Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Ñemañaha (ojestudiáva)  |  Junio de 2014

Ñaipytyvõkena ñane ermanokuérape oipurupaite hag̃ua ikapasida

Ñaipytyvõkena ñane ermanokuérape oipurupaite hag̃ua ikapasida

“Che ajesarekóta nderehe roakonseha hag̃ua.” (SAL. 32:8, NM)

1, 2. ¿Mbaʼépa Jehová opensa isiervokuérare?

SAPYʼÁNTE tuvakuéra omaña ifamíliare ohuga jave ha ohechakuaa ikatupyryha heta mbaʼépe. Por ehémplo, oĩ mitã ivaléva depórtepe, ha iñermáno katu odivuhakuaa térã ojapokuaa heta mbaʼe ipópe. Péro tahaʼe haʼéva umi mitã ojapokuaáva, ituvakuéra oipytyvõseterei voi chupekuéra ikatupyryve hag̃ua upévape.

2 Jehová avei oñeinteresaiterei itaʼyrakuérare ojerovia mbarete rupi hikuái ha oadorágui chupe ipyʼaite guive. Chupe g̃uarã isiervokuéra haʼe hína umi ‘mbaʼerepy’ oúva opa tetãgui (Ageo 2:7, ÑÑB). Oiméne nde rehechakuaa umi ermáno ikatupyryha hetaiterei mbaʼépe. Por ehémplo, oĩ umi ojapokuaaitereíva diskúrso, ha ótro katu oorganisakuaa heta tembiapo ojejapóva Jehová organisasiónpe. Heta ermána pyaʼeterei oaprende ótro idióma ikatu hag̃uáicha opredika hetave héntepe. Oĩ avei ermána oporohendukuaáva térã ipasiénsiava oñatende hag̃ua umi hasývare (Rom. 16:1, 12). ¡Ajépa jaguerohoryete koʼãichagua ermáno ha ermánape!

3. ¿Mbaʼépa jahecháta ko artíkulope?

3 Péro heta ermáno, por ehémplo umi mitãrusu térã umi  ojevautisa ramóva, ndoikuaái gueteri mbaʼépepa ideprovéchota kongregasiónpe. ¿Mbaʼéichapa ikatu ñaipytyvõ chupekuéra oipurupaite hag̃ua ikapasida? ¿Mbaʼérepa ñahaʼanga vaʼerã Jehovápe ha jaheka mbaʼépepa ikatupyry hikuái?

JEHOVÁ OHECHA MBAʼÉPEPA ÑANDEKATUPYRY

4, 5. ¿Mbaʼéichapa Jueces 6:11-16 ohechauka Jehová ohechaha mbaʼe mbaʼépepa ikatupyry isiervokuéra?

4 La Bíbliape oĩ heta ehémplo ohechaukáva Jehová ohechaha mbaʼépepa ñandekatupyry ha avei moõ pevépa omeʼẽ ñande kapasida. Jahechamína peteĩ ehémplo. Ñandejára oiporavórõ guare Gedeónpe oipeʼa hag̃ua ipuévlope umi madianíta poguýgui, ou peteĩ ánhel ha heʼi chupe: “Nde, gerréro katupyry, Jehová oĩ nendive”. Gedeón oñesorprende pe ánhel heʼi haguére chupe upéicha. Haʼe nopensái ‘ikatupyryha’ ni ikatutaha osalva Ñandejára puévlope. Péro Jehová nopensái upéicha, haʼe ojerovia Gedeón rehe (elee Jueces 6:11-16).

5 Jehová ohechakuaa Gedeón rehe heta mbaʼe porã, upévare oikuaa ikatutaha oipuru chupe osalva hag̃ua Israélpe. Pe ánhel ohecha mbaʼeichaitépa Gedeón oñemeʼẽmbaite ojapo jave itraváho, por ehémplo mbaʼéichapa oinupã pe trígo rakã onohẽ hag̃ua chugui isemílla. Péro Jehová ánhel ohecha avei ótra kósa. Ymave umi chokokue omonguʼi vaʼekue isemílla okápe, ikatu hag̃uáicha pe yvytu ogueraha ikyʼakue. Péro Gedeón ndojapói upéicha. Haʼe ogueraha umi trígo rakã ombaʼapo hag̃ua hese peteĩ lagárpe, térã ojejapohápe víno, ani hag̃ua umi madianíta ohecha pe trígo ombyaty vaʼekue ha omonda chugui. Añetehápe Gedeón iñakãporã, haʼe oñemeʼẽ enkuénta oĩha peteĩ situasión ipeligrósovape ha odesidi porã. Jehová ohechakuaa Gedeón ikatupyryha ha oipuru chupe.

