Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Ñemañaha (ojestudiáva)  |  Julio de 2014

Kyreʼỹme oñekuaveʼẽ hikuái oservi hag̃ua Micronésiape

Kyreʼỹme oñekuaveʼẽ hikuái oservi hag̃ua Micronésiape

PETEĨ ermána Estados Unidosgua hérava Katherine, ojevautisa orekórõ guare 16 áño. Haʼe ikyreʼỹeterei opredika hag̃ua, péro pe siuda oikohápe, saʼi oĩ umi ohenduséva pe marandu porã. Haʼe omombeʼu: “Heta vésema alee umi puvlikasiónpe oĩha persóna ojeruréva Ñandejárape tomondomi hendápe peteĩ tapicha ikatúva oipytyvõ chupe oñemoag̃ui hag̃ua hese. Ha che ningo atopasénte peteĩ persóna peichagua, péro arakaʼeve ndajuhúiva”.

Opredika rire heta áñore iterritóriope, Katherine opensa ova ótro lugárpe umi hénte ohendu porãvehápe pe predikasión. Péro oĩ peteĩ mbaʼe oipyʼapýva chupe. Haʼe nosẽguasúiva hógagui. Una ves añoite osẽ vaʼekue dos semánare, ha ndovyʼaieterei ohechagaʼúgui ihentekuérape. ¿Ikatúnepa oaguanta heta tiémpo mombyry chuguikuéra? Upéicharõ jepe, oikuaa ovyʼaitereitaha oipytyvõramo umi héntepe, ha upéva omokyreʼỹ chupe. Upéi ohecha moõ moõpa ikatu ova ha oskrivi pe Sukursál oĩvape Guámpe, ha heʼi chupe hikuái moõpa ikatu oho oservi hag̃ua. Julio de 2007-pe, orekórõ guare 26 áño Katherine ova Saipánpe, peteĩ ísla oĩva Océano Pacíficope ha opytáva 9.650 kilómetro hógagui. ¿Mbaʼépa oiko upe rire?

JEHOVÁ OMBOHOVÁI MOKÕI ORASIÓN

Og̃uahẽ riremi ikongregasión pyahúpe, Katherine oikuaa peteĩ kuñakaraípe hérava Doris, orekóva 45 áñorupi ha oñepyrũ ombostudia chupe la Biblia. Ostudia rire hikuái tres kapítulo pe lívro Mbaʼépa omboʼe la Biblia?, Katherine oñepyrũ ojepyʼapy. Haʼe omombeʼu: “Doris ningo ostudia porãiterei ha aipota oñakãrapuʼã ohóvo. Péro che arakaʼeve nambostudiáiva peteĩ persónape heta tiémpore ha upévare apensa ombostudia vaʼerãha chupe ótra ermána ijedavéva chehegui ha orekovéva experiénsia”. Upémarõ oñemboʼe Jehovápe ojuhu hag̃ua peteĩ ermána ikatupyrýva ombohasa hag̃ua chupe iñestudiánte. Upéi odesidi oñeʼẽ Doris ndive.

Katherine heʼi mboyve mbaʼépa ojapose, Doris omombeʼu chupe peteĩ provléma orekóva. Katherine ojapysaka porã hese ha upéi omombeʼu mbaʼéichapa Jehová oipytyvõ chupe ohasárõ guare peteĩ provléma peichaguávare. Doris oagradese Kátherinepe ha heʼi: “Jehová ojevale nderehe. Nde reg̃uahẽrõ guare primera ves ógape, che hetáma alee kuri la Biblia upe díape. Cherasẽ ha  ajerure Ñandejárape tomboumínte cherendápe peteĩ persóna ikatúva chepytyvõ antende hag̃ua Iñeʼẽ. Upe javete nde reg̃uahẽ. ¡Jehová ohendu raʼe che ñemboʼe!”. Katherine hesay pororopa imanduʼávo upévare. Haʼe heʼi: “Doris omombeʼúva ohechauka chéve Jehová ombohovaiha che ñemboʼe. Ñandejára ohechauka chéve chekatupyryha asegi hag̃ua amboʼe chupe”.

