Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Ñemañaha (ojestudiáva)  |  Junio de 2014

Oñeporandúva jepi

Oñeporandúva jepi

¿Ikatúpa kristianokuéra ojapouka pe kremasión?

La Bíbliape ni peteĩ hendápe ndeʼíri ndovaleiha ojejapo pe kremasión. *

Ñandejára Ñeʼẽme heta hendápe oñemombeʼu ojehapy hague umi omanóva retekue térã ikanguekue (Jos. 7:25; 2 Crón. 34:4, 5). Upéva ikatu kuri ojejapo ojehechauka hag̃ua koʼã tapicha nomereséi hague oñeñotỹ. Péro nameméi ojejapo upévare.

Por ehémplo, ñanemanduʼamína rréi Saúl ha umi mbohapy itaʼýrare. Haʼekuéra enterove omano kuri oñorairõrõ guare umi filistéo kóntrape. Peteĩva umi itaʼýra ningo Jonatán, David amigoite. Upéi heta isrraelíta ipyʼaguasúva oikóva Jabés-galaádpe ohendu pe oiko vaʼekue ha oho ogueru Saúl ha itaʼyrakuéra retekue, ohapy ha oñotỹ ikanguekue. Upe rire David oguerohory chupekuéra ojapo haguére upéicha (1 Sam. 31:2, 8-13; 2 Sam. 2:4-6).

La Biblia opromete Ñandejára omoingove jeytaha umi omanóvape. Jehová ipoderóso ha ikatu omoingove jey peteĩ persónape ha omeʼẽ chupe hete pyahurã, tove tojehapy raʼe hetekue. Ñapensamína umi mbohapy evréore Nabucodonosor omanda vaʼekue oñemombo hag̃ua peteĩ órnope. Haʼekuéra ningo nopensái Jehová ndaikatumoʼãiha omoingove chupekuéra ojehapýta haguére (Dan. 3:16-18). Ha upéicha avei opensa umi kristiáno iñeʼẽrendúva omano vaʼekue umi kámpo de konsentrasión násipe. Haʼekuéra oikuaa porã Ñandejára omoingove jeytaha chupekuéra ojehapýramo jepe hetekue. Ha oĩ avei heta Ñandejára siérvo omano vaʼekue oiko rupi peteĩ explosión térã ambue hendáicha ha hetekuéra ni ndojetopavéi. Péro jaikuaa porã Jehová katuete omoingove jeytaha chupekuéra (Apoc. 20:13).

Jehová natekotevẽi ombyatypa jey peteĩ persóna retekue omoingove jey hag̃ua chupe. Ñapensamína mbaʼépa oiko umi oñemoingove jeývagui oiko hag̃ua yvágape. Por ehémplo, Jesús “omano yvypóraicha, péro oikove jey espírituicha”. Upéicha avei umi unhído oñemoingove jeývo yvágape ndoipuruvéima hetekue, péro upéva ndeʼiséi oikomaha chuguikuéra ótra persóna (1 Ped. 3:18; 1 Cor. 15:42-53; 1 Juan 3:2).

Ñande jaikuaa porã Ñandejára omoingove jeytaha umi omano vaʼekuépe ha ojaposeha voi upéva, marãve ndoikói ojejapóramo pe kremasión (Hech. 24:15). Ikatu hína nañantendepái mbaʼeichaitépa Ñandejára oporomoingove jey vaʼekue ymave ni mbaʼéichapa ojapóta upéva koʼẽrõite. Upéicharõ jepe, jajerovia hese ñande pyʼaite guive omeʼẽ rupi ñandéve “peteĩ garantía” omoingove jeývo Jesúspe (Hech. 17:31; Luc. 24:2, 3).

Umi kristiáno odesidíta vove mbaʼépa ojapóta ihénte omanóvagui, tekotevẽ ohecha mbaʼépa opensáta umi hénte, mbaʼéichapa oñeñandúta umi ohayhúva chupe ha mbaʼépa heʼi umi léi upe tetãmegua (2 Cor. 6:3, 4). Upéicharõ, káda kristiáno térã káda família odesidi vaʼerã ojapótapa pe kremasión térã nahániri.

^ párr. 3 Pe kremasión heʼise ojehapyha peteĩ omanóva retekue oiko peve chugui tanimbu. Upéva ojejapo peteĩ krematóriope.