Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Ñemañaha (ojestudiáva)  |  Enero de 2014

Mitãrusu ha mitãkuñanguéra, pedesidi porãkena

Mitãrusu ha mitãkuñanguéra, pedesidi porãkena

“[Mitãrusu ha mitãkuñanguéra], pemombaʼeguasúkena Jehová réra.” (SAL. 148:12, 13, NM)

1. ¿Mbaʼe mbaʼépa ojapo oikóvo heta mitãrusu ha mitãkuña oservíva Jehovápe?

ÑANDE ningo jaiko peteĩ tiémpo iñimportantetereívape. Koʼág̃arupi hetaiteve hénte opa tetãygua oñepyrũ omombaʼeguasu Jehovápe (Apoc. 7:9, 10). Heta mitãrusu ha mitãkuña vyʼápe oipytyvõ hapichakuérape ontende hag̃ua la Biblia omboʼéva ikatu hag̃uáicha ojesalva (Apoc. 22:17). Heta oĩ ovyʼáva ojapóvo estúdio vívliko ha oipytyvõvo umi héntepe okambia hag̃ua. Ótro katu opredika kyreʼỹme umi território oñeñeʼẽhápe ambue idióma (Sal. 110:3; Is. 52:7). Añetehápe Ñandejára puévlo ovyʼa ojapo haguére ko tembiapo iñimportantetéva. Mitãrusu ha mitãkuñanguéra, ¿mbaʼépa ikatu pejapo pembaʼapove hag̃ua Jehovápe g̃uarã?

2. ¿Mbaʼéichapa Timoteo ohasa vaʼekue ohechauka Jehová omeʼẽseha rresponsavilida umi imitãvape? (Ehecha pe taʼanga oĩva iñepyrũme.)

2 Koʼág̃a nemitãre, ikatu redesidi heta mbaʼe upe rire nepytyvõtava reservi porãve hag̃ua Jehovápe ha revyʼa hag̃ua. Epensamíntena Timoteo rehe, onase vaʼekue peteĩ táva héravape Listra. Haʼe ningo odesidi porã vaʼekue ha upéva oipytyvõ chupe ohupyty hag̃ua upe rire heta mbaʼe iporãva. Por ehémplo orekórõ guare 20 áñorupi, oikóma chugui misionéro (Hech. 16:1-3). Apóstol Pablo oĩrõ guare Tesalónicape ojepersegi vaieterei umi ermánope, upéicha rupi haʼe ohómante vaʼerã upégui. Upe riremi  Pablo omondo Timotéope omombarete hag̃ua pe kongregasiónpe (Hech. 17:5-15; 1 Tes. 3:1, 2, 6). ¿Mbaʼéichapa nde ere oñeñandúne hague Timoteo orresivírõ guare pe asignasión?

PE DESISIÓN IÑIMPORTANTEVÉVA

3. ¿Mbaʼépa hína pe desisión iñimportantevéva, ha mbaʼe moméntopepa rejapo vaʼerã?

3 Ñanemitã aja jadesidi vaʼerã heta mbaʼe iñimportánteva. Péro oĩ peteĩ mbaʼe iñimportantevéva opa mbaʼégui: jadesidi jaservi Jehovápe. ¿Mbaʼe moméntopepa jajapo vaʼerã upéva? Jehová heʼi: “Nemanduʼákena [...] nde Apohare rehe nemitã aja” (Ecl. 12:1, NM). ¿Mbaʼépa heʼise ‘nemanduʼa nde Apohare rehe’? Heʼise reservi vaʼerãha Jehovápe nde pyʼaite guive (Deut. 10:12). Redesidívo upéva, reiporavóma mbaʼe tapérupipa rehóta reikove aja pukukue. Upévare ko desisión iñimportanteterei (Sal. 71:5).

4. ¿Mbaʼépa tekotevẽta avei redesidi?