Doris ojevautisa 2010-pe ha koʼág̃a orekóma heta estúdio vívliko. Katherine heʼi: “Avyʼaite akumpli haguére peteĩ mbaʼe ymaite guive ajapose vaʼekue”. Koʼág̃a haʼe oservi de prekursóra espesiál Kosráepe, ótra ísla oĩva Océano Pacíficope.

OMBOHOVÁI VAʼERÃ HIKUÁI MBOHAPY MBAʼE

Mas de 100 ermáno ha ermána orekóva 19 a 79 áño ou ótro tetãgui oservi hag̃ua umi lugár oñekotevẽvehápe maranduhárare Micronésiape. Por ehémplo, áño 2006-pe peteĩ ermána hérava Erica de 19 áño ova Guámpe. Haʼe heʼívare jahechakuaa mbaʼéichapa oñeñandu entéro umi ótro ermáno ováva oservi hag̃ua Micronésiape. Erica heʼi: “Añetehápe javyʼaiterei jaservíramo de prekursór peteĩ território oĩhápe heta hénte ohendu porãva pe mensáhe. Aagradese Jehovápe oheja haguére aservi chupe upéicha”. Koʼág̃a Erica oservi de prekursóra espesiál peteĩva umi ísla Márshallpe hérava Ebeye. Péro umi ermáno oservíva tetã ambuépe ombohovái vaʼerã heta mbaʼe. Jahechamína mbaʼéichapa umi ermáno ováva Micronésiape ombohovái mbohapy situasión.

Erica

Oñekontenta vaʼerã hikuái umi mbaʼe orekomívarente. Áño 2007-pe, orekórõ guare 22 áño, Simon ova Paláospe, ha pyaʼe opilla saʼieteve oganataha Inglatérrape ogana vaʼekuégui. Haʼe omombeʼu: “Ahechakuaa ndaikatumoʼãiha ajogua opa mbaʼe aipotáva. Koʼág̃a aiporavo porã umi hiʼupy ajoguátava ha ajeporeka présiore. Oĩramo che kósa oñembyaíva katu aheka rrepuésto usádo ha añehaʼã amyatyrõka”. ¿Oipytyvõpa chupe koʼã mbaʼe? Simon heʼi: “Ahechakuaa mbaʼépa añetehápe aikotevẽ, ha mbaʼéichapa aiko vaʼerã umi mbaʼe arekomívarente. Heta vésema añandu Jehová oñangarekoha cherehe. Koʼã siete áño ahasávape koʼápe, arakaʼeve ndofaltáiva chéve haʼu vaʼerã ni lugár akemi hag̃ua”. Jahechaháicha, Jehová oipytyvõ entéro oñekontentávape umi mbaʼe orekomívarente ikatu hag̃uáicha omotenonde Irréino (Mat. 6:32, 33).

Ombohovái vaʼerã hikuái techagaʼu. Erica omombeʼu: “Che ningo ajepokuaa vai che hentekuérare, ha akyhyje ahechagaʼuetereírõ g̃uarã chupekuéra ha aju ndavyʼavéi che servísiope”. ¿Mbaʼépa ojapo ombohovái hag̃ua pe situasión? Haʼe heʼi: “Aviaha mboyve, alee heta artíkulo oñeʼẽva techagaʼúre, ha umíva ideprovechoiterei chéve. Peteĩvape oñemombeʼu kuri peteĩ ermána heʼi hague imembykuñáme: ‘Jehová oñatende porãvéta  nderehe’. Alee rire koʼã mbaʼe chekyreʼỹve apytávo”. Hannah ha iména Patric, oservi Majúrope oĩva ísla Márshallpe avei. Haʼe ojeheʼa meme umi ermáno ha ermána ikongregasionguáre, ha upéva oipytyvõ chupe ani hag̃ua ohechagaʼueterei ihentekuérape. Hanna heʼi: “Aagradeseterei ningo Jehovápe areko haguére heta ermáno ko yvy tuichakuére. Che famíliaichante avei hikuái. Haʼekuéra nachepytyvõirire, che ndaikatúi vaʼerãmoʼã aservi oñekotevẽvehápe”.

