Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Ñemañaha (ojestudiáva)  |  Agosto de 2014

Ñahendúkena Jehová heʼíva

Ñahendúkena Jehová heʼíva

“Pehendúta peteĩ ñeʼẽ pende rapykuéri heʼítava peẽme: ‘Kóva hína pe tape, tapeho koʼárupi’.” (IS. 30:21)

1, 2. ¿Mbaʼéichapa Jehová oñekomunika isiervokuéra ndive?

YMAITE guive Jehová ogia isiervokuérape heta hendáicha. Por ehémplo, oñekomunika hendivekuéra umi ánhel rupive, iképe, térã visión rupive, tahaʼe omombeʼu hag̃ua mbaʼépa oikóta tenonderãme, térã omeʼẽ hag̃ua chupekuéra hembiaporã (Núm. 7:89; Ezeq. 1:1; Dan. 2:19). Heta vése ojevale avei umi irrepresentánte yvypórare oservíva iñorganisasiónpe, omeʼẽ hag̃ua instruksión hembiguaikuérape. Jahechaháicha, Ñandejára omeʼẽ vaʼekue imensáhe heta hendáicha, ha katuete ovendesi umi iñeʼẽrendúvape.

2 Koʼág̃arupi Jehová ñandegia la Biblia, ijespíritu sánto ha pe kongregasión rupive (Hech. 9:31; 15:28; 2 Tim. 3:16, 17). Opa mbaʼe haʼe heʼíva ningo hesakã porã, haʼete voi ñahendúva peteĩ ñeʼẽ ñande rapykuéri heʼíva: “Kóva hína pe tape, tapeho koʼárupi” (Is. 30:21). Ñandejára ojevale avei Jesús rehe oñeʼẽ hag̃ua ñandéve, ha omoĩ voi chupe omoakã hag̃ua pe kongregasión “pe tembiguái jeroviaha ha iñarandúva” rupive (Mat. 24:45). Ikatu hag̃uáicha jahupyty pe jeikove opaveʼỹva, tekotevẽ jarrespeta opa mbaʼe Jehová heʼíva ha ñaneñeʼẽrendu chupe (Heb. 5:9).

3. ¿Mbaʼérepa sapyʼánte ikatu nañahendúi Jehová heʼíva? (Ehecha pe taʼanga oĩva iñepyrũme.)

3 Satanás oikuaa porã ikatuha jajesalva jajapóramo Jehová heʼíva, upévare oñehaʼãmbaite ñanderesarea. Ha ndahaʼéi  upéva añónte, ñane “korasõ itraisionéro” ha ikatu ñanembotavy ha jajapo peteĩ mbaʼe noĩporãiva (Jer. 17:9). Jahechamína mbaʼépa jajapo vaʼerã ani hag̃ua Satanás ñandereity iñuhãme ha nañahenduvéi Jehová heʼíva. Upéi jahecháta iñimportanteha avei ñañemboʼe Ñandejárape ikatu hag̃uáicha siémpre ñaime porã hendive, tahaʼe haʼéva ñane situasión.

UMI ÑUHÃ SATANÁS OMOĨVA

4. ¿Mbaʼépa Satanás oipuru omoinge hag̃ua umi hénte akãme umi mbaʼe vai?

4 Satanás oipuru japu ha propagánda oporombotavýva omoinge hag̃ua umi hénte akãme umi mbaʼe vai (elee 1 Juan 5:19). Umi médio de komunikasión, tahaʼe diário, rrádio, televisión ha Internet ningo og̃uahẽ mombyryveha peve ko yvy ape ári. Koʼã mbaʼe ikatu ideprovécho heta mbaʼépe, péro pyʼỹinte omboliga umi héntepe ojapo hag̃ua umi mbaʼe naiporãiva ha Jehovápe ndogustáiva (Jer. 2:13). Por ehémplo, koʼág̃arupi umi prográma de entretenimiénto, térã umi notisiéro oñeʼẽ mbaʼeveʼỹrõguáicha umi kuimbaʼe omendávare kuimbaʼére, térã kuña kuñándi. Upévare heta persóna opensa la Biblia heʼíva pe omosexualida rehe oĩ vaiha (1 Cor. 6:9, 10).

5. ¿Mbaʼépa jajapo vaʼerã ani hag̃ua ñanembotavy umi propagánda vaieta oúva Satanásgui?

