Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Ñemañaha (ojestudiáva)  |  Abril de 2014

Jaikuaave hag̃ua

Jaikuaave hag̃ua

¿Mbaʼérepa yma umi hénte omondoro vaʼekue ijao?

LA Biblia omombeʼu heta tapicha omondoro hague ijao ha omombeʼu avei mbaʼe situasiónpepa ojapómi hikuái upéicha. Koʼág̃a ningo ndojejapovéima upéva, péro yma umi hudío omondoro ijao ohechauka hag̃ua oñembyasyha, oñemotĩha, ipochy térã ojejopy vaiha.

Por ehémplo, Rubén “omondoro ijao” ñembyasýgui oikuaávo oñevende hague esklávoramo iñermáno Josépe, ha ndaikatuveimaha ojapo mbaʼeve omosãso hag̃ua chupe. Avei itúva Jacob “omondoro ijao” oimoʼãgui peteĩ mymba ñarõ hoʼu hague itaʼýra Josépe (Gén. 37:18-35). Job avei “omondoro ijao” oikuaárõ guare omanombaite hague ifamiliakuéra (Job 1:18-20). Avei peteĩ mensahéro “ijao sorokuepa reheve” oho omombeʼu saserdóte guasu Elípe umi isrraelíta operde hague pe gérra, umi mokõi itaʼýra omano hague ha umi iñenemigokuéra ogueraha hague pe árka del pákto (1 Sam. 4:12-17, ÑÑB). Josías avei “omondoro ijao” ojeleérõ guare chupe Ñandejára Léi ha ohechakuaávo ipuévlo ojapo vai hague heta mbaʼe (2 Rey. 22:8-13).

Ojehusgárõ guare Jesúspe, pe saserdóte guasu Caifás “omondoro ijao” ohendúvo Jesúspe, ha heʼi hese otakyha Ñandejárare (Mat. 26:59-66). Yma umi rravíno ohendúvo ojetakyha Ñandejárare omondoro vaʼerã ijao. Péro oñehundi rire pe témplo oĩva Jerusalénpe, umi rravíno heʼi: “Koʼág̃a umi ohendúva ojetakyha Ñandejárare natekotevẽvéima omondoro ijao, ha ojapóramo katu ijao oñehundi vaʼerã”.

Péro yma umi hénte omondoróva ijao ohechauka vaʼerã oñembyasyha ipyʼaite guive, upéicharõmante ovaléta Jehovápe g̃uarã. Upévare voi Haʼe heʼi vaʼekue ipuévlope: “Pemondoro pende pyʼapy, ha ani pende aokuéra, pejevy katu [...] pende Jára rendápe” (Joel 2:13, ÑÑB).