Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Ñemañaha (ojestudiáva)  |  Febrero de 2014

Jehová ovendesi peteĩ viúdape ojerovia rupi

Jehová ovendesi peteĩ viúdape ojerovia rupi

EÑEIMAHINAMI ko mbaʼe: Peteĩ viúda hatã oañua imemby peteĩmíme, haʼe ndaikatúi oguerovia pe oikóva. ¿Mbaʼérepa? Angeténte haʼe oreko kuri henondépe imembyʼi reʼongue, péro koʼág̃a oikove jey ha opukavymi omañávo hese. Jehová proféta oĩva upépe heʼi chupe: “Emañami, ne memby oikove jey”.

Ojapóma tres mil áño oiko hague ko milágro tuichaite. Ko istória jatopa 1 de Reyes kapítulo 17-pe. Pe proféta hína Elías, ha pe kuñakarai peteĩ viúda oikóva Saréptape. ¡Mbaʼeichaitépa oiméne imbarete raʼe ijerovia ohechávo imemby oikove jey hague! Jahechami mbaʼépa ikatu ñaaprende ko kuñakaraígui.

ELÍAS OIKUAA PE VIÚDA OJEROVIAITÉVAPE

Acab haʼe vaʼekue peteĩ rréi iñañaitereíva, ha Jehová heʼi vaʼekue haʼe ogovernahápe oĩtaha peteĩ séka puku. Elías oprofetisa upéva oikotaha. Upéi pe sekía aja Ñandejára oñangareko Elíasre pono otopa hese rréi Acab. Jehová avei ojevale umi yryvu rehe ogueraha hag̃ua chupe pan ha soʼo. Upéi Ñandejára heʼi Elíaspe: “Epuʼã tereho Saréptape, oĩva Sidónpe, ha epyta upépe. Che haʼéta peteĩ viúdape nemongaru hag̃ua” (1 Rey. 17:1-9, NM).

Elías og̃uahẽvo Saréptape ohecha peteĩ viúda mboriahumi ombyatýva hína jepeʼa. Ohechávo chupe haʼe oiméne opensa raʼe: “¿Kóvane piko pe viúda Jehová heʼíva chemongarutaha? Imboriahueterei anga ningo”. Upéicharamo jepe, Elías heʼi pe kuñakaraípe: “Jaʼumína nde y ikatúramo”. Ogueru rire chupe la y, heʼi pe viúdape: “Chekonvidána avei ne pan pedasomi” (1 Rey. 17:10, 11, NM). Pe viúda naiprovlémai omeʼẽ hag̃ua chupe y, péro koʼág̃a ótra kosaitéma la ojeruréva chupe.

Upémarõ ombohovái: “Añetehápe, nde Jára Jehováre haʼe ndéve ndarekoiha  pan ameʼẽ hag̃ua ndéve. Kavalete ningo reg̃uahẽ ambyaty jave jepeʼa akosina hag̃ua chéve ha che membýpe g̃uarã. Aiporúta pe arína ha aséite rembyremi arekóva, ha upéi katu rohaʼarõtantema romano” (1 Rey. 17:12, NM). Jahechami mbaʼépa ikatu ñaaprende ko kuñakarai heʼi vaʼekuégui.

Ko viúda heʼívo “añetehápe, nde Jára Jehováre haʼe ndéve”, ohechauka oikuaa hague Elías haʼeha peteĩ isrraelíta oadoráva Jehovápe. Ikatu jaʼe upéicharõ ko kuñakarai oikuaa hague algúna kósa Jehovágui, péro neʼĩra ojerovia hese ipyʼaite guive, upévare ndeʼíri “Ñandejára Jehová”. Ko viúda oiko vaʼekue Saréptape, ha 1 Reyes 17:9 ohechauka pe siuda oĩha Sidónpe, oiméne upéva heʼise oĩha Sidón poguýpe. Umi hénte oikóva Saréptape katuete oiméne oadora Baálpe, upéicharamo jepe Jehová ohecha ko viúda idiferenteha umi ótro héntegui.

Ko kuñakarai ojerovia Ñandejára teetére, jepe entéro umi hénte oikóva ijerére oadora Baálpe. Jehová ningo ojepyʼapy Elíasre, upévare omondo chupe pe kuñakarai rendápe, péro ojapo avei upéva oñeintereságui pe viúdare. Koʼã mbaʼe ñanemboʼe peteĩ leksión iñimportánteva.