5 ¿Mbaʼépa ojapo vaʼerã Jehová siervokuéra ani hag̃ua ombotavy chupekuéra umi propagánda vaieta oúva Satanásgui? ¿Mbaʼéichapa ohechakuaáta hikuái mbaʼépa iporã ha mbaʼépa ivai? “Oikóramo [Ñandejára] ñeʼẽ heʼiháicha” (Sal. 119:9). Umi konsého oĩva la Bíbliape ñanepytyvõ japilla hag̃ua mbaʼe informasiónpa ikatu jaguerovia, ha mbaʼeichaguápa ikatu ñanembotavy (Prov. 23:23). Jesús imanduʼa Ñandejára Ñeʼẽre heʼívo: “Yvypóra [...] oikotevẽ [...] opaite mbaʼe Jehová heʼívare” (Mat. 4:4). Upéva heʼise ñaaprende vaʼerãha jaiko la Biblia heʼiháicha. Por ehémplo, heta tiémpo Ñandejára ohaika mboyve Moiséspe pe léi okondenáva pe ñemoakãratĩ, José ontendéma opekataha Jehová kóntrape oñenóramo Potifar rembirekóndi. Upévare haʼe ni nopensái ojapo peteĩ mbaʼe Ñandejárape ndogustáiva, jepe pe kuñakarai heta omboliga chupe (elee Génesis 39:7-9). Pe kuñakarai oikóramo jepe hapykuéri, José nopenái hese, síno ojapo Jehová heʼíva. ¿Mbaʼépa ñanemboʼe ko ehémplo? Ikatu hag̃uáicha jahechakuaa mbaʼépa iporã ha mbaʼépa ivai, tekotevẽ ñahendu Ñandejára heʼíva ha nañapenái vaʼerã umi propagánda oúvare Satanásgui.

6, 7. ¿Mbaʼépa jajapo vaʼerã ani hag̃ua ñahendu umi konsého vaiete Satanás omeʼẽva?

6 Ko múndope ningo oĩ hetaiterei rrelihión omboʼéva enseñánsa japu, ha umi hénte ndoikuaavéima mávapepa ogueroviáta. Upéicha rupi, heta persóna opensa oheka reitaha pe rrelihión añetegua. Péro umi ohekáva Ñandejára gía ojuhúta katuete. Tekotevẽnte odesidi mávapepa ohendúta. Jaikuaaháicha, hasy ñahendu hag̃ua mokõi oñeʼẽvape ojojaite. Upévare, jaikuaa vaʼerã Jesús ñeʼẽ ha ñahendu chupe añoite. Ñandejára  voi omoĩ Crístope oñangareko hag̃ua ijovechakuérare (elee Juan 10:3-5).

7 Jesús heʼi vaʼekue: “Peñatende porãke koʼã mbaʼe pehendúvare” (Mar. 4:24). Umi konsého Jehová omeʼẽva ningo hesakã porã ha ndojavýi. Péro tekotevẽ japrepara ñane korasõ ikatu hag̃uáicha jarresivi umíva ha jasegi. Nañañatendéiramo, ikatu hína ñahendu umi konsého vaiete Satanás omeʼẽva ha ñamboyke umi konsého Ñandejára omeʼẽva mborayhúpe. Aníkena arakaʼeve jaheja ñanedomina umi mbaʼe oñepensáva ko múndope, tahaʼe músika rupive, umi prográma osẽva télepe, térã livrokuéra rupive. Ani jaheja odesidi ñanderehe ñane kompañerokuéra, umi mboʼehára, térã umi iñarandu guaʼúva (Col. 2:8).

8. a) ¿Mbaʼéichapa ñane korasõ ikatu ñandereity Satanás ñuhãme? b) ¿Mbaʼépa ikatu oiko ñanderehe jahechakuaáramo jaha vaimaha péro nañakambiái?

