Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Ñemañaha (ojestudiáva)  |  Junio de 2014

“Rehayhu vaʼerã nde rapichápe nde rejehayhuháicha”

“Rehayhu vaʼerã nde rapichápe nde rejehayhuháicha”

“Pe segundo [mandamiénto] heʼi kóicha: ‘Rehayhu vaʼerã nde rapichápe nde rejehayhuháicha.’” (MAT. 22:39)

1, 2. a) ¿Mbaʼépa pe segundo mandamiénto iñimportantevéva oĩva pe Léipe? b) ¿Mbaʼépa jahecháta ko artíkulope?

PETEĨ fariséo oporandúrõ guare Jesúspe “mbaʼépa pe mandamiénto tuichavéva oĩva pe Léipe”, haʼe ombohovái chupe: “Rehayhu vaʼerã Jehová nde Járape nde pyʼaite guive, ne álma rugua guive, ha opa ne arandukue reheve”. Pe artíkulo ohasa vaʼekuépe jahecha kuri mbaʼépa heʼise jahayhuha Ñandejárape. Péro Jesús heʼi pe segundo mandamiénto iñimportanteha avei: “Rehayhu vaʼerã nde rapichápe nde rejehayhuháicha” (Mat. 22:34-39).

2 Jahechaháicha, Jesús heʼi kuri jahayhu vaʼerãha ñande rapichápe ñande jajehayhuháicha. Péro, ¿mbaʼépa heʼise upéva? ¿Mbaʼéichapa ikatu jahechauka jahayhuha ñande rapichápe? Ko artíkulo ombohovái koʼã porandu.

¿MBAʼÉPA HEʼISE JAHAYHUHA ÑANDE RAPICHÁPE?

3, 4. a) ¿Mbaʼe ehémplopa oipuru Jesús ombohovái hag̃ua pe karai oporandúvape chupe mávapa hapicha? b) ¿Mbaʼéichapa pe samaritáno oipytyvõ pe hudío oñembyepoti vaipávape? (Ehecha pe taʼanga oĩva iñepyrũme.)

3 Peteĩ kuimbaʼe oporandu Jesúspe: “¿Máva piko añetehápe che rapicha?”. Upémarõ Jesús omombeʼu pe káso oñeʼẽva pe samaritáno ipyʼaporãvare (elee Lucas 10:29-37). Heʼi ojasalta hague peteĩ hudíope, oñembyepoti vaipaite chupe ha ojeheja heʼõngue  lénto pe tapépe. Upe rire ohasa ijypýrupi peteĩ saserdóte, ha upéi peteĩ levíta, péro ni peteĩva nopenái hese, ojerénte chugui hikuái. Koʼãichagua persóna koʼýte oipytyvõ vaʼerã kuri opavavépe. Péro upe rire ohasa upérupi peteĩ samaritáno ha opyta oipytyvõ chupe, hiʼarive umi hudío ha samaritáno ndochaʼéi ojuehe upe tiémpope (Juan 4:9).

4 Pe samaritáno omoĩ aséite ha víno pe hudío erídare oipohano hag̃ua chupe. Upéi ogueraha peteĩ posádape ha opaga pe posáda járape dos denário, térã dos día de traváho repykue, ikatu hag̃uáicha oñangareko hese (Mat. 20:2). Ajépa ndahasýi jahechakuaa hag̃ua mávapa añetehápe ohayhu hapichápe. Ko ehémplo rupive Jesús ñanemboʼe jahayhu ha jaiporiahuvereko vaʼerãha ñande rapichakuérape.

Ñandejára siervokuéra pyaʼe oporopytyvõ (Ehecha párrafo 5)

5. ¿Mbaʼéichapa ohechauka Jehová siervokuéra oporohayhuha oikórõ guare peteĩ desástre naturál?

5 Koʼã “ára pahápe” saʼíma oĩ oiporiahuverekóva hapichápe. Upéva rangue hetaiterei oĩ ipyʼahatãva, ivioléntova ha ni michĩmi ndojepyʼapýiva ótrore (2 Tim. 3:1-3). Por ehémplo, áño 2012-pe octubre pahárupi, og̃uahẽ Nueva Yórkpe pe urakán Sandy ha sarambi ojapo upe siudápe. Peteĩ lugár ivaive haguépe pe urakán, heta persóna opyta elektrisidaʼỹre, ohasa roʼy ha ofaltapa chupekuéra umi mbaʼe oñekotevẽvéva. Heta hénte katu oaprovecha upéva ha omondapa chupekuéra. Péro umi testígo de Jehová oñeorganisa oñopytyvõ hag̃ua ha avei oipytyvõ hag̃ua ótra héntepe. ¿Mbaʼépa omomýi chupekuéra ojapo hag̃ua upéva? Opavave oservíva Jehovápe ohayhu hapichakuérape. Péro, ¿mbaʼéichapa ikatu avei jahechauka jahayhuha umi héntepe?