Ndaikatúi jaʼe enterove umi hénte oikóva Saréptape oadora hague Baálpe ha naipohãvéima hague. Omondóvo Elíaspe pe viúda rógape, Jehová ohechauka orekoha avei enkuénta umi persóna ipyʼaporãvape, jepe umíva ndoikuaaporãiti chupe. La Biblia heʼi voi: “Haʼe oguerohory entéro umi hembiapo porãva ha okyhyjévape chugui, tahaʼe haʼéva tetãygua” (Hech. 10:35).

Nde territóriope, ¿mboy persónapa oĩne ojoguáva ko viúdape? Ko múndope oĩramo jepe hetaiterei rrelihión japu, ikatu gueteri oĩ hénte ohekáva Ñandejárape ha oñehaʼãva oñemoag̃uive hese. Oime vaʼerã haʼekuéra ndoikuaaguasúi Jehovápe térã katu ndoikuaaiete voi chupe. Upévare tekotevẽterei ñaipytyvõ chupekuéra omombaʼeguasu hag̃ua Ñandejára teetépe. ¿Rehekápa nde koʼãichagua persónape?

“EJAPO RAẼ CHÉVE G̃UARÃ PETEĨ PAN”

Koʼág̃a ñanemanduʼami Elías ojerure vaʼekuére. Pe viúda omombeʼu kuri chupe orekoha tembiʼu una verãntema hoʼu hag̃ua imembýndi, ha upéi omanotamaha hikuái. Upéicharamo jepe Elías heʼi chupe: “Ani rekyhyje opárõ g̃uarã ndehegui hiʼupy, tereho katu ejapo raẽ chéve g̃uarã peteĩ pan, ha upéi penembaʼerã. Pórke péicha heʼi Jehová, Israel Jára: ‘Ndopamoʼãi ne arína ni nde aséite, ág̃a Jehová ombou jey peve peteĩ ama ko yvy ape ári’” (1 Rey. 17:11-14, NM).

Ñande ikatu ñapensa: “¿Mbaʼéicha piko ojeruréta upéva? ¿Mbaʼéichaiko oipeʼáta chuguikuéra hembiʼu?”. Péro, ¿mbaʼéichapa orreaksiona pe viúda? Ndoikuaaporãiramo jepe Jehovápe, haʼe oguerovia Elíaspe ha ojapo upe ojeruréva chupe. Ijetuʼúramo jepe upe ojejeruréva chupe, haʼe odesidi porã.

Pe viúda ojerovia rupi, Jehová oprotehe chupe ha imembýpe

Ñandejára okumpli ipromésa ha ndahesaráiri chuguikuéra, heʼi haguéicha Elías rupive, ‘ndopái pe arína ni pe aséite’. Péicha ndofaltái la hoʼu vaʼerã pe viúda, imemby ha Elíaspe (1 Rey. 17:16; 18:1, NM). ¿Mbaʼépa oiko vaʼerãmoʼã pe viúda hakateʼỹrire iñarína ha ijaséitere? Ikatu jaʼe hoʼúta hague pe último tembiʼu orekóva ha omano hikuái. Péro  haʼe ohechauka ojeroviaha Jehováre ha ojapo raẽ Elíaspe hembiʼurã.

Ko istóriagui ñaaprende avei Jehová ovendesiha umi ohechaukávape ojeroviaha hese. Ñande jadesidíramo ñaneñeʼẽrendu Jehovápe ijetuʼúramo jepe, haʼe katuete ñanepytyvõta. Péicha jave haʼe omeʼẽta ñandéve opa mbaʼe ñaikotevẽva, ñandeprotehéta, ha peteĩ amígoicha oĩta ñande ykére ikatu hag̃uáicha ñaaguanta (Éx. 3:13-15).

Áño 1898-pe rrevísta La Torre del Vigía de Sión, koʼág̃a hérava Ñemañaha, heʼi vaʼekue mbaʼépa ñanemboʼe pe viúda ehémplo: “Pe viúda iñeʼẽrendúramo ha ohechaukárõ ojeroviaha, Ñandejára ohechakuaáta omereseha oipytyvõ chupe iproféta rupive. Péro ndojeroviáirõ, Jehová ohekáta ótra viúda ohechaukáva ojeroviaha hese. Upéicha avei oiko ñanderehe: Jehová oheja jahasa umi pruéva ojekuaa hag̃ua añetehápepa jajerovia hese. Jahechaukáramo jajeroviaha hese haʼe ñanevendesíta, ndaupéichairamo katu japytáta po nandi”.