4 Ikatu oime redesidíma reservi Jehovápe, péro tekotevẽ avei redesidi hetave mbaʼe. Por ehémplo rehecha vaʼerã remendátapa térã nahániri, mávarepa remendáta ha mbaʼéichapa reñemantenéta. Koʼã mbaʼe ningo iñimportánte, péro iñimportanteve jey rehecha reñemeʼẽmbaitétapa Jehová servísiope (Deut. 30:19, 20). ¿Mbaʼérepa? Umi mbaʼe redesidíva pe matrimónio ha traváhore, nepytyvõta reime porã hag̃ua Ñandejárandi térã nemomombyrýta chugui (embojoja Lucas 14:16-20 rehe). Péro redesidíramo reservi Jehovápe, upéva nepytyvõta redesidi porã hag̃ua avei pe matrimónio ha traváhore. Upévare redesidi raẽ vaʼerã mbaʼépa iñimportantevéta ndéve g̃uarã (Filip. 1:10).

¿MBAʼÉPA REJAPÓTA NEMITÃ AJA?

5, 6. Emombeʼu peteĩ experiénsia ohechaukáva jahupytyha heta vendisión jadesidi porãramo. (Ehecha avei ko rrevístape pe artíkulo hérava “Peteĩ mbaʼe adesidi vaʼekue chemitãme”.)

5 Redesidi rire reservitaha Ñandejárape, reñeporandu vaʼerã mbaʼépa haʼe oipota rejapo ha upéi redesidi mbaʼéichapa reservíta chupe. Peteĩ ermáno Japongua oskrivi: “Arekórõ guare 14 áño, asẽ apredika peteĩ ansiánondi ha haʼe ohechakuaa ndavyʼaiha che servísiope. Pe ermáno pyʼaporãmente heʼi chéve: ‘Yuichiro, ehóntena nde rógape ha eguapy epensa umi mbaʼe Jehová ojapóvare nderehehápe’. Ha upéicha ajapo, heta día apensa ha añemboʼe. Mbeguekatúpe akambia apensa lája ha añepyrũma avyʼa Jehová servísiope. Che ningo aleeseterei voi umi misionéro rembiasakue, ha upéva chemokyreʼỹ ambaʼapove hag̃ua Jehovápe g̃uarã”.

6 Yuichiro heʼi avei: “Añepyrũ adesidi heta mbaʼe upe rire chepytyvõva aservi hag̃ua Jehovápe ótro tetãme. Por ehémplo, astudia inglés. Amohuʼã rire che koléhio, amboʼe inglés ikatu hag̃uáicha añemantene ha ajapo che prekursorádo. Arekórõ guare 20 áño, astudia avei mongól ha avisita peteĩ grúpo oĩháme maranduhára oñeʼẽva upe idióma. Dos áño haguépe, 2007-pe aviaha Mongóliape sapyʼami. Upépe asẽ apredika prekursorkuéra ndive ha ahechakuaa oĩha heta hénte oikuaasevéva la Bíbliagui. Upévare avaséma upépe ikatu hag̃uáicha aipytyvõ umi héntepe. Upémarõ aha jey Japónpe ha añepyrũ ajeprepara. Abril de 2008 guive aservi de prekursór Mongóliape. Koʼápe ningo ijetuʼu heta mbaʼe, péro oĩ heta hénte ohenduséva pe marandu porã, ha che aipytyvõ chupekuéra oñemoag̃ui hag̃ua Jehováre. Ni michĩmi nambyasýi adesidi haguére aservi peteĩ lugár oñekotevẽvehápe”.

7. a) ¿Mbaʼe mbaʼépa káda uno jadesidi vaʼerã? b) ¿Mbaʼe ehémplopa omoĩ ñandéve Moisés?

7 Káda uno jadesidi vaʼerã mbaʼéichapa jaiporúta ñande rekove Jehová servísiope (Jos. 24:15). Ore ndaikatúi roʼe ndéve “Emenda katu”, térã “Aníke remenda”. Ndaikatúi avei roʼe ndéve mávarepa remenda vaʼerã, ni rodesidi mbaʼeichagua traváhopa reheka  vaʼerã. ¿Redesidítapa restudia peteĩ mbaʼe mbykymívante ikatu hag̃uáicha rembaʼapo? Peẽ mitãrusu ha mitãkuñanguéra peservíva Jehovápe, pende apytépe oĩ oikóva umi táva imboriahúvape, ótro katu umi siuda tuichávape. Entéronte penediferénte ojuehegui, por ehémplo pepensa lája, umi mbaʼe pendegustáva, pejaposéva, pende kapasida ha pende jerovia. Upéicha avei umi mitãrusu ha mitãkuña evréo oiko vaʼekue Egíptope idiferénte vaʼekue Moisésgui. Haʼekuéra ningo esklavomínte, péro Moisés oiko pe mburuvicha guasu rógape, ha ikatu kuri ohupyty heta mbaʼe upépe (Éx. 1:13, 14; Hech. 7:21, 22). Haʼekuéra oiko vaʼekue peteĩ tiémpo iñimportántevape, ndéicha avei (Éx. 19:4-6). Káda uno odesidi vaʼerã kuri oservítapa Jehovápe ipyʼaite guive, ha jaʼekuaa Moisés odesidi porãiterei hague (elee Hebreos 11:24-27).