¿MBAʼÉICHAPA IKATU JAHECHAUKA JAHAYHUHA ÑANDE RAPICHÁPE?

6. ¿Mbaʼérepa ikatu jaʼe jahayhuha ñande rapichakuérape japredikávo chupekuéra?

6 Ñaipytyvõ chupekuéra la Biblia rupive. Japredika jave ñameʼẽ umi héntepe pe ‘konsuélo’ oĩva Ñandejára Ñeʼẽme (Rom. 15:4). Jahechauka jahayhuha chupekuéra ñamombeʼúvo pe marandu porã oñeʼẽva Ñandejára Rréinore (Mat. 24:14). ¡Ajépa tuichaite mbaʼe ikatu haguére ñamog̃uahẽ ñande rapichápe pe esperánsa “Ñandejára omeʼẽva” (Rom. 15:13).

7. a) ¿Mbaʼépa pe Rrégla de Óro? b) ¿Mbaʼépa jahupyty jasegíramo pe Rrégla de Óro?

7 Jasegíkena pe Rrégla de Óro. Pe Sermón del Móntepe, Jesús omyesakã vaʼekue mbaʼépa heʼise pe Rrégla de Óro heʼírõ guare: “Opa mbaʼe peẽ peipotáva ojapo penderehe pende rapichakuéra, peẽ pejapo vaʼerã avei hesekuéra. Añetehápe upéva hína la omboʼéva pe Léi ha umi Profetakuéra” (Mat. 7:12). Jatratáramo umi héntepe Jesús heʼi haguéicha, ñakumpli hína “pe Léi” (Génesis guive Deuteronomio peve), ha avei “umi Profetakuéra” ñeʼẽ (umi lívro ohai vaʼekue umi proféta oĩva Eskritúras Evréaspe). Koʼã lívrope ojehechauka Jehová ovendesiha umi ohayhúvape hapichakuérape. Proféta Isaías rupive, Jehová heʼi: “Pedefende pe tekojoja ha pejapo hekopeguáva. [...] Ovyʼaite vaʼerã pe yvypóra ojapóva péicha” (Is. 56:1, 2, NM). Jahayhúramo ñande rapichápe ha jasegi pe Rrégla de Óro, katuete Jehová ñanevendesíta.

8. a) ¿Mbaʼérepa jahayhu vaʼerã ñane enemigokuérape? b) ¿Mbaʼépa ikatu oiko jahechaukáramo jahayhuha ñane enemigokuérape?

8 Jahayhúkena umi ndaijaʼéivape ñanderehe. Jesús heʼi vaʼekue: “Peẽ peikuaa ojeʼe hague: ‘Rehayhu vaʼerã nde rapichápe, ha nderechaʼéi vaʼerã ne enemígore’. Che katu haʼe peẽme: Akóintekena pehayhu pene enemigokuérape ha peñemboʼe umi pendepersegívare. Péicha pehechaukáta peẽ haʼeha pende Ru yvagapegua raʼy” (Mat. 5:43-45). Apóstol Pablo omeʼẽ avei peteĩ konsého ojoguáva upévape, heʼírõ guare: “Ne enemígo iñembyahýiramo, emongaru chupe; ijyʼuhéiramo, emboyʼu” (Rom. 12:20; Prov. 25:21). Pe Léi Mosáikape heʼi  peteĩ isrraelíta oipytyvõ vaʼerãha iñenemígope ohecháramo hymba hoʼaha ha ikárga opytaha hiʼári (Éx. 23:5). Péicha oñopytyvõramo, ikatu hína oiko chuguikuéra oñoamigoite. Koʼág̃a avei jahechaukáramo jahayhuha ñane enemigokuérape, tañandepersegi jepe raʼe, ñaipytyvõkuaa chupekuéra okambia hag̃ua opensa lája. Ha moõ piko jaikuaapáta, ikatu voi ningo oiko chuguikuéra Jehová siérvo.

