Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Ñemañaha (ojestudiáva)  |  Febrero de 2014

¡Javyʼákena pe Ovecharaʼy kasamiéntore!

¡Javyʼákena pe Ovecharaʼy kasamiéntore!

“Ñandepyʼarory ha javyʼaitereíkena [...] og̃uahẽmagui pe Ovecharaʼy kasamiénto.” (APOC. 19:7)

1, 2. a) ¿Máva kasamiéntopa oporombovyʼáta yvágape? b) ¿Mbaʼe porandúpa ñambohováita?

PETEĨ kasamiénto ningo ndojepreparái sapyʼaitépe, ¿ajépa? Péro oĩ peteĩ kasamiénto ojapómava 2.000 áñorupi ojeprepara hague. ¿Mbaʼeichaguápa hína upéva? Peteĩ rréi kasamiénto, ha saʼíma ofalta omenda hag̃ua pe nóviare. Koʼẽrõitéma pe palásiope oñehendúta músika pu rory asy, ha hetaiterei oĩta opurahéiva: “Pemombaʼeguasúke Jehovápe, Ñandejára Ipuʼakapáva Jehová oñepyrũma rupi ogoverna. Ñandepyʼarory ha javyʼaitereíkena, ha ñameʼẽ chupe tekomimbipa, og̃uahẽmagui pe Ovecharaʼy kasamiénto ha hembirekorã ojepreparáma omenda hag̃ua” (Apoc. 19:6, 7).

2 Yvágape ojevyʼaiterei pe kasamiéntore. ¿Mávapa “pe Ovecharaʼy” omendátava? Upéva hína Jesucristo (Juan 1:29). ¿Mbaʼéichapa oñemonde ikasamientorã? ¿Mávapa pe nóvia ha mbaʼéichapa ojeprepara? ¿Arakaʼépa oikóta pe kasamiénto? Ha ojevyʼaitereítaramo jepe yvágape, ¿ikatúpa jaʼe ovyʼataha avei umi orekóva esperánsa oikove hag̃ua opa ára g̃uarã ko yvy ape ári? Jaikuaa hag̃ua upéva, jasegi ñahesaʼỹijo Salmo 45.

 “NDE AOKUÉRA HYAKUÃVUREI”

3, 4. a) ¿Mbaʼéichapa oñemonde pe Nóvio, ha mbaʼérepa ovyʼaiterei? b) ¿Mávapa “umi rréi rajykuéra” ha “pe rréina” ovyʼáva avei pe Nóvio ndive?

3 (Elee Salmo 45:8, 9.) Pe Nóvio Jesucristo omonde peteĩ ao omimbipáva. Ha ijaógui osẽ “mbaʼe ryakuã porãva” haʼetéva mírra ha kásia. Koʼã ingrediénte ojeporu vaʼekue Israélpe ojeprepara hag̃ua peteĩ aséite espesiál, por ehémplo pe aséite ojeporúva ojeporavo jave peteĩ tapichápe ojapo hag̃ua peteĩ tembiapo iñimportánteva (Éx. 30:23-25, ÑÑB).

4 Pe músika ipúva yvágape pe palásiope ombovyʼavéntema pe Nóviope. Avei ovyʼaiterei “pe rréina”, haʼéva hína Ñandejára organisasión (pe párte oĩva yvágape), ha umíva apytépe oĩ “umi rréi rajykuéra”, térã umi ánhel imarangatúva. Oime vaʼerã ipirĩmba umi ohendúva ojepurahéivo yvágape: “Ñandepyʼarory ha javyʼaitereíkena [...] og̃uahẽmagui pe Ovecharaʼy kasamiénto”.

OJEPREPARA PE NÓVIAPE OMENDA HAG̃UA

5. ¿Mávapa hína “pe Ovecharaʼy rembireko”?