8. ¿Mbaʼépa oipytyvõta umi mitãrusu ha mitãkuñáme odesidi porã hag̃ua?

8 Jehová nepytyvõ redesidi porã hag̃ua nemitã aja. Haʼe omeʼẽ konsého ideprovechoitereítava ndéve, tahaʼe haʼéva ne situasión (Sal. 32:8). Umi ansiáno ha nde tuvakuéra oservíva Jehovápe ikatu avei nepytyvõ resegi hag̃ua umi konsého (Prov. 1:8, 9). Koʼág̃a ñahesaʼỹijóta mbohapy konsého oĩva la Bíbliape nepytyvõtava redesidi hag̃ua umi mbaʼe upe rire ideprovéchotava ndéve.

MBOHAPY KONSÉHO VÍVLIKO NEPYTYVÕTAVA

9. a) ¿Mbaʼéichapa Jehová ñanembotuicha? b) ¿Mbaʼépa ohupyty umi ‘omotenonde meméva Ñandejára Rréino’?

9 Emotenonde memékena Ñandejára Rréino ha ihustísia (elee Mateo 6:19-21, 24-26, 31-34). Jehová ningo ñanembotuicha omeʼẽvo ñandéve pe liverta jadesidi hag̃ua. Haʼe ndoikói heʼi mboy órapa japredika vaʼerã. Péro Jesús omeʼẽ ñandéve peteĩ konsého porã heʼívo ñamotenonde vaʼerãha Ñandejára Rréino. Resegíramo ko konsého, reguerekóta heta oportunida rehechauka hag̃ua rehayhuha Jehovápe, reñeinteresaha nde rapicháre ha reagradeseha ikatúta haguére reiko opa ára g̃uarã. Ndete ningo redesidi vaʼerã remendátapa térãpa nahániri ha mbaʼépepa rembaʼapóta. Péro, ¿ohechaukátapa umi mbaʼe reiporavóva remotenondeha Ñandejára Rréino ha ihustísia, remotenonde rangue umi mbaʼerepy?

10. ¿Mbaʼépa ombovyʼa vaʼekue Jesúspe, ha mbaʼéichapa nde avei revyʼáta?

10 Evyʼákena reservívo nde rapichakuérape (elee Hechos 20:20, 21, 24, 35). Jesús omboʼe vaʼekue javyʼaha jaservívo ñande rapichakuérape. Haʼe ovyʼaiterei ojapo haguére Itúva rembipota, ojapo rangue umi mbaʼe chupe ogustávante. Ha ipyʼarory ohechávo mbaʼéichapa umi hénte ipyʼaporãva ohendu pe marandu porã ha ojapo umi mbaʼe oaprendéva (Luc. 10:21; Juan 4:34). Oiméne nde rehechakuaáma voi javyʼaitereiha ñaipytyvõramo ñande rapichakuérape. Resegíramo umi konsého Jesús omeʼẽ vaʼekue redesidi hag̃ua umi mbaʼe iñimportantevéva, katuete nde revyʼáta ha rembopyʼarorýta avei Jehovápe (Prov. 27:11).

11. ¿Mbaʼérepa Baruc ndovyʼavéi raʼe, ha mbaʼe konséhopa omeʼẽ chupe Jehová?

11 Añetehápe javyʼave jaservíramo Jehovápe (Prov. 16:20). Ha amalisia Baruc, Jeremías sekretário, hesarái kuri upévagui. Haʼe ndovyʼaguasuvéi Ñandejára servísiope, upévare Jehová heʼi chupe: “Nde reiko reheka ndejupe g̃uarã umi mbaʼe tuicháva. Ani reheka. Eñatende porãke, che aguerúta mbaʼe vai opa oikóvape [...] ha ndéve katu rosalváta reho rehohápe” (Jer. 45:3, 5, NM). ¿Mbaʼépa nde repensa? ¿Mbaʼépa ombovyʼavéne Barúcpe? ¿Oikóramo oheka umi mbaʼe tuicháva, térãpa iñeʼẽrendu Jehovápe ha ojesalva Jerusalén oñehundívo? (Sant. 1:12.)

