Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Ñemañaha (ojestudiáva)  |  Junio de 2014

“Rehayhu vaʼerã Jehová nde Járape”

“Rehayhu vaʼerã Jehová nde Járape”

“Rehayhu vaʼerã Jehová nde Járape nde pyʼaite guive, ne álma rugua guive, ha opa ne arandukue reheve.” (MAT. 22:37)

1. ¿Mbaʼérepa Jesús ha Itúva ojoayhueterei?

JEHOVÁ Raʼy, Jesucristo, heʼi vaʼekue ‘ohayhuha pe Túvape’ (Juan 14:31). Heʼi avei: “Pe Túva ohayhu Itaʼýrape” (Juan 5:20). Upéva ningo ñande ndajahecharamói. Jaikuaaháicha, Jesús ou mboyve ko yvy ape ári, oiko vaʼekue hetaiterei tiémpo Jehovándi. Ombaʼapo voi hendive ojapo hag̃ua opa mbaʼe (Prov. 8:30). Oĩ aja Itúvandi, oaprende chugui heta mbaʼe porã, ha ohasávo pe tiémpo koʼýte ojoayhuve hikuái.

2. a) ¿Mbaʼépa jajapo vaʼerã Jehová ñanderayhu hag̃ua? b) ¿Mbaʼépa jahecháta ko artíkulope?

2 Pe salmísta David opurahéi vaʼekue: “Rohayhu [Jehová], nde hína pe chemombaretéva” (Sal. 18:1). Ñande avei jahayhu vaʼerã Jehovápe, ha ñaneñeʼẽrendúramo katu, haʼe ohechaukáta ñanderayhuha (elee Deuteronomio 7:12, 13). Péro, ¿mbaʼéicha piko jahayhúta peteĩ jahechaʼỹvape? ¿Mbaʼépa heʼise jahayhuha Jehovápe? ¿Mbaʼérepa jahayhu vaʼerã chupe? ¿Mbaʼéichapa ikatu jahechauka upéva?

IKATU NINGO JAHAYHU ÑANDEJÁRAPE

3, 4. ¿Mbaʼérepa yvypóra ikatu ohayhu Jehovápe?

3 “Ñandejára ningo peteĩ espíritu”, upévare ndaikatúi jahecha  chupe (Juan 4:24). Upéicharõ jepe, ikatu jahayhu chupe. Hiʼarive la Biblia ñanemokyreʼỹ jajapo hag̃ua upéva. Por ehémplo Moisés heʼi vaʼekue umi isrraelítape: “Rehayhu vaʼerã Jehová nde Járape nde pyʼaite guive, ne álma rugua guive, ha opa ne mbaretekue reheve” (Deut. 6:5, NM).

4 ¿Mbaʼérepa ikatu jahayhu Ñandejárape? Haʼe ñandeapo rupi japorohayhu hag̃uáicha ha avei jahechakuaa hag̃ua ñaikotevẽha hese. Ñande jaikuaavévo Jehovápe, jahayhuve chupe ha upéva ñanembovyʼaiterei. Jesús heʼi voi: “Ovyʼa umi ohechakuaáva oikotevẽha Ñandejárare, imbaʼekuéra hína pe Rréino yvagapegua” (Mat. 5:3). Heta oĩ ohechakuaáva yvyporakuérape ojejapo hague oadora hag̃uáicha Ñandejárape. Pe eskritór Abraham C. Morrison, ohai vaʼekue pe lívro Man Does Not Stand Alone [Yvyporakuéra ndaikatúi oñemaneha haʼeño], heʼi: “Ñamombaʼeterei jahechávo opavave yvypóra ohekaha peteĩ diós oadora hag̃ua ha avei ojeroviaha hese”.

5. ¿Mbaʼérepa jaʼekuaa yvyporakuéra ikatuha oñemoag̃ui Ñandejárare?