6, 7. a) ¿Ohechápa rakaʼe Jehová Amóspe umi isrraelíta ohechaháicha chupe? b) ¿Mbaʼérepa ikatu jaʼe Amós oikuaa hague heta mbaʼe?

6 Jahechamína ótro ehémplo. Oiméne heta hénte oiko vaʼekue proféta Amós tiémpope opensáne raʼe hese ikapasidaʼietereiha. Péro Jehová ohechakuaa Amós rehe heta mbaʼe porã hapichakuéra ndohechakuaáiva. Amós heʼi vaʼekue ijehe haʼeha peteĩ ovecharerekua ha chokokue. Jehová oipuru ko profétape ogueraha hag̃ua imensáhe pe rréino de 10 trívupe ndoadoravéiva chupe. Oiméne oĩ raʼe isrraelíta opensáva Amós ndaikatupyryiha ojapo hag̃ua upe tembiapo (elee Amós 7:14, 15).

7 Amós oiko vaʼekue peteĩ puevloʼípe oĩva mombyry umi siudágui. Upéicharõ jepe oikuaa umi hénte kostúmbre ha umi mburuvicha itiempopeguápe. Katuete oikuaa porãne raʼe mbaʼe situasiónpepa oĩ Israel, ha otrata meme rupi umi komersiántendi, oikuaa avei mbaʼe mbaʼépa oiko umi tetãme oĩva Israel jerére (Amós 1:6, 9, 11, 13; 2:8; 6:4-6). Oĩ heʼíva Amós haʼe hague peteĩ eskritór ikatupyrýva. Por ehémplo oipuru komparasión, umi palávra ndahasýiva oñentende hag̃ua ha opokóva ñane korasõre. Haʼe ndokyhyjéi vaʼekue okondena hag̃ua Amasíaspe, peteĩ saserdóte ikorrúptova, ha upéva ohechauka porã Jehová ndojavýi hague oiporavórõ guare chupe. Añetehápe, Jehová ohechakuaa Amós rehe heta mbaʼe porã ndojekuaaguasúiva kuri, ha oaprovecha ikapasida okumpli hag̃ua hembipota (Amós 7:12, 13, 16, 17).

8. a) ¿Mbaʼépa Jehová opromete Davídpe? b) ¿Mbaʼérepa Salmo 32:8 omokyreʼỹeterei umi ndojeroviapáivape ijehe?

8 Jehová oikuaapaite isiervokuéra kapasida ha ñanepytyvõse enterovévape ñameʼẽmbaite hag̃ua ñandejehegui. Rréi Davídpe Jehová opromete vaʼekue ojesarekotaha hese oakonseha hag̃ua chupe (elee Salmo 32:8). ¡Ajépa ñanemokyreʼỹete upéva! Ikatu ningo ñapensa ñande kapasida  nomeʼẽiha jajapo hag̃ua heta mbaʼe, péro Jehová ñanepytyvõkuaa jahupyty hag̃ua umi méta ni nañaimoʼãiva ikatutaha jahupyty. Jaikuaaháicha, peteĩ mboʼehára ikatu oipytyvõ iñalúmnope ikatupyryve hag̃ua ohóvo. Péicha avei, Jehová ikatu ñandegia japrogresa hag̃ua jahávo iservísiope, ha upearã oipuru umi ermáno oĩvape ñane kongregasiónpe. ¿Mbaʼéichapa haʼekuéra ñanepytyvõ ñandekapasitadove hag̃ua?

ÑAÑEHAʼÃ JAHECHA MBAʼÉPEPA IKATUPYRY ÑANE ERMANOKUÉRA

9. ¿Mbaʼéichapa ikatu jasegi Pablo konsého ha ñañeinteresa umi ótrore?