8 Satanás oikuaa ñande yvypóra ñanekangy ha jajaposeha ivaíva, ha ojaprovecha upévare ñandejopy hag̃ua. Upéicha jave, ijetuʼueterei ñandéve ñaneñeʼẽrendu hag̃ua Jehovápe (Juan 8:44-47). Ñapensamíntena peteĩ persóna ndoipeʼaiha iñakãgui peteĩ tentasión, upéi oimoʼãʼỹetére ou hoʼa pe mbaʼe vaípe (Rom. 7:15). ¿Mbaʼéicha rupípa oiko hese upéva? Ikatu oime nopenavéi kuri oikóvo Ñandejára heʼívare ha ndohechakuaái oho vaimaha, térã ohechakuaa oho vaiha ha odesidi osegínte péicha. Por ehémplo, oiméne noñemboʼevéi, ndopredikaguasuvéi, térã ofalta meme rreunionhápe. Ha ohasávo pe tiémpo hoʼa pe tentasiónpe, jepe oikuaa porã oĩ vaiha. ¿Mbaʼépa jajapo vaʼerã ani hag̃ua oiko ñanderehe koʼã mbaʼe? Ñañatende vaʼerã jahechakuaa hag̃ua noiméipa jaháma hína tape vaíre, ha tekotevẽramo, pyaʼe ñakambia. Jajapysaka porãramo Jehová heʼívare, arakaʼeve nañahendumoʼãi avei umi apóstata omboʼéva (Prov. 11:9).

9. ¿Mbaʼérepa iñimportánte japilla mbaʼépepa ñanekangy?

9 Peteĩ persóna hasýva oikuaáramo voi reheve mbaʼépa imbaʼasy, ikatu hína ojetrata ha okuera jey. Péicha avei, japilla vove mbaʼépepa ñanekangy, ñañehaʼã vaʼerã pyaʼe jajehekýi chugui. Péichamante ndajahejamoʼãi Satanás ‘ñanemoñuhã [...] jajapo hag̃ua hembipota’ (2 Tim. 2:26). ¿Mbaʼépa jajapo vaʼerã jahechakuaáramo jaikoha ñapensa umi mbaʼe Jehovápe ndogustáivare? Tekotevẽ ñanderekomirĩ ha pyaʼe ñañemoag̃ui jey hese, ñahendu umi konsého haʼe omeʼẽva ha ñamoĩ umíva ñande pyʼapýpe ikatu hag̃uáicha jasegi (Is. 44:22). Jadesidi vaíramo ikatu tuicha jajeperhudika ha jasufri hetáta ko múndo añáme.  ¡Ajépa iporãitevéta ñakambiáramo jaʼa mboyve Satanás ñuhãme!

Jajepokuaáramo ñahendu Jehová heʼíva, jajehekýita umi ñuhã Satanás omoĩvagui (Ehecha párrafo 4 guive 9 peve)

ANÍKE ÑAÑEMOMBAʼEGUASU HA ÑANDETARYRÝI

10, 11. a) ¿Mbaʼépa opensa umi oñemombaʼeguasúva? b) ¿Mbaʼépa ñaaprende Coré, Datán ha Abirámgui?

10 Ñarrekonose vaʼerã ñane korasõ ikatuha avei ñanemomombyry Jehovágui. Ñande ningo ñaneimperfékto ha ndahasyiete jajapo hag̃ua ivaíva. Por ehémplo, ikatu jaju ñañemombaʼeguasu térã ñandetaryrýi. Koʼã mbaʼe ikatu ñandegueraha vai ha upéva káusare nañahenduvéi Ñandejára heʼíva. Pe oñemombaʼeguasúva opensaiterei ijehénte. Oimoʼã orekoha derécho ojapo hag̃ua chupe ogustáva ha avave ndeʼíri vaʼerãha chupe mbaʼeve. Upéicha rupi ikatu opensa natekotevẽiha osegi umi konsého omeʼẽva chupe umi ermáno térã ansianokuéra, ni Jehová organisasión heʼíva nohenduséi. Umichagua haʼete mombyry guivénte ohendu vai vaíva Ñandejára heʼíva.

11 Umi isrraelíta oikórõ guare pe desiértore, Coré, Datán ha Abiram ndorrespetái pe autorida Ñandejára omeʼẽ vaʼekue Moisés ha Aarónpe. Ha oñemombaʼeguasu rupi hikuái oadorase Jehovápe chupekuéra ogustaháichante. Upévare Ñandejára ohundi koʼã mbohapy kuimbaʼépe ha umi omoirũvape chupekuéra (Núm. 26:8-10). Ko rreláto ohechauka ñandéve katuete osẽ vaitaha umi opuʼãva Jehováre. Avei ñanemomanduʼa ‘upe oñembotuicháva katuete hoʼataha’ (Prov. 16:18; Is. 13:11).

12, 13. a) Emoĩ peteĩ ehémplo ohechaukáva umi itaryrýiva katuete osẽ vaiha. b) ¿Mbaʼérepa jaʼekuaa ikatuha ñandetaryrýi jahejáramo ipuʼaka ñanderehe umi mbaʼe jaipotáva?