5 (Elee Salmo 45:10, 11.) Koʼág̃a jaikuaáma mávapa pe Nóvio, péro ¿mávapa hína pe nóvia? Ndahaʼéi peteĩ persónante, síno peteĩ grúpo de 144.000 unhído, ha chupekuéra omoakã Jesucristo (elee Efesios 5:23, 24). Haʼekuéra oĩta pe Rréino Mesiánikope oĩva Cristo poguýpe (Luc. 12:32). Koʼã 144.000 unhído osegi “pe Ovecharaʼýpe toho ohohápe” (Apoc. 14:1-4). Ha oiko rire chuguikuéra “pe Ovecharaʼy rembireko”, oikóta hikuái yvágape (Apoc. 21:9; Juan 14:2, 3).

6. ¿Mbaʼérepa ojeʼe koʼã unhídore haʼeha pe “rréi rajy”, ha mbaʼérepa ojeʼe chupekuéra ‘hesarái vaʼerãha ipuévlogui’?

6 Pe nóviare ojeʼe oñemondeha ‘peteĩ rréi rajýicha’ (Sal. 45:13, NM). ¿Mávapa pe “rréi” oñeñeʼẽha ko téxtope? Upéva hína Jehová. Haʼe ningo oadopta umi unhídope “itaʼýraramo” (Rom. 8:15-17). Koʼã kristiánogui oikóta rupi pe nóvia amo yvágape, ojeʼe chupekuéra: “Nderesaráikena nde puévlogui ha nde tuvakuéra [yvypóra] rógagui”. Avei ojeʼe chupekuéra: “Pepensa memékena umi mbaʼe yvagapeguáre ha ani umi mbaʼe ko yvy arigua rehe” (Col. 3:1-4).

7. a) ¿Mbaʼéichapa Cristo opreparáma oikóvo hembirekorãme? b) ¿Mbaʼépa opensa pe nóvia Inóviore?

7 Heta tiémporema Jesús oprepara oikóvo hembirekorãme omenda hag̃ua yvágape. Apóstol Pablo heʼi: “Cristo ohayhu [...] pe kongregasión ha omeʼẽ hekove hesehápe. Ikatu hag̃uáicha omomarangatu omopotĩvo chupe ýpe, haʼéva hína Ñandejára Ñeʼẽ. Cristo ojapo upéva pe kongregasión ojajaipa hag̃ua henondépe. Haʼe oipota vaʼekue pe kongregasión imarangatu, iporãmbaite, ha ani ichaʼĩ ni oreko mbaʼeve ikyʼáva” (Efes. 5:25-27). Pablo heʼi avei umi kristiáno Corintoguápe: “Chete voi apromete kuri pomeʼẽtaha pemenda hag̃ua Crístore, ha popresentase chupe peteĩ mitãkuña pyahúicha. Upévare ajepyʼapyeterei penderehe Ñandejára ojapoháicha” (2 Cor. 11:2). Pe Nóvio, haʼéva pe Rréi Jesucristo, oguerohoryeterei pe nóviape ‘iporãiterei’ haguére, térã oĩ porã rupi Ñandejára renondépe. Ha pe nóvia katu orrekonose haʼeha ‘ijára’ ha ‘oñakãity henondépe’ orrespetágui chupe.

PE NÓVIA “OJEGUERAHA [...] PE RRÉI RENDÁPE”

8. ¿Mbaʼérepa ojeʼe pe nóviare ‘ojajaipaha’?

8 (Elee Salmo 45:13, 14a.) Pe nóvia “ojajaipa” oñepresentávo pe kasamientorã. Apocalipsis 21:2-pe oñembojoja chupe peteĩ siudáre, Jerusalén Pyahu, ha  ojeʼe haʼeteha “peteĩ nóvia ojeprepara ha oñemoporãva iménape g̃uarã”. Ko siuda yvagapegua oreko “Ñandejára rekomimbipa” ha ojajaipa, “omimbi peteĩ ita iporãitereívaicha, haʼete háspe overáva peteĩ kristál hesakã asývaicha” (Apoc. 21:10, 11). Pe lívro de Apocalípsispe oñemombeʼu mbaʼeichaitépa omimbipa porãgui pe Jerusalén Pyahu (Apoc. 21:18-21). Ndareíri pe salmísta heʼi pe nóvia ‘ojajaipaha’. Ha upéichata voi, pe kasamiénto ningo oiko yvágape.