9. ¿Mbaʼépa Jesús heʼi jajapo vaʼerãha oiméramo jajoavy peteĩ ermánondi?

9 ‘Ñañehaʼã memékena jaiko pyʼaguapýpe opavavéndi’ (Heb. 12:14). Koʼýte jaiko vaʼerã pyʼaguapýpe ñane ermanokuérandi. Jesús heʼi vaʼekue: “Regueraha jave nde jopói pe altárpe nemanduʼáramo ne ermáno ipochyha nderehe, eheja nde jopói pe altár renondépe, ha tereho eñemoĩ porã raẽ ne ermánondi, upéi ae eju emeʼẽ nde jopói” (Mat. 5:23, 24). Jehová katuete ñanevendesíta jahechaukáramo jahayhuha ñane ermánope ha pyaʼe ñañehaʼãramo ñaĩ porã jey hendive oimérõ oĩ raʼe peteĩ provléma.

10. ¿Mbaʼérepa ndajaikói vaʼerã jaheka defékto avavére?

10 Aníkena jahusga ñande rapichápe. Jesús heʼi vaʼekue: “Anive pehusga pende rapichápe, ha Ñandejára napendehusgamoʼãi avei. Cháke peẽ peporohusgaháicha pejehusgáta avei, ha pe medída peiporúva pende rapicháre ojeporúta avei penderehe. Upéicharõ, ¿maʼerãpa repena pe kapiʼi oĩvare ne ermáno resápe, péro nderehechái pe víga oĩva nde resápe? ¿Mbaʼéicha piko eréta ne ermánope: ‘Anohẽmíta ndéve pe kapiʼi oĩva nde resápe’, ha ¡péina!, nde voi nderehechái pe víga oĩva nde resápe? ¡Tekove rovamokõi! Enohẽ raẽna pe víga nde reságui, ha upépe ae rehecha porãta mbaʼéichapa renohẽta pe kapiʼi ne ermáno reságui” (Mat. 7:1-5). ¡Mbaʼéicha piko jaikóta jahusga ñande rapichápe sonséra reíre, ko ñande voi sapyʼánte tuicha jajavýva!

JAHECHAUKÁKENA JAHAYHUHA ÑANDE RAPICHAKUÉRAPE PREDIKASIÓN RUPIVE

11, 12. ¿Mbaʼéichapa jahechauka avei jahayhuha ñande rapichakuérape?

11 Jesús ojapo haguéicha, ñande jahechauka avei jahayhuha ñande rapichakuérape pe predikasión rupive (Luc. 8:1). Haʼe omanda isegidorkuérape: “Tapeho pemboʼe umi hénte opa tetãyguápe” (Mat. 28:19, 20). Ñakumplívo ko mandáto, ñaipytyvõ ñaína ñande rapichápe anive hag̃ua oho  pe tape oporoguerahávare ñehundípe, síno oguata hag̃ua pe tape oporoguerahávare jeikove opaveʼỹvape (Mat. 7:13, 14). Katuete ningo Jehová ñanevendesíta ñañehaʼã haguére.

12 Jesús oipytyvõ vaʼekue umi héntepe ohechakuaa hag̃ua oikotevẽha Jehováre, ha ñande avei jajapo upéicha (Mat. 5:3). Oĩramo oñeinteresáva ñamboʼe chupekuéra “Ñandejára marandu porã” (Rom. 1:1). Ha umi oaseptáva, ohechakuaa ikatuha oñemoĩ porã jey Ñandejára ndive Jesús sakrifísio rupive (2 Cor. 5:18, 19). Añetehápe, japredikávo umi héntepe jahechauka porã jahayhuha chupekuéra.

13. ¿Mbaʼéichapa nde reñeñandu ikatu haguére reipytyvõ nde rapichakuérape pe predikasión rupive?

13 Jajeprepara porãramo javisita jey ha ñamboʼe hag̃ua la Biblia umi héntepe, ñaipytyvõ hína chupekuéra ikatu hag̃uáicha okambia ha oiko Jehová oipotaháicha (1 Cor. 6:9-11). “Opavave oñehaʼãva ohupyty jeikove opaveʼỹva” okambia oĩ porã hag̃ua Jehová ndive ha oiko chugui iñamígo. Ha ñande javyʼaiterei jahechávo mbaʼéichapa Ñandejára oipytyvõ chupekuéra (Hech. 13:48). Heta persóna ostudia mboyve la Biblia ikatu kuri ojepyʼapyeterei, péro upéi oúma ipyʼaguapy ha ojerovia Jehováre. ¡Ajépa javyʼaite jahechávo oñemoag̃uiveha ohóvo hikuái Ñandejárare! Tuichaiterei mbaʼe ningo ñandéve g̃uarã ikatu haguére ñaipytyvõ péicha ñande rapichakuérape.