5 ¿Ikatúpa yvyporakuéra oñemoag̃ui Ñandejárare? Si ikatu, ha haʼe voi oipota jajapo upéva. Apóstol Pablo oñeʼẽrõ guare peteĩ hénte atýpe pe Areópagope, ohechauka ikatuha ñañemoag̃ui Ñandejárare. Ñapensamíntena ñaimeha pe Areópagope. Upe guive ojekuaa pe Partenón, peteĩ témplo ojepurúva ojeadora hag̃ua Atenéape, pe diósa Atenasgua. Upépe Pablo osẽ heʼi: “Ñandejára ojapo vaʼekue ko múndo ha opaite mbaʼe oĩva ipype, haʼe ningo [...] ndoikói peteĩ témplo kuimbaʼekuéra ojapo vaʼekuépe”. Upéi heʼi avei: “Haʼe ojapo vaʼekue peteĩ kuimbaʼégui opaite tetãnguéra, oiko hag̃ua oparupiete ko yvy ape ári, avei omoĩ tiémpo opa mbaʼerã ha heʼi moõpa oiko vaʼerã yvyporakuéra. Péicha haʼekuéra oheka hag̃ua Ñandejárape, sapyʼánte ohekárõ g̃uarã jepovyvyhápe ha añetehápe ojuhu chupe. Péro haʼe noĩri voi mombyry ñandehegui” (Hech. 17:24-27). Péicha jahecha opavave yvypóra ikatuha oñemoag̃ui Ñandejárare. Koʼág̃a oĩma mas de 7.500.000 testígo de Jehová ‘ojuhúmava’ Ñandejárape ha ohayhúva chupe ipyʼaite guive.

¿MBAʼÉPA HEʼISE JAHAYHUHA ÑANDEJÁRAPE?

6. ¿Mbaʼépa “pe mandamiénto tuichavéva ha tenondegua”?

6 Jahayhu vaʼerã Jehovápe ñande pyʼaite guive. Peteĩ fariséo oporandúrõ guare Jesúspe mbaʼépa hína pe mandamiénto tuichavéva oĩva pe Léipe, haʼe ombohovái: “‘Rehayhu vaʼerã Jehová nde Járape nde pyʼaite guive, ne álma rugua guive, ha opa ne arandukue reheve’. Kóva hína pe mandamiénto tuichavéva ha tenondegua” (Mat. 22:34-38).

7. ¿Mbaʼépa heʼise jahayhuha Jehovápe a) ‘ñande pyʼaite guive’? b) ‘ñane álma rugua guive’? c) ‘opa ñane arandukue reheve’?

7 Jesús heʼi vaʼekue jahayhu vaʼerãha Jehovápe ‘ñande pyʼaite guive’. Upéva heʼise jahayhu vaʼerãha chupe ñane korasõ ruguaite guive, térã jarekoha chupe enkuénta umi mbaʼe jaipotáva ha ñañandúvape. Heʼi avei jahayhu vaʼerãha Ñandejárape ‘ñane álma rugua guive’, térã jahechauka upéva jaiko lájare ha opa mbaʼe jajapóvape. Ha upe rire heʼi jahayhu vaʼerã Jehovápe ‘opa ñane arandukue reheve’, térã jareko chupe ñane akãme ha jahechauka umi mbaʼe ñapensávare jahayhuha chupe. Péicha jahecha mbaʼeichaitépa jahayhu vaʼerã Ñandejárape.

8. ¿Mbaʼe mbaʼépa jajapóta jahayhúramo Ñandejárape?

8 Jahayhúramo Ñandejárape ñande pyʼaite guive, ñane álma rugua guive ha opa ñane arandukue reheve, ñahesaʼỹijo porãta Iñeʼẽ, jajapóta vyʼapópe opa mbaʼe haʼe ojeruréva, ha japredikáta kyreʼỹme pe marandu porã oñeʼẽva Irréinore (Mat. 24:14; Rom. 12:1, 2). Jahayhu añetéramo Jehovápe ñañemoag̃uivéta hese koʼẽ koʼẽre (Sant. 4:8). Añetehápe ningo oĩ hetaiterei mbaʼe ñanemomýiva  jahayhu hag̃ua Ñandejárape, péro ñahesaʼỹijomína seis umíva apytégui.

¿MBAʼÉREPA JAHAYHU VAʼERÃ ÑANDEJÁRAPE?

9. ¿Mbaʼérepa nde rehayhu Jehovápe?

9 Jehová haʼe hína ñande Apohare ha omeʼẽ ñandéve opa mbaʼe ñaikotevẽva. Pablo heʼi vaʼekue: “Haʼe rupi ningo jaikove, jakuʼe ha jaiko” (Hech. 17:28). Jehová omeʼẽ ñandéve ko Yvy porãite (Sal. 115:16). Omeʼẽ avei ñandéve hiʼupy ha opa mbaʼe ñaikotevẽva jaikove hag̃ua. Upévare Pablo heʼi vaʼekue umi hénte oikóvape Lístrape ndoadorái vaʼerãha taʼangápe, síno Jehovápe, “Ñandejára oikovéva”. Heʼi avei chupekuéra: “Umi mbaʼe porã ojapóvare oikuaauka peẽme mávapa haʼe, omboúvo ama yvágagui ha omeʼẽvo peẽme hetaiterei kóga. Haʼe hetaiterei tembiʼu omeʼẽ peẽme ha penembopyʼarory” (Hech. 14:15-17). Ajépa imbaʼeporãite ñanendive ñande Apohare. ¡Mbaʼéicha voi piko ndajahayhumoʼãi chupe! (Ecl. 12:1.)