9. a) ¿Mávapa hína “pe rréi” orresivítava pe nóviape? b) ¿Mbaʼéichapa oñemonde pe nóvia?

9 Pe nóviape ojegueraha pe Nóvio rendápe, haʼéva hína pe Rréi Mesiániko. Haʼe opreparáma kuri oikóvo pe nóviape “omopotĩvo chupe ýpe, haʼéva hína Ñandejára Ñeʼẽ” ikatu hag̃uáicha “imarangatu [ha] iporãmbaite” (Efes. 5:26, 27). Haʼe avei oñemonde porã pe kasamientorã. “Ijaokuéra oñembojegua órope” ha “omonde ao ojevordapáva ojegueraha hag̃ua pe rréi rendápe”. Pe Ovecharaʼy kasamientorã, pe nóviape “oñemeʼẽ permíso omonde hag̃ua ao de líno iporã, ipotĩ ha omimbipáva, pe líno iporãva orrepresenta rupi umi mbaʼe porã ojapóva umi imarangatúva” (Apoc. 19:8).

‘OG̃UAHẼMA PE OVECHARAʼY KASAMIÉNTO’

10. ¿Arakaʼépa oikóta pe Ovecharaʼy kasamiénto?

10 (Elee Apocalipsis 19:7.) ¿Arakaʼépa oikóta pe Ovecharaʼy kasamiénto? Apocalipsis 19:7 heʼi pe Ovecharaʼy ‘rembirekorã ojepreparamaha’, péro umi mbaʼe oñemombeʼúva umi versíkulo oĩvape upe rire noñeʼẽi hína pe kasamiéntore, síno umi mbaʼe oikótavare oñemohuʼãvoma pe jehasa asy guasu (Apoc. 19:11-21). ¿Heʼisépa upéva pe kasamiénto oikotaha pe Nóvio omohuʼã mboyve iñorairõ? Nahániri. Umi visión oñemombeʼúva Apocalípsispe, noñekumplíri por órden oñemoĩháicha pe lívrope. Salmo 45 omombeʼu pe kasamiénto oikotaha pe Rréi omoĩ rire ijespáda ikuʼáre ha oho ‘ogana hag̃ua’, térã omohuʼã rire iñorairõ (Sal. 45:3, 4, NM).

11. ¿Mbaʼe órdenpepa Cristo omohuʼãta iñorairõ?

11 ¿Mbaʼe órdenpepa oñekumplíta umi mbaʼe ojeʼéva Apocalípsispe? Ñepyrũrã oñehundíta “pe kuña rekovaípe”, térã Babilonia Guasu, oĩhápe opavave umi rrelihión japu (Apoc. 17:1, 5, 16, 17; 19:1, 2). Upe rire, Cristo rupive Jehová ohundíta Satanás múndo aña Armagedónpe, pe “gérra oikótava Ñandejára Ipuʼakapáva ára guasúpe” (Apoc. 16:14-16; 19:19-21). Ipahaitépe katu pe Rréi Gerréro omohuʼãta iñorairõ opoívo Satanás ha idemoniokuérape pe yvykua pypukúpe. Upépe haʼekuéra oĩta ku omanorõguáicha, ndaikatumoʼãvéima ojapo mbaʼevete (Apoc. 20:1-3).

12, 13. a) ¿Arakaʼépa oikóta pe Ovecharaʼy kasamiénto? b) ¿Máva mávapa ovyʼáta yvágape pe Ovecharaʼy kasamiéntore?