9 Pablo omokyreʼỹ vaʼekue opavave kristiánope oñeinteresa hag̃ua umi ermánore (elee Filipenses 2:3, 4). Ha upéva heʼise avei jahechakuaa vaʼerãha mbaʼépepa ikatupyry ñane ermanokuéra ha jaguerohory chupekuéra. Ñapensamína, ¿mbaʼéichapa ñañeñandu oĩ jave ñandeguerohorýva jajapo porã haguére peteĩ mbaʼe? Katuete upéva ñanemokyreʼỹ jajapo porãve hag̃ua. Upéicha avei, jahechávo ñane ermanokuéra ojapo porãha peteĩ mbaʼe ha jafelisita chupekuéra upe haguére, katuete ikyreʼỹvéta oprogresa hag̃ua.

10. ¿Máva mávapa ikatu hína oikotevẽ ñañeinteresa hesekuéra?

10 Sapyʼánte enterovéva ñaikotevẽ ñande rapicha ohechauka oñeinteresaha ñanderehe. Péro koʼýte umi imitãva ha umi ojevautisa ramóva ohechakuaa vaʼerã ideprovechoha kongregasiónpe. Ndajahechakuaáiramo umi mbaʼe ojapóva hikuái, ikatu hína ou naikyreʼỹvéi ha noñehaʼãsevéi ohupyty hag̃ua rresponsavilida kongregasiónpe. Hiʼarive Ñandejára Ñeʼẽ heʼi iporãha ñañehaʼã jahupyty koʼã mbaʼe (1 Tim. 3:1).

11. a) ¿Mbaʼéichapa peteĩ ansiáno oipytyvõ peteĩ mitãrusu hiʼotĩetereívape? b) ¿Mbaʼépa ñanemboʼe Julien ohasa vaʼekue?

11 Peteĩ ansiáno hérava Ludovic omombeʼu umi ermáno oñeinteresa hague hese imitãrõ guare, ha upéva oipytyvõiterei chupe. Haʼe heʼi: “Ahechauka jave aipytyvõseha umi ermánope, oprogresa pyaʼeve hikuái”. Upe rire heʼi Julien rehe, peteĩ ermáno hiʼotĩetereíva: “Haʼe ningo ndojeroviaguasúi vaʼekue ijehe, upévare sapyʼánte haʼete ku ojechaukaséva ha osẽ ojapo peteĩ mbaʼe noñehaʼarõietéva. Péro che ahechakuaa imbaʼeporãha ha oipytyvõseha umi ermánope. Upévare ndaikói apensa vai hese, síno ajesareko umi mbaʼe porã ojapóvare ha amokyreʼỹ chupe”. Tiémpo rire, Juliéngui oiko siérvo ministeriál, ha koʼág̃a haʼéma prekursór rregulár.

ÑAIPYTYVÕKENA UMI ERMÁNOPE OIPURUPAITE HAG̃UA IKAPASIDA

12. ¿Mbaʼérehepa tekotevẽ jajesareko ñaipytyvõ hag̃ua ñane ermanokuérape ikapasitadove hag̃ua? Emoĩ peteĩ ehémplo.

12 Julien experiénsia ohechauka ñaipytyvõséramo ñane ermanokuérape oipurupaite hag̃ua ikapasida, ndajaikói vaʼerãha ñamañaiterei ideféktore. Upéva rangue ñañehaʼã vaʼerã jahecha umi mbaʼe porã ojapóva ha mbaʼépepa ikatupyry. Jesús ojapo vaʼekue upéva oipytyvõ hag̃ua Pédrope. Sapyʼánte Pedro osẽ vaʼekue heʼi térã ojapo peteĩ mbaʼe noñehaʼarõietéva ha upévare haʼetévaicha ndaikatúiva ojejeroviapa hese. Péro Jesús oipytyvõ Pédrope ikapasitadove hag̃ua, upévare ombohéra chupe Cefas, heʼiséva “ita”, térã peteĩ mbaʼe nokambiáiva (Juan 1:42).

13, 14. a) ¿Mbaʼépa Bernabé ohechakuaa Marcos rehe? b) ¿Mbaʼéichapa peteĩ mitãrusúpe oñepytyvõ vaʼekue Márcospe oñepytyvõ haguéicha? (Ehecha pe taʼanga oĩva iñepyrũme.)