PABLO OMYESAKÃ MBAʼÉPA HEʼISE PE MBORAYHU

14. ¿Mbaʼéichapa oporotrata peteĩ persóna oporohayhúva, heʼiháicha 1 Corintios 13:4-8?

14 Pablo omyesakã porãiterei mbaʼépa heʼise pe mborayhu. Jahayhúramo ñande rapichakuérape haʼe heʼi haguéicha, Jehová ñandeguerohorýta, jajehekýita heta provlémagui ha javyʼaitereíta (elee 1 Corintios 13:4-8). Ñahesaʼỹijomína mbaʼépa heʼi Pablo pe mborayhúre ha jahecha mbaʼéichapa ikatu jasegi ikonsého jatratávo ñande rapichakuérape.

15. a) ¿Mbaʼérepa ñanepasiénsia ha ñanembaʼeporã vaʼerã? b) ¿Mbaʼérepa nañaneenvidiósoi ha nañañembotuichái vaʼerã?

15 “Pe mborayhu ipasiénsia ha imbaʼeporã.” Jehová ningo ohechauka ipasiénsia ha imbaʼeporãha yvyporakuérandi, opavave ñaneimperféktoramo jepe. Upéva ñanemokyreʼỹ vaʼerã ñanepasiénsia ha ñanembaʼeporã hag̃ua ñande rapichakuéra ndive, oĩramo jepe naimbaʼerechakuaáiva ñanendive. Pe oporohayhúva “naiñenvidiósoi”. Upévare, jahayhúramo ñane ermanokuérape ndajaikomoʼãi jaipota umi mbaʼe orekóva hikuái térã umi priviléhio ohupytýva kongregasiónpe. Hiʼarive, japorohayhúramo ñande pyʼaite guive, nañañembotuichamoʼãi ni ndajaikomoʼãi jajechaukase. La Biblia heʼi voi: “Ñandejára oñemoĩ umi oñembotuichávare” (Sant. 4:6).

16, 17. ¿Mbaʼéichapa ikatu jajapo 1 Corintios 13:5, 6 heʼíva?

16 Pe oporohayhúva ningo “ndojapói mbaʼeve hekopeʼỹ”. Upévare, jahayhúramo ñande rapichápe nañandejapumoʼãi chupe ni nañamondamoʼãi avavépe. Avei ndajajapomoʼãi mbaʼeve ndogustáiva Jehovápe. Japorohayhúramo ndajajapomoʼãi ñandévente ou porãva, ‘síno jajepyʼapýta avei ñande rapicháre’ (Filip. 2:4).

17 Pe oporohayhúva ipyʼaite guive “ndaipochyreíri ha ndaipyʼarói” avavéndi. Oĩramo ñandetrata vaíva, ñande nañandepochypyaʼéi. Avei ndajarahái enkuénta mboy vésepa ñande rapicha ofalla ñanendive (1 Tes. 5:15). Ikatu hag̃uáicha ñaime porã Jehovándi nañandepyʼarói vaʼerã avavéndi. Ndajaipeʼáiramo pe mbaʼe vai ñande pyʼapýgui, ikatu hína pe pochy tatáicha okakuaa ñande pype ha ñandeperhudika ñandéve ha avei ótrope (Lev. 19:18). Iporãve ñaporoperdona  ha ñanderesarái pe oiko vaʼekuégui. Avei pe oporohayhúva “ndovyʼái umi mbaʼe vai ojejapóvare”, upévare ndajavyʼái oñemaltratárõ peteĩ ndaijaʼéiva ñanderehe térã ojejapórõ hese peteĩ inhustísia (elee Proverbios 24:17, 18).

18. ¿Mbaʼépa 1 Corintios 13:7, 8 heʼi pe oporohayhúvare?

