguapýva, péro iména Nabal katu peteĩ karai ndovaléiva mbaʼeverã, imaledukádo ha naimbaʼerechakuaáiva (1 Sam. 25:2, 3, 25). David ha umi kuimbaʼe omoirũva chupe, peteĩ tiémpore oipytyvõ Nabálpe oñangarekóvo umi isiérvo ha ijovechakuérare. Péro upéi David ojerurekárõ guare chupe provistami, haʼe osẽ  “ojaʼo chupekuéra” ha mbaʼevete nomeʼẽi umi kuimbaʼépe. Upépe David ipochy hese ha heʼi ohotaha ojuka Nabal ha hembiguaikuérape. Oikuaávo upéva, Abigail osẽ ogueraha hiʼupy ha vevída David ha umi kuimbaʼe omoirũvape chupe. Upéva ojoko Davídpe ani hag̃ua ojuka Nabal ha hogayguakuérape (1 Sam. 25:8-18, ÑÑB). Upéi David heʼi Abigaílpe: “¡Toñemombaʼeguasu Israel Jára nembou haguére ko ára kóvape [cherug̃uaitĩ] hag̃ua!” (1 Sam. 25:32). Nabal omano rire, David omenda Abigail rehe (1 Sam. 25:37-42).

14. a) ¿Mbaʼe tembiapópepa opartisipa Salum rajykuéra? b) ¿Mbaʼérepa jaʼekuaa heta kristiána koʼag̃agua ojoguaha Salum rajykuérape?

14 Heta kuimbaʼe, kuña ha mitã omano vaʼekue umi vavilónio ohundírõ guare Jerusalén ha pe témplo áño 607-pe a.C. Upéi umi murálla oñemopuʼã jey áño 455-pe a.C. ha Nehemías omoakã upe tembiapo. Oĩ vaʼekue heta tapicha ombaʼapóva ojejapórõ guare upe traváho. Umíva apytépe oĩ kuri Salum rajykuéra. Salum haʼe vaʼekue peteĩ prínsipe orekóva ipoguýpe la mita pe distríto de Jerusalén (Neh. 3:12). Jahechaháicha, koʼã kuña vyʼapópe oñekuaveʼẽ ojapo hag̃ua umi traváho umílde. ¡Ajépa jaguerohoryete koʼág̃arupi umi kristiánape oapoja meméva heta hendáicha umi konstruksión ojejapóva Ñandejára organisasiónpe!

KUÑANGUÉRA IÑEʼẼRENDÚVA JEHOVÁPE SÍGLO PRIMÉROPE

15. ¿Mbaʼe priviléhiopa Jehová omeʼẽ Maríape?

15 Jehová ovendesi vaʼekue heta kuñáme omeʼẽvo chupekuéra priviléhio ijojahaʼỹva. Por ehémplo, pe vírhen hérava María oñekompromete omenda hag̃ua José ndive. Péro omenda mboyve ou hyeguasu espíritu sánto rupive. ¿Mbaʼérepa Jehová oiporavo chupe Jesús syrã? Oikuaágui María ikatutaha omongakuaa porã peteĩ mitã perfékto. ¡Ajépa tuichaite pe priviléhio oreko vaʼekue! Imemby haʼe kuri pe kuimbaʼe iñimportantevéva oiko vaʼekue ko yvy ape ári (Mat. 1:18-25).

16. ¿Mbaʼéichapa Jesús otrata umi kuñáme? Emombeʼu peteĩ ehémplo.

16 Jesús ningo imbaʼeporãiterei vaʼekue umi kuña ndive. Por ehémplo, ñapensamíntena pe kuña 12 áñorema oikóva huguyháre. Haʼe ou umi hénte apytépe ha oñemboja Jesús rehe hapykuéguio ha opoko ijaóre. Jesús ndojaʼói chupe, síno pyʼaporãmente heʼi chupe: “Che rajy, rejerovia rupi ningo rekuera ko mbaʼasy nembohasa asyetévagui. Tereho katu pyʼaguapýpe” (Mar. 5:25-34).

17. ¿Mbaʼe milágropa oiko Pentekostés áño 33-pe?

17 Jesús disípulo apytépe oĩ vaʼekue umi kuña oservíva chupe ha umi apóstolpe (Luc. 8:1-3). Upéi Pentekostés áño 33-pe, amo 120 kuimbaʼe ha kuña orresivi Ñandejára espíritu (elee Hechos 2:1-4). Jehová voi oprofetisa vaʼekue: “Añohẽta che espíritu mayma kuimbaʼe ha kuñanguéra ári ha pende raʼy ha pende rajykuéra oprofetisáta. [...] Añohẽta avei che espíritu pene rembiguái kuimbaʼe ha kuñanguéra ári” (Joel 2:28, 29, ÑÑB). Ko milágro rupive, Jehová ohechauka omboykemaha pe Israel apóstatape, ha oguerohoryha pe “Israel Ñandejára mbaʼéva”, oĩháme kuña ha kuimbaʼe (Gál. 3:28; 6:15, 16). Pe síglo primérope heta kristiána omombeʼu vaʼekue pe marandu porã, ha umíva apytépe oĩ kuri umi cuatro Felipe rajy (Hech. 21:8, 9).