Ñambohovái jave peteĩ situasión ijetuʼúva ñañehaʼã vaʼerã jahecha mbaʼépa Jehová oipota jajapo, upearã ikatu jajevale la Biblia ha umi puvlikasionkuérare. Upéi jasegi vaʼerã umi konsého jatopa vaʼekue, jepe ikatu nañandegustapái hína. Jehová ningo katuete ñanevendesíta jarekóramo enkuénta ko téxto heʼíva: “Ejerovia Jehováre nde pyʼaite guive, ha ani ndejehe añónte. Nemanduʼáke hese opa mbaʼe rejapóvape, ha haʼe omyesakãta ndéve nde rape” (Prov. 3:5, 6, NM).

‘¿REJU PIKO REJUKA HAG̃UA CHE MEMBÝPE?’

Ko viúda ohasa jey peteĩ situasión ijetuʼúva tekotevẽhápe ohechauka imbaretépa ijerovia. La Biblia omombeʼu mbaʼépa oiko: “Pe viúda memby ou hasyete, ndokueravéi ha omano”. Ko kuñakarai nontendéi mbaʼérepa ojehu chupe ko mbaʼe vaiete, ha upévare heʼi Elíaspe: “Karai, Ñandejára oikovéva remimbou, ¿mbaʼéiko che ajapo raʼe nderehe? ¿Reju piko chemomanduʼa hag̃ua che rembiapo vaikue ha rejuka hag̃ua che membýpe?” (1 Rey. 17:17, 18, NM). ¿Mbaʼérepa heʼi koʼã mbaʼe pe viúda?

Ikatu oime ko kuñakarai ymave opeka raʼe ha koʼág̃a ojopy chupe ikonsiénsia, térã okalkula Ñandejára ombou hague Elíaspe okastiga hag̃ua chupe ojukávo imembýpe. La Biblia nomombeʼúi koʼã detálle, péro si omyesakã ko viúda ndeʼíri hague Ñandejára iñinhustoha hendive.

Katuete ningo oiméne Elías oñesorprende raʼe omano haguére pe viúda memby, ha ombyasy avei haʼe opensa haguére ikáusare omanoha pe mitã. Upe rire Elías ogueraha pe mitã pe koty yvateguápe ha hatã heʼi: “Ñandejára Jehová, ¿repermitíta piko avei ko viúda cherresivi vaʼekue hógape ohasa asy ha reheja omano imemby?”. Elías ningo ndoipotaiete voi Jehová réra oñemongyʼa, opermitívo osufri ko kuñakarai imbaʼeporãite vaʼekue. Upévare ojerure asy Ñandejárape: “Jehová che Jára, emoingove jeýna ko mitãme” (1 Rey. 17:20, 21, NM).

“EMAÑAMI, NE MEMBY OIKOVE JEY”

Jehová ohendu Elíaspe. Pe kuñakarai ningo omongaru iprofétape ha ohechauka ojeroviaha hese. Ñandejára ikatu kuri omonguera pe viúda memby, péro amalisia haʼe ohejánte pe mitã osegi hasykatu, oikuaágui upe rire orresusita jeytaha chupe. Elías oñemboʼe rire, Jehová omopuʼã jey pe mitãme. Eñeimahinamíntena mbaʼeichaitépa oiméne oñeñandu pe kuñakarai Elías heʼírõ guare chupe: “Emañami, ne memby oikove jey”. Upévo pe viúda heʼi: “Koʼág̃a aikuaáma nde añetehápe haʼeha Ñandejára remimbou, ha reñeʼẽ hague Jehová rérape”. Ko pártepe primera ves oñemombeʼu la Bíbliape oñemoingove jey hague peteĩ omanóvape. Ha ko milágro omeʼẽ esperánsa hetaiterei héntepe (1 Rey. 17:22-24, NM).

Upe rire ko pártepe noñemombeʼuvéima mbaʼépa oiko ko viúdagui, péro ikatu jaʼe haʼe oservi hague Jehovápe omano meve, pórke Jesús imanduʼa porã vaʼekue hese (Luc. 4:25, 26). Ko viúda rembiasakue ohechauka Ñandejára ovendesiha umi otrata porãva isiervokuérape (Mat. 25:34-40). Avei jahechakuaa haʼe omeʼẽha oikotevẽva umi iñeʼẽrendúvape, ivaivéramo jepe la situasión (Mat. 6:25-34). Ñaaprende avei Jehová ikatuha omoingove jey umi omano vaʼekuépe ha ojaposeha voi upéva (Hech. 24:15). Katuete ideprovechoitereíta ñandéve jajepyʼamongetáramo pe viúda ehémplore.