18 Apóstol Pablo heʼi avei pe oporohayhúva ‘ogueropuʼakaha opa mbaʼe’. Upévare, oĩramo ñaneofendéva, péro upéi ojerure ñandéve perdón, japorohayhu rupi ñaperdona chupe. Pe oporohayhúva “oguerovia opa mbaʼe”. Upéva heʼise jagueroviaha entéro mbaʼe oĩva la Bíbliape ha jaagradeseha oñemeʼẽva ñandéve Jehová organisasión rupive ikatu hag̃uáicha ñamombarete ñande jerovia. Avei pe oporohayhúva “ohaʼarõ opa mbaʼe”. Ñande ñahaʼarõiterei Jehová okumpli ipromesakuéra, ha jahayhu rupi ñande rapichakuérape, ñamombeʼu opavavépe ñane esperánsa (1 Ped. 3:15). Ijetuʼu jave pe situasión katu ñañemboʼe Jehovápe ha ñahaʼarõ tosẽ porã entéro mbaʼe. Pe oporohayhúva “oaguanta opa mbaʼe”. Oĩramo ermáno ofalláva ñanendive, térã umi hénte ndaijaʼéiva ñanderehe ñandepersegíramo, ñande ñaaguanta. Pablo heʼi avei: “Pe mborayhu ndopamoʼãi arakaʼeve”. Péicha ohechauka Ñandejára siervokuéra oporohayhutaha opa árare.

JASEGÍKENA JAHAYHU ÑANDE RAPICHÁPE ÑANDE JAJEHAYHUHÁICHA

19, 20. ¿Mbaʼe téxtopa ohechauka iñimportanteha jasegi jahayhu ñande rapichápe?

19 Jajapóramo la Biblia heʼíva, siémpre jahayhúta ñande rapichápe ñande jajehayhuháicha (Mat. 22:39). Jehová ha Jesús oipota jajapo upéva. Hiʼarive haʼekuéra oipota jahayhu entéro ñande rapichápe, tahaʼe ótro tetãgua térã umi ikostúmbre diferéntevape. ¿Ijetuʼúpa sapyʼánte japorohayhu hag̃ua? Oiméramo upéicha, jajerure vaʼerã Jehovápe espíritu sánto. Haʼe oguerohorýta upéva ha ñanepytyvõta ikatu hag̃uáicha japorohayhu (Rom. 8:26, 27).

20 Iñimportanteterei ningo pe mandáto heʼíva jahayhu vaʼerãha ñande rapichápe jajehayhuháicha ñande voi. Upévare oñehenói ko mandátope pe “Léi ijojahaʼỹva” (Sant. 2:8). Pe Léi Mosáikape Jehová omeʼẽ umi isrraelítape heta mandáto omboʼéva chupekuéra ohayhu hag̃ua hapichápe. Upéi Pablo avei oskrivi: “Entéro umi ótro mandamiénto añetehápe haʼe peteĩ léinte, upéva hína: ‘Rehayhu vaʼerã nde rapichápe nde rejehayhuháicha’. Pe oporohayhúva ndojapói ivaíva hapicháre; upéicharõ pe oporohayhúva okumpli hína pe Léi” (Rom. 13:8-10). Upéva heʼise jasegi vaʼerãha jahayhu opavavépe.

21, 22. ¿Mbaʼérepa jahayhu vaʼerã Ñandejárape ha ñande rapichakuérape?

21 Ñapensávo mbaʼérepa jahayhu vaʼerã ñande rapichakuérape, iporã avei ñanemanduʼa Jesús heʼi vaʼekue Itúvare: “Haʼe ningo oheja osẽ kuarahy iñaña ha hekoporãvape g̃uarã; ha omongy hekojoja ha hekojojaʼỹvape g̃uarã” (Mat. 5:43-45). ¿Mbaʼépa ñanemboʼe upéva? Jahayhu vaʼerãha ñande rapichápe, tove taiñaña térã tahekoporã. Jahecháma haguéicha, jahechauka jahayhuha ñande rapichápe ñamombeʼúvo chupe pe marandu porã. Ha oaseptárõ ipyʼaite guive, oikóta chugui Jehová amígo. ¡Ajépa tuichaite priviléhio upéva!

22 Oĩ ningo hetaiterei mbaʼe ñanemomýiva jahayhu hag̃ua Jehovápe ñande pyʼaite guive. Ha jahecha haguéicha, ikatu avei jahechauka heta hendáicha jahayhuha ñande rapichápe. Jahayhúramo Ñandejárape ha ñande rapichakuérape, jahechaukáta jasegiha koʼã mokõi mandamiénto tuichaitéva. Péro opa mbaʼe ári, ñambopyʼarorýta Jehovápe, ñande Ru yvagapegua.