12 Koʼã ára pahápe, umi unhído omohuʼãva hekove ko yvy ape ári, oikove jeýma yvágape. Oñehundi rire Babilonia Guasu, Jesús ombyatypáta yvágape umi unhído hembývape ko yvy ape ári (1 Tes. 4:16, 17). Upéicharõ, enterovete unhído haʼéva pe “nóvia” oĩtama yvágape oñepyrũ mboyve Armagedón. Oñemohuʼã rire ko ñorairõ, oikóta pe Ovecharaʼy kasamiénto. ¡Ajépa ojevyʼaitéta upéva oiko vove! Apocalipsis 19:9 heʼi: “Ovyʼaite umi oñeinvitáva pe karu guasu ojejapótavape pe Ovecharaʼy kasamientorã”. Añetehápe umi 144.000 haʼéva hína pe nóvia, ovyʼaitereíta. Ha pe Nóvio, pe Rréi Jesucristo, ovyʼáta avei oreko rupi ijykére entéro ogovernátavape hendive Irréinope, ku oguapyrõguáicha hikuái imesápe ‘okaru  ha omboyʼu’ (Luc. 22:18, 28-30). Péro ndahaʼéi pe Nóvio ha pe nóviante la ovyʼátava pe Ovecharaʼy kasamientorã.

13 Jahecháma haguéicha, yvágape oĩta hetaiterei opurahéitava: “Ñandepyʼarory ha javyʼaitereíkena, ha ñameʼẽ chupe tekomimbipa, og̃uahẽmagui pe Ovecharaʼy kasamiénto ha hembirekorã ojepreparáma omenda hag̃ua” (Apoc. 19:6, 7). Péro ¿ovyʼátapa avei Ñandejára siervokuéra oikóva ko yvy ape ári?

“HAʼEKUÉRA OÚTA TORY HA VYʼÁPE”

14. ¿Máva mávapa hína umi “vírhen omoirũva” pe nóviape heʼiháicha Salmo 45?

14 (Elee Salmo 45:12, 14b, 15.) Zacarías oprofetisa vaʼekue umi ára pahápe oĩtaha tapicha opa tetãygua omoirũtava pe Israel yvagapeguápe oĩva gueteri ko yvy ape ári. Haʼe heʼi: “Upérõ diez kuimbaʼe oúva diferénte tetãgui ha oñeʼẽva diferénte idióma ipojáita peteĩ hudío ao ruguáire ha heʼíta: ‘Ore rohose penendive, rohendúgui Ñandejára oĩha penendive’” (Zac. 8:23, NM). Salmo 45:12-pe koʼã ‘diez kuimbaʼépe’ oñehenói “Tiro rajy” ha “umi irrikovéva”. Haʼekuéra oho jopói reheve umi unhído hembýva ko yvy ape ári rendápe, ikatu hag̃uáicha oĩ porã hendivekuéra ha oipotágui oipytyvõ chupekuéra “oñemoĩ porã” hag̃ua Ñandejára renondépe. Áño 1935 guive umi unhído hembýva ko yvy ape ári oipytyvõma hetaiterei tapichápe “ojuhu hag̃ua pe hustísia” (Dan. 12:3, ÑÑB). Koʼã “diez kuimbaʼe” iñeʼẽrendúva ha omoirũva umi unhídope, oñemopotĩma opaichagua rrelihión japúgui ha upévare ikatu ojeʼe hesekuéra haʼeha vírhen. Koʼã “vírhen omoirũva” pe nóviape oñemeʼẽma  Jehovápe ha iñeʼẽrendu pe Rréi Jesucrístope, pe Nóvio.

15. ¿Mbaʼéichapa ‘umi vírhen omoirũ’ umi unhído hembývape gueteri ko yvy ape ári?

15 Umi unhído oĩva gueteri ko yvy ape ári oagradeseterei umi ‘vírhen omoirũvape’ chupekuéra oipytyvõ haguére ojepredika hag̃ua pe “marandu porã” ko yvy tuichakuére (Mat. 24:14). “Pe espíritu sánto ha pe nóvia akóinte heʼi: ‘¡Eju!’”. Péro ndahaʼéi haʼekuérante oporoinvitáva, síno opavave ohendúva heʼi avei: “¡Eju!” (Apoc. 22:17). Umi “ambue ovechakuéra” ohendu umi unhídope heʼívo “¡Eju!”, ha omoirũ chupekuéra oinvita hag̃ua opavavépe ko yvy tuichakuére (Juan 10:16).

16. ¿Mbaʼe priviléhiopa omeʼẽ Jehová umi ambue ovechakuérape?