10. ¿Mbaʼépa nde repensa Jesucristo sakrifísiore?

10 Ñandejára ojapo tekotevẽva jajei hag̃ua pekádo ha ñemano poguýgui jahupyty vaʼekue Adán kúlpare (Rom. 5:12). La Biblia heʼi: “Ñandejára katu ohechauka ñanderayhuha, Cristo omanóvo ñanderehehápe ñande pekadór aja gueteri” (Rom. 5:8). ¡Jaagradesete ningo Ñandejárape omeʼẽ haguére Itaʼýrape ñanderayhupápe! Ñañarrepentíramo ñande pyʼaite guive ha jajeroviárõ isakrifísiore, Jehová operdonáta ñande pekadokuéra (Juan 3:16).

11, 12. ¿Mbaʼeichagua esperánsapa Jehová omeʼẽ ñandéve?

11 Jehová omeʼẽ ñandéve peteĩ esperánsa ‘ñanembopyʼaguapy ha ñanembovyʼáva’ (Rom. 15:13). Jareko rupi esperánsa jaikovetaha opa árare, ikatu ñambohovái opa mbaʼe omokangyséva ñande jerovia. Umi unhído iñeʼẽrendúva omano meve, ohupytýta “pe jeikove peteĩ prémioicha” yvágape (Apoc. 2:10). Ha umi Ñandejára siérvo ndahaʼéiva unhído, oikóta vyʼápe opa árare ko yvy ape ári peteĩ hardín neporãvape (Luc. 23:43). ¿Mbaʼéichapa ñanemoñeñandu koʼã promésa? Katuete ningo javyʼaiterei, ñandepyʼaguapy ha jahayhueteve Ñandejárape, omeʼẽva ñandéve “opa mbaʼe porã ha rregálo hekopeguáva” (Sant. 1:17).

12 Ñandejára opromete umi omanóva oikove jeytaha (Hech. 24:15). Añetehápe ñambyasyeterei omanóramo peteĩ jahayhúva. Péro Jehová opromete omoingove jeytaha umi omanóvape, upéicha rupi ñande ndajasufrietereíri “umi ndorekóiva esperánsa” osufriháicha (1 Tes. 4:13). Ñandejára oipotaiterei oikove jey umi omano vaʼekue, koʼýte isiervokuéra iñeʼẽrendúva, por ehémplo Job (Job 14:15). Epensamíntena mbaʼeichaitépa javyʼáta oiko vove pe rresurreksión ha ñaime jey ñane hénte ha ñane amigokuérandi. Katuete upéva ñanemomýita jahayhuve hag̃ua ñande Ru yvagapeguápe. ¡Ajépa imbaʼeporãite ñanendive omeʼẽ haguére ñandéve ko esperánsa ijojahaʼỹva!

13. ¿Mbaʼérepa jaʼekuaa Jehová añetehápe ojepyʼapyha ñanderehe?

13 Jehová ojepyʼapy ñanderehe (elee Salmo 34:6, 18, 19 ha 1 Pedro 5:6, 7). Ñande ningo ñañeñandu porãiterei Ñandejára “ovecha atýpe” jaikuaa porãgui haʼe oĩha oipytyvõ hag̃uáicha isiervokuéra iñeʼẽrendúvape (Sal. 79:13, NM). Ha umi mbaʼe Jehová oprometéva koʼytevéntema ohechauka mbaʼeichaitépa ñanderayhu. Ñandejára ojevaléta Jesucrístore, pe Rréi Mesiániko, oipeʼa hag̃ua ko yvy ape árigui opa mbaʼe vai, por ehémplo umi hénte iñañáva, ivioléntova ha omaltratáva hapichápe. Upe rire, umi iñeʼẽrendúva ikatúta oiko pyʼaguapy ha vyʼápe opa árare (Sal. 72:7, 12-14, 16). Koʼã promésa porãite ñanemomýi jahayhu hag̃ua Jehovápe ñande pyʼaite guive, ñane álma rugua guive, ha opa ñane arandukue reheve (Luc. 10:27).

14. ¿Mbaʼe priviléhio ijojahaʼỹvapa omeʼẽ ñandéve Jehová?