Simon

Ijeheʼa vaʼerã hikuái. Simon heʼi: “Ñag̃uahẽvo ótro tetãme, opa mbaʼénte idiferénte. Sapyʼánte añeñandu vai amombeʼúrõ peteĩ chíste ha avave nachentendéi”. Erica katu heʼi: “Ñepyrũrã haʼete avave ndojeheʼaséiva cherehe, péro upe rire chemanduʼa aha hague aservive hag̃ua Jehovápe ha che rapichakuérape”. Upéi heʼi: “Ohasávo pe tiémpo akonsegi heta che amigorã, ha upéva amombaʼeterei”. Simon avei oñehaʼã oaprende idióma palauano, ha upéva oipytyvõ chupe ‘oavri hag̃ua ikorasõ’ ha otopa kongregasiónpe heta iñamigorã (2 Cor. 6:13). Umi ermáno oguerohoryve chupe ohechávo oñehaʼãha oaprende iñidiomakuéra. Jahechaháicha, umi ohóva oservi umi lugár oñekotevẽvehápe ombaʼapo meme vaʼerã umi ermáno upepegua ndive. Péichamante enterovénte oñevenefisia ha pe kongregasiónpe opavave ojoguerohory. ¿Mbaʼépa ohupyty avei umi ohóva oservi oñekotevẽvehápe?

“HETA OÑOTỸVA, HETA OMONOʼÕTA”

Apóstol Pablo ohai vaʼekue: “Pe heta oñotỹva, heta omonoʼõta” (2 Cor. 9:6). Ko téxto oñekumpli umi oñemeʼẽmbaitévare ojapove hag̃ua Ñandejára servísiope. Péro ¿mbaʼépa ‘omonoʼõ’ umi ova vaʼekue Micronésiape?

Patrick ha Hannah

Micronésiape oĩ gueteri heta persóna ostudiaséva la Biblia ha ikatúva oprogresa Jehová servísiope. Patrick ha Hannah oho avei opredika Angáurpe, peteĩ ísla michĩva oikohápe 320 persónante. Dos mése opredika haguépe, ojuhu hikuái peteĩ kuñakarai omongakuaáva haʼeño imemby, ha pyaʼe voi oñepyrũ ostudia la Biblia. Haʼe ojeroviaiterei pe añeteguáre ha okambia heta mbaʼépe. Hannah ha iména oho jepi visikléta ári ombostudia hag̃ua ko kuñakaraípe. Ha oukuévo pe estúdiogui omaña hikuái ojuehe ha heʼi: “Grásiamante Jehová”. Upéi heʼi avei: “Aikuaa porã Jehová oimeháicha oguerutaha ko ‘ijovechaʼípe’, péro ore roguereko pe oportunida rojuhúvo ha roipytyvõvo chupe oikuaa hag̃ua pe añetegua roju rupi roservi oñekotevẽvehápe. ¡Koʼã mbaʼe ningo koʼýte orembovyʼa!”. Erika heʼi avei: “Hasy ningo ñamombeʼupa hag̃ua mbaʼeichaitépa javyʼa ñaipytyvõramo peteĩ persónape oikuaa hag̃ua Jehovápe”.

¿IKATÚPA NDE AVEI REPOROPYTYVÕ?

Heta tetãme oñekotevẽve maranduhárare. ¿Ikatúpa nde reva reipytyvõ hag̃ua umírupi? Ejerure Jehovápe tanemokyreʼỹ rejapove hag̃ua iservísiope. Eñeʼẽ umi ansiáno ne kongregasiongua ndive, pe superintendénte de sirkuíto, térã umi ermáno ohóma vaʼekue ndive oservi ótro lugár oñekotevẽvehápe. Reñepyrũta vove rejeprepara reva hag̃ua, reskrivi vaʼerã pe Sukursál oñatendévape pe lugár nde rehosehápe reservi ha ejerure informasión. * Oĩ heta ermáno imitãva ha ijedáva, soltéro ha omendáva oñekuaveʼẽva oservi hag̃ua oñekotevẽvehápe. Ha nde ikatu hína remoirũ chupekuéra ha péicha vyʼápe ‘remonoʼõta’ Jehovápe g̃uarã.

^ párr. 17 Ehecha Ñane Marandu Porã agosto de 2011-pe, pe artíkulo “Ikatúpa rehasa Macedóniape?”.