“UMI KUÑA [...] HAʼETE PETEĨ EHÉRSITO TUICHÁVA”

18, 19. a) ¿Mbaʼe priviléhiopa omeʼẽ Jehová umi kuña ha kuimbaʼekuérape? b) ¿Mbaʼépa heʼi vaʼekue pe salmísta umi kuña opredikávare?

18 Pe dékada de 1870-pe, oĩ kuri mbovymi kuña ha kuimbaʼe omombaʼetereíva la Biblia omboʼéva. Haʼekuéra opreparáma pe tape ojepredika hag̃ua, ha oñepyrũ okumpli ko profesía: “Koʼã marandu porã  oñeʼẽva Ñandejára Rréinore oñemombeʼúta oparupiete ko yvy ape ári, ojekuaa hag̃ua opa tetãrupi, ha upéi og̃uahẽta pe ára pahaite” (Mat. 24:14).

19 Umi Estudiánte de la Biblia haʼe vaʼekue peteĩ grúpo michĩva, péro okakuaave ohóvo. Koʼág̃a g̃uarã oikóma chugui peteĩ grúpo oĩháme mas de 7.900.000 testígo de Jehová. Ha pe áño ohasa vaʼekuépe, mas de 11.000.000 persóna ndahaʼéiva Testígo oho pe Konmemorasiónpe, ojegueromanduʼahápe Jesús omano hague. Haimete entéro tetãme, hetave kuña umi ohóva pe Konmemorasiónpe. Ko yvy tuichakuére oĩ mas de 1.000.000 oservíva Jehovápe de tiémpo kompléto, ha umíva apytépe hetave avei kuñanguéra. Jahechaháicha, Ñandejára omeʼẽ umi kuña iñeʼẽrendúvape pe priviléhio orrepresentávo chupe. Añetehápe oñekumpli pe profesía heʼi vaʼekue pe salmísta: “Jehová voi heʼi: ‘Umi kuña omombeʼúva pe marandu porã haʼete peteĩ ehérsito tuicháva’” (Sal. 68:11, NM).

“Umi kuña omombeʼúva pe marandu porã haʼete peteĩ ehérsito tuicháva” (Ehecha párrafo 18 ha 19)

UMI KUÑA IÑEʼẼRENDÚVA OHUPYTÝTA HETA MBAʼE PORÃ

20. ¿Mbaʼe mbaʼépa ikatu ñahesaʼỹijo jastudia jave?

20 Ñandejára Ñeʼẽme oñemombeʼu hetaiterei kuña iñeʼẽrendúva rembiasakue, ha ko artíkulope mbovymírente ñanemanduʼa. Péro ikatu jahecha koʼã kuña ehémplo la Bíbliape voi, ha avei ñane puvlikasionkuérape. ¡Ñapensamíntena mbaʼeichaitépa ideprovéchota ñandéve jajepyʼamongetáramo Rut ehémplo porãitére! (Rut 1:16, 17.) Oĩ avei pe rréina Ester rembiasakue. Katuete ñamombaretevéta ñande jerovia jaleéramo pe lívro de Ester ha avei umi artíkulo oñeʼẽva hese. ¡Ajépa iporãite vaʼerã jaipurúramo koʼãichagua informasión jajapo hag̃ua ñande estúdio de família! Ha oiméramo ñaneaño, ikatúnte avei ñahesaʼỹijo koʼãichagua téma jajapo jave ñande estúdio personál.

21. ¿Mbaʼéichapa heta kristiána ohechauka iñeʼẽrenduha Jehovápe ohasa jave umi mbaʼe ijetuʼúva?

21 Katuete ningo oime vaʼerã jahechakuaa Jehová ovendesiha pe tembiapo ojapóva kristianakuéra predikasiónpe ha oipytyvõha chupekuéra ohasa jave umi mbaʼe ijetuʼúva. Por ehémplo, omombarete umi ermána oĩ vaʼekuépe umi nási ha komunísta poguýpe, ikatu hag̃uáicha osegi hikuái iñeʼẽrendu ha oaguanta. Koʼã kristiána heta osufri ha oĩ voi kuri omanóva iñeʼẽrendu haguére Ñandejárape (Hech. 5:29). Yma guaréicha avei, koʼág̃arupi opavave kristiáno, tahaʼe kuña térã kuimbaʼe, oiporavóma Ñandejára Jehovápe Igovernanterã. Ha ojapo haguéicha umi isrraelítare, Jehová ojagarra chupekuéra ipógui ha heʼi: ‘Ani rekyhyje, aju roipytyvõ hag̃ua’ (Is. 41:10-13).

22. ¿Mbaʼe mbaʼépa ohupytýta Jehová siervokuéra iñeʼẽrendúva?

22 Koʼẽrõitéma umi kuña ha kuimbaʼe iñeʼẽrendúva Jehovápe ojapóta ko Yvýgui peteĩ paraíso, ha omboʼéta Jehová rembipota umi oikove jeýtavape. Péro ñahaʼarõ aja og̃uahẽ upe tiémpo, jasegi vaʼerã ñamombaʼe pe priviléhio Jehová omeʼẽva ñandéve jaservi hag̃ua chupe “peteĩ ñeʼẽme” (Sof. 3:9, ÑÑB).