12 Jahechamína koʼág̃a mbaʼépa oiko umi itaryrýivare. Peichagua persóna ningo odesidi jepi ijeheguíntema heta mbaʼe, ha opensa umi konsého Jehová omeʼẽva ndahaʼeiha chupe g̃uarã. Oiméne ñanemanduʼa mbaʼépa ojapo vaʼekue Guehazí, proféta Eliseo rembiguái. Naamán, pe ehérsito sírio héfe, oreko vaʼekue lépra ha Eliseo omonguera chupe. Upévare omeʼẽse pe profétape peteĩ rregálo, péro haʼe ndoaseptái chugui. Guehazí katu itaryrýi ha oipota imbaʼerã umi rregálo ha heʼi ipyʼapýpe: “Adiparáta ahupyty chupe ha ajagarráta chugui oimeraẽ mbaʼe”. Heʼiʼỹre mbaʼeve Eliséope, Guehazí osẽ odipara Naamán rapykuéri ha ijapu tuicha porã chupe okonsegi hag̃ua chugui “32 kílo rasami pláta ha mokõi ao”. Upéi ijapu avei Eliséope. ¿Mbaʼépa oiko hese upe haguére? Ova hese Naamán leprakue (2 Rey. 5:20-27, NM).

13 Peteĩ persóna itaryrýiva ningo ñepyrũrã oipotánte kuri peteĩ mbaʼe, péro ndojejokói rupi, upéva ou ipuʼaka hese. Pe rreláto oñeʼẽva Acán rehe ohechauka peteĩ persóna pyaʼeterei ikatuha itaryrýi. Acán heʼi: “Ahechárõ guare umi hénte kosakue apytépe peteĩ ao iporãitereíva Sinárpe ojejapo vaʼekue, 2 kílo rasami pláta ha peteĩ várra de óro ipohýiva medio kílorupi, aipotaiterei ha agueraha”. Acán omboyke rangue pe ohesatiráva chupe, itaryrýi, omonda umi mbaʼe ha oñomi hógape. Upéi ojekuaárõ guare mbaʼépa ojapo, Josué heʼi Acánpe Jehová okastigataha chupe upévare. Upe árape voi haʼe ha ifamiliakuérape ojejapi itápe omano meve (Jos. 7:11, 21, 24, 25). Entéronte ñañeñangareko vaʼerã ani peichahágui jaju ñandetaryrýi. La Biblia heʼi voi ndovaleieteha ‘ñandetaryrýi mbaʼevére’ (Luc. 12:15). Ikatu sapyʼapyʼa ñapensa umi mbaʼe vai térã itieʼỹva. Péro ñañehaʼã vaʼerã jaipeʼa umíva ñane akãgui, ha ani jaheja umi mbaʼe vai ñandegustáva ipuʼaka ñanderehe ha japeka (elee Santiago 1:14, 15).

14. ¿Mbaʼépa jajapo vaʼerã ñañepyrũramo ñañemombaʼeguasu térã ñandetaryrýi?

14 Ñandeorgullóso ha ñandetaryrýiramo, katuete oho vaíta ñandéve. Jajepyʼamongetáramo upévare ñanepytyvõta ñahendu  hag̃ua Jehová heʼíva, ha ndajahejamoʼãi ipuʼaka ñanderehe umi mbaʼe vai jajaposéva (Deut. 32:29). La Biblia rupive, Ñandejára añeteguáva ohechauka ñandéve pe tape jasegi vaʼerã. Avei omyesakã mbaʼéichapa ou porã ñandéve jajapóramo haʼe heʼíva ha mbaʼépa oikóta ñasẽramo upe tapégui. Oiméramo ñande pyʼapýpe ñañepyrũ ñañemombaʼeguasu térã ñandetaryrýi ha jajapose peteĩ mbaʼe ivaíva, ñapensa raẽ vaʼerã mbaʼéichapa upéva ñandeperhudikáta ñandéve, umi jahayhúvape, ha opa mbaʼe ári, mbaʼéichapa japytáta Jehová renondépe.

ÑAÑEMBOʼÉKENA JEHOVÁPE ÑANDE PYʼAITE GUIVE

15. ¿Mbaʼérepa iñimportantete ñañeʼẽ Jehovándi ojapo haguéicha Jesús?