14 Ñandejára ñandeporavo jaiko hag̃ua  Itestígoramo (Is. 43:10-12). Jehová omeʼẽ ñandéve oportunida ñambaʼapo hag̃ua Irréino rehehápe ha jagueraha hag̃ua pe mensáhe okonsoláva entéro ohasa asývape, ha upévare jahayhu chupe. Ñande ningo jajerovia pe mensáhe jaguerahávare ha ndajakyhyjéi ñamombeʼu hag̃ua umi héntepe. ¿Mbaʼérepa? Opa mbaʼe jaʼéva ñaguenohẽ la Bíbliagui ha Ñandejára katuete okumpli ipromésa (elee Josué 21:45 ha 23:14). Jahechaháicha, oĩ hetaiterei mbaʼe ñanemomýiva jahayhu hag̃ua Jehovápe. Péro, ¿mbaʼéichapa ikatu jahechauka jahayhuha chupe?

¿MBAʼÉICHAPA IKATU JAHECHAUKA JAHAYHUHA ÑANDEJÁRAPE?

15. ¿Mbaʼéichapa ñanepytyvõ jastudia meméramo la Biblia ha jajapo umi mbaʼe ñaaprendéva?

15 Jastudia meme la Biblia ha jajapo umi mbaʼe ñaaprendéva. Péicha jahechauka jahayhuha Jehovápe ha jaipotaha Iñeʼẽ ñandegia (Sal. 119:105). Jahasa jave peteĩ situasión ijetuʼúva, tuicha ñanekonsola koʼãichagua téxto: “Ñandejára, nderehejaichéne pe oñekevranta ha oñembyasývape”; “Ne mborayhu chemombarete [Jehová]. Jepyʼapy oguapy pohýiramo che ári, nde [chekonsola] ha chembovyʼa” (Sal. 51:17, NM; 94:18, 19). Jehová ha Jesús ipyʼaporãiterei umi ohasa asýva ndive (Is. 49:13; Mat. 15:32). Jastudiáramo la Biblia jahechakuaa mbaʼeichaitépa Ñandejára ojepyʼapy ñanderehe ha jahayhuve chupe.

16. ¿Mbaʼérepa jahayhuve Jehovápe ñañemboʼe meméramo?

16 Ñañemboʼe meme. Jehová ningo ‘ohendu pe ñemboʼe’, upéicha rupi ñañemboʼévo ñanemoag̃ui hese (Sal. 65:2, ÑÑB). Jahechávo haʼe ombohovaiha ñane orasión, koʼýte jahayhuve chupe. Por ehémplo, ikatu oime jahasa raʼe peteĩ mbaʼe ijetuʼúva, péro jahechakuaa haʼe ndohejái hague oiko peteĩ mbaʼe ndaikatumoʼãiva kuri jagueropuʼaka (1 Cor. 10:13). Sapyʼánte jajepyʼapyeterei ha jajerure Jehovápe tañanepytyvõ, upéicha jave katuete ñañandúta “Ñandejára pyʼaguapy” ijojahaʼỹva (Filip. 4:6, 7). Ikatu avei ñañemboʼe kirirĩháme, ojapo haguéicha Nehemías, ha upéi jahechakuaa Jehová ombohovaiha ñane ñemboʼe (Neh. 2:1-6). ‘Ñañemboʼe memévo’ ha jahecha Jehová ñanerendu hague, jahayhuve chupe ha ñañandu haʼe ñanepytyvõtaha jahasa jave umi mbaʼe ijetuʼúva omokangyséva ñande jerovia (Rom. 12:12).

17. ¿Mbaʼéichapa jahecháta umi rreunión jahayhúramo Jehovápe?

 17 Ndajafaltái umi rreuniónpe ni umi aty guasuhápe (Heb. 10:24, 25). Umi isrraelíta oñembyaty vaʼekue ohendu hag̃ua Ñandejára heʼíva ha oikuaa hag̃ua chupe. Upéva oipytyvõ chupekuéra omombaʼeguasu hag̃ua Jehovápe ipyʼaite guive ha okumpli hag̃ua Iléi (Deut. 31:12). Jahayhu añetéramo Ñandejárape, katuete jajapóta hembipota, ha upéva ndahaʼemoʼãi ñandéve g̃uarã peteĩ kárga (elee 1 Juan 5:3). Upévare, jajapókena opa ikatúva ñaime hag̃ua umi rreunionhápe. Jahayhúkena Jehovápe jahayhu haguéicha jaikuaa ypy guive chupe (Apoc. 2:4).