13 Bernabé ojesareko umi mbaʼe porã ojapóvare umi ermáno, ha upéva ojekuaa oipytyvõrõ guare Juánpe, oñehenóiva avei Marcos (Hech. 12:25). Pe primer viáhe misionál ojapo vaʼekuépe Pablo ha Bernabé, Marcos “oipytyvõ [...] chupekuéra”, ha oime vaʼerã oñenkarga umi mbaʼe oikotevẽvare hikuái.  Péro og̃uahẽvo Panfíliape, Marcos osẽ oheja rei chupekuéra, hiʼarive oho vaʼerã hikuái nórte gotyo ha ohasa vaʼerã peteĩ lugár ipeligrósovare oĩháme vandído (Hech. 13:5, 13). ¿Mbaʼépa ojapo Bernabé? Ohecha rangue ifállante, ojesareko umi mbaʼe porã ojapóvare, ha upe rire osegi ombokatupyry chupe (Hech. 15:37-39). Upéicha rupi Márcosgui oiko peteĩ kristiáno ijerovia mbaretéva. Upe rire, oñangareko Páblore oĩ aja préso Rómape, ohaírõ guare umi Colosasguápe. Upe kártape Pablo imanduʼa porãiterei Marcos rehe ha heʼi oguerahaukaha chupekuéra salúdo (Col. 4:10). Ótra vuéltape, Pablo ojerure Marcos rehe ideprovéchota rupi chupe. Ajépa ombovyʼaiténe raʼe upéva Bernabépe (2 Tim. 4:11).

14 Jahechamína ohasa vaʼekue peteĩ ansiáno pyahu hérava Alexandre. Chupe ningo tuicha oipytyvõ vaʼekue peteĩ ermáno imbaʼerechakuaáva. Alexandre omombeʼu: “Chemitãvépe chenerviosoiterei vaʼekue añemboʼéta jave en púvliko. Péro peteĩ ansiáno chepytyvõ ajeprepara hag̃ua ha pono chenerviosoiterei. Haʼe nachemboykéi, upéva rangue omeʼẽve chéve oportunida añemboʼe hag̃ua oñesẽ mboyve predikasiónpe. Upéicha rupi, mbeguekatúpe ajeroviavéma ahávo chejehe”.

15. ¿Mbaʼéichapa Pablo oguerohory iñermanokuérape?

15 ¿Jaguerohorýpa ñane ermáno térã ñane ermánape ojapo porã jave peteĩ mbaʼe? Romanos kapítulo 16-pe jahecha mbaʼéichapa Pablo oguerohory mas de 20 ermánope umi mbaʼe porã ojapóvare (Rom. 16:3-7, 13). Por ehémplo, heʼi Andrónico ha Junias hetave tiémpoma oservi hague chugui Crístope ha oguerohory chupekuéra oaguanta haguére. Avei oguerahauka salúdo Rufo sýpe. Oiméne imanduʼa raʼe ko ermána mborayhúpe oñangareko hague hese.

Frédéric (iskiérda) omokyreʼỹ Rícope osegi hag̃ua oservi Jehovápe (Ehecha párrafo 16)

16. ¿Mbaʼéichapa ikatu oipytyvõ umi imitãvape ojeguerohorýramo chupekuéra?

16 Jaguerohorýramo ñane ermanokuérape ñande pyʼaite guive, tuicha ñaipytyvõta chupekuéra. Peteĩ mitãʼi Franciagua hérava Rico ou oñedesanima itúva ndahaʼéiva Testígo ndoipotái haguére ojevautisa. Rico opensa ohaʼarõ vaʼerãha omboty 18 áño ikatu hag̃uáicha oservi porã Jehovápe. Avei ikompañerokuéra oñembohory hese, ha upéva nombovyʼái chupe. Peteĩ ansiáno hérava Frédéric, ostudiáva hendive la Biblia, heʼi: “Afelisita Rícope ipyʼaguasu haguére omombeʼu hag̃ua umi mbaʼe ogueroviáva, ha haʼe chupe upéicha rupínte oĩha oñembohorýva hese”. Upéva oipytyvõ chupe oprogresa hag̃ua ha ojogueraha porãve hag̃ua itúvandi. Ipahápe Rico ojevautisa orekópe 12 áño.