16 Umi unhído hembýva ko yvy ape ári ohayhueterei umi ‘ambue ovechakuérape’. Upévare oagradese hikuái pe Nóvio Túva, Jehovápe, omeʼẽ haguére koʼã ovechápe oportunida ovyʼa hag̃ua avei oiko vove pe Ovecharaʼy kasamiénto. Sálmope ojeʼéma kuri koʼã “vírhen omoirũva” pe nóviape ‘outaha tory ha vyʼápe’. Umi ambue ovechakuéra orekóva esperánsa oiko hag̃ua opa árare ko yvy ape ári, ovyʼáta avei opavave Jehová família ovyʼaháicha ág̃a oiko vove pe Ovecharaʼy kasamiénto yvágape. Ndareíri ningo Apocalípsispe heʼi oĩha “peteĩ aty guasu” oñemboʼýva “pe tróno ha pe Ovecharaʼy renondépe”. Haʼekuéra omombaʼeguasu Jehovápe ko yvy ape ári pe témplo espirituál korapýpe (Apoc. 7:9, 15).

Pe Ovecharaʼy kasamiénto ombovyʼaiterei ‘umi vírhen omoirũvape’ pe nóviape (Ehecha párrafo 16)

“NDE RAʼYKUÉRA OĨTA UMI NDE YPYKUE RENDAGUÉPE”

17, 18. a) ¿Mbaʼépa ojehupytýta pe Ovecharaʼy kasamiénto rupive? b) ¿Mbaʼérepa ojeʼe Crístogui oikotaha peteĩ túva ogoverna vove Mil Áñore?

17 (Elee Salmo 45:16.) “Umi vírhen omoirũva” Cristo nóvia yvagapeguápe, koʼýte ovyʼavétantema ohecha vove umi mbaʼe ojehupytýva ko yvy ape ári pe kasamiénto rupive. Pe Nóvio haʼéva hína pe Rréi Jesucristo omoingove jeýta ko yvy ape ári umi ‘ijypykuépe’ ha oikóta chuguikuéra ‘itaʼýra’ (Juan 5:25-29; Heb. 11:35). Umíva apytégui onombráta “prínsipe ko yvy tuichakuére”. Ha jaʼekuaa avei upérõ oiporavotaha umi ansiáno oikóvagui koʼág̃a omotenonde hag̃ua umi tembiapo pe múndo pyahúpe (Is. 32:1).

18 Cristo ogoverna vove Mil Áñore, oikóta chugui peteĩ túva. ¿Mbaʼérepa jaʼe upéva? Opaite umi ojeroviáva Jesucristo sakrifísiore ikatúta oiko ko yvy ape ári opa ára g̃uarã (Juan 3:16). Upéicha rupi oikóta Jesúsgui “Túva Opa ára g̃uarã” (Is. 9:6, 7, NM).

“AIKUAAUKÁTA NDE RÉRA”

19, 20. ¿Mbaʼéichapa oipytyvõ opavave kristiánope umi mbaʼe oĩva Salmo 45-pe?

19 (Elee Salmo 45:1, 17.) Jahechaháicha, umi mbaʼe oñemombeʼúva Salmo 45-pe iñimportánte opavave kristiánope g̃uarã. Umi unhído oĩva gueteri ko yvy ape ári ovyʼaiterei oikuaágui koʼẽrõitéma ohotaha yvágape oĩháme iñermanokuéra ha Inóvio. Ha umi ambue ovechakuéra katu kyreʼỹme oñemoĩ pe Rréi hekomimbipáva poguýpe, ha oagradeseterei ikatu haguére oservi umi unhído ndive hembýva gueteri ko yvy ape ári. Pe Ovecharaʼy kasamiénto rire, Cristo ha umi ogovernátava hendive ovendesíta yvyporakuérape oñeimoʼãʼỹháicha (Apoc. 7:17; 21:1-4).

20 Ñahaʼarõ aja oñekumpli “umi mbaʼe neporãva” pe Rréi Mesiánikore, jajapo vaʼerã pe salmísta heʼi vaʼekue: “Aikuaaukáta nde réra entéro oikovévape”. Upévare, ‘ñamombaʼékena [pe Rréipe] opa árare’.