12. ¿Mbaʼérepa Ramiro ovyʼaiterei?

12 Peteĩ ermáno hérava Ramiro, ovyʼa  ikatu haguére oporopytyvõ. Haʼe heʼi: “Anase peteĩ família mboriahumíme ha roiko peteĩ puevlítope kordilléra de los Ándespe. Oñepresenta chéve peteĩ oportunida tuicháva che ermáno majór heʼírõ guare opagataha che estúdio universidápe. Upérõ ajevautisa ramoite kuri ha upe javete peteĩ prekursór cheinvita ava hag̃ua pe puevloʼi haʼe oservihápe. Upémarõ ava upépe, aaprende aporopelukea hag̃ua ha aavri peteĩ pelukería ikatu hag̃uáicha añemantene. Heta hénte ohendu porã pe mensáhe ha oñepyrũ ostudia la Biblia. Upe rire ava peteĩ kongregasión pyahúpe, oñeñeʼẽhápe peteĩ idióma indíhena. Koʼág̃a ohasáma 10 áño añepyrũ hague che prekursorádo, ha avyʼaiterei ikatu haguére aipytyvõ umi héntepe ontende hag̃ua pe marandu porã iñeʼẽtépe voi. Aikuaa porã ndaiporiha ambue mbaʼe peichaite peve chembovyʼátava”.

Imitã guive Ramiro ovyʼa Jehová servísiope (Ehecha párrafo 12)

13. ¿Mbaʼérepa reservi vaʼerã Jehovápe nemitãre?

13 Evyʼákena reservívo Jehovápe nemitãre (elee Eclesiastés 12:1). Aníkena repensa ndetraváho porã raẽ vaʼerãha reñepyrũ hag̃ua reservi Jehovápe. Nde ningo nanefamíliai gueteri ha saʼi nerresponsavilida, avei neresãi ha nembarete rejapo hag̃ua umi tembiapo ipohyivéva. Upévare koʼág̃a reñepyrũ vaʼerã reservi Ñandejárape nde pyʼaite guive. ¿Mbaʼépa rejapose Jehová rehehápe nemitã reheve? Oĩ heta mbaʼe ikatúva rejapo, por ehémplo reñepyrũkuaa nde prekursorádo, reaprende ótro idióma repredika hag̃ua térã rembaʼapove pe kongregasión reimehápe voi. Tahaʼe haʼéva upe rejaposéva Jehová servísiope, tekotevẽta reñemantene. ¿Mbaʼépepa rembaʼapóta? ¿Mbaʼépa tekotevẽta restudia?

UMI KONSÉHO VÍVLIKO NEPYTYVÕTA REDESIDI PORÃ HAG̃UA

14. ¿Mbaʼérehepa umi mitãrusu ha mitãkuña opensa vaʼerã odesidíta jave mbaʼe traváhopa oiporavóta?

14 Umi mbohapy konsého vívliko ñahesaʼỹijo vaʼekue nepytyvõta rehecha hag̃ua mbaʼeichagua traváhopa ou porãvéta ndéve.  Por ehémplo, umi mboʼehára nde kolehiopegua térã peteĩ organisasión ikatu heʼi mbaʼeichagua traváhopa okonvenivéta ndéve reikohárupi térã pe lugár rehosehápe reiko. Ha ikatu ideprovécho umi informasión omeʼẽva hikuái, upéicharõ jepe, reñatende porã vaʼerã. Umi ndohayhúiva Jehovápe ikatu nemboliga rehayhu hag̃ua ko múndo (1 Juan 2:15-17). Ha reñemoĩramo repensa umi mbaʼe ko múndo oikuaveʼẽvare, ne korasõ ikatu nembotavy (elee Proverbios 14:15; Jer. 17:9).

15, 16. ¿Mávapa ikatu omeʼẽ ndéve umi konsého iporãvéva reiporavo hag̃ua nde travahorã?