Jérôme (derécha) oipytyvõ Rýanpe oiko hag̃ua chugui misionéro (Ehecha párrafo 17)

17. a) ¿Mbaʼéichapa ikatu ñaipytyvõ ermanokuérape oprogresa hag̃ua? b) ¿Mbaʼépa ojapo peteĩ misionéro oipytyvõ hag̃ua umi mitãrusúpe, ha mbaʼépa ojehupyty upe haguére?

17 Jaʼéramo umi ermánope jaguerohoryetereiha umi mbaʼe porã ojapóva, ñamokyreʼỹ hína chupekuéra oservi hag̃ua Jehovápe ipyʼaite guive. Silvia, * peteĩ ermána  heta áñorema oservíva Betel de Fránciape, heʼi umi ermána ikatuha avei omokyreʼỹ ermanokuérape. Haʼe omombeʼu kuñanguéra sapyʼánte hetave mbaʼe ohechakuaaha umi kuimbaʼégui. Haʼe heʼi: “Umi ermáno iñexperiensiavéva oipytyvõ ermanokuérape oprogresa hag̃ua, péro umi ermána heʼíva tuicha avei omokyreʼỹ chupekuéra”. Upe rire Silvia heʼi: “Añehaʼãmbaite amokyreʼỹ ermanokuérape, upéva chéve g̃uarã peteĩ rresponsavilida” (Prov. 3:27). Jérôme, peteĩ ermáno oservíva de misionéro Guayana Francésape, omokyreʼỹma heta ermáno imitãvape oiko hag̃ua chuguikuéra misionéro. Haʼe heʼi: “Ahechakuaa umi ermáno ojeroviaveha ijehe ha oprogresaveha afelisitáramo chupekuéra ombaʼapo porã rupi predikasiónpe, térã okomenta porã haguére rreuniónpe”.

18. ¿Mbaʼérepa iporã ñambaʼapo umi ermáno imitãvandi?

18 Ikatu avei ñaipytyvõ ñane ermanokuérape ñambaʼapóvo hendivekuéra. Por ehémplo, peteĩ ansiáno ikatu ojerure peteĩ mitãrusu oipurukuaávape komputadóra toimprimi peteĩ informasión oipytyvõtava umi ermáno ijedavévape ndorekóiva komputadóra. Upearã ikatu oheka umi informasión ñande sítiope oĩva Internétpe: jw.org. Térã oiméramo ñambaʼapo Salón del Réinope, ikatu jajerure peteĩ mitãrusúpe ñanepytyvõ hag̃ua. Upéicha jahechakuaáta ikualida, mbaʼe mbaʼépepa ikatupyry ha ikatúta jafelisita chupe (Prov. 15:23).

ÑAPENSÁKENA TENONDERÃRE

19, 20. ¿Mbaʼérepa ñaipytyvõ vaʼerã ermanokuérape oprogresa hag̃ua?

19 Jehová onombrárõ guare Josuépe omoakã hag̃ua umi isrraelítape, omanda avei Moiséspe ‘omokyreʼỹ ha omombarete’ hag̃ua chupe (elee Deuteronomio 3:28). Jehová organisasiónpe oike hína heta hetave persóna, ha entéro kristiáno iñexperiénsiava oipytyvõ vaʼerã umi mitãrusúpe ha avei umi kristiáno ojevautisa ramóvape oipurupaite hag̃ua ikapasida. Ko tembiapo ningo ndahaʼéi umi ansiánonte la ojapo vaʼerã. Péicha heta hetave ermáno oservíta de tiémpo kompléto ha “ikatupyrýta omboʼe hag̃ua ótrope” (2 Tim. 2:2).

20 Ñapensa meme vaʼerã tenonderãre, tove tañaime peteĩ kongregasión tuichávape térã peteĩ grúpo oñehaʼãmbaitévape hína oiko hag̃ua chugui kongregasión. Ha ani ñanderesarái jasegi vaʼerãha Jehová ehémplo ha ñañehaʼã vaʼerãha jahecha umi mbaʼe porã orekóva ñane ermanokuéra.

^ párr. 17 Oñekambia héra.