15 Jehová oipota iporãvante ñandéve g̃uarã (Sal. 1:1-3). Ñandegia heta hendáicha ha ñaikotevẽhaichaite (elee Hebreos 4:16). Jesús perféktoramo jepe, oikotevẽterei vaʼekue Ñandejárare, upévare oñemboʼe meme chupe. Ha Jehová oipytyvõ ha ogia Itaʼýrape oñeimoʼãʼỹháicha. Por ehémplo, omondo hendápe anhelkuéra omeʼẽ hag̃ua chupe oikotevẽva. Avei Ñandejára omeʼẽ Jesúspe ijespíritu sánto ha ogia chupe oiporavótarõ guare umi 12 apóstol. Hiʼarive oñeʼẽ yvága guive ohechauka hag̃ua oipytyvõ ha oguerohoryha Itaʼýrape (Mat. 3:17; 17:5; Mar. 1:12, 13; Luc. 6:12, 13; Juan 12:28). Jesús ojapo haguéicha, ñande avei tekotevẽ ñañeʼẽ Jehovápe ñande pyʼaite guive (Sal. 62:7, 8; Heb. 5:7). Péicha ikatúta akóinte ñañemongeta hendive ha ñambotuicháta chupe jaiko lájare.

16. ¿Mbaʼéicha añoitépa Jehová ñanepytyvõta ñahendu hag̃ua haʼe heʼíva?

16 Jehová omeʼẽramo jepe konsého enterovévape, ndojopýi avavépe osegi hag̃ua umíva. Upéicharõ jepe, tekotevẽ jajerure chupe ijespíritu sánto ikatu hag̃uáicha jajapo haʼe heʼíva. Katuete Jehová ipojeráta ha omeʼẽta ñandéve ijespíritu ñaikotevẽhaichaite (elee Lucas 11:10-13). La Biblia heʼi avei: “Pejapysaka porã vaʼerã” (Luc. 8:18). Ikatu hína jajerure Ñandejárape tañanepytyvõ ñambohovái hag̃ua umi tentasión ikatúva ñandegueraha tekokyʼápe. Péro ¿mbaʼépa haʼe opensáta upe riremínte ñañemoĩramo jahecha pornografía térã pelíkula ohechaukáva mbaʼe tieʼỹ? Upéva ohechaukáta ñanderovamokõiha, ha ñamboykeha ikonsého. Ikatu hag̃uáicha Jehová ñanepytyvõ, jaheka vaʼerã pe espíritu sánto. Jaikuaa porã ningo pe espíritu katuete oĩha umi rreunión de kongregasiónpe. Heta ermáno, ohendúvo Jehová heʼíva umi rreunión rupive, ohechakuaa ikorasõme oñepyrũha hína oike mbaʼe vai ha pyaʼe voi okambia, ha upéicha ojehekýi heta provlémagui (Sal. 73:12-17; 143:10).

JASEGÍKENA JAJAPYSAKA JEHOVÁ HEʼÍVARE

17. ¿Mbaʼérepa ndovaléi jajerovia ñandejehe?

17 Ñanemanduʼamína David rehe. Haʼe ningo imitãrusúpe ojuka vaʼekue Goliátpe, pe filistéo tuichaitéva. Tiémpo rire oiko chugui soldádo ha rréi. Upérõ haʼe oñangareko vaʼekue ipuévlore ha odesidi heta mbaʼe iñimportánteva. Péro upéi ou ojerovia ijehe, ha ikorasõ otraisiona chupe. Hoʼa peteĩ pekádo ivaietereívape Bat-seba ndive ha ojukauka Uríaspe, upe kuñakarai ménape. Upéicharõ jepe, Jehová okorrehírõ guare chupe, orrekonose ojavy hague ha oñemoĩ porã jey hendive (Sal. 51:4, 6, 10, 11).

18. ¿Mbaʼépa ñanepytyvõta ñahendu hag̃ua Jehová heʼíva?

18 Jasegíkena pe konsého oĩva 1 Corintios 10:12-pe ha ani jajerovia ñandejehe. Ñande ningo ‘ndahaʼéi ñande rape ni ñande rekove jára’. Upéicha rupi peteĩ tapénte ikatu jasegi: Ñandejára heʼíva, térã Satanás heʼíva (Jer. 10:23, ÑÑB). Upévare, ñañemboʼe memékena ha jaheja pe espíritu sánto tañandegia. Jasegíkena jajapysaka porã Jehová heʼívare.