15 Rehechakuaa rire mbaʼeichagua traváhopa ikatu rejapo, reikotevẽta konsého (Prov. 1:5). ¿Mávapa ikatu nepytyvõ la Biblia rupive redesidi porã hag̃ua? Ehendúkena umi ohayhúvape Jehovápe, umi nderayhu ha oikuaávape ne situasión. Haʼekuéra nepytyvõta rehechakuaa hag̃ua mbaʼeichagua traváhopepa ikatu rejededika ha mbaʼépa iñimportanteve remotenonde. Ha ikatu voi umi konsého oñemeʼẽva ndéve nepytyvõ rekambia hag̃ua umi mbaʼe rejaposéva. Ha oiméramo nde tuvakuéra oservi Jehovápe katu, ndegiakuaa heta mbaʼépe. Umi ansiáno ikatu avei nepytyvõ, haʼekuéra ningo ikatupyry ha iñakãguapy. Reñemongetakuaa avei umi prekursór ha superintendénte viahánte ndive ha eporandu chupekuéra mbaʼérepa odesidi oservi Jehovápe de tiémpo kompléto, mbaʼéichapa oiko chuguikuéra prekursór, mbaʼépa ojapo oñemantene hag̃ua ha mbaʼe vendisiónpa ohupyty hikuái (Prov. 15:22).

16 Umi ndekuaa porãva katuete omeʼẽta ndéve konsého ideprovéchova. Por ehémplo, epensamína rehejaseha nde koléhio nanekyreʼỹguasúi rupi restudia hag̃ua ha rejapotanteha nde prekursorádo. Peteĩ persóna nderayhúva ikatu ohechakuaa mbaʼérepa rehejase nde estúdio, upévare oñemoñeʼẽta ndéve ikatu hag̃uáicha rentende pe koléhio nepytyvõtaha avei reaguanta hag̃ua heta mbaʼe. Jahechaháicha, jaservi hag̃ua Jehovápe ñande pyʼaite guive tekotevẽ ñañehaʼãmbaite (Sal. 141:5; Prov. 6:6-10).

17. ¿Mbaʼeichagua desisiónpa ñamboykete vaʼerã?

17 Añetehápe enterove jaservíva Jehovápe ñambohovái vaʼerã heta pruéva ikatúva ñanemomombyry chugui (1 Cor. 15:33; Col. 2:8). Ha oĩ heta traváho ikatúva ñandeperhudika. ¿Ndépa rehechakuaa oĩha persóna oiporavo vaíva itravahorã ha upéicha rupi “ijerovia oñehundi, peteĩ várko ojejosóva itáre oñehundiháicha”? (1 Tim. 1:19.) Reñatende porã vaʼerã ani hag̃ua redesidi umi mbaʼe ndereja vaítava Ñandejára renondépe (Prov. 22:3).

EVYʼÁKENA JEHOVÁ SERVÍSIOPE

18, 19. ¿Mbaʼépa ojapo vaʼerã peteĩ mitãrusu térã mitãkuña ohechakuaáramo naikyreʼỹguasuiha oservi hag̃ua Jehovápe?

18 Oiméramo reservise Jehovápe nde pyʼaite guive, eaprovechákena umi oportunida oñepresentáva ndéve koʼág̃a nemitã reheve. Eñehaʼãkena eiporavo umi mbaʼe nepytyvõtava vyʼápe reservi hag̃ua Jehovápe koʼã tiémpo iñimportántevape (Sal. 148:12, 13).

19 Péro, ¿mbaʼépa ikatu rejapo nanekyreʼỹguasúiramo reservi hag̃ua Jehovápe? Aníkena reñentrega, síno akóinte remombarete vaʼerã nde jerovia. Apóstol Pablo omombeʼu mbaʼeichaitépa oñehaʼã ojapo Ñandejára ojeruréva chugui, ha upe rire heʼi: “Oiméramo peẽ napepensái hína péicha, Ñandejára ohechaukáta peẽme mbaʼéichapa pepensa vaʼerã. Opáichavo, oiméramo jahupytýma hína heta mbaʼe, jasegíkena jaiko upéicha ha jaha meme tenonde gotyo” (Filip. 3:15, 16). Aníkena nderesarái Jehová nderayhuetereiha he ejepyʼamongeta meme ikonsehokuérare. Haʼe nepytyvõta redesidi porã hag̃ua koʼág̃a nemitã reheve.