18. ¿Mbaʼe tembiapópa jajapo jahayhúgui Ñandejárape?

18 Kyreʼỹme japredika “umi marandu porã” (Gál. 2:5). Jahayhúramo Ñandejárape ñanekyreʼỹetereíta ñañeʼẽ hag̃ua Itaʼýrare opavavépe. Ñamombeʼuseterei pe Rréi Mesiániko Jesucristo, osẽtaha ikavaju ári oñorairõ hag̃ua pe “añetegua [...] rehehápe” Armagedónpe (Sal. 45:4, NM; Apoc. 16:14, 16). ¡Ajépa javyʼaite ikatu haguére ñamombeʼu umi héntepe Jehová ñanderayhuetereiha ha oprometeha ñandéve jaikotaha peteĩ múndo pyahúpe! (Mat. 28:19, 20.)

19. ¿Mbaʼérepa jaagradese vaʼerã ansianokuéra ojapóva ñanderehehápe?

19 Jaagradese opa mbaʼe ojapóva umi ansiáno kongregasiónpe (Hech. 20:28). Jehová oipota iporãvante isiervokuérape g̃uarã, upévare oipuru umi ansiánope oñangareko hag̃ua ijovechakuérare. La Biblia heʼi hesekuéra: “Káda uno haʼetéta peteĩ lugár oñekañyha yvytúgui ha oñemoʼãha torméntagui, haʼetéta ysyry peteĩ yvy perõme, ha kuarahyʼã peteĩ yvy isékovape” (Is. 32:1, 2, NM). ¡Ajépa javyʼaite jajuhúramo peteĩ lugár ñañemoʼã hag̃ua torméntagui, térã peteĩ kuarahyʼã hakueterei jave! Koʼã komparasión ohechauka mbaʼeichaitépa umi ansiáno oñangareko ñanderehe ha ñanepytyvõ ñamombarete hag̃ua ñande jerovia ñaneprovléma jave. Ñahendúramo koʼã kuimbaʼépe Ñandejára omeʼẽva “rregáloramo”, jahechaukáta ñamombaʼeha chupekuéra ha jahayhuha Jehovápe ha Crístope, Omoakãva pe kongregasión (Efes. 4:8; 5:23; Heb. 13:17).

Umi ansiáno Jehová oipurúva oñeinteresa umi ermánore (Ehecha párrafo 19)

JAHAYHUVÉKENA JEHOVÁPE KOʼẼ KOʼẼRE

20. ¿Mbaʼéichapa ikatu jajapo Santiago 1:22-25 heʼíva?

20 Ñaime porãramo Jehová ndive, ‘jajapóta Ñandejára Ñeʼẽ heʼíva’, ndahaʼéi ñahendútanteva (elee Santiago 1:22-25). Jajapóramo “Ñandejára Ñeʼẽ heʼíva” jajeroviáta Jehováre ha upéva ñanemokyreʼỹta japredika hag̃ua pe marandu porã ha ñakomenta meme hag̃ua rreunionhápe. Jahayhu rupi Jehovápe ñande pyʼaite guive, ñakumpli pe ‘Léi hekopeguáva’, térã opaite mbaʼe haʼe oipotáva (Sal. 19:7-11).

21. ¿Mbaʼérehepa ikatu ñakompara ñane ñemboʼe?

21 Jahayhúramo Jehovápe katuete ñañemboʼe meméta chupe. Yma umi saserdóte Israelgua ohapy vaʼerã insiénso káda día Ñandejárape g̃uarã. Upévare peteĩ purahéipe rréi David okompara iñemboʼe pe insiénsore, ha heʼi: “Insiénsoicha tog̃uahẽ ndéve che ñemboʼe. Mbaʼekuaveʼẽ kaʼaruguáicha umi che po ndéve amopuʼã” (Sal. 141:2; Éx. 30:7, 8). Jaagradese ha ñamombaʼékena Jehovápe ñande pyʼaite guive ñañemboʼe jave chupe. Péicha ñane orasión ojoguáta pe insiénso hyakuã asývape, ha Ñandejára ñandeguerohorýta (Apoc. 5:8).

22. ¿Mbaʼépa jahecháta pe artíkulo oúvape?

22 Jesús heʼi vaʼekue jahayhu vaʼerãha Ñandejárape, péro avei jahayhu vaʼerãha ñande rapichakuérape (Mat. 22:37-39). Pe artíkulo oúvape jahecháta ifasilvetaha ñandéve jahayhu hag̃ua ñande rapichápe jahayhúramo Jehovápe ha imandamientokuéra.