Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Ñemañaha (ojestudiáva)  |  Julio de 2014

Jehová siervokuéra “oheja vaʼerã umi mbaʼe vai”

Jehová siervokuéra “oheja vaʼerã umi mbaʼe vai”

“Opavave ohenóiva Jehová réra oheja vaʼerã umi mbaʼe vai.” (2 TIM. 2:19)

1. ¿Mbaʼépa iñimportanteterei opavave testígo de Jehovápe g̃uarã?

HETA hénte oreko jepi hógape umi kuádro oĩva pype umi téxto orekóva Jehová réra. Jahechávo upéva katuete ñaneinteresa. ¿Mbaʼéicha rupípa? Ñande ningo testígo de Jehová ha ñambotuicha upe téra. Ndaipóri ótro grúpo oipurúva Ñandejára réra ñandéicha. Añetehápe, tuichaiterei rresponsavilida hína ñañehenói testígo de Jehová.

2. ¿Mbaʼépa tekotevẽ jajapo Jehová ñandeguerohory hag̃ua?

2 Jehová ñandeguerohory hag̃ua ndahaʼéi jaipurúnte vaʼerã héra, tekotevẽ avei jaiko haʼe oipotahaichaite. Upévare la Biblia heʼi Ñandejára siervokuérape: “Ejei tembiapo vaígui” (Sal. 34:14, ÑÑB). Apóstol Pablo oñeʼẽ vaʼekue avei upévare, ha heʼi: “Opavave ohenóiva Jehová réra oheja vaʼerã umi mbaʼe vai” (elee 2 Timoteo 2:19). Enterovénte voi oikuaa ñande Testígo jaipuru memeha Jehová réra, péro ¿mbaʼépa heʼise jaheja vaʼerãha umi mbaʼe vai?

“PEJEI” UMI MBAʼE VAÍGUI

3, 4. ¿Mbaʼépa ontende porãse umi mboʼehára ostudiáva umi palávra vívlika, ha mbaʼérepa?

3 Segunda a Timoteo 2:19-pe Pablo heʼi vaʼekue ‘Ñandejára  omoĩha peteĩ simiénto opyta hatãva’. Upe rire heʼi avei pe simiéntore oĩha peteĩ mensáhe heʼíva mokõi mbaʼe iñimportánteva. Primero: “Jehová oikuaa umi imbaʼévape”. Ikatu jaʼe upépe Pablo imanduʼa hague Números 16:5-pe heʼívare (ehecha pe artíkulo ñahesaʼỹijo vaʼekue kóva mboyve). Pe segunda párte katu heʼi: “Opavave ohenóiva Jehová réra oheja vaʼerã umi mbaʼe vai”. Umi mboʼehára ostudiáva umi palávra vívlika, heta tiémporema oikuaase moõguipa Pablo oguenohẽ upéva. ¿Mbaʼérepa?

4 Haʼete ningo Pablo oguenohẽva avei Eskritúras Evréasgui umi mbaʼe heʼi vaʼekue pe segunda pártepe, péro ndaipóri ni peteĩ téxto ojoguáva upe haʼe heʼi vaʼekuépe. ¿Mbaʼérepa upéicharõ Pablo osẽ heʼi: “Opavave ohenóiva Jehová réra oheja vaʼerã umi mbaʼe vai”? Upe mboyvemínte ningo imanduʼa kuri umi mbaʼe oiko vaʼekuére Coré ojerrevelárõ guare, oñemombeʼúva Números kapítulo 16-pe. ¿Ikatúpa jaʼe pe segunda párte oñeʼẽha avei uperõ oiko vaʼekuére?

5-7. ¿Mbaʼérehepa Pablo imanduʼa oskrivírõ guare 2 Timoteo 2:19? (Ehecha pe taʼanga oĩva iñepyrũme.)

5 La Biblia heʼi Eliab raʼykuéra, hérava Datán ha Abirám, omoirũ hague Corépe omoakã hag̃ua umi opuʼãvape Moisés ha Aarón rehe (Núm. 16:1-5). Haʼekuéra ndaijaʼeieterei Moisés rehe ha ndoaseptaséi hikuái Jehová omeʼẽ hague chupe autorida. Añetehápe ningo koʼã kuimbaʼe oĩ kuri Ñandejára puévlope ha upéicha rupi oiméne omokangy rakaʼe heta isrraelíta jerovia. Péro upéi og̃uahẽ pe tiémpo ojekuaatahápe mávapa iñeʼẽrendu ipyʼaite guive ha mávapa irrevélde. Ha ojekuaa hag̃ua upéva, Jehová heʼi ipuévlope mbaʼépa ojapo vaʼerã.

6 La Biblia omombeʼu: “Jehová oñeʼẽ Moiséspe, ha heʼi: ‘Eñeʼẽ pe puévlope ha ere: “¡Pejei Coré, Datán ha Abiram róga kárpa ypýgui!”’. Upéi Moisés opuʼã oho Datán ha Abiram rendápe, ha umi ansiáno Israelgua oho hendive. Upémarõ oñeʼẽ pe puévlope ha heʼi: ‘Pejeína ikatúramo koʼã kuimbaʼe aña róga kárpa ypýgui, ha ani ni pepoko umi mbaʼe haʼekuéra orekóvare, pono peñehundi hendivekuéra ipekádope’. Upepete entéro umi oĩva Coré, Datán ha Abiram róga kárpa jerére ojerretira upégui” (Núm. 16:23-27, NM). Upéi Jehová ohundipaite umi irrevéldevape. Péro umi omombaʼeguasúva Jehovápe ipyʼaite guive ojesalva, ohechauka rupi ojeiha umi mbaʼe vaígui oñemomombyrývo umi irrevéldevagui.

7 Jehová oikuaa mbaʼépa oĩ ñane korasõme ha ohechakuaa umi imbaʼéva iñeʼẽrendúramo chupe ipyʼaite guive. Péro umi ohayhúva Ñandejárape tekotevẽ kuri idesidído ha ojei umi mbaʼe vai apoha ypýgui. Upévare ikatu jaʼe Pablo oñeʼẽ hague Números 16:5, 23-27 heʼívare oskrivírõ guare: “Opavave ohenóiva Jehová réra oheja vaʼerã umi mbaʼe vai”. Koʼã mbaʼe oho avei pe ohai vaʼekuére upe mboyvemi: “Jehová oikuaa umi imbaʼévape” (2 Tim. 2:19).

“ANI [...] REÑENTREMETE UMI OIKÓVARE OJODISKUTI ÑEʼẼREI HA VYROREÍRE”

8. ¿Mbaʼépa tekotevẽ ojapo opavave oservíva Jehovápe?

8 Pablo oñeʼẽrõ guare umi mbaʼe oiko vaʼekuére Moisés tiémpope, omomanduʼa Timotéope idesidído vaʼerãha ani hag̃ua oñemomombyry Jehovágui. Ndahaʼéi oĩ haguérente peteĩ kongregasiónpe ndojepyʼapyvéima vaʼerã. Ñanemanduʼa Coré ha isegidorkuéra oipuru hague avei Jehová réra, péro upéva ndeʼiséi oĩ porã hague Ñandejára renondépe. Upévare, enterove oservíva Jehovápe tekotevẽ idesidído ha “oheja [...] umi mbaʼe vai”. ¿Mbaʼéichapa  oipytyvõ Timotéope Pablo heʼi vaʼekue, ha mbaʼéichapa upéva ñanepytyvõ avei ñandéve?

9. ¿Mbaʼéichapa umi ‘ñeʼẽrei ha vyrorei’ operhudika vaʼekue pe kongregasiónpe síglo primérope?

9 Ñandejára Ñeʼẽ heʼi porã ñamboyke vaʼerãha umi mbaʼe vai, ha ohechauka ñandéve mbaʼeichaguápa umíva. Por ehémplo, Pablo heʼi Timotéope “ani [hag̃ua] oiko vai ñeʼẽre” ha omboyke hag̃ua “umi ñeʼẽrei” (elee 2 Timoteo 2:14, 16, 23). Kongregasiónpe oĩ vaʼekue omosarambíva enseñánsa apóstata. Oĩ avei omboʼéva heta mbaʼe ikatúva oporomoingo vai, ha ndotakýiramo jepe la Biblia omboʼévare, ikatu kuri odividi ermanokuérape. Upévare Pablo heʼi Timotéope ani hag̃ua oñentremete “umi oikóvare ojodiskuti ñeʼẽrei ha vyroreíre”.

10. ¿Mbaʼépa jajapóta jahecha térã ñahendúramo umi apóstata omboʼéva?

10 Ñane tiémpope ndaiporiguasúi apóstata kongregasiónpe. Péro, ¿mbaʼépa jajapóta peichahágui jahecha térã ñahendúramo umi mbaʼe haʼekuéra omboʼéva? Ñamboykete vaʼerã umíva, tou ouháguio. Naiporãmoʼãi ningo jaikóramo jajodiskuti umi apóstatandi, tahaʼe en persóna, Internet rupive, térã ambue hendáicha. Ni naiporãmoʼãi jaikóramo ñarrasonase koʼãichagua persóna ndive ñapenságui péicha ñaipytyvõtaha chupekuéra. Jajapóramo upéva ñamboyke hína pe mandáto heʼíva ndovaleiha jajodiskuti umi ñeʼẽrei ha vyroreíre. Jehová heʼi porã ñandéve jarrechasaite vaʼerãha pe apostasía.

Ani jajodiskuti umi apóstata ndive (Ehecha párrafo 10)

11. a) ¿Mbaʼépa ikatu omoñepyrũ ‘ñeʼẽrei ha vyrorei’? b) ¿Mbaʼéichapa ansianokuéra ikatu omoĩ ehémplo porã kongregasiónpe?

11 Ndahaʼéi pe apostasíante ikatúva odividi peteĩ kongregasión, síno avei ikatu hína oñepyrũ ‘ñeʼẽrei ha vyrorei’ umi vyʼarã káusare. Por ehémplo heta ermánope g̃uarã ndaivaíri peteĩ kláse de diversión, péro ótrope g̃uarã katu ivai. Péro oĩramo ermáno omboligáva ótrope opartisipa hag̃ua umi vyʼarã naiporãivape, ansianokuéra ointerveni vaʼerã. Ndovaléi opermiti peichagua komportamiénto kongregasiónpe (Sal. 11:5; Efes. 5:3-5). Péro upéicha avei oñatende vaʼerã hikuái ani hag̃ua oñemohatã haʼekuéra heʼívapente. Upéva rangue, umi ansiáno osegi vaʼerã ko konsého Ñandejára omeʼẽva chupekuéra: “Peñangarekóke peteĩ ovecharerekuáicha Ñandejára ovechakuérare oĩva pende poguýpe [...]. Haʼekuéra Ñandejára mbaʼe hína, upévare ndovaléi pemanda guasu hesekuéra. Peẽ ningo ehémplo vaʼerã pe ovecha atýpe g̃uarã” (1 Ped. 5:2, 3; elee 2 Corintios 1:24).

12, 13. a) ¿Mbaʼépa opensa Jehová organisasión umi vyʼarãre? b) ¿Mbaʼe konséhopa ikatu ñanepytyvõ jaiporavo porã hag̃ua umi vyʼarã? c) ¿Mbaʼéichapa umi téxto oĩva párrafo 12-pe ikatu ñanepytyvõ jadesidi hag̃ua heta mbaʼe?

12 Jehová organisasión ndoikói orrevisa umi pelíkula, videohuégo, lívro térã músika heʼi hag̃ua ñandéve mávapa iporã ha mávapa ivai. ¿Mbaʼérepa ndojapói upéva? La Biblia heʼi rupi káda kristiáno ‘oipuru meme vaʼerãha iñakã’ ha ‘ikatupyry vaʼerãha oikuaa hag̃ua mbaʼépa iporã ha mbaʼépa ivai’ (Heb. 5:14). Ñandejára Ñeʼẽme oĩ heta téxto ñanepytyvõva jahechakuaa hag̃ua mbaʼeichagua diversiónpa iporã. Péro ani ñanderesarái jajapo mboyve oimeraẽ mbaʼe ‘ñañehaʼã meme vaʼerãha jahechakuaa mbaʼépa oguerohory ñande Ruvicha’ (Efes. 5:10). La Biblia ningo heʼi porã umi omoakãva hogapy ikatuha odesidi mbaʼeichagua vyʼarãpa nopermitimoʼãi hógape (1 Cor. 11:3; Efes. 6:1-4). *

13 Koʼã téxto jahecháva ndahaʼéi ñanepytyvõva jaiporavo porã hag̃uánte umi  vyʼarã, síno avei jaikuaa hag̃ua mbaʼéichapa ñañemonde ha jajearregla vaʼerã, mbaʼéichapa ñañangareko vaʼerã ñande salu rehe, ñane alimentasión rehe ha hetave mbaʼére. Upévare Jehová siervokuéra ndovaléi ojodiskuti koʼã mbaʼére, koʼýte oiméramo ndojejapói hína peteĩ mbaʼe la Biblia oproivíva. “Ñande Ruvicha rembiguái natekotevẽi oñorairõ avavéndi, síno imbaʼeporã vaʼerã enterovéndi.” (2 Tim. 2:24.)

¡ANÍKENA ÑANEJÚNTA VAI!

14. ¿Mbaʼe komparasiónpa oipuru Pablo ohechauka hag̃ua ndajarekói vaʼerãha júnta vai?

14 ¿Mbaʼéichapa avei umi ohenóiva Jehová réra ohechauka vaʼerã ‘ohejaha umi mbaʼe vai’? Ndojeheʼái vaʼerã umi ojapóvare mbaʼe vai. Oiméne ñanemanduʼa Pablo oipuru hague peteĩ ehémplo heʼíva ‘Ñandejára omoĩha peteĩ simiénto opyta hatãva’. Péro upe rire haʼe oipuru avei ótra komparasión. Oñeʼẽ peteĩ ‘óga tuichávare’, ha heʼi upépe noĩriha “mbaʼyru de óro ha de pláta añónte, síno oĩ avei de madéra ha ojejapóva ñaiʼũgui, oĩ mbaʼyru ojeporu porãtava ha oĩ ojeporútava oimeraẽ mbaʼerã” (2 Tim. 2:20, 21). Upéi heʼi enterove kristiáno ojeiete vaʼerãha, térã oñemomombyry vaʼerãha umi mbaʼyru ojepurúvagui “oimeraẽ mbaʼerã”.

15, 16. ¿Mbaʼépa ñaaprende pe ehémplo Pablo omoĩ vaʼekuégui?

15 ¿Mbaʼépa ñanemboʼe ko ehémplo? Pablo okompara pe kongregasión kristiána peteĩ “óga tuicháva” rehe, ha umi ermáno katu umi ‘mbaʼyrúre’, térã tembiporu. Peteĩ ógape ojeguereko opaichagua mbaʼyru, por ehémplo oĩ ojepurúva limpiesarã, ha ótro katu kosinámente. Umi ojepurúva kosináme oñemoĩ apárte ani hag̃ua ojeheʼa umi ótrore ha oñekontamina.

16 Péicha avei, Jehová siervokuéra oñehaʼãmbaitéva hekopotĩ, ndojeheʼái vaʼerã umi ermáno ndorrespetáivare umi konsého oĩva la Bíbliape (elee 1 Corintios  15:33). Tekotevẽramo ñañatende mávarepa jajeheʼa kongregasiónpe voi, koʼýte ñañeñangareko vaʼerã umi ndahaʼéivagui Jehová siérvo. Umíva apytépe ningo oĩ heta ‘iplatarayhúva, [...] naiñeʼẽrendúiva ituvakuérape, [...] oporombotavýva, [...] okopíva ótrore, ndojejokokuaáiva, oñemboharáiva hapicháre, ndohayhúiva mbaʼeve iporãva, itraisionérova, [ha] oikóva vyʼarã rapykuéri ohayhu rangue Ñandejárape’ (2 Tim. 3:1-5).

JEHOVÁ ÑANEVENDESI ÑANDEDESIDÍDORAMO

17. ¿Mbaʼéichapa umi isrraelíta iñeʼẽrendúva ohechauka ojapoha Jehová heʼíva guive?

17 Ñandejára Ñeʼẽ omombeʼu heta isrraelíta ohechauka hague idesididoha oñemandárõ guare chupekuéra ‘ojei hag̃ua Coré, Datán ha Abiram róga kárpa ypýgui’. La Biblia heʼi hesekuéra: “Upepete [...] ojerretira upégui” (Núm. 16:24, 27, NM). Haʼekuéra nopensái dos vése, síno pyaʼe osẽ upégui. Avei Ñandejára Ñeʼẽ omombeʼu mbaʼeichaite pevépa iñeʼẽrendu hikuái: “Entéro umi oĩva Coré, Datán ha Abiram róga kárpa jerére ojerretira upégui”. Umi iñeʼẽrendúva ni michĩmi ndojapeligraséi, upévare ojapo hikuái ojeʼe hagueichaite chupekuéra. Ohechauka hikuái oñemoĩha Jehová ykére ha oĩha pe mbaʼe vai kóntrape. ¿Mbaʼépa ikatu ñaaprende chuguikuéra?

18. ¿Mbaʼépa Pablo omboʼe vaʼekue Timotéope heʼírõ guare: “Emboykete umi mbaʼe ojaposéva jepi mitãrusukuéra”?

18 Ikatu hag̃uáicha siémpre ñaime porã Jehová renondépe, tekotevẽ ñandedesidído ha pyaʼe jajapo haʼe heʼíva. Upéva Pablo omboʼe vaʼekue Timotéope heʼírõ guare: “Emboykete umi mbaʼe ojaposéva jepi mitãrusukuéra” (2 Tim. 2:22). Upérõ ningo Timoteo okakuaapáma, oiméne orekóma 30 áño rasa. Upéicharõ jepe oñeñangareko vaʼerã umi mbaʼe vai sapyʼánte oñantohávagui umi imitãvévape. Upévare haʼe omboykete vaʼerã kuri umíva, térã “oheja vaʼerã umi mbaʼe vai”. Jesús omeʼẽ vaʼekue avei peteĩ konsého ojoguáva upévape heʼírõ guare: “Nde resa nemoñepysangáramo, eipeʼa ha emombo mombyry ndehegui” (Mat. 18:9). Koʼág̃arupi, umi kristiáno osegíva ko konsého, idesidído ha pyaʼe omboyke oimeraẽ mbaʼe ikatúva omoĩ vai chupekuéra Jehová renondépe.

19. ¿Mbaʼépa odesidi ojapo heta kristiáno ani hag̃ua oñemoĩ vai Jehová renondépe?

19 Por ehémplo, oĩ ermáno hoʼu rasa vaʼekue vevída oiko mboyve chugui Testígo, upévare odesidi ndoʼuvéi mbaʼeveichagua vevída. Oĩ katu omboyketéva heta kláse vyʼarã ndaivaíriramo jepe, oikuaágui umíva ikatuha mbeguekatúpe ogueraha vai jey chupe (Sal. 101:3). Oiko mboyve chugui Testígo, peteĩ ermáno oho meme vaʼekue umi fiestahápe ha umichahárupi umi hénte itieʼỹeterei jepi. Upévare, oikuaa rire Jehovápe haʼe ndojerokyvéi ni umi fiestíta ojapóvape ermanokuéra, ani hag̃ua ni omomanduʼa chupe umi mbaʼe vai oheja vaʼekue. Añetehápe ningo kristianokuéragui ndojeproivíri ojeroky térã hoʼu vevída. Upéicharõ jepe, enterovéva idesidído vaʼerã ha ojapo tekotevẽva guive ojeprotehe hag̃ua oimeraẽ mbaʼe ikatúvagui omoĩ vai chupekuéra Jehová renondépe.

20. ¿Mbaʼépa ñanekonsola ha ñanepytyvõ sapyʼánte ijetuʼúramo jepe ‘jaheja hag̃ua umi mbaʼe vai’?

20 Ñande ningo testígo de Jehová ha upéva tuichaiterei rresponsavilida. Upéicha rupi ‘jaheja umi mbaʼe vai’ ha ñanembojeguaru opaichagua ‘tembiapo vai’ (Sal. 34:14, ÑÑB). Upéva sapyʼánte ijetuʼu ñandéve. Péro tuicha ñanekonsola jaikuaávo Jehová siémpre ohayhutaha “umi imbaʼévape” ha nosẽiva pe tape porãgui (2 Tim. 2:19; elee 2 Crónicas 16:9a).

^ párr. 12 Ehecha Internétpe pe artíkulo hérava “¿Perekópa peteĩ lísta oĩháme mbaʼeichagua pelíkula, lívro térã músikapa ojeproivi pendehegui?” (jw.org/gug > ORE INFORMASIÓN > OÑEPORANDU